၁၂၈ ကြိမ်မြောက် ဂိလဒ်ကျောင်းဆင်းပွဲ

လူတို့ကို “တပည့်ဖြစ်စေ” ဖို့ ခရစ်ယာန်သာသနာပြုများကို စေလွှတ်

“လူမျိုးအပေါင်း သတင်းကောင်းကြားသိဖို့ ခရစ်ယာန်တချို့က မိသားစုနဲ့ နေရပ်ကို လိုလိုလားလား စွန့်ခွာပြီး တိုင်းတစ်ပါးမှာ သတင်းကောင်း သွားဟောပြောတော့မှာ ဖြစ်ပါတယ်။” ယေဟောဝါသက်သေတွေရဲ့ အုပ်ချုပ်ရေးအဖွဲ့ဝင်တစ်ဦးဖြစ်တဲ့ ဒေးဗစ် စပလိန်းက ပရိသတ်အတွက် စိတ်လှုပ်ရှားစရာကောင်းပြီး တည်ဆောက်မှုပေးတဲ့ ဖြစ်ရပ်ကို အထက်ပါအတိုင်း အစချီလိုက်ပါတယ်။

၂၀၁၀ ခုနှစ်၊ မတ်လ ၁၃ ရက်နေ့မှာ ဂိလဒ်ကင်းမျှော်စင် သမ္မာကျမ်းစာကျောင်းရဲ့ ၁၂၈ ကြိမ်မြောက် သင်တန်းဆင်းပွဲအတွက် ပရိသတ် ၈,၀၀၀ နီးပါး စုရုံးရောက်ရှိနေကြပါတယ်။ နိုင်ငံပေါင်း ၂၇ နိုင်ငံက သင်တန်းဆင်းတွေရဲ့ မိတ်ဆွေတွေ၊ မိသားစုဝင်တွေနဲ့ ဧည့်သည်တွေ အဲဒီအစီအစဉ်ကို တက်ရောက်ခဲ့ကြတယ်။

ယေရှုရဲ့ ‘တပည့်တွေဟာ အိမ်မှာထိုင်စောင့် နေကြတာမဟုတ်ဘူး’

သဘာပတိဖြစ်တဲ့ ညီအစ်ကို စပလိန်းက ‘ထို့ကြောင့် သွား၍ လူမျိုးတကာမှ လူတို့ကို တပည့်ဖြစ်စေကြလော့’ ဆိုတဲ့ ယေရှုရဲ့ မိန့်မှာချက်ကို ဆွေးနွေးပြီး အစီအစဉ်ကို ဖွင့်လှစ်ပေးလိုက်ပါတယ်။ (မဿဲ ၂၈:၁၉၊ ၂၀) ယေရှုက တပည့်တွေကို လူတွေဆီ စေလွှတ်ခဲ့တဲ့အကြောင်း ညီအစ်ကို စပလိန်းက အလေးပေးပြောခဲ့တယ်။ အေဒီ ၃၃၊ ပင်တေကုတ္တေပွဲနေ့မှာ မက်ဆိုပိုတေးမီးယား၊ မြောက်အာဖရိကနဲ့ ရောမအင်ပါယာအတွင်းမှာရှိတဲ့ ဒေသများစွာက လူတွေ ဂျေရုဆလင်မြို့ကို ရောက်လာကြပြီး သတင်းကောင်းကို ကြားနာသိရှိခဲ့ရတယ်။ ဒါပေမဲ့ ယေရှုရဲ့ “တပည့်တွေဟာ လူမျိုးအပေါင်းက လူတွေ သူတို့ဆီကိုရောက်လာဖို့ အိမ်မှာ ထိုင်စောင့်နေကြတာ မဟုတ်ဘူး။ လူတွေကို ရှာတွေ့ဖို့ မြေကြီးစွန်းတိုင်အောင် သွားခဲ့ကြရပါတယ်” လို့ ညီအစ်ကို စပလိန်းက ဟောပြောသွားတယ်။—တမန်တော် ၁:၈။

“ယေရှုက သူ့တပည့်တွေကို ဘာလုပ်ရမယ်ဆိုတာလောက်ပဲ မပြောဘဲ ဘယ်လိုလုပ်ရမယ်ဆိုပြီးတော့လည်း သင်ပေးခဲ့တယ်။ ဆုတောင်းဖို့လောက်ပဲ မပြောဘဲ ဘယ်လိုဆုတောင်းရမယ်ဆိုပြီး သင်ပေးခဲ့တယ်။ ဟောဖို့လောက်ပဲ မပြောဘဲ ဘယ်လိုဟောရမယ်ဆိုတာ သွန်သင်ပြသခဲ့တယ်။ သွန်သင်သူကောင်းဖြစ်ဖို့လောက်ပဲ မဟုတ်ဘဲ ထိရောက်တဲ့ သွန်သင်နည်းစနစ်တွေကို ဖော်ပြပေးခဲ့တယ်” လို့ ညီအစ်ကို စပလိန်းက ပြောသွားတယ်။

သဘာပတိက ကျောင်းဆင်းတွေရဲ့ မိဘတွေကိုဦးတည်ပြီး “ငါသည်လည်း ဤလောကစနစ် နိဂုံးပိုင်းတိုင်အောင် သင်တို့နှင့်အတူ အစဉ်မပြတ်ရှိသည်” ဆိုတဲ့ ယေရှုရဲ့ အာမခံချက်ကို ကိုးကားပြောဆိုသွားတယ်။ (မဿဲ ၂၈:၂၀) တိုင်းတစ်ပါးမှာ တာ၀န်ထမ်းဆောင်ကြမယ့် ကျောင်းဆင်းတွေကို ယေရှု ဆက်ကြည့်ရှုစောင့်ရှောက်သွားမယ်ဆိုပြီး ညီအစ်ကို စပလိန်းက ပရိသတ်ကို ယုံကြည်စိတ်ချစေခဲ့တယ်။

“ဆက်ပြီးဝါကြွားနေပါ”

အုပ်ချုပ်ရေးအဖွဲ့ဝင် အန်တိုနီ မောရစ္စက သင်တန်းသားတွေကို “ဆက်ပြီးဝါကြွားနေပါ” ဆိုပြီး အားပေးခဲ့တယ်။ လျောက်ပတ်တဲ့ ဝါကြွားမှုနဲ့ မလျောက်ပတ်တဲ့ ဝါကြွားမှုဆိုပြီး နှစ်မျိုးနှစ်စားရှိကြောင်း ညီအစ်ကိုက ပြောသွားတယ်။ မလျောက်ပတ်တဲ့ ဝါကြွားမှုဆိုတာ ကိုယ့်ကိုယ်ကိုယ် အမွှမ်းတင်ခြင်းဖြစ်တယ်။ လျောက်ပတ်တဲ့ ဝါကြွားမှုကို ၁ ကောရိန္သု ၁:၃၁ မှာဒီလို ဖော်ပြထားတယ်– ‘ဝါကြွားသောသူသည် ယေဟောဝါဘုရားသခင်၌သာ ဝါကြွားစေ။’ “ယေဟောဝါဘုရားသခင်နဲ့ဆိုင်တဲ့ အသိပညာ၊ ထိုးထွင်းသိမြင်မှုနဲ့ပတ်သက်ပြီး ဝါကြွားသင့်ပါတယ်။ တကယ်တော့ ယေဟောဝါဘုရားသခင်ရဲ့ နာမတော်ကို ခံယူထားပြီး သက်သေခံတစ်ယောက်ဖြစ်ခွင့်ရတာက အခွင့်ထူးကြီးဖြစ်တယ်” လို့ ညီအစ်ကို မောရစ္စက ပြောခဲ့တယ်။—ယေရမိ ၉:၂၄။

အဲဒီနောက် ဟောပြောသူက အာဖရိကနိုင်ငံမှာ အမှုဆောင်နေတဲ့ ခရစ်ယာန်သာသနာပြုတစ်ယောက်ရဲ့ အတွေ့အကြုံကို ပြောပြပြီး ယေဟောဝါဘုရားသခင်ရဲ့နာမတော်ကို လူသိရှင်ကြား ကြေညာခြင်းရဲ့ အရေးကြီးမှုကို အလေးပေးခဲ့တယ်။ အဲဒီခရစ်ယာန်သာသနာပြု ဇနီးမောင်နှံက ကျမ်းစာဟောပြောချက်ပေးဖို့ ခရီးထွက်ခဲ့ကြတယ်။ စစ်ဆေးရေးဂိတ်တစ်ခုကိုရောက်တော့ စစ်သားတစ်ယောက်က ညီအစ်ကို,ကို သေနတ်နဲ့ချိန်ပြီး ခင်ဗျား ဘယ်သူလဲလို့ မေးတယ်။ အဲဒီညီအစ်ကိုရဲ့ ဇနီးက ဂိလဒ်သင်တန်းတက်တုန်းက ရခဲ့တဲ့ လေ့ကျင့်မှုကို ပြန်သတိရပြီး ခင်ပွန်းသည်ကို ဒီလိုတိုးတိုးလေး ပြောခိုင်းလိုက်တယ်– “ကျွန်တော်က ယေဟောဝါသက်သေတစ်ယောက်ပါ။ ကျမ်းစာဟောပြောချက်ပေးဖို့ ခရီးထွက်လာတာပါ။” ဇနီးသည်ပေးတဲ့အကြံအတိုင်း ပြောလိုက်တဲ့အခါ စစ်ဆေးရေးဂိတ်ကို ဖြတ်ခွင့်ရသွားတယ်။ နောက်တစ်နေ့ရောက်တော့ ခရစ်ယာန်သာသနာပြုလို့ ပြောတဲ့သူတွေကို  သတ်ပစ်ဖို့ ကင်းစောင့်တာဝန်ကျ စစ်သားတွေကို သမ္မတဖြစ်သူက အမိန့်ပေးထားတဲ့သတင်းကို ရေဒီယိုကနေ အဲဒီဇနီးမောင်နှံ ကြားသိလိုက်ရတယ်။ သာသနာပြုလို့ပြောမယ့်အစား ယေဟောဝါသက်သေလို့ ပြောလိုက်တဲ့အတွက် အဲဒီဇနီးမောင်နှံ အသက်ချမ်းသာရာရသွားခဲ့တယ်။ “သင်တို့တာဝန်ကျတဲ့နိုင်ငံကို ရောက်တဲ့အခါ ဆက်ပြီးဝါကြွားနေပါ။ ယေဟောဝါဘုရားသခင်ရဲ့ဘုန်း အမြဲထင်ရှားဖို့ သင်တို့ကို အသုံးပြုတဲ့အခါ ကိုယ်တော်လုပ်ဆောင်ပြီးမြောက်နေတဲ့ အရာအားလုံးအတွက် ဝါကြွားကြပါ” လို့ပြောပြီး ညီအစ်ကို မောရစ္စက ဟောပြာချက်ကို နိဂုံးချုပ်လိုက်တယ်။

“တာဝန်ကျေပွန်အောင် လုပ်ဆောင်နိုင်မလား”

ခရစ်ယာန်သာသနာပြု လုပ်ခဲ့ဖူးတဲ့ အုပ်ချုပ်ရေးအဖွဲ့ဝင် ဂျက်ဖရီ ဂျက်ဆင်က ကျောင်းဆင်းတော့မယ့် သင်တန်းသားတွေ သုံးသပ်နိုင်ဖို့ အထက်ပါအတိုင်း မေးခဲ့တယ်။ သူက “တစ်ယောက်ယောက်ကို ခရစ်ယာန်သာသနာပြုလို့ ပြောလိုက်ရင် ဘယ်လိုအဓိပ္ပာယ် သက်ရောက်သွားမလဲ” လို့မေးခဲ့တယ်။ “ခရစ်ယာန်သာသနာပြု” ဆိုတဲ့စကားလုံးက လက်တင်စကားကနေ ဆင်းသက်လာတာဖြစ်ပြီး အထူးတာဝန်ရရှိထားတဲ့ လူတစ်ယောက် ဒါမှမဟုတ် အုပ်စုတစ်စုကို ရည်ညွှန်းတယ်လို့ ညီအစ်ကိုဂျက်ဆင်က ရှင်းပြတယ်။ ယေဟောဝါသက်သေတွေရဲ့ တာဝန်က သတင်းကောင်းဟောပြောဖို့နဲ့ တခြားသူတွေ ဘုရားသခင်အကြောင်းသိဖို့ ကူညီပေးခြင်းဖြစ်တယ်။ ယေရှု ကမ္ဘာပေါ်ရှိတုန်းက အဲဒီတာဝန်ကိုပဲ အာရုံစိုက်လုပ်ဆောင်ခဲ့တဲ့အတွက် ကျွန်ုပ်တို့လည်း ယေရှုကို တုပတဲ့အနေနဲ့ အဲဒီလိုလုပ်ဆောင်တာဖြစ်တယ်။ ရောမဘုရင်ခံ ပုန္တိပိလတ်ကို ယေရှု ဒီလိုပြောခဲ့တယ်– “အမှန်တရားကို သက်သေခံရန် ငါသည် ဖွားမြင်ခြင်းကိုခံ၍ ဤလောကသို့ ကြွလာပြီ။”—ယောဟန် ၁၈:၃၇။

ညီအစ်ကိုဂျက်ဖရီက သင်တန်းသားတွေကို ဂျေရိခိုမြို့တိုက်ပွဲနဲ့ပတ်သက်တဲ့ ကျမ်းစာမှတ်တမ်းအကြောင်း ဆင်ခြင်သုံးသပ်စေခဲ့တယ်။ အစ္စရေးစစ်သားတွေဟာ ခြောက်ရက်ပတ်လုံး မနက်စောစောထ၊ စစ်ဝတ်စုံအပြည့်ဝတ်ပြီး ဂျေရိခိုမြို့ကို တစ်ပတ်ပတ်၊ ပြီးရင် ပြန်လာကြရတယ်။ “လူ့ရှုထောင့်ကနေကြည့်ရင် သူတို့ရဲ့လုပ်ရပ်က အဓိပ္ပာယ်မရှိဘူး” ဆိုပြီး ညီအစ်ကိုကပြောတယ်။ ‘ဒါသက်သက် အချိန်ဖြုန်းတာပဲ’ လို့တချို့စစ်သားတွေက တွေးကောင်းတွေးကြမယ်။ ဒါပေမဲ့ ခုနစ်ရက်မြောက်နေ့မှာ မြို့ကို ခုနစ်ကြိမ်ပတ်ပြီး စစ်ညာသံကို အသံအကျယ်ကြီးနဲ့ပေးဖို့ အစ္စရေးစစ်သားတွေ ညွှန်ကြားခံရတယ်။ ဘာဖြစ်သွားသလဲ။ ဂျေရိခိုမြို့ရိုးတွေ ပြိုကျသွားပါလေရော။—ယောရှု ၆:၁၃-၁၅၊ ၂၀။

ဂျေရိခိုမြို့မှတ်တမ်းကနေ သင်ခန်းစာလေးခုကို ညီအစ်ကိုဂျက်ဆင်က ထုတ်နုတ်ပြတယ်။ (၁) နာခံမှုရှိဖို့ အရေးကြီးတယ်။ ကိုယ့်နည်းကိုယ့်ဟန်နဲ့ လုပ်တာထက် ယေဟောဝါဘုရားသခင်ရဲ့ နည်းလမ်းအတိုင်း လုပ်ဆောင်သင့်တယ်။ (၂) ယေဟောဝါဘုရားသခင်ကို ယုံကြည်ကိုးစားဖို့ အရေးကြီးတယ်။ မြို့ရိုးဖြိုစက်တွေကို မသုံးဘဲ ‘ယုံကြည်ခြင်းအားဖြင့် ဂျေရိခိုမြို့ရိုး ပြိုကျ’ သွားတာဖြစ်တယ်။ (ဟေဗြဲ ၁၁:၃၀) (၃) စိတ်ရှည်ရမယ်။ အချိန်တန်တဲ့အခါ ယေဟောဝါဘုရားသခင်ရဲ့ကောင်းချီးက “သင့်အပေါ်မှာ သက်ရောက်” လိမ့်မယ်။ (တရားဟောရာ ၂၈:၂) (၄) လက်မလျှော့ပါနဲ့။ သင့်ရဲ့တာဝန်ကို ဘယ်တော့မှ မမေ့ပါနဲ့။ “အဲဒီအချက်လေးချက်ကို မှတ်သားထားမယ်ဆိုရင် ယေဟောဝါဘုရားသခင်ရဲ့ဘုန်းနာမ ထင်ရှားဖို့အတွက် သင့်တာဝန်ကို ကျေပွန်အောင် ဆောင်ရွက်နိုင်ပါလိမ့်မယ်” လို့ပြောပြီး ညီအစ်ကိုဂျက်ဆင်က ဟောပြောချက်ကို နိဂုံးချုပ်လိုက်တယ်။

အစီအစဉ်ရဲ့ အခြားပေါ်လွင်ချက်များ

“သမ္မာကျမ်းစာနဲ့ ၎င်းရဲ့အာဘော်ရှင်ကို ချစ်မြတ်နိုးပါ။” အမေရိကန်နိုင်ငံ ဌာနခွဲကော်မတီဝင် မက်ခ်စ်ဝဲလွိုက်က အထက်ပါခေါင်းစဉ်ကို အဆင့်ဆင့် တင်ဆက်သွားတယ်။ “သမ္မာကျမ်းစာက သင့်အတွက် အသက်ရှင်တဲ့စာအုပ်တစ်အုပ် ဖြစ်စေပါ” လို့ သင်တန်းသားတွေကို ပြောတယ်။ အဲဒီနောက် ညီအစ်ကိုက သင်တန်းသားတွေကို ဒီလိုအားပေးသွားတယ်– ယေဟောဝါဘုရားသခင်အပေါ် ထားရှိတဲ့ သင်တို့ရဲ့မေတ္တာကို ဘယ်တော့မှ မမှေးမှိန်သွားစေပါနဲ့။ ကိုယ်သင်ပေးတဲ့အရာတွေကို လူတိုင်း နားလည်ကြမယ်လို့ မမျှော်လင့်ပါနဲ့။ သင်သားတွေရဲ့နှလုံးထဲ ကျမ်းစာအမှန်တရားရောက်စေဖို့ ရိုးရိုးရှင်းရှင်း သင်တတ်ဖို့ သင်ယူပါ။ စိတ်နှိမ့်ချပါ။ သူများထက် ပိုသိတယ်ဆိုတဲ့ပုံစံမျိုး မဖမ်းပါနဲ့။ ဥပမာတွေသုံးပြီး သင်ပေးပါ။ သမ္မာကျမ်းစာကို သင် အရမ်းမြတ်နိုးတယ်ဆိုတာကို သင်တို့ရဲ့ ကျမ်းစာသင်သားတွေ တွေ့မြင်ပါစေ။

“ကျီးအတို့ကို စေ့စေ့ဆင်ခြင်ကြလော့။” ခရစ်ယာန်သာသနာပြု လုပ်ခဲ့ဖူးတဲ့ သင်တန်းပို့ချသူ မိုက်ကယ်ဘားနက်က အထက်ပါခေါင်းစဉ်နဲ့ ဟောပြောချက်ပေးခဲ့တယ်။ တစ်ခါတလေ စိုးရိမ်ပူပန်မှုတွေ ကြုံရနိုင်တယ်လို့ ညီအစ်ကိုကဆိုတယ်။ ဒါပေမဲ့ ယေရှုရဲ့ ဒီဆုံးမစကားကို သတိရပါ– ‘ကျီးအတို့ကို စေ့စေ့ဆင်ခြင်ကြလော့။ ထိုငှက်များသည် မျိုးစေ့ကြဲခြင်း၊ ရိတ်သိမ်းခြင်းတို့ကို မပြုကြ။ သို့သော်လည်း ဘုရားသခင်သည် သူတို့ကို ကျွေးမွေးတော်မူ၏။’ (လုကာ ၁၂:၂၄) ပညတ်ပဋိညာဉ်အရ ကျီးအတွေက မစင်ကြယ်တဲ့အရာ၊ မစားအပ်တဲ့အရာဖြစ်တယ်။ အဲဒီငှက်တွေကို ရွံရှာဖွယ်ရာအဖြစ် သတ်မှတ်ထားတယ်။ (ဝတ်ပြုရာ ၁၁:၁၃၊ ၁၅) ဘာပဲဖြစ်ဖြစ် သူတို့ကို ဘုရားသခင် ကျွေးမွေးနေတယ်။ “ဒါကြောင့် အနာဂတ်အတွက် သင်တို့ အကြီးအကျယ်စိုးရိမ်တဲ့အခါ ကျီးအတွေကို မြင်ယောင်လိုက်ပါ။ မစင်ကြယ်တဲ့ ရွံရှာဖွယ်ငှက်တိရစ္ဆာန်ကိုတောင်  ဘုရားသခင် ကြည့်ရှုစောင့်ရှောက်တယ်ဆိုရင် ကိုယ်တော့်အမြင်မှာ သန့်ရှင်းစင်ကြယ်တဲ့ သင်တို့ကို ပိုပြီးကြည့်ရှုစောင့်ရှောက်မှာ ဖြစ်ပါတယ်” လို့ ညီအစ်ကို ဘားနက်က ပြောခဲ့တယ်။

“ငါသည် သင့်အပေါ် မတရားပြုသည်မဟုတ်။” ဂိလဒ်သင်တန်းပို့ချသူ နောက်တစ်ဦးဖြစ်တဲ့ မာ့ခ် နူမာရ်က ယေရှုရဲ့ စပျစ်ခြံလုပ်သားပုံဥပမာကို တင်ဆက်ဟောပြောသွားတယ်။ အလုပ်သမားတချို့က တစ်နေ့လုံး ပင်ပင်ပန်းပန်း အလုပ်,လုပ်ခဲ့ကြတယ်။ တချို့ကတော့ တစ်နာရီပဲ အလုပ်,လုပ်တယ်။ ဒါပေမဲ့ သူတို့အားလုံး လုပ်အားခအတူတူ ရကြတယ်။ အဲဒီအခါမှာ အချိန်ကြာကြာလုပ်ခဲ့တဲ့သူတချို့က ပြစ်တင်ညည်းတွားလာကြတယ်။ သူတို့တွေကို စပျစ်ခြံပိုင်ရှင်က ဒီလိုပြောတယ်– “ငါသည် သင့်အပေါ် မတရားပြုသည်မဟုတ်။ ဒေနာရိတစ်ပြား အခယူရန် သင်သဘောတူခဲ့သည် မဟုတ်လော။ သင်၏လုပ်အားခကို ယူ၍သွားလော့။” (မဿဲ ၂၀:၁၃၊ ၁၄) သင်ခန်းစာက ဘာလဲ။ တခြားသူတွေနဲ့ မနှိုင်းယှဉ်ပါနဲ့။ “အဲလိုနှိုင်းယှဉ်မယ်ဆိုရင် သင့်ရဲ့ပျော်ရွှင်မှု ပျောက်ဆုံးသွားလိမ့်မယ်။ ပိုဆိုးတာက သင့်ရဲ့တာဝန်ကို ထမ်းဆောင်ချင်တော့မှာမဟုတ်ဘူး။ လုပ်ငန်းတော်အခွင့်ထူးကို လက်လွတ်ချင်စိတ် ပေါ်လာလိမ့်မယ်” ဆိုပြီး ညီအစ်ကို နူမာရ်က ပြောသွားခဲ့တယ်။ ကနေ့ခေတ်မှာ လူတွေစုသိမ်းခြင်းလုပ်ငန်းကို ယေရှု ညွှန်ကြားနေတဲ့အတွက် နောက်လိုက်တွေကို လုပ်အားခ ကြိုက်သလိုပေးနိုင်တယ်ဆိုတာ ဟောပြောသူက သင်တန်းသားတွေကို သတိပေးခဲ့တယ်။ သင်မရရှိတဲ့ ကောင်းချီးတစ်ခုခုကို တခြားသူက ရရှိထားတဲ့အခါ ယေဟောဝါဘုရားသခင်နဲ့ ယေရှုက သင့်ကို မတရားလုပ်နေတာ မဟုတ်ပါဘူး။ သင်ရရှိထားတဲ့ လုပ်ငန်းတာဝန်ကိုပဲ အာရုံစိုက်ပါ။ တခြားသူတွေရရှိထားတဲ့ “လုပ်အားခ” ကိုကြည့်ပြီး ယေဟောဝါဘုရားသခင် ပေးအပ်ထားတဲ့ သင့်တာဝန်ကနေ သွေဖည်မသွားပါနဲ့။

တွေ့ ကြုံမှုများနှင့် လူတွေ့မေးမြန်းခန်းများ

သင်တန်းမရှိတဲ့အခါ၊ ဒါမှမဟုတ် အိမ်စာမရှိတဲ့အခါ ဂိလဒ်သင်တန်းသားတွေက ဒေသခံ ယေဟောဝါသက်သေတွေနဲ့ပူးပေါင်းပြီး ဟောပြောခြင်းလုပ်ငန်းမှာ ပါဝင်ခဲ့ကြတယ်။ ဂိလဒ်သင်တန်းပို့ချသူတစ်ဦးဖြစ်တဲ့ ဆမ် ရော်ဘာစဲန်က ကျောင်းသားတချို့ကို သူတို့ရဲ့ တွေ့ကြုံမှုတွေပြောပြဖို့ လူတွေ့မေးမြန်းခဲ့တယ်။ ဥပမာ၊ ညီအစ်မ အလက်စန္ဒြာ ကာ့ခ်လာက ဆေးလိပ်စွဲနေတဲ့ သားအတွက် ရတက်မအေးဖြစ်နေတဲ့ အမျိုးသမီးတစ်ယောက်နဲ့ တွေ့ဆုံခဲ့တယ်။ အဲဒီနောက် အလက်စန္ဒြာက ဆေးလိပ်သောက်ခြင်းနဲ့ပတ်သက်တဲ့ ဆောင်းပါးပါတဲ့ နိုးလော့!မဂ္ဂဇင်းတစ်စောင်နဲ့ အဲဒီအမျိုးသမီးဆီ ပြန်လည်ပတ်ခဲ့တယ်။ အိမ်မှာ ဘယ်သူမှမရှိပေမဲ့ အဲဒီမဂ္ဂဇင်းကို ထားပေးလိုက်တယ်။ တစ်နေ့မှာ အဲဒီအမျိုးသမီး အိမ်မှာရှိနေတာကို တွေ့ရတဲ့အခါ အလက်စန္ဒြာ အိမ်ထဲ ဝင်ခွင့်ရခဲ့တယ်။ အဲဒီအမျိုးသမီးက မဂ္ဂဇင်းအတွက် ကျေးဇူးတင်ကြောင်း ဒီလိုပြောတယ်– “ကျွန်မ ဘာကြောင့် ပြဿနာတွေ ကြုံနေရသလဲ။ ဘုရားသခင်က ကျွန်မကို တစ်ခုခု သင်ပေးချင်လို့များလား။” အလက်စန္ဒြာက ပြဿနာတွေကို ဘုရားသခင် ဖြစ်ပေါ်စေတာမဟုတ်ဘူးဆိုတာ ကျမ်းစာထဲကနေ ဖတ်ပြလိုက်တယ်။ (ယာကုပ် ၁:၁၃) အခုဆိုရင် အဲဒီအမျိုးသမီးနဲ့ သူ့သားက ကျမ်းစာလေ့လာနေကြပြီ။

လုပ်ငန်းတော်ဌာနမှာ တာဝန်ထမ်းဆောင်နေတဲ့ မယ်လ်ဗင် ဂျုံးစ်က ဂိလဒ်ကျောင်းသားဟောင်း သုံးယောက်ကို လူတွေ့မေးမြန်းခဲ့တယ်။ ဂိလဒ်ကျောင်းမှာ အခြေခံကျမ်းစာအမှန်တရားတွေကိုပဲ သင်ပေးတာမဟုတ်ဘူး။ အဲဒီအမှန်တရားတွေကို ဘယ်လိုကျင့်သုံးရမယ်ဆိုတာကိုလည်း သင်ပေးတဲ့အကြောင်း သူတို့သုံးယောက်စလုံးက တစ်လေသံတည်း ပြောပြသွားကြတယ်။

အဲဒီနောက် ကျောင်းသားတစ်ယောက်က အားလုံးကိုယ်စား ကျေးဇူးတင်လွှာဖတ်ပြတယ်။ အုပ်ချုပ်ရေးအဖွဲ့မှာ အသက်အကြီးဆုံးဖြစ်တဲ့ အသက် ၉၆ နှစ်အရွယ် ဂျွန်ဘားရ်က ၁၂၈ ကြိမ်မြောက် ဂိလဒ်သင်တန်းရဲ့ လုပ်ဆောင်မှုတွေကို ယေဟောဝါဘုရားသခင် ကောင်းချီးပေးဖို့ ဆုတောင်းပြီး အစီအစဉ်ကို နိဂုံးချုပ်လိုက်ပါတယ်။

 [စာမျက်နှာ ၃၁ ပါဇယားနှင့်မြေပုံ]

သင်တန်းဆိုင်ရာ အချက်အလက်များ

၈ ကိုယ်စားပြုနိုင်ငံပေါင်း

၅၄ ကျောင်းသား/သူပေါင်း

၂၇ စုံတွဲ

၃၅.၂ ပျမ်းမျှအသက်

၁၉.၁ ပျမ်းမျှနှစ်ခြင်းခံပြီးသက်တမ်း

၁၃.၈ ပျမ်းမျှအချိန်ပြည့်အမှုဆောင်သက်တမ်း

မြေပုံ

(ကားချပ်အပြည့်အစုံများကို စာစောင်တွင်ကြည့်ပါ)

သင်တန်းသားများ တာဝန်ခန့်အပ်ခံရတဲ့ နိုင်ငံပေါင်း ၂၅ နိုင်ငံက အောက်ပါအတိုင်းဖြစ်ပါတယ်–

ခရစ်ယာန်သာသနာပြုတာဝန်ခန့်အပ်ချက်များ

အယ်လ်ဘေးနီးယား

အာရူးဘား

ဘိုလီးဗီးယား

ကမ္ဘောဒီးယား

ကုတ်ဒ်အဗွား

ဒိုမီနီကန် သမ္မတနိုင်ငံ

အီကွေဒေါ

ဂါနာ

ဂွာတီမာလာ

ဂီနီ

ဂိုင်ယာနာ

ဟွန်ဒူးရပ်စ်

အင်ဒိုနီးရှား

ကိုဆိုဗို

လတ်ဗီးယား

လိုင်ဘေးရီးယား

မာဒါဂါစကာ

မွန်ဂိုးလီးယား

နမီးဘီးယား

နီကာရာဂွာ

ပါရာဂွေး

ရိုမေးနီးယား

ရဝမ်ဒါ

ဆားဘီးယား

တရုတ်(တိုင်ပေ)

(ဩစတြေးလျဌာနခွဲမှ တာဝန်ချပေးသည်)

ခရစ်ယာန်သာသနာပြုတာဝန်ခန့်အပ်ချက်များ

[စာမျက်နှာ ၃၀ ပါရုပ်ပုံ]

ဂိလဒ်သင်တန်းသားများ၊ သူတို့ရဲ့ ဟောပြောခြင်း လုပ်ငန်းအတွေ့အကြုံကို ပြန်လည်သရုပ်ပြနေ

[စာမျက်နှာ ၃၁ ပါရုပ်ပုံ]

ဂိလဒ်ကင်းမျှော်စင် သမ္မာကျမ်းစာကျောင်း၏ ၁၂၈ ကြိမ်မြောက် သင်တန်းဆင်းပွဲ

အောက်ပါစာရင်းမှာ အတန်းတွေကို ရှေ့တန်းမှ နောက်တန်းကို ရေတွက်ပြီး နာမည်တွေကို လက်ဝဲမှ လက်ယာဘက်ကို စီထားပါတယ်။

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.