TLAMACHTILI 6
¿Sampa itstosej katli miktokej?
1. ¿Nojua uelis tikinitasej katli miktokej?
Se tonali, kema Jesús itstoya ipan Tlaltipaktli, mijki iuampo katli motokaxtiyaya Lázaro. Ya itstoya ne Betania nechka Jerusalén. Kema Jesús asito nopaya, ya panotoya naui tonali miktoya Lázaro. Jesús ininuaya Marta uan María katli eliyayaj Lázaro iikniuaj, yajkej kampa kitoktoyaj Lázaro, uan nimantsi miakej mosentilijkej nopaya. ¿Timoiljuia kenijkatsa tlauel yolpajkej Marta uan María kema Jesús kiyolkuik Lázaro? (Xijpoua Juan 11:21-24 uan 38-44).
Biblia techmachtia moyolkuisej mijkatsitsij. Marta kimatiyaya kenijkatsa Jehová kiijtoua kinyolkuis mijkatsitsij uan kej nopa sampa ma itstokaj ipan Tlaltipaktli. (Xijpoua Job 14:14 uan 15).
2. ¿Tlake kinpano katli mikij?
ToTeotsij kiiljuik Adán: “Nijchijki motlakayo ika tlali, uan kema timikis sampa timokuepas tlali” (GÉNESIS 3:19).
Nochi maseualmej techchijtokej ika tlaltejpoktli (Génesis 2:7; 3:19). Totlakayo amo kipia se tonaltsi. Yeka kema timikij tlami tonemilis uan ayokmo titlalnamikij. Uajka mijkatsitsij amo tleno kiyolmatij yon amo tlaijiyouiaj. Yeka kema Lázaro moyolkuik amo kiijtok tlake kipanok kema mijki. (Xijpoua Salmo 146:4; Eclesiastés 9:5, 6 uan 10).
Sekij moiljuiaj toTeotsij kintlaijiyouiltia mijkatsitsij ipan tlitl. Ni amo nelia, pampa ipan Biblia kiijtoua mijkatsitsij ayokmo tlalnamikij. Yeka san kiistlakauiaj toTeotsij kema kiijtouaj tetlaijiyouiltia ipan tlitl, pampa Jehová amo kema moiljuiskia kitlaijiyouiltis se akajya ipan tlitl. (Xijpoua Jeremías 7:31).
Xikita nopa video ¿Tlake kinpano katli mikij?
3. ¿Uelis tikinnojnotsasej mijkatsitsij?
Mijkatsitsij amo uelij kamanaltij yon amo tlakakij (Salmo 115:17). Maske mijkatsitsij amo uelij kamanaltij, itstokej se keskij amo kuali iluikaeuanij tlen uelij kinnojnotsaj maseualmej, uan monextiaj kejuak eliskiaj maseualmej katli miktokej (2 Pedro 2:4). Yeka Jehová tlauel kikualankamaka kema se akajya kineki kinnojnotsas mijkatsitsij. (Xijpoua Deuteronomio 18:10 uan 11).
4. ¿Ajkia inijuantij moyolkuisej?
Miakej maseualmej katli miktokej moyolkuisej uan sampa itstosej ipan Tlaltipaktli. Nojkia moyolkuisej katli amo kiixmatkej Jehová uan kichijkej tlen amo kuali. (Xijpoua Hechos 24:15).
Katli moyolkuisej uelis kimatisej ajkia toTeotsij katli melauak, uan kinextisej kineltokaj Jesús tlaj kichiuasej tlen ya tlanauatia (Apocalipsis [Revelación] 20:11, 12). Tlaj kej nopa kichiuasej uelis itstosej nochipa ipan Tlaltipaktli. (Xijpoua Juan 5:28 uan 29).
5. ¿Tlake techmachtia ni tlen Jehová?
Jehová tlauel techiknelia pampa kichiuas ma moyolkuikaj mijkatsitsij. Tojuantij uelis timoyolkuisej pampa toTeotsij kititlanki iKone ma motemaktiliki. Uajka kema moyolkuisej mijkatsitsij, ¿ajkia tijneki tikitas? (Xijpoua Juan 3:16 uan Romanos 6:23).
