“Qatt tkunu ansjużi dwar l-​għada, għax l-​għada se jkollu l-​ansjetajiet tiegħu.”—MATTEW 6:34.

Xi jfisser: L-​ansjetajiet taʼ kuljum huma parti mill-​ħajja. Imma l-​ansjetajiet t’għada żżidhomx maʼ tal-​lum. Ipprova għix ġurnata b’ġurnata.

• L-​istress jistaʼ jagħmilna ansjużi. Allura pprova dan: L-​ewwel, trid taċċetta li ċertu stress ma tistax tevitah. Li tinkwieta fuq affarijiet li m’għandekx kontroll fuqhom iżidlek l-​istress. It-​tieni, ifhem li spiss l-​affarijiet li ninkwetaw dwarhom ma jiġrux.

‘L-​għerf li ġej minn fuq hu raġunevoli.’—ĠAKBU 3:17.

Xi jfisser: Tkunx perfezzjonist. Tistenniex iżżejjed minnek innifsek jew minn oħrajn.

• Kun modest, agħmel miri raġunevoli, u qis il-​limitazzjonijiet tiegħek u dawk t’oħrajn. Meta tagħmel dan, se tnaqqas l-​istress kemm għalik kif ukoll għal ħaddieħor u se tagħmilha eħfef għalik u għal oħrajn li jkollkom iżjed suċċess. Ukoll, tgħallem idħaq. Meta tidħaq—anke meta xi ħaġa tmur żmerċ—l-​istress jitnaqqas u jkollok burdata aħjar.

“Bniedem taʼ dixxerniment iżomm spirtu kalm.”—PROVERBJI 17:27.

Xi jfisser: Emozzjonijiet negattivi, bħal rabja, ansjetà, u nuqqas taʼ paċenzja, jistgħu ma jħallukx taħseb ċar, allura pprova ibqaʼ kalm.

• Identifika dak li jistressjak u nnota kif tirreaġixxi. Pereżempju, meta tħossok stressjat innota l-​ħsibijiet, l-​emozzjonijiet, u l-​imġiba tiegħek, forsi anke żżomm nota tagħhom bil-​miktub. Billi ssir taf kif tirreaġixxi għall-​istress, int għandek mnejn tkun tistaʼ tikkontrollah b’mod iktar effettiv. Ukoll, aħseb kif tneħħi affarijiet li jagħmlulek stress f’ħajtek. Jekk dan mhux realistiku, fittex modi kif tnaqqas l-​effett tagħhom fuqek, forsi billi tara kif tistaʼ tagħmel xi biċċa xogħol aħjar jew torganizza l-​ħin tiegħek.

• Ipprova ara l-​affarijiet minn lenti oħra. Xi ħaġa li tistressja lilek tistaʼ ma tistressjax lil ħaddieħor. Id-​differenza tistaʼ tkun fil-​ħarsa tiegħek lejn l-​affarijiet. Ikkunsidra dawn it-​tliet suġġerimenti:

  1. Taqbadx u taħseb ħażin f’kull ħaġa li tiġri madwarek. Xi ħadd jistaʼ jaqbżek fi kju. Jekk taħseb fuq kemm kienet pastaża dil-​persuna, tistaʼ tibda tirrita ruħek. Minflok, għala ma taħsibx li kellha raġuni tajba għal dak li għamlet? Forsi jkollok raġun!

  2. Ara n-​naħa pożittiva taʼ sitwazzjoni. Se jkollok inqas stress jekk tuża l-​ħin li ddum tistenna f’ajruport jew biex tidħol għand it-​tabib f’li toqgħod taqra jew tagħmel xi xogħol jew tara l-​e-​mails.

  3. Tiffokax fuq affarijiet żgħar. Staqsi lilek innifsek, ‘Din il-​problema se naraha daqshekk kbira għada jew il-​ġimgħa d-​dieħla?’ Agħmel differenza bejn kwistjonijiet żgħar u dawk iktar serji.

“Ħa jsir kollox bid-​deċenza u bl-​ordni.”—1 KORINTIN 14:40.

Xi jfisser: Ipprova kun organizzat, jew żomm l-​ordni, fil-​ħajja tiegħek.

• Kulħadd jieħu pjaċir ikollu ammont raġunevoli taʼ ordni fil-​ħajja. Ħaġa li tistaʼ twassal għal diżordni u stress hi li toqgħod tittratieni, u dan jistaʼ jwassal għal lista li dejjem tiżdied taʼ xogħol nofsu lest. Għala ma tipprovax dawn iż-​żewġ suġġerimenti?

  1. Agħmel skeda realistika u żomm magħha.

  2. Identifika u kkoreġi kwalunkwe attitudni li ġġiegħlek tittratieni.

“Aħjar id mimlija bil-​mistrieħ milli tnejn mimlijin bix-​xogħol iebes u l-​ġiri wara r-​riħ.”—EKKLEŻJASTI 4:6.

Xi jfisser: Nies li ħsiebhom biss biex jaħdmu jistgħu jċaħħdu lilhom infushom mill-​benefiċċji taʼ żewġ idejn “mimlijin bix-​xogħol iebes.” Għandhom mnejn ma jibqgħalhomx ħin u enerġija biex igawdu dak li ħadmu għalih.

• Ara li jkollok ħarsa realistika tax-​xogħol u l-​flus. Iżjed flus ma jfissirx iżjed kuntentizza jew inqas stress. Fil-​fatt, il-​kuntrarju taʼ dan jistaʼ jkun veru. “L-​abbundanza taʼ l-​għani mhix qed tħallih jorqod,” jgħid Ekkleżjasti 5:12. Għalhekk, tonfoqx flus iżjed milli għandek.

• Ħalli l-​ħin biex tirrilassa. Int tnaqqas l-​istress meta tagħmel affarijiet li tieħu pjaċir tagħmilhom. Madankollu, rikreazzjoni passiva, bħal li tara t-​televixin, tistaʼ ma tgħinx.

• Żomm it-​teknoloġija f’postha. Evita li toqgħod il-​ħin kollu tiċċekkja l-​e-​mails, il-​messaġġi, jew is-​siti tal-​midja soċjali. Sakemm iċ-​ċirkustanzi ma jitolbux mod ieħor, tiċċekkjax e-​mails li għandhom x’jaqsmu max-​xogħol meta ma tkunx xogħol.

“It-​taħriġ tal-​ġisem hu taʼ benefiċċju.”—1 TIMOTJU 4:8.

Xi jfisser: Eżerċizzju regolari hu tajjeb għal saħħa aħjar.

• Żviluppa drawwiet tajbin għas-​saħħa. L-​attività fiżika tistaʼ tgħinek tħossok aħjar u ttejjeb il-​mod kif ġismek jirreaġixxi għall-​istress. Kul ikel nutrittiv, u pprova evita li taqbeż xi ikla. Kun ċert li tistrieħ biżżejjed.

• Evita “soluzzjonijiet” taʼ ħsara għall-​istress, bħat-​tipjip jew l-​abbuż mid-​drogi u l-​alkoħol. Fl-​aħħar mill-​aħħar, dawn iżidulek l-​istress, forsi billi jiħdulek saħħtek u l-​flus li tkun ħdimt iebes għalihom.

• Mur għand it-​tabib tiegħek jekk l-​istress jiżdied. Li titlob għajnuna professjonali mhix xi ħaġa taʼ mistħija.

‘Aċċertaw ruħkom minn dak li hu iktar importanti.’—FILIPPIN 1:10.

Xi jfisser: Aħseb sew dwar l-​affarijiet iktar importanti.

• Agħmel lista tal-​affarijiet li trid tagħmel skont l-​importanza tagħhom. Dan se jgħinek tiffoka fuq xogħlijiet iktar importanti minn oħrajn, u b’hekk se tkun taf x’tistaʼ ma tagħmilx immedjatament, liema affarijiet tagħti lil xi ħadd biex jagħmilhomlok, jew liema saħansitra twarrab.

• Żomm nota taʼ kif tuża l-​ħin tiegħek għal ġimgħa. Imbagħad ara kif tistaʼ tużah aħjar. Iktar ma tikkontrolla l-​mod kif tqattaʼ ħinek, inqas se tħossok stressjat.

• Ħalli ftit ħin biex tirrilassa. Anke ħinijiet qosra jistgħu jerġgħu jagħtuk is-​saħħa u jnaqqsulek l-​istress.

“L-​ansjetà f’qalb il-​bniedem ittaqqalha, imma l-​kelma t-​tajba tferraħha.”—PROVERBJI 12:25.

Xi jfisser: Kliem ħelu u li jintqal b’qalb tajba minn oħrajn jistaʼ jinkuraġġik.

• Tkellem dwar dak li tħoss maʼ xi ħadd li jifhmek. Persuna li tafdaha tistaʼ tgħinek tara l-​affarijiet b’mod differenti jew anke ssib soluzzjoni li ma tkunx ħsibt fiha qabel. Li biss tiftaħ qalbek jistaʼ jgħinek tħossok aħjar.

• Itlob l-​għajnuna. Tistaʼ tagħti xi biċċa xogħol milli għandek lil ħaddieħor jew tagħmilha flimkien miegħu?

• Jekk xi ħadd li taħdem miegħu jistressjak, fittex mod kif ittejjeb is-​sitwazzjoni. Pereżempju, tistaʼ int b’qalb tajba u tattika tgħidlu kif iġiegħlek tħossok? (Proverbji 17:27) Jekk dan ma jirnexxix, tistaʼ tnaqqas il-​ħin li tqattaʼ maʼ din il-​persuna?

“Henjin dawk li huma konxji tal-​bżonn spiritwali tagħhom.”—MATTEW 5:3.

Xi jfisser: Bħala bnedmin, neħtieġu iktar milli jkollna x’nieklu, x’nilbsu, u dar fejn noqogħdu. Aħna għandna l-​bżonn spiritwali, jew il-​gwida mingħand Alla. Sabiex inkunu ferħanin, għandna nkunu konxji taʼ dan il-​bżonn u nieħdu ħsiebu.

• It-​talb jistaʼ jgħin ħafna. Alla jistiednek ‘titfaʼ l-​ansjetà kollha tiegħek fuqu, għax hu jimpurtah minnek.’ (1 Pietru 5:7) Bit-​talb u l-​meditazzjoni jistaʼ jkollok paċi tal-​moħħ vera.—Filippin 4:6, 7.

• Aqra affarijiet li se jressquk qrib t’Alla. Il-​prinċipji diskussi f’din ir-​rivista huma meħudin mill-​Bibbja, li nkitbet biex tissodisfa l-​bżonn spiritwali tagħna. Dawn il-​prinċipji jippromwovu “l-​għaqal u l-​abbiltà li taħseb.” (Proverbji 3:21) Għala ma tagħmilx mira li taqra l-​Bibbja? Il-​ktieb tal-​Proverbji jistaʼ jkun ideali li tibda minnu.