Winston, xitechtapoui keniuj peuak tiktemoua Dios.

Nimoskaltij ompa Queensland (Australia) uan nochankauan amo kipiayaj se taneltokalis. Kemej tinemiaj uejka itech se tal kampa uelia titatokayaj uan tikiniskaltiayaj tapialmej, amo semi nitajtouaya iniuan oksekin, sayoj iniuan nochankauan. Keman nikpiaya 12 xiujmej, peuak niktemoua Dios. Niktataujtij maj nechpaleui maj nikixmati. Satepan, ninemito okseko uan peuak nitekiti ompa Adelaida (Australia Meridional). Keman nikpiaya 21 xiujmej nipaxaloto Sydney uan ompa nikixmatik Pam. Ika nechnojnotsak israelismo británico, se taneltokalis tein kijtoua ke xolalmej británicos ualeuaj itech uejkauj kalyetouanij Israel tein poliujkej. Tamachtiaj ke nejon kalyetouanij yejuan majtakti kalyetouanij tein moajsiaj kampa ika norte, akin kinuikakej okseko itech xiuit 740 achto itech totonaluan. Keman nimokepak Adelaida, nitajtoj ika nejon iuan se notekitikaikniuj, akin momachtijtoya iniuan itaixpantijkauan Jiova. Satepan ke iuan nitajtoj seki horas ika tein kineltokaj itaixpantijkauan Jiova, nikitak ke Dios kinankilijtoya netataujtil tein nikchiujka keman katka ninojnel. Nimomachtijtoya keniuj yekmelauj tamati toTachijchiujkauj uan toni iTekiuajyo. ¡Nikajsikaya “perla den kachi patio”! (Mat. 13:45, 46).

Pam, tejua no peuak tiktemoua nejin perla keman katka tiichpoch. ¿Keniuj tikajsik?

Nimoskaltij ompa Coffs Harbour (Nueva Gales del Sur) uan nokalyetouanij kipiayaj inintaneltokalis. Notatuan uan noueyitatuan kiselijkej tein motamachtiaya itech israelismo británico. Nokniuj akin nojnel, nokniuj siuat akin tayekana, seki noprimos uan nejua techmachtijkej ke Dios okachi kinpaleuia británicos.  Sayoj ke, amo semi nikneltokaya nejon uan amo nikmachiliaya maj nimotoki iuan Dios. Keman nikpiaya 14 xiujmej nitakakito itech tataman taneltokalismej tein moajsij ompakauin kemej anglicanos, bautistas uan adventistas del séptimo día. Sayoj ke amo nechpaleuijkej maj nikixmati Dios.

Satepan, nochankauan uan nejua tinemitoj Sydney, kampa nikixmatka Winston keman ompa paxaloto. Kemej yejua kijtoj achto, titajtoskej ika taneltokalismej, kichiuak maj peua momachti Biblia iniuan itaixpantijkauan Jiova. Satepan, itech cartas tein nechtitaniliaya, kijkuilouaya miak textos. Nejon nechtekipachoj uan hasta nikualanik. Sayoj ke yolik peuak nikita ke tein momachtijtoya katka melauak.

Itech xiuit 1962 nimokaltalito ompa Adelaida uan ijkon ninemiskia kampa Winston. Yejua kiniluij Thomas uan Janice Sloman akin namikuanij uan itaixpantijkauan Jiova maj ninemini iniuan. Yejuan tapaleuijkaj kemej misioneros ompa Papúa Nueva Guinea. Sayoj nikpiaya 18 xiujmej, yejuan nechnextilijkej kualtakayot uan nechpaleuijkej maj okachi nikixmati Jiova. Yejua ika no peuak nimomachtia Biblia uan niman nikitak ke katka tamachtilis tein melauak. Satepan ke timonamiktijkej, Winston uan nejua peuak ika miak yolpakilis tiktekitiliaj Dios uan nejon kichiuani maj okachi tikpatiuitakan perla tein tikajsikej, maski tikpanouanij ouijkayomej.

Winston, xitechilui toni tikpanok keman peuak tikchiua itekiyo Dios.

Tepitsin satepan ke timonamiktijkej, peuak tikseliaj tekimej itech nechikol (1 Cor. 16:9). Tokniuj Jack Porter, akin takalpanouaya itech tonechikol uan inamik Roslyn techyolchikaujkej maj tikpeualtianij tekit kemej precursores regulares, se tekit tein tikchiujkej makuil xiuit. (Tokniuj Jack axkan poui iniuan akin kiixyekanaj sucursal ompa Australasia). Nikpiaya 29 xiujmej keman techyoleujkej maj tikinkalpanokan nechikolmej itech xolalmej tein moajsij tatajko ueyiat ompa Pacífico sur, tein kinixyekanaya sucursal tein moajsi Fiyi. Tikalpanojkej Kiribati, Nauru, Niue, Samoa, Samoa Norteamericana, Tokelau, Tonga, Tuvalu uan Vanuatu.

Itech nejon xiujmej, akin nemiaj itech seki nejon xolalmej amo kuali kinitayaj itaixpantijkauan Jiova, yejua ika monekia kuali tikixejekoskej tein tikchiuaskiaj (Mat. 10:16). Amo miakej pouiaj itech nechikolmej uan itech seki amo onkaya kani timokauaskej. Yejua ika tikintajtaniayaj akin ompa nemiaj ox ueliskia timokauaskej ininchan. Nochipa katkaj kualtakamej.

Winston, semi tikuelita tekit tein mochiua itech tajtolkepalis. ¿Keniuj peuak tikuelita?

Itech nejon tonalmej, tokniuan akin nemiaj Tonga sayoj kipiayaj seki tratados uan folletos itech tajtol tongano, se tajtol tein mokui ompa Polinesia. Keman tamachtiayaj ika Biblia, kikuiaj amatajkuilol La verdad que lleva a vida eterna itech tajtol inglés. Yejua ika, itech se nemachtil tein kiselijkej tayekananij tein uejkauak naui semanas, eyi tayekananij akin tepitsin kimatiaj tajtol inglés kitajtolkepkej nejon amatajkuilol itech tajtol tongano. Pam kijkuiloj ika se máquina tein motajtolkepka, uan satepan tiktitankej sucursal ompa Estados Unidos kampa moamakixtij. Nejin tekit motamichiuak kemej itech chikueyi semanas. Maski amo semi kuali motajtolkepka, kinpaleuij miakej akin tajtouayaj tongano maj kiixmatikan tamachtilis tein melauak. Maski Pam uan nejua amo titajtolkepanij, nejon techpaleuij maj peua tikuelitakan tajtolkepalis.

Pam, kemej tinemia Australia, ¿keniuj taman kemej tinemik ompa itech xolalmej tein moajsij tatajko ueyiat?

Semi taman katka. Onkayaj moyomej, tel tonaya, takuechauaya uan no onkayaj kimichimej, tataman kokolismej uan kemansa amo semi tikpiayaj tein tikuaskej. Sayoj ke,  keman tapoyauia, tiknalitayaj ueyiat keman timoseuiayaj itech fale tein tikpiayaj, ijkon kinotsayaj itech tajtol samoano kali tein kichijchiuayaj polinesios tein kipantsakuayaj ika imaxiujyo palmera uan amo kipiaya tepamit. Keman metstonaya, tikitayaj ininyekauil palmeras uan imeyouj metsti itech ueyiat. Keman tikitayaj nejon, titanemiliayaj uan timotataujtiayaj uan techpaleuiaya maj tikpiakan kuali tanemililmej.

Techyolpaktiayaj konemej. Techuetskitiayaj uan kinyolnotsaya kinitaskej analtekojkayomej akin katkaj chijchipaujkej. Keman titakalpanotoj ompa Niue, se okichpil peuak kikitskia imauan Winston uan kijtoj: “Nikuelita moijuiyo”. Okichpil amo keman kiitstoya maj imauan aksa kitelpianij tsonti uan amo kimatia keniuj kiluis.

Techyolkokouaya tikitaskej keniuj tel miakej kipanouayaj tatasojtilis. Katka takualtsinkan sayoj ke amo semi onkaya kani mopajtiskej uan tasojtia at tein chipauak. Maski ijkon tokniuan amo kintekipachouaya nejon. Yolpakiaj porin iniuan yetoyaj ininkalyetouanij uan porin kipiayaj kani kiueyichiuaskej Jiova. Ininneskayo techpaleuij maj tiktayekanaltikan tein okachi moneki uan maj tinemikan ika amo miak taman.

Pam, kemansa monekia tiktemos at uan titakualchiuas kemej amo timomattoya. ¿Keniuj tikchiuak?

Niktasojkamatilia nopopaj porin nechmachtij miak taman tein nechpaleuij. Nechmachtij keniuj nitaxotaltis kampa nitakualchiuaskia uan maj ninemi ika tepitsin. Se tonal keman tiyajkej Kiribati, timokaujkej itech se sakakaltsin tein tsintsaktoya ika ojtat uan talpan kipiaya coral takuechol. Nitakualchijchiuaya itech se tekoch tein nikchiuak talpan uan nitaxotaltiaya ika ieuayo coco. Uan keman niyaya niatakuiti monekia nimochias iniuan okseki siuamej. Tikuiaj se kouit ueyak kemej ome metros tein sekopa kiilpiliayaj se mekat kemej tein ika amichkitskiaj uan mekat kiilpiliayaj se lata. Keman kipankajkauayaj, ijsiujka kioliniayaj kemej ueliskia pexonis ika at. Moitaya ke amo ouij hasta ke nejua nikpantamotak. Miakpa nikchiuak sayoj ke amo pexonia, ta sayoj mokauaya aixko. Nochin siuamej peuak ueuetskaj uan satepan, semej nechmachtij keniuj nikchiuas. Akin nemiaj itech nejon xolalmej nochipa techpaleuiayaj uan katkaj kualtakamej.

Nanomen semi namechyolpaktij ompa nantapaleuiskej. Xitechiluikan tein okachi nankielnamikij.

Winston: Amo niman tikajsikamatkej seki taman tein ompa kichiuayaj. Kemej neskayot, keman tokniuan techyoleuayaj ininchan, techmakayaj nochi takual tein kipiayaj. Yekinika amo tikmatiaj ke monekia tikinkauiliskej tein yejuan kikuaskiaj uan nochi tikuayaj. Keman tikmatkej, peuak tikinkauiliaj tapalol. Maski timopolouayaj tokniuan semi techajsikamatiaj. Kinyolpaktiaya techitaskej chijchikuasen metsti keman tikinkalpanouayaj. Itech nejon xiujmej amo kinixmatiaj oksekin itaixpantijkauan Jiova, sayoj akin ompa nemiaj uan tejuan.

Titakalpanoskej itech nejon xolalmej tapaleuij maj kinixmatikan itaixpantijkauan Jiova. Miakej akin ompa nemiaj kinemiliayaj ke tokniuan kichiujkaj inintaneltokalis. Yejua ika keman kiitayaj ke omen analtekojkayomej akin no katkaj itaixpantijkauan Jiova yayaj ompa kinkalpanotij tokniuan, kiajsikamatkej ke itaixpantijkauan Jiova moajsij noyampa taltikpak uan semi kimoujkaitayaj nejon.

Pam: Se taman tein okachi nechyolpaktia nikelnamikis yejua tein panok ompa Kiribati, kampa moajsia se nechikol tein amo ueyi. Tokniuj Itinikai Matera, akin katka tayekankej nochipa kitemouaya maj kuali timoajsikan. Se tonal techmakak se chikiuit tsikitsin tein kipiaya se piotet uan kijtoj: “Nejin nanmoaxka”. Itech nejon tonalmej semi tasojtiaj piotemej. Ika tein kichiuak maski amo ueyi, semi techyololinij.

 Pam, seki xiujmej satepan momikilij mokonetsin achto ke yoliskia. ¿Toni mitspaleui amo ximosenkauani?

Itech xiuit 1973 nimokokoxkatalij keman tiyetoyaj Pacífico sur. Yejua ika timokepkej Australia uan naui metsti satepan momikilij nokonetsin. Winston no semi moyolkokoj. Ijkon kemej panokej tonalmej amo semi nitayokoyayaok, sayoj kemansa, hasta ke tikixtajtoltijkej La Atalaya 15 de abril de 2009. Itech taxelol “Preguntas de los lectores” kijtouaya: “Si una criatura muere en el vientre materno, ¿volverá a la vida en la resurrección?”. Tamachtilis kijtouaya ke nejon Jiova kiixejekoskia uan yejuatsin nochipa kichiua tein melauak. Uan kichiuas maj tikelkauakan nochi tayokol tein tikpanouaj axkan porin kiixtalijya iKonetsin maj “kinuejuelos in chikaualisme den amokuali Satanás” (1 Juan 3:8). Tamachtilis no techpaleuij maj okachi tikpatiuitakan perla tein tikpiaj akin tiktekitiliaj Jiova. Semi techyolseuia tikmatiskej tein Jiova kichiuas satepan.

Satepan oksepa peuak tiktekitiliaj Dios miak tonalmej. Seki metsti titapaleuijkej Betel ompa Australia uan satepan oksepa peuak tikinkalpanouaj nechikolmej. Itech xiuit 1981, keman tikuikayajya naui xiuit ke tikinkalpanouayaj xolalkonemej ompa Nueva Gales del Sur uan Sydney, techyoleujkej maj titapaleuitij sucursal tein moajsi Australia, kemej ijkuak motokaytiaya uan hasta axkan ompa tiksentokaj.

Winston, ¿tiknemilia ke tein tikpanok ompa Pacífico sur mitspaleuia itech tekit tein tikchiua iniuan akin kiixyekanaj sucursal ompa Australasia?

Kemaj, semi nechpaleuia. Achto, Australia kiitaya tekit tein mochiuaya ompa Samoa uan Samoa Norteamericana. Satepan, sucursal tein moajsia Nueva Zelanda mochiujkej sayoj se iuan tein moajsi Australia. Uan axkan sucursal Australasia kiita tekit tein mochiua ompa Australia uan itech xolalmej Cook, Niue, Nueva Zelanda, Samoa, Samoa Norteamericana, Timor Oriental, Tokelau uan Tonga. Nikpiani tatiochiualis nikinkalpanos miakej nejon xolalmej keman sucursal nechtitanini. Kemej nitekitik iniuan tokniuan akin nemij itech nejon xolalmej nechpaleuiani axkan ke nimoajsi Betel maj niksentoka nitekiti iniuan.

Achto ke namechtamitapouis tein tikpanokej, nikneki nikijtos ke ika tein tikpanouanij Pam uan nejua, tikitanij ke amo sayoj akin uejueykej kitemouaj Dios. Ta akin telpochmej uan ichpochmej no kinekij kiajsiskej “perla den kachi patio”, maski ininchankauan amo kinekiskej (2 Rey. 5:2, 3; 2 Crón. 34:1-3). Senkis moita ke Jiova semi tetasojta uan kineki maj konemej, telpochmej, ichpochmej uan akin uejueykej momakixtikan.

Keman Pam uan nejua peuak tiktemouaj Dios panouaya cincuenta xiujmej, amo tikmatiaj hasta kani tiajsiskiaj. Senkis moita ke tamachtilis tein melauak se perla tein semi kipia ipatiuj. Uan tikixtalijtokej nochipa tikyekpiaskej.