Israyɛll nebã le wa n basa a Zeova n pʋʋsd bõn-naandse. Amon nebã sẽn wa n zab ne-bã, bõn-naandsã pa tõog n sõng-b ye. Amon nebã nams-b-la yʋʋm wʋsgo. B wa n baas n yeela a Zeova yaa: ‘Tõnd maana yel-wẽnde. D kotame tɩ f fãag tõndo.’ Israyɛll nebã sãama b bõn-naandsã, la b le sɩng a Zeova tũubu. A Zeova ra pa rat tɩ b ket n namsdẽ ye.

A Zeova yãka ned yʋʋr sẽn boond t’a Zɛfte, t’a na n lʋɩ taoor tɩ b tɩ zab ne Amon nebã. A Zɛfte pʋʋsa a Zeova yaa: ‘Fo sã n sõng tõnd tɩ d tõog zabrã, m sã n lebg n watẽ, ned ning sẽn na n yi mam zakẽ wã pipi n sɛg maamã, yẽ soab na n lebga foo n so.’ A Zeova kelga a Zɛfte pʋʋsgã, n sõng-b tɩ b tõog zabrã.

 A Zɛfte sẽn lebg n wat yirã, a bi-puglã n yɩ pipi n sɛg-a. Yaa a Zɛfte bi-yende. A ra wẽeda sɩlsaka, la a saoodẽ. A Zɛfte na n maana wãna? A tẽega a sẽn pʋlem a Zeova bũmb ningã, n yeel yaa: ‘Wui m biig sõngo. Mam sũurã sãamame. Mam pʋlma a Zeova bũmbu. Sẽn na yɩl n pids-a, m tog n talla foo n kẽng sɛk-roogẽ wã Silo, tɩ f tɩ tʋm be f yõor tɛka.’ La a bi-puglã yeel-a lame yaa: ‘M baaba, fo sã n pʋlma a Zeova bũmbu, f segd n pidsame. M kotame bal tɩ f bas tɩ m kẽng tãmsẽ wã ne m zo-rãmbã kiis a yiibu. Rẽ poore, m na kẽng sɛk-roogẽ wã.’ A Zɛfte bi-puglã kell n tʋma sɛk-roogẽ wã a yõor tɛka. Yʋʋmd fãa, a zo-rãmbã ra kẽnda Silo n get-a.