TLAMACHTILI 26
¿Kenke titlaijiyouiaj uan pano tlen amo kuali?
Kema pano tlen amo kuali miakej maseualmej motlajtlaniaj: “¿Kenke kiampa panok?”. Tlauel techyolchikaua pampa Biblia kinankilia ni tlajtlanili.
1. ¿Tlake kichijki Satanás uan kiampa pejki tlen amo kuali ipan Tlaltipaktli?
Diablo o Satanás kiijixnamijki toTeotsij. Ya kinekiyaya kinnauatis sekinok, yeka kichijki Adán uan Eva nojkia ma kiijixnamikikaj toTeotsij. Uan kiampa kichijki kema kikajkayajki Eva (Génesis 3:1-5). Satanás kichijki Eva ma moiljui toTeotsij kitlatiliyaya se tlamantli tlen kuali. Ya kinejki kiijtos maseualmej yolpakiskiaj tlaj amo kineltokaskiaj toTeotsij. Uajka, Satanás achtoui istlakatik kema kiiljuik Eva amo mikiskia. Yeka Biblia kiijtoua ya eli “se istlakatiketl uan nochi istlakayotl peua ika ya” (Juan 8:44).
2. ¿Tlake kichijkej Adán uan Eva?
Jehová kinmakak Adán uan Eva miak tlamantli tlen kuali. Kiniljuik ueliskiaj kikuasej itlajka tlen ueli kuauitl, san setsi kuauitl itlajka amo ueliskiaj kikuasej (Génesis 2:15-17). Maske kiampa kiniljuik, inijuantij kikuajkej itlajka nopa kuauitl. Eva “kitejki se uan kikuajki”. Teipa, Adán “nojkia kikuajki” (Génesis 3:6). Kiampa amo kineltokakej Jehová. Adán uan Eva eliyayaj xitlauakej, yeka ueliskia kichiuasej tlen kuali pampa toTeotsij kiampa kinchijchijtoya. Maske kimatiyayaj kiixpanoskiaj toTeotsij, kikuajkej nopa kuauitl itlajka, kiampa tlajtlakolchijkej uan kinextijkej amo kinekiyayaj toTeotsij ma kinnauati. Tlen kitlapejpenijkej, kichijki tlauel ma tlaijiyouikaj (Génesis 3:16-19).
3. ¿Tlake panok pampa Adán uan Eva tlajtlakolchijkej?
Kema Adán uan Eva tlaixpanokej, elkej tlajtlakolejkej uan kinpanoltilijkej tlajtlakoli nochi ininkoneuaj. Yeka Biblia kiijtoua: “Kema pejki Tlaltipaktli, Adán tlajtlakolchijki uan tlajtlakoli pejki ipan Tlaltipaktli pampa san se tlakatl tlajtlakolchijki. Uan pampa pejki tlajtlakoli, nojkia pejki mikistli. Uajka ama mikistli techasi nochi titlakamej” (Romanos 5:12).
Uajka, ¿kenke titlaijiyouiaj? Kemantika pampa amo kuali tijtlapejpeniaj tlen tijchiuasej. Uan kemantika pampa sekinok amo kuali kitlapejpeniaj tlen kichiuasej. Nojkia pampa tiitstokej kampa amo kinamiki uan kema amo monekiyaya nopaya tiitstosej (xijpoua Eclesiastés 9:11).
KUALI XIMOMACHTI
Ma tikitakaj kenke amo kinamiki tijtlajtlakoltisej toTeotsij pampa titlaijiyouiaj uan pampa pano tlen amo kuali, uan kenijkatsa kiyolmati kema titlaijiyouiaj.
4. ¿Ajkia kichiua ma titlaijiyouikaj?
Miakej maseualmej moiljuiaj toTeotsij kinauatia Tlaltipaktli. ¿Nelnelia tlen moiljuiaj? Xikitakaj nopa VIDEO.
Xijpouakaj Santiago 1:13, TNM uan 1 Juan 5:19 uan xijnankilikaj ni tlajtlanili:
-
¿ToTeotsij kichiua ma titlaijiyouikaj uan ma pano tlen amo kuali?
5. ¿Tlake panotok pampa Satanás tlanauatia?
Xijpouakaj Génesis 3:1-6 uan xijnankilikaj ni tlajtlanili:
-
¿Tlake istlakatili kiijtok Satanás? (Xikitakaj versículos 4 uan 5).
-
¿Tlake kiijtok Satanás pampa kinekiyaya Adán uan Eva ma moiljuikaj Jehová kintlatilijtoya se tlamantli tlen kuali?
-
¿Kiijtoua Satanás moneki Jehová ma technauati uan kiampa tiyolpakisej?
Xijpouakaj Eclesiastés 8:9 uan xijnankilikaj ni tlajtlanili:
-
¿Kenijkatsa itstokej maseualmej pampa toTeotsij amo kinnauatia?
-
A. Maske Adán uan Eva amo eliyayaj tlajtlakolejkej uan itstoyaj ipan Xochimili, inijuantij kineltokakej Satanás uan kiijixnamijkej Jehová.
-
E. Kema Adán uan Eva tlaijixnamijkej, ipan Tlaltipaktli pejki onka tlajtlakoli, tlaijiyouilistli uan mikilistli.
-
I. Jehová kitlamiltis tlajtlakoli, tlaijiyouilistli uan mikilistli. Maseualmej ayokmo kipiasej tlajtlakoli uan itstosej ipan Xochimili.
6. Jehová moyolkokoua kema kiita titlaijiyouiaj
¿Nelia moyolkokoua toTeotsij kema kiita titlaijiyouiaj? Xikita tlake kiijkuilok tlanauatijketl David uan apóstol Pedro. Xijpouakaj Salmo 31:7 uan 1 Pedro 5:7 uan xijnankilikaj ni tlajtlanili:
-
¿Kenijkatsa tijyolmati pampa tikita Jehová kimati tlake kuesoli tijpia uan kiyolkokoua kema kiita titlaijiyouia?
7. ToTeotsij kitlamiltis nochi tlen techtlaijiyouiltia
Xijpouakaj Isaías 65:17 uan Apocalipsis 21:3, 4 uan xijnankilikaj ni tlajtlanili:
-
Jehová kiijtojtok kitlamiltis nochi tlamantli tlen techtlaijiyouiltijtok uan kichiuas kuali ma tiitstokaj. ¿Mitsyolchikaua tlen toTeotsij kiijtojtok kichiuas? ¿Kenke mitsyolchikaua?
¿Tijmajtoya?
Satanás kiistlakauik Jehová kema kiijtok nopa achtoui istlakatili. Ya kichijki maseualmej ma moiljuikaj Jehová amo eli se kuali tlanauatijketl uan amo teiknelia. Jehová nechka kitlamiltis tlaijiyouilistli, uan kiuejkapantlalis itoka, kiampa kinextis san ya kuali tlanauatia. ¡Tlauel kuali kema kiampa kichiuas! (Mateo 6:9, 10).
TLEN SEKINOK KIIJTOUAJ: “ToTeotsij techtlaijiyouiltia pampa kineki kiitas tlaj nelnelia titlaneltokaj ipan ya”.
-
¿Ta tlake tikijtoskia?
TLEN TIMOMACHTIJKEJ
Satanás, Adán uan Eva kiijixnamijkej toTeotsij, yeka nama titlaijiyouiaj. Jehová tlauel kiyolkokoua kema kiita titlaijiyouiaj, yeka nechka kitlamiltis nochi tlen amo kuali.
¿Tlake tijyekok?
-
¿Tlake kiijtok Satanás uan kiampa kikajkayajki Eva?
-
¿Tlake techpano pampa Adán uan Eva tlaijixnamijkej?
-
¿Kenke tikijtouaj Jehová kiyolkokoua kema kiita titlaijiyouiaj?
NOJKIA XIKITA NI
Xikita ipan Biblia tlake kiijtosneki tlajtlakoli.
Xikita sekinok tlamantli tlen Satanás kinejki kiijtos ipan xochimili Edén.
“¿Kenke toTeotsij kikaua ma titlaijiyouikaj?” (Tlen Tematiltia, enero 1, 2014)
Xikita kenijkatsa techyolchikaua kema monankilia se tlajtlanili tlen ouij.
“¿Kenke mochijki nopa Holocausto judío? ¿Kenke toTeotsij kikajki ma pano?” (Tlamachtili ipan jw.org)
Xikita tlake kipaleuik ma yolpaki se tlakatl katli tlaijiyouiyaya.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
