အမြဲတမ်း ပထမ​နေရာ လိုချင်တဲ့​သူ တစ်ယောက်ယောက်ကို ကလေးတို့ သိသ​လား။— အဲဒီ​လူဟာ တန်းစီ​ရင်​လည်း ထိပ်ဆုံး​နေရာ​ရဖို့ သူများ​ကို တွန်း​ပစ်​တတ်တယ်။ အဲဒါ​မျိုး တွေ့ဖူးသလား။— လူကြီးတွေ​တောင်မှ ထိပ်ဆုံး​နေရာ၊ အထင်ပေါ်ဆုံး​နေရာ ရဖို့ ကြိုးစားကြတာကို ကြီးမြတ်တဲ့​ဆရာ တွေ့ခဲ့တယ်။ ဒါကို ယေရှု မကြိုက်ဘူး။ ဘယ်လို ဖြစ်ပျက်ခဲ့တယ်​ဆိုတာ ကြည့်ကြရအောင်။

ယေရှုဟာ ထင်ပေါ်တဲ့ ဘာသာရေး​ခေါင်းဆောင် ဖာရိရှဲ​တစ်ယောက်ရဲ့​အိမ်မှာ စား​သောက်ပွဲကြီး​ကို ကြွရောက်ဖို့ ဖိတ်ခေါ်ခံ​ရတယ်လို့ ကျမ်းစာက​ဆိုတယ်။ ရောက်လာတဲ့ ဧည့်သည်​တွေ​ဟာ အကောင်းဆုံး​နေရာကို ရွေး​ထိုင်​ကြ​မှန်း ယေရှု သတိထား​မိတယ်။ ဒါကြောင့် ဖိတ်ခေါ်ခံ​ရသူတွေကို ပုံပြင်​တစ်ပုဒ် ပြောပြတယ်။ ကလေးတို့​ကော နားထောင်ချင်သလား။—

 ယေရှု​က ‘တစ်ယောက်ယောက်​က ခင်ဗျားတို့ကို မင်္ဂလာပွဲ​တက်ဖို့ ဖိ​တ်​တဲ့အခါ အကောင်း​ဆုံး၊ အထင်ပေါ်ဆုံး​နေရာကို ရွေး​မ​ထိုင်​ကြနဲ့’ လို့​ပြောတယ်။ ယေရှု ဘာလို့ ဒီလို​ပြောတာလဲ၊ သိသလား။— အိမ်ရှင်​က ပို​အရေးပါ​သူကို ဖိတ်ရင်​ဖိ​တ်​ထားမယ်လို့ ယေရှု​ပြောတယ်။ ပုံ​မှာ​တွေ့ရတဲ့​အတိုင်း အိမ်ရှင်​က အနားကို​လာပြီး ‘သူ့ကို ဒီ​နေရာ ပေးလိုက်ပါ။ ခင်ဗျား ဟိုနေရာ​မှာ သွားပါ’ လို့ ပြော​လိမ့်မယ်။ အဲဒီ​ဧည့်သည် ဘယ်လို​ခံစား​ရမလဲ။— တခြား​ဧည့်သည်တွေ​ရှေ့မှာ အရေးမပါတဲ့​နေရာကို ပြောင်း​ထိုင်​ရတော့ သူ့​ခမျာ ရှက်ရှာမှာပေါ့။

အကောင်းဆုံး​နေရာကို လိုချင်တာ မကောင်းဘူးဆိုတာကို ယေရှု​ရှင်းပြ​နေတာ။ ဒါကြောင့် ‘ခင်ဗျားတို့ ဖိတ်ခေါ်​ခံရတဲ့​အခါ နောက်ဆုံး​နေရာမှာ ထိုင်​ကြ။ အဲဒီအခါ အိမ်ရှင်​က လာပြီး “မိတ်ဆွေ၊ ရှေ့ကို ကြွပါ” လို့​ပြော​လိမ့်မယ်။ ခင်ဗျားလည်း ဧည့်သည်​အားလုံး​ရှေ့မှာ ဂုဏ်တက်​လိမ့်မယ်’ လို့​ပြောခဲ့တယ်။—လုကာ ၁၄:၁၊ ၇-၁၁။

ယေရှု ပြောပြတဲ့ ပုံပြင်​ရဲ့ ဆိုလိုရင်းကို ကလေးတို့ သဘောပေါက်သလား။— ​သဘောပေါက်​မ​ပေါက် သိရ​အောင် ဥပမာ​တစ်ခုကို ကြည့်ရအောင်။ ကလေးတို့ လူ​သိပ်​ကျပ်​တဲ့ ဘတ်စကား​ပေါ်​ကို တက်​သွားတယ်​ဆိုပါတော့။ အသက်ကြီးတဲ့​လူ မတ်တတ်ရပ်​နေပါ​စေ၊ ကိုယ်က​တော့ နေရာ​ရအောင် လု​ထိုင်​မလား။— အဲဒီလိုလုပ်ရင် ယေရှု ကြိုက်ပါ့မလား။—

တို့တစ်တွေ ဘာလုပ်လုပ် ယေရှု အရေး​မစိုက်​ပါဘူး​လို့ တစ်ယောက်ယောက် ပြော​လိမ့်မယ်။ ကလေးတို့​ကော ဒီလိုပဲ ယူဆသလား။— ဖာရိရှဲ​အိမ်က စားသောက်ပွဲ​မှာ လူတွေ နေရာ​ရွေးတာကို ယေရှု စောင့်ကြည့်​ခဲ့​တယ်။ ဒီနေ့လည်း တို့တစ်တွေ လုပ်သမျှကို စိတ်ဝင်တစား ကြည့်နေ​တယ်လို့ မထင်​ဘူး​လား။— အခု​ဆိုရင် ယေရှု ကောင်းကင်မှာ ရှိနေပြီ​ဖြစ်တဲ့အတွက် တို့တစ်တွေကို စောင့်ကြည့်​လို့ ကောင်းတဲ့​နေရာမှာ ရှိနေတယ်​လေ။

 တစ်ယောက်ယောက်​က ပထမ​နေရာ လု​ရင် ပြဿနာ တက်​နိုင်တယ်။ စကားများ​တာ​တို့၊ စိတ်ဆိုးတာ​တို့ ဖြစ်တတ်တယ်။ တစ်ခါတလေ ကလေးတွေ ဘတ်စကား အတူတူ စီးကြတဲ့​အခါမှာ အဲဒီလိုမျိုး ဖြစ်တတ်တယ်။ ကား​တံခါး ဖွင့်လိုက်တာနဲ့ သူ့​ထက်​ငါ​ဦး​အောင် လုတက်ကြတယ်။ အကောင်းဆုံး​နေရာ၊ ပြတင်းပေါက်​နားက ထိုင်ခုံတွေကို လိုချင်ကြတယ်​လေ။ အဲဒီတော့ ဘာဖြစ်​တတ်သလဲ။— အချင်းချင်း စိတ်ဆိုး​စရာတွေ ဖြစ်လာ​တတ်တယ်။

ပထမ​နေရာ လိုချင်​ရင် ပြဿနာ အများကြီး ဖြစ်လာနိုင်တယ်။ ယေရှုရဲ့ တမန်တော်တွေ​ကြားမှာ​တောင် ပြဿနာ တက်ခဲ့​ကြသေးတယ်။ ဒီ​စာအုပ် အခန်း ၆ မှာ သိခဲ့ရတဲ့​အတိုင်း တမန်တော်တွေ​ထဲမှာ ဘယ်သူ အကြီးမြတ်ဆုံးလဲ​ဆိုပြီး ငြင်းခုံခဲ့​ကြတယ်။ ယေရှု ဘာလုပ်ခဲ့သလဲ။— ဟုတ်တာပေါ့၊ သူတို့​အမှား​ကို ပြင်ပေး​ခဲ့​တယ်။ ဒါပေမဲ့ နောက်ပိုင်းမှာ သူတို့ ထပ်​ငြင်းခုံကြ​ပြန်တယ်။ ဘယ်​ကနေ ဘယ်လို​စ​ဖြစ်သလဲ​ဆိုတာ ကြည့်ရအောင်။

တမန်တော်တွေ​နဲ့  တခြား​လူတွေဟာ​ ယေရှု​နဲ့​အတူ  ဂျေရုဆလင်​မြို့​ကို နောက်ဆုံး​အကြိမ်  သွား​နေကြ​တယ်။ ယေရှု​က သူ့ရဲ့​နိုင်ငံ​အကြောင်း ပြောပြ​ထား​တော့ ယာကုပ်နဲ့ ယောဟန်တို့က ယေရှုနဲ့အတူ အုပ်ချုပ်​မယ့်​အကြောင်းကို တွေး​နေကြ​တယ်။ အဲဒီ​အကြောင်းကို သူတို့​မိခင် ရှာလုံ​ကိုတောင် ပြောပြ​ကြသေးတယ်။ (မဿဲ ၂၇:၅၆။ မာကု ၁၅:၄၀) ဒါနဲ့ ဂျေရုဆလင်​မြို့ကို သွား​နေတုန်း ရှာလုံက ယေရှု​ဆီ လာ​ဦးညွှတ်​ပြီး တောင်းဆို​စ​ရာ​လေး​ရှိတယ်​တဲ့။

ယေရှု​က “ဘာ​လိုချင်သလဲ” လို့ မေးတော့ ရှာလုံက ယေရှုရဲ့ နိုင်ငံမှာ သူ့သား​နှစ်ယောက်ကို ဘယ်​ဘက်မှာ​တစ်ယောက် ညာဘက်မှာ​တစ်ယောက် ထိုင်​ခွင့်​ပေးပါလို့ တောင်းဆိုတယ်။ ယာကုပ်​နဲ့ ယောဟန်​က သူတို့​မိခင်​က​တစ်ဆင့် အဲဒီလို​တောင်းလျှောက်တာကို ကျန်​တမန်တော်​ဆယ်ပါး သိ​သွားတဲ့အခါ ဘယ်လို​ဖြစ်​ကြမယ် ထင်သလဲ။—

ဟုတ်တယ်၊ ယာကုပ်နဲ့ ယောဟန်တို့ကို အကြီးအကျယ် စိတ်ဆိုးကြတာပေါ့။ ဒါကြောင့် ယေရှု​က တမန်တော်​အားလုံးကို အကြံဉာဏ်​ကောင်း ပေးတယ်။ လောက​အုပ်စိုးရှင်​တွေဟာ  သြဇာ​ကြီးသူ၊ အရေးပါ​သူ သိပ်​ဖြစ်ချင်ကြတယ်။ လူတကာ​ကို အာဏာပြ​တတ်ကြတယ်​တဲ့။ ဒါပေမဲ့ ယေရှုရဲ့ နောက်လိုက်​တွေ​ကတော့ အဲဒီလို မဖြစ်​ရ​ဘူး။ အဲဒီအစား “ပထမ​နေရာ ရချင်​သူ​တိုင်း ကျွန်​ဖြစ်ရမယ်” ဆိုပြီး ယေရှု ပြောတယ်။ စဉ်းစား​ကြည့်ပါ​ဦး။—မဿဲ ၂၀:၂၀-၂၈။

ကျွန်​ဆိုတာ ဘာလုပ်​ရသလဲ သိသလား။— သူများ​ကို လုပ်ကျွေး​ပြုစု​ရတယ်၊ သူများ လုပ်ကျွေး​ပြုစု​မှာ​ကို မမျှော်လင့်​ဘူး။ အနိမ့်ဆုံး​နေရာမှာ ထိုင်တယ်၊ ထိပ်ဆုံး​နေရာမှာ မ​ထိုင်​ဘူး။ အရေးပါဆုံး ပုဂ္ဂိုလ်​လို မဟုတ်ဘဲ ဘာမှ​အရေးမပါတဲ့​လူ​လို လုပ်ဆောင်​ရတယ်။ ပထမ​နေရာ ရ​ချင်​သူဟာ ကျွန်​တစ်ယောက်လို လုပ်ဆောင်သင့်တယ်လို့ ယေရှု ပြောခဲ့တာကို ပြန်သတိရပါ။

တို့တစ်တွေ​အတွက် ဘာ​အဓိပ္ပာယ် ရှိတယ်လို့ ထင်သလဲ။— အစေခံကျွန်​တစ်ယောက်ဟာ အကောင်းဆုံး​နေရာ ဘယ်သူ​ထိုင်​မယ်​ဆိုတာ သခင်​နဲ့ အငြင်းပွား​မလား။ ဒါမှမဟုတ် ဘယ်သူ အရင်​စား​မယ်​ဆိုတာ ငြင်းခုံ​မလား။ ကလေးတို့ ဘယ်လို ထင်သလဲ။— ကျွန်ဟာ သခင်​ကို အမြဲတမ်း ဦးစား​ပေးတယ်ဆိုတာ ယေရှု ရှင်းပြတယ်။—လုကာ ၁၇:၇-၁၀။

ဒီတော့ ပထမ​နေရာ ရဖို့ ကြိုးစား​မယ့်​အစား တို့တစ်တွေ ဘာ​လုပ်သင့်သလဲ။— ဟုတ်တယ်၊ အစေခံကျွန်​တစ်ယောက်​လို ဖြစ်သင့်တယ်။ ကိုယ့်ထက် သူများ​ကို ဦးစား​ပေးတာကို ဆိုလို​တယ်။ တခြား​လူတွေဟာ ကိုယ့်ထက် အရေးပါတယ်လို့ သဘော​ထားတာကို ပြောချင်တာ။ သူများ​ကို ဦးစား​ပေးနိုင်တဲ့ နည်းတွေကို စဉ်းစား​ကြည့်​နိုင်မလား။— စာမျက်နှာ ၄၀ နဲ့ ၄၁ ကို​ဖွင့်ပြီး သူတစ်ပါး အကျိုးဆောင်​ပေးခြင်း​ဖြင့် ဦးစား​ပေးနိုင်တဲ့ နည်း​တချို့ကို ပြန်​ကြည့်လိုက်ပါဦး။

ကြီးမြတ်တဲ့​ဆရာဟာ သူတစ်ပါး အကျိုးဆောင်​ပေးခြင်း​ဖြင့် သူတို့ကို ဦးစား​ပေးခဲ့တာကို ကလေးတို့ မှတ်မိမှာပါ။ တမန်တော်တွေ​နဲ့ အတူ​ရှိခဲ့တဲ့ နောက်ဆုံး​ညမှာ ယေရှုဟာ စားပွဲ​က​ထပြီး တမန်တော်တွေရဲ့ ခြေကို​တောင် ဆေး​ပေးခဲ့တယ်။ တို့တစ်တွေလည်း သူတစ်ပါး အကျိုးဆောင်ခြင်း​အားဖြင့် သူများ​ကို ဦးစား​ပေးမယ်​ဆိုရင် ကြီးမြတ်တဲ့​ဆရာရော၊ ဆရာရဲ့​ဖေဖေ ယေဟောဝါ ဘုရားသခင်ပါ နှစ်သက်သဘောကျ​မှာ​ကွဲ့။