Rao n da zĩ wẽnd-doogã zak noor daar fãa n bõosdẽ. A ra pa tõe n kẽn ye. La daar a ye zaabre, a yãa a Pɩyɛɛr ne a Zã sẽn kẽed wẽnd-doogẽ wã, t’a yeel-b yaa: ‘M bõosda ligdi.’ La a Pɩyɛɛr leokame: ‘Mam na n kõo foo bũmb sẽn tar yõod n yɩɩd ligdi. Ne a Zeezi yʋʋre, yik n kẽne!’ A Pɩyɛɛr sõng-a lame t’a yiki, n sɩng kẽna. Nebã sũy yɩɩ noog b sẽn yã yel-solemdã, hal tɩ wʋsg sak n lebg a Zeezi karen-biisi.

Maan-kʋʋdbã ne Sadiseẽ-rãmbã sũyã yikame, tɩ b yõk tʋm-tʋmdbã n kẽng Sãnedrẽ wã, tũudmã taoor dãmb nengẽ, tɩ b na n kao b bʋʋdo. B soka tʋm-tʋmdbã yaa: ‘Ãnd n kõ yãmb tõog tɩ y sãoog rao wã?’ T’a Pɩyɛɛr leoke: ‘Yaa a Zeezi Kirist, rao ning yãmb sẽn kʋ wã, n kõ tõnd tõogo.’ Tũudmã taoor dãmb zab-b lame n yeele: ‘Da le saag-y n gom-y a Zeezi yell ye.’ La b yeelame: ‘Tõnd pa tõe n sĩnd ye. Yaa tɩlɛ tɩ d gom a Zeezi yelle.’

B sẽn bas a Pɩyɛɛr ne a Zã wã bala, b tɩ togsa karen-biis a taabã bũmb ning sẽn maanã. La b naaga taab n pʋʋs n yeel a Zeova yaa: ‘D bõos tɩ f sõng tõnd tɩ d tall raoodo, n kell n tʋm fo tʋʋmdã.’ A Zeova kõ-b-la a vʋʋsem sõngã, tɩ b tõog n kell n moon koɛɛgã la b sãoog bãad-rãmba. A Zeezi karen-biisã sõor ra tara paasgo. Sadiseẽ-rãmbã ra maanda sũ-kiiri, hal n yõk tʋm-tʋmdbã n kẽes bãens-roogo. La yʋng sẽn ta, a Zeova tʋma malɛk t’a wa pak bãensã roogo, la a yeel tʋm-tʋmdbã yaa: ‘Leb-y wẽnd-doogẽ wã n tɩ zãms nebã.’

Beoogã sẽn vẽege, neb n tɩ yeel Sãnedrẽ wã neb yaa: ‘Bãensã roog kʋɩlens ket n pagame, la rap nins yãmb sẽn kẽes be wã yiime. B bee wẽnd-doogẽ wã n zãmsd nebã.’ Sãnedrẽ wã neb kɩtame  tɩ b le yõg tʋm-tʋmdbã n wa. Maan-kʋʋdb kãsmã yeel-b lame: ‘Tõnd yeela yãmb tɩ y ra le gom a Zeezi yell ye.’ La a Pɩyɛɛr leokame: “Tõnd tog n saka Wẽnnaam n yɩɩd ninsaalbã.”

Tũudmã taoor dãmb sũyã yikame hal tɩ b rat n kʋ tʋm-tʋmdbã. La Fariziẽ a ye yʋʋr sẽn boond t’a Gamaliyɛll yikame n yeel yaa: ‘Maan-y gũusgu. Tõe tɩ Wẽnnaam bee ne nin-kãensã. Yãmb rat n zaba ne Wẽnnaam sɩda?’ B kelga a Gamaliyɛlle. La b pãba tʋm-tʋmdbã ne kalwaase, n yeel-b tɩ b ra le moon koɛɛgã, n yaool n bas-b tɩ b looge. La rẽ pa kɩt tɩ b pa le moon ye. B kell n moona koɛɛgã ne raoodo, wẽnd-doogẽ wã la zak-zaka.