TLAMACHTIL 3
¿Ken kineki toTajtsin Dios ma tiyetokan?
1. ¿Ken kineki toTajtsin Dios ma tiyetokan?
IJKUAK toTajtsin Dios okichijchi Adán uan Eva, okinekiaya kuali ma yetokan. Okinekiaya ma yetokan itech xochitlali, ma kinpiakan inkoneuan, nochi tlaltikpak ma kikopakan se xochitlali uan ma kinmaluikan yolkamej. ToTajtsin Dios ok kineki ijkon ma tiyetokan (Génesis 1:28; 2:8, 9, 15; xikita nota 6).
2. 1) ¿Tleka uelis tikneltokaskej toTajtsin Dios kichiuas tlen yokijto? 2) ¿Akinmej chantiskej itech xochitlali uan keski xiuitl?
2 ¿Tikneltoka se tonal tichantiskej itech xochitlali? Jehová techiluia melauak ijkon mochiuas, kijtoa: “Yonikijto uan nikchiuas ma uiki” (Isaías 46:9-11; 55:11). Amitlaj nion amikaj kitsakuilis ma kichiua tlen yokijto. Biblia kijtoa amo san nenka okichijchi tlaltikpak (Isaías 45:18). Kineki miakej ma yetokan itech tlaltikpak. Pero ¿akinmej kineki itech ma chantikan uan keski xiuitl? Biblia kijtoa: “Yolmelauakej [noso, akinmej tetlakamatij] yetoskej tlaltikpak uan nochipa itech chantiskej” (Salmo 37:29; Apocalipsis 21:3, 4).
3. ¿Tlen uelis timotlajtlaniskej ijkuak tikitaj miakej mokokoaj uan ixpoliuij?
3 Axkan miakej mokokoaj uan ixpoliuij. San kanin moteuiaj uan momijmiktiaj. ToTajtsin Dios amo okinekiaya ijkon ma tiyetokan. ¿Tlen opanok? ¿Tleka amo mochijtok tlen Jehová kineki? San Biblia techiluia tleka.
¿AKIN OPEJKI KIXNAMIKI TOTAJTSIN DIOS?
4, 5. 1) ¿Akin okichi ma tlajto koatl tlen omotlapoui iuan Eva? 2) ¿Ken uelis ikaj yolkuali mochiuas ichteki?
4 Biblia kijtoa ikaj kikokolia toTajtsin Dios uan “itoka diablo iwa satanás”. Itech xochitlali Edén, Satanás okitekitilti se koatl ijkuak omotlapoui iuan Eva (Apocalipsis 12:9; Génesis 3:1). Noijki okichi Eva ma kineltoka koatl okitlapoui (xikita nota 7).
5 ¿Kox toTajtsin Dios okichijchi Satanás? Amo. Ijkuak toTajtsin Dios otlayektlali kanin chantiskiaj Adán uan Eva, ompa iluikak yokatkaj miakej ángeles. Satepan se ángel okipatlak iyelis, ik non, omochi Diablo (Job 38:4, 7). ¿Tleka? ¿Ken uelis ikaj yolkuali mochiuas ichteki? Se ichteki amo ijkon nesi. Pero tla kineki itlaj tlen amo iaxka, san itech mokuayejyekojtos uan okachi kinekis kipias. Satepan tlachteki porque yomokuayejyeko ijkon kichiuas. Ye ineuian omokopki ichteki, amikaj okichiualti (xiktlajtolti Santiago 1:13-15; xikita nota 8).
6. ¿Ken opejki se ángel kixnamiki toTajtsin Dios?
6 Ijkon okipanok ángel tlen omokopki Satanás. Ijkuak toTajtsin Dios okichijchi Adán uan Eva okinmilui ma kinpiakan inkoneuan uan ma momiaktilikan itech nochi tlaltikpak (Génesis 1:27, 28). Xamo non ángel omokuayejyeko: “Nochtin yejuan uelis nechueyichiuaskej uan amo Jehová”. Ye nochipa ijkon omokuayejyekoaya uan opejki kineki tlen san Jehová kinamiki: ma kiueyichiuakan. Ik non, okikajkaya Eva uan ye okineltokili (xiktlajtolti Génesis 3:1-5). Ijkon omochi Satanás uan Diablo uan opejki kixnamiki toTajtsin Dios.
7. 1) ¿Tleka Adán uan Eva omikej? 2) Xikyekijto tleka tinochtin tikokoxkatij noso tiueuejtij uan tiixpoliuij.
7 ToTajtsin Dios okinmilui Adán uan Eva amo ma kikuakan se tlakilotl porque mikiskiaj tla kikuaskiaj. Pero yejuan amo okitlakamatkej uan okikuajkej (Génesis 2:17; 3:6). Adán uan Eva otlajtlakolchijkej uan satepan omikej ijkon ken okinmilui Jehová (Génesis 3:17-19). Inkoneuan noijki yokipiayaj tlajtlakoli ijkuak oneskej, ik non, noijki oixpolikej (xiktlajtolti Romanos 5:12). ¿Tleka inkoneuan noijki yokatkaj tlajtlakolejkej? Ma tikijtokan se tlakatl kichijchiua pan ika se molde. Tla molde amo kuali kajki, nochi pan amo kuali kisas. Noijki ijkon, Adán otlajtlakolchi ijkuak amo otetlakamatki. Tinochtin tiikoneuan Adán, ik non, tinochtin tinesij titlajtlakolejkej. Satepan, tinochtin tikokoxkatij noso tiueuejtij uan tiixpoliuij (Romanos 3:23; xikita nota 9).
8, 9. 1) ¿Tlen okinekiaya Satanás ma mokuayejyekokan Adán uan Eva? 2) ¿Tleka Jehová amo san niman okinmixpolo akinmej okixnamikej?
8 Satanás opejki kixnamiki Jehová ijkuak okichi Adán uan Eva amo ma kitlakamatikan. Ye okinekiaya ma mokuayejyekokan Jehová okinkajkaya, amo kuali tlanauatia uan amo okinekiaya kuali ma yetokan. Noijki okinekiaya kijtos toTajtsin Dios amo moneki techiluis tlen tikchiuaskej. Okinekiaya Adán uan Eva ma kineltokakan uelis inneuian kipejpenaskiaj tlen kuali uan tlen amo. ¿Tlen kichiuaskia Jehová? Uelis san niman kinmixpoloskia akinmej amo okitlakamatkej. Pero ijkon amo uelis kiteititiskia Satanás san tlakajkayaua.
9 Jehová amo san niman okinmixpolo uan okitekauili ma timonauatikan. ¿Tleka? Para kiteititis Satanás tlakajkayaua uan san Jehová kimati ken uelis tiyolpakiskej. Itech tlamachtil 11 okachi timomachtiskej itech non tlamantli. ¿Ken tikita tlen Adán uan Eva okichijkej? ¿Kox kuali okichijkej ijkuak okineltokilijkej Satanás uan amo okitlakamatkej toTajtsin Dios? Jehová okinmakak nochi tlen okipiayaj: xochitlali kanin ochantiayaj, tekitl tlen okinpaktiaya uan amo okatkaj tlajtlakolejkej. Pero Satanás amitlaj okinmakak. ¿Tlen tikchiuaskia tla ompa tiyetoskia?
10. ¿Tlen moneki tikpejpenaskej?
10 Ijkon ken Adán uan Eva, noijki moneki tikpejpenaskej tlen tikchiuaskej tla tiknekij tiyoltoskej nochipa. Moneki timokuayejyekoskej kox tiknekij ma technauati Jehová noso Satanás. Tla tiktlakamatiskej Jehová, tikpaleuiskej ma kiteititi Satanás san tlakajkayaua (Salmo 73:28; xiktlajtolti Proverbios 27:11). Axkan miakej amo kitlakamatij Jehová. Ye amo kinauatijtok tlaltikpak uan tla ye amo, ¿akin kinauatijtok?
¿AKIN KINAUATIJTOK TLALTIKPAK?
¿Kox uelis Satanás kiluiskia Jesús kimakaskia tekiuajkayomej tla amo iaxkauan yetoskiaj?
11, 12. 1) ¿Tlen techititia tlen okichi Satanás? 2) ¿Tlen textos techpaleuiaj ma tikmatikan Satanás kinauatijtok tlaltikpak?
11 Jesús okimatiaya akin kinauatijtok tlaltikpak. Se tonal Satanás okititi Jesús “nochteh n tlalmeh kan tlanawatiah n tlaltikpaktlakah ika nochi inweyilis”. Ijkuakon, Satanás okilui Jesús: “Nochi ni nimitsmakas, tla techweyijkachiwas iwa timotlankuaketsas nonawak” (Mateo 4:8, 9; Lucas 4:5, 6). Ximokuayejyeko: Satanás amo kiluiskia Jesús kimakaskia nonmej tekiuajkayomej tla amo iaxkauan yetoskiaj. Non kiteititia Satanás kinnauatijtok nochtin tekiuajkayomej.
12 Xamo uelis tikijtos: “¿Tleka Satanás kinauatijtok tlaltikpak? ¿Amo san Jehová akin sapanoa chikauak uan okichijchi semanauak?” (Apocalipsis 4:11). Kema ye okichijchi nochi. Pero Jesús okijto Satanás “tlanawatijtok itech nin tlaltíkpaktli” (Juan 12:31; 14:30; 16:11). Tlatitlanil Pablo okijto Diablo ye “dios non kinawatijtok nin tlaltíkpaktli” (2 Corintios 4:3, 4). Noijki tlatitlanil Juan okijkuilo “tlaltikpaktlakah non amo kineltokah Dios kinnawatijtok n satanás” (1 Juan 5:19).
SATANÁS AYAKMO KINAUATIS TLALTIKPAK
13. ¿Tleka moneki toTajtsin Dios ma kiyektlali tlaltikpak?
13 Axkan okachi momiaktilijtok tlen amo kuali. Onka guerras, miakej tlachtekij, tlakajkayauaj uan san kanin momijmiktiaj. Amikaj uelis kiyektlalis nochi tlen amo kuali maski mochijchikauas. Ik non, toTajtsin Dios kinmixpolos akinmej amo yolkualmej itech guerra tlen itoka Armagedón uan kiyektlalis nochi tlaltikpak. Ijkuakon, ayakmo yetos tlen amo kuali (Apocalipsis 16:14-16; xikita nota 10).
14. 1) ¿Akin okipejpenki toTajtsin Dios ma tlanauati itech iTekiuajkayo? 2) ¿Tlen okijto Biblia itech Jesús?
14 Jehová yokitlali se Tekiuajkayotl ompa iluikak tlen kinauatis tlaltikpak. Ijkuakon yetos yolseuilistli. Ye okipejpenki Jesús para tlanauatis itech non Tekiuajkayotl. Yiuejkika Biblia okijto Jesús yetoskia ken “Tekiua tlen kitemaka Yolseuilistli” uan itekiuajkayo amo keman tlamis (Isaías 9:6, 7). Jesús okinmilui imachtijkauan ma kitlajtlanikan non tekiuajkayotl. Okijto: “Ma uiki moTekiuajkayo. Ma mochiua motlanekilis ompa iluikak uan noijki nikan tlaltikpak” (Mateo 6:10, TNM). Itech tlamachtil 8 tikitaskej non Tekiuajkayotl kinpatkayotis nochtin tekiuajkej (xiktlajtolti Daniel 2:44). Uan satepan kikopas tlaltikpak se xochitlali (xikita nota 11).
AYAKMO MIAK POLIUI TLALTIKPAK MOKOPAS XOCHITLALI
15. ¿Akinmej yetoskej itech “yankuik tlali”?
15 Biblia kijtoa: “Pero tejwah tikchiah tlan Dios yokijto techmakas, se yankuik ilwikak iwa se yankuik tlali” uan “ompa yetos milajkachiwálistli” (2 Pedro 3:13; Isaías 65:17). Ualeua ijkuak Biblia kijtoa “tlali” noso tlaltikpak kijtosneki tlaltikpaktlakamej (Génesis 11:1). Ik non, itech “yankuik tlali” yetoskej san akinmej kitlakamatij toTajtsin Dios uan tlen ye kinselia. Nochtin yejuan chantiskej itech xochitlali.
16. 1) ¿Ken kinteochiuas toTajtsin Dios akinmej chantiskej itech xochitlali? 2) ¿Tlen moneki tikchiuaskej tla tiknekij nochipa tiyoltoskej?
16 Jesús okijto toTajtsin Dios kichiuas ‘nochipa mayolitokah’ akinmej chantiskej itech xochitlali (Marcos 10:30). ¿Tlen moneki tikchiuaskej tla tiknekij nochipa tiyoltoskej? Biblia techiluia tlen moneki tikchiuaskej itech Juan 3:16 uan 17:3 (xiktlajtolti). Ma tikitakan ken tiyetoskej itech xochitlali ijkon ken kijtoa Biblia.
17, 18. ¿Ken tikmatij itech xochitlali tikpiaskej yolseuilistli uan ayakmo timomojtiskej?
17 Ayakmo yetos guerras, amikaj tlateuis nion kichiuas tlen amo kuali. Akinmej amo yolkualmej ayakmo yetoskej (Salmo 37:10, 11). San yetoskej akinmej kitlasojtlaskej uan kitlakamatiskej toTajtsin Dios. Nochipa yetos yolseuilistli (Salmo 72:7). ToTajtsin Dios kitlajtlamis nochi guerras (Salmo 46:9; Isaías 2:4).
18 Itekipanojkauan Jehová amitlaj kinmomojtis. Yiuejkika ijkuak israelitas okitlakamatiayaj toTajtsin Dios, ye okinmaluiaya, ik non, amitlaj okinmomojtiaya (Levítico 25:18, 19). Noijki ijkuak tiyetoskej itech xochitlali amitlaj techmomojtis. Nochipa tikpiaskej yolseuilistli (xiktlajtolti Isaías 32:18 uan Miqueas 4:4).
19. ¿Ken tikmatij itech xochitlali tinochtin tikpiaskej tlen tikkuaskej?
19 Tinochtin tikpiaskej tlen tikkuaskej. Biblia kijtoa: “Yetos miak xinachtli ipan tlaltikpak; ipan tepemej sapanoa tlamochiuas” (Salmo 72:16). Jehová “techteochiuas” uan “tlali kitemakas itlakilo” (Salmo 67:6).
20. ¿Ken tikmatij tlaltikpak mokopas se xochitlali?
20 Nochi tlaltikpak mokopas se xochitlali. Kuali tikpiaskej tochan uan nochi kuajkualtsin yetos (xiktlajtolti Isaías 65:21-24 uan Apocalipsis 11:18). Nochi tlaltikpak yetos ijkon ken xochitlali Edén. Jehová techmakas nochi tlen monekis. Biblia kijtoa tlen kichiuas: “Te tiktlapoa moma uan tikinmaka tlen kinekij nochtin tlen yoltokej” (Salmo 145:16).
21. ¿Ken tikmatij nochtin yetoskej ika yolseuilistli iuan yolkamej?
21 Nochtin yetoskej ika yolseuilistli iuan yolkamej. Yolkamej ayakmo itlaj techchiuiliskej. Konemej amitlaj kinpanos maski yetoskej iuan yolkamej (xiktlajtolti Isaías 11:6-9 uan 65:25).
22. ¿Ken kinpaleuis Jesús akinmej mokokoaj?
22 Amikaj mokokos. Jesús okinpajti miakej ijkuak okatka nikan tlaltikpak (Mateo 9:35; Marcos 1:40-42; Juan 5:5-9). Pero ijkuak ualtlanauatis nochtin kinpajtis uan ayakmo ikaj kijtos: “Nimokokoa” (Isaías 33:24; 35:5, 6).
23. ¿Tlen kinpanos akinmej yoixpolikej?
23 Kinyolitiskej akinmej yoixpolikej. ToTajtsin Dios yokijto sapanoa miakej kinyolitis. Biblia kijtoa: “Nochteh non yomikkeh moyolitiskeh, akimeh otlájtlakolchijkeh iwa akimeh amó” (xiktlajtolti Juan 5:28, 29; Hechos 24:15).
24. ¿Mitspaktiskia tiyetos itech xochitlali?
24 Tinochtin moneki itlaj tikpejpenaskej: ¿tikchiuaskej tlen Jehová techmachtia noso tlen tejuan tiknekij? Melauak tiyolpakiskej tla tiktlakamatij Jehová. Jesús ijkin okilui se tlakatl tlen noijki yimikiskia: “Tiyetos nouan itech xochitlali” (Lucas 23:43, TNM). Ma timomachtikan ken iyelis Jesús uan ken tlapaleuis ma mochiua tlen yokijto toTajtsin Dios.
