အသက် မရှင်ချင်​တော့​လောက်​အောင် ဖြစ်ဖူးသလား။ ဖြစ်​ဖူး​ရင် အန်ဒရီယာနာ​ကို နားလည်​ပေးနိုင်ပါ​လိမ့်မယ်။ အန်ဒရီယာနာ​ဟာ ပူပင်​သောက​လွန်ကဲမှု​ဝေဒနာ ခံစား​နေရ​ပြီး ဝမ်းနည်း​နေတယ်၊ မျှော်လင့်ချက် မဲ့နေတယ်။ စိတ်ကျ​ဝေဒနာ ခံစား​နေတယ်။

မကျန်းမာတဲ့ သက်ကြီးရွယ်အို မိဘတွေကို ပြုစု​စောင့်ရှောက်​နေရတဲ့ ဂျပန်​လူမျိုး ကာအိုရူ​အဖြစ်ကိုလည်း သုံးသပ်​ကြည့်ပါ။ “တစ်ခါတလေ အလုပ်မှာ ဖိစီးမှု အရမ်း​များတယ်။ စား​မဝင်၊ အိပ်မပျော် ဖြစ်လာတယ်။ သေ​မှ​ပဲ အေး​မယ်​လို့ တွေးမိတယ်။”

နိုင်ဂျီးရီးယား​က အိုဂျေဘိုဒီ ဒီလို​ပြောတယ်– “တစ်ချိန်လုံး ဝမ်းနည်း​ပြီး မျက်ရည်ကျ​တတ်တယ်။ ဒါနဲ့ ကိုယ့်ကိုယ်ကိုယ် သတ်သေ​မယ့်​နည်း​တွေ ရှာကြံ​ခဲ့​တယ်။” ဝမ်းသာစရာ​ကတော့ အိုဂျေဘိုဒီ၊ ကာအိုရူ၊ အန်ဒရီယာနာ​တို့ ကိုယ့်ကိုယ်ကိုယ် မ​သတ်​သေ​ခဲ့​ကြဘူး။ ဒါပေမဲ့ နှစ်​တိုင်း လူ​သိန်း​နဲ့​ချီ ကိုယ့်ကိုယ်ကိုယ် သတ်​သေနေ​ကြတယ်။

ကိုယ့်ကိုယ်ကိုယ် သတ်​သေ​သူ​အများစုက အကူအညီ တောင်း​ရမှာ​ကို ရှက်​တဲ့ အမျိုးသားတွေ ဖြစ်တယ်။ ဖျားနာ​သူတွေ​အတွက် သမားတော် လိုအပ်တယ်လို့ ယေရှု ပြောခဲ့တယ်။ (လုကာ ၅:၃၁) ဒါကြောင့် အကူအညီ တောင်း​ဖို့ မရှက်ပါနဲ့။ စိတ်ကျ​ဝေဒနာ ခံစား​ရသူတွေဟာ ဆေး​ကုသမှု ခံယူ​တဲ့အခါ သက်သာ​လာကြတယ်။ အိုဂျေဘိုဒီ၊ ကာအိုရူ၊ အန်ဒရီယာနာ​တို့ဟာ ဆရာဝန်​အကူအညီ​နဲ့ ဝေဒနာ သက်သာ​လာကြပြီ။

စိတ်ကျ​ဝေဒနာ​အတွက် ဆရာဝန်တွေ​က စကားပြော​ကုထုံး​နဲ့​ဖြစ်စေ၊ ဆေးဝါး​နဲ့​ဖြစ်စေ ကုသ​ပေး​နိုင်တယ်။ နှစ်မျိုးလုံးနဲ့လည်း ကုသ​ပေး​နိုင်တယ်။ စိတ်ကျ​ဝေဒနာ ခံစား​နေရ​သူတွေဟာ စိတ်ရှည်​သည်းခံ​ပြီး ဂရုစိုက်​တတ်တဲ့ မိသားစုနဲ့ မိတ်ဆွေ​တွေရဲ့ ထောက်မမှု​လည်း လိုအပ်​ကြတယ်။ အကောင်းဆုံး​မိတ်ဆွေ​ကတော့ ယေဟောဝါ​ဘုရားပါပဲ။ ဘုရား​စကားတော် သမ္မာကျမ်းစာ​အားဖြင့် အံ့ဖွယ်​နည်းနဲ့ ကူညီ​ထောက်မပေး​နေပါ​တယ်။

စိတ်ကျ​ဝေဒနာသည်​တွေဟာ ရေရှည်​ကုသမှု ခံယူဖို့ လိုတယ်။ ဘဝပုံစံ​တွေ ပြုပြင်​ပြောင်းလဲ​ပြီး ရင်ဆိုင်​တတ်​ရမယ်။ ဒါပေမဲ့ သင်ဟာ စိတ်ကျ​ဝေဒနာ ခံစား​နေရ​ရင် အိုဂျေဘိုဒီလို တောက်ပတဲ့ အနာဂတ်ကို မျှော်လင့်​နိုင်တယ်။ သူ ဒီလို​ပြောတယ်– “ဟေရှာယ ၃၃:၂၄ မှာ ဘယ်သူကမှ ‘နေမကောင်း​ဘူး’ လို့ မ​ညည်း​ရတော့မယ့် အချိန်​အကြောင်း ကြိုဟော​ထားတယ်။ အဲဒီ​အချိန်ကို ကျွန်တော် မျှော်လင့်​နေပါ​တယ်။” အိုဂျေဘိုဒီလို ဘုရား​ကတိတော်​ကနေ နှစ်သိမ့်မှု ရယူပါ။ “နာကျင်ခြင်း” ရှိတော့မှာ မဟုတ်တဲ့ “မြေကြီး​သစ်” ကို ဘုရား ကတိပြု​ထားတယ်။ (ဗျာဒိတ် ၂၁:၁၊ ၄) အဲဒီ​ကတိ​တွေ​မှာ စိတ်ပိုင်းဆိုင်ရာ ဝေဒနာ​အားလုံး ပျောက်ကင်း​သွားမယ်​ဆိုတာလည်း ပါတယ်။ ခံစား​နေရတဲ့ စိတ်​နာကျင်မှု​တွေ​လည်း ထာဝစဉ် ပျောက်ကင်း​သွားမယ်။ စိတ်နာ​ကျင်​စရာတွေ​ကို “သတိရ​တော့​မှာ မဟုတ်ဘူး။ အဲဒါတွေဟာ စိတ်ထဲ​ပေါ်လာ​တော့​မှာ မဟုတ်ဘူး။”—ဟေရှာယ ၆၅:၁၇။