TLAPOUALISTLI 39

Itlako Aarón oxochitoponki

XIKITA xochimej uan almendras tlen kisaj itech nin tlakotl. Nin itlako Aarón. ¡Ninmej xochimej uan tlakilotl okiskej itech itlako Aarón san itech se yoak! Ma tikitakan tleka.

Israelitas yokipiayaj miak kauitl san oyajtinemiayaj kanin tlauaki. Sekimej ayakmo okinekiayaj Moisés ma tlayekana, nion Aarón ma yeto ueyi teopixki. Coré ijkon omokuayejyekoaya, noijki ijkon okichijkej Datán, Abiram uan 250 akinmej noijki otlayekanayaj itech altepetl. Nochtin yejuan okiluijkej Moisés: ‘¿Tleka timomachilia tiueyititok uan tikneki titechyekanas?’.

Moisés okilui Coré uan akinmej okipaleuiayaj: ‘Mostla kualkan xiktlalilikan kopali tlen ika nantlapopochuiaj. Uan xiualakan ixpan itabernáculo Jehová. Tikitaskej akin kipejpenas Jehová’.

Mostlatika, Coré uan 250 akinmej okipaleuiayaj oyajkej ixpan tabernáculo. Miakej noijki oyajkej pampa kinpaleuiskiaj. Jehová okualanki miak. Moisés okijto: ‘Ximoachiuakan itech inmantajkali ninmej tlakamej tlen amo yolkualmej. Amo itlaj xikitskikan tlen inmiaxka’. Tlaltikpaktlakamej okikakej uan omoachijkej itech inmantajkaluan Coré, Datán uan Abiram.

Ijkuakon Moisés okijto: ‘Ika nin nankimatiskej akin kipejpenas Jehová. Tlali motlapos uan kintolos ninmej tlakamej tlen amo yolkualmej’.

Ijkuak Moisés otlanki otlajto, tlali san niman omotlapo. Inmantajkali uan nochi tlamantli tlen okipiayaj Coré, Datán, Abiram uan nochtin akinmej okinpaleuiayaj, okintolo tlali. Ijkuak tlakamej okikakej ken otsajtsiayaj akinmej oyajtokaj ijtik tlali, okijtojkej: ‘¡Ximotlalokan! ¡Tlali noijki uelis techtolos!’.

Coré uan 250 akinmej okipaleuiayaj ok okatkaj ixpan tabernáculo. Ik non, Jehová okiualtitlanki tlitl, uan nochtin otlatlakej. Ijkuakon, Jehová okilui Eleazar ikone Aarón ma kinmololo tlen ika otlapopochuiayaj akinmej yomikej uan ma kikanauakan cobre uan ika ma kipepechokan altar. Uan nin okinmilnamiktiaya israelitas san Aarón uan ikoneuan omonekiaya tekitiskej ken teopixkamej pampa Jehová.

Maski ijkon, Jehová okinekiaya kuali ma kimatikan ye yokinpejpenki Aarón uan ikoneuan ken teopixkamej. Ik non, okilui Moisés: ‘Akin tlayekana itech sejse nechikol itech Israel ma kiualika itlako. Uan itech nechikol Leví, Aarón ma kiualika itlako. Ijkuakon, xiktlali sejse intlako ijtik tabernáculo ixpan arca itech tlajtolsenkaualistli. Itlako tlakatl tlen ne nikpejpenas xochitoponis’.

Mostlatika, Moisés okitak, ¡itlako Aarón oxochitoponki uan noijki okipiaya almendras! ¿Axkan tikita tleka Jehová okichi ma xochitoponi itlako Aarón?

Números 16:1-49; 17:1-11; 26:10.