Nitlakatki ipan se granja tlen notatauaj kipixtoyaj ipan se pilaltepetsi tlen Galicia, ika norte tlen España. Tieliyayaj chikueyij tiiknimej, eyij noteipaikniuaj uan nauij noachtouikniuaj. Tlauel tiyolpakiyayaj. Ipan nopa tonali, maseualmej momajtoyaj kintitlanij ininkoneuaj ipan seminario o kampa itstokej monjas. Uan omej nosiuaikniuaj uan na nopaya techtitlankej.

Kema nijpiayaya 13 xiuitl niajki Madrid kampa itstokej monjas, nopaya ya itstoya se nosiuaikni. Nopaya amo moikneliyayaj uan amo yolpakiyayaj. Nojkia amo mouikayayaj; san onkayaya miak tlanauatili, momaijtouayayaj uan monekiyaya amo tleno tijpiasej. Ika ijnalok timonechikouayayaj ipan capilla pampa timoyoliljuiyayaj, uan na nimantsi nimoiljuiyaya ipan sekinok tlamantli. Teipa, tiuikayayaj uan tiauiyayaj misa. Nochi tlen nopaya moijtouayaya eliyaya ika tlajtoli Latín, yeka amo tleno nijkuamachiliyaya uan nijmatiyaya toTeotsij itstok tlauel uejka. Amo nikamanaltiyaya ininuaya sekinok. Maske nosiuaikni uan na timopantiyayaj, san tikijtouayayaj: “Ave María purisíma”. Uan kema titlamiyayaj titlakuaj, san techkauayayaj ma tikamanaltikaj tlajko hora. ¡Ipan tochaj amo kiampa tiitstoyaj pampa tlauel tiyolpakiyayaj! Nijyolmatiyaya niitstoya noselti, yeka nochipa nimochokiliyaya.

Maske amo kema nijyolmatki niitstoya inechka toTeotsij, nimosentlalik ipan tlen nimoiljuijtoya uan nimochijki monja kema nijpixtoya 17 xiuitl. Kiampa nijchijki pampa ya nopa kinekiyayaj ma nijchiua. Teipa pejki nimotlajtlania tlaj kinamikiyaya nielis monja. Nopa monjas katli nopaya itstoyaj techiljuiyayaj tlaj se akajya ayokmo kinekiyaya elis monja yaskia infierno. Maske kiampa techiljuiyayaj, na amo nijkuamachiliyaya se keski tlamantli. Na nijmatiyaya Jesucristo amo mouejkatlaliyaya tlen maseualmej, ya kinmachtiyaya uan kinpaleuiyaya (Mateo 4:23-25). Kema nijpixtoya 20 xiuitl ayokmo nijnejki nielis monja. Nimosentlachilik, pampa nopa monja katli tlayakanayaya nechiljuik tlaj ayokmo nijnekiyaya nielis monja, nima ma nikisa, yeka kiampa nijchijki. Nimoiljuia uelis kiampa nechiljuik pampa amo kinekiyaya sekinok nojkia ma kichiuakaj kej na.

Kema nitlakuepilik nochaj notatauaj amo kualankej, uan pampa ipan nopa pilaltepetsi amo onkayaya tekitl monejki nias Alemania occidental kampa itstoya se noikni. Ya kinpaleuiyaya se keskij maseualmej katli kinkixtijtoyaj tlen España uan eliyayaj comunistas. Tlauel kuali nijyolmatiyaya niitstos ininuaya nopa maseualmej pampa kinpaleuiyayaj katli tekitij uan nojkia pampa amo kinekiyayaj ma kinchikoitakaj siuamej. Nojkia nimochijki comunista uan nimonamiktik iuaya se katli nojkia tlapaleuiyaya nopaya. Nitemajmakayaya amatlajkuiloli uan tiojtsakuayayaj pampa tijnekiyayaj ma mochiua tlen xitlauak. Kuali nijyolmatiyaya ika tlen nijchiuayaya.

Teipa ayokmo kuali nikitak tlen tijchiuayayaj pampa nikitak nopa comunistas amo kichiuayayaj tlen kiijtouayayaj. Uan nojua tlauel amo kuali nikitak tlen kichijkej ipan 1971, kema se keskij telpokamej comunistas kitlatijkej nopa tekikali español de Fráncfort pampa kiijtouayayaj amo kichiuayaya tlen xitlauak katli tlanauatiyaya España. Nimoiljuik amo kinamikiyaya kiampa kichiuasej.

Kema tlakatki toachtouikone, nikiljuik noueue ayokmo niaskia kampa monechikouayayaj comunistas. Nijyolmatki niitstoya noselti pampa kema tlakatki topilkone amo techpaxalo yon se touampo. Pejki nimotlajtlania kenke tiitstokej. Uan, ¿tlaj nelnelia moneki tijchiuasej kampeka tijpatlasej tlen kichiuaj maseualmej?

Ipan 1976, se toikni iuaya isiua asikoj tochaj uan nechkauilijkej se keski amatlajkuiloli. Kema sampa techpaxalokoj, nikintlajtlanik miak tlamantli pampa nijnekiyaya nijmatis kenke titlaijiyouiaj uan kenke mochiua tlen amo xitlauak. Nimosentlachilik kema nechnankilijkej ika Biblia tlen nijnekiyaya nijmatis. Yeka, nimantsi nijnejki ma nechmachtikaj ika Biblia.

Achtouia, san nijnekiyaya nijmatis miak tlamantli. Teipa, ayokmo kiampa nijchijki pampa noueue uan na pejki timonechikouaj ininuaya Jehová itlajtoltemakauaj. Ipan nopa tonali, ya tikinpixtoyaj omej tokoneuaj. Uan toikniuaj techuikayayaj tlanechikoli uan techpaleuiyayaj tikinmokuitlauisej tokoneuaj kema tiitstoyaj nopaya. Tlauel nimomatki niitstos ininuaya toikniuaj.

Maske kiampa, nojua ayamo kuali nijkuamachiliyaya se keski tlamantli. Kema niajki España nikinpaxaloto nochampoyouaj, notío katli eliyaya sacerdote, nechiljuik ayokmo ma nimomachti Biblia, uan toikniuaj tlen nopa altepetl tlauel nechpaleuijkej. Inijuantij kichijkej kej toikniuaj tlen Alemania, nechnankilijkej ika Biblia nochi tlen nijnekiyaya nijmatis. Yeka nijnejki sampa ma nechmachtikaj ika Biblia kema nitlakuepiliskia Alemania. Uan kiampa nijchijki, maske noueue ayokmo kinejki momachtis. Ipan 1978 nimoatsonpoliuiltik uan nimochijki se tlen Jehová itlajtoltemakauaj.

Kema nijkuamachilik tlen Biblia tlamachtia, nechpaleuik ma niyolpaki uan ma nijkuamachili amo san tlapik tiitstokej. Se neskayotl, 1 Pedro 3:1-4 kiijtoua se siuatl moneki kikauas iueue ma kiyakana, moneki kitlepanitas uan kipias iyolo “pampa ya nopa tlen ipati iixtla toTeko”. Ni uan sekinok textos tlen Biblia, nechpaleuijtok kuali ma nimouika iuaya noueue uan ininuaya nokoneuaj.

Ya panotok treinta y cinco xiuitl ika nimochijki se tlen Jehová itlajtoltemakauaj. Tlauel niyolpaki pampa nijtekipanoua toTeotsij, pampa nikinpantik katli elij kej nochampoyouaj ipan toTeotsij itlanechikol uan pampa nauij tlen makuiltij nokoneuaj nojkia kitekipanouaj Jehová.