1, 2. Bõe yĩng tɩ b ra segd n kogl pagã yagengã?

D SÃ N dat n bãng a Zeova raabã sẽn na n pids to-to wã, yaa tɩlae tɩ d wʋm Biiblã pipi bãngr-gomdã võore. Edɛn kɩɩsgã poore, Wẽnnaam yeela woto: “Mam na n ninga beem foo [a Sʋɩtãan] ne pagã sʋka, la fo yagengã ne yẽ yageng sʋka.” Beemã sɩd na n yɩɩ beem tɛkẽ. Bala, a Zeova paasame: “Yẽ [pagã] yageng na n pogla fo zugu, la fo [a Sʋɩtãan] na n pogla yẽ nao-kãsenkãare.” (Sɩng. 3:15) Beem ning sẽn na n zĩnd waafã ne pagã sʋkã na n talla pãng wʋsgo, hal t’a Sʋɩtãan na n maan a sẽn tõe fãa sẽn na yɩl n sãam pagã yagengã.

² Rẽnd yɩɩl-gʋlsdã sẽn pʋʋs Wẽnnaam a nin-buiidã yĩng n yeel bũmb ningã pa ling tõnd ye. A yeela woto: “Gese, yãmb bɛɛbã maanda bʋrga, yãmb kisgdbã zẽkda b zutu. Bãmb sɩfda yãmb nebã ne sɩlem n tagsd b sẽn na n maan neb nins yãmb sẽn gũudã n yetẽ yaa: ‘Wa-y tɩ d menes bãmb tɩ b yi dũniyã buud sʋka’ ” (Yɩɩl 83:3-5) A Sʋɩtãan sẽn da rat yaa a menes buud ning pʋgẽ yagengã sẽn na n dogã, wall a kɩt tɩ b kalem buud a taabã. Rẽ n so t’a Zeova maan kaool a taab sẽn na yɩl n kogl yagengã, la a wilg t’a Rĩungã na n pidsa a raabã.

3, 4. a) Wakat bʋg la tõogã kaool sɩng-yã, la bõe la Israyɛll nebã pʋlem tɩ b na n maaname? b) Tõogã kaool yõod ra yaa bõe?

³ A Abrahaam, a Izaak la a Zakoob yagensã sẽn wa n lebg milyõ-rãmbã, a Zeova sigl-b lame tɩ b lebg Israyɛll buudã. A kõ-b-la tõogã n maan kaool ne b buudã tõre, t’a Moiiz yaa kaool-kãng sɛ-yõkda. Israyɛll nebã pʋlmame tɩ b na n saka tõogã. Biiblã yeela woto: “[A Moiiz] rɩka kãabgã sebr n karem a koɛɛgã tɩ nebã fãa wʋm. La bãmb yeelame: ‘Tõnd na n sakame n maan bũmb ning fãa Zu-soabã sẽn yeelã.’ Dẽ, a Moiiz rɩka [lols nins a sẽn kʋ maoongã] zɩɩmã n mes nebã n yeele: ‘Yãoã yaa kãabg zɩɩm Zu-soabã sẽn maan ne yãmb ne gom-kãensã fãa.’ ”—Yik. 24:3-8.

⁴ Yɩɩ yʋʋmd 1513 sẽn deng a Zezi rogmã la tõogã kaoolã sɩng-yã. Kaool-kãng maasem yĩnga, Wẽnnaam yãka Israyɛll buudã t’a lebg buud a sẽn so. Rẽ tɛka, a Zeova lebga b Bʋ-kaooda, b Rĩma, la b Soaala. (Ezai 33:22) Israyɛll buudã kibar wilgda Wẽnnaam noyã tũub sẽn wat ne bark ninsã, la b kɩɩsg sẽn wat ne yɛl ninsã me. Tõogã ra gɩdga Israyɛll nebã tɩ b ra kẽ kãadem ne bu-zemsã neb ye. Sẽn paase, b ra pa segd n pʋʋs bõn-naands ye. Rẽnd tõogã kaool ra kogenda Israyɛll buudã sẽn yaa buud ning pʋgẽ a Abrahaam yagengã sẽn da na n yi wã.—Yik. 20:4-6; 34:12-16.

5. a) Ne Tõogã kaool maasem, Israyɛll buudã ra tõe n maana bõe? b) Bõe n kɩt tɩ Wẽnnaam raag Israyɛll buudã n base?

⁵ Tõogã kaool maasem yĩng me, b ra yãka neb tɩ b yaa maan-kʋʋdb Israyɛlle. Maan-kʋʋdbã ra makda neb sẽn na n wa tʋm maan-kʋʋr tʋʋmd tɩ naf ãdem-biisã n yɩɩge. (Heb. 7:11; 10:1) Sɩd me, tõogã kaool ra paka sor tɩ Israyɛll ‘buudã na n yɩ maan-kʋʋdba.’ La rẽ ra yaa Israyɛll nebã sẽn na n tũ a Zeova noyã. (Karm-y Yikr 19:5, 6.) La b pa tũ ye. Mesi wã sẽn yaa a Abrahaam yagengã meng-mengã sẽn wa n wa wã, b pa sak-a ye. Rẽ n so tɩ Wẽnnaam me raag-b n base.

6. Tõogã yõod ra yaa bõe?

⁶ Israyɛll nebã sẽn pa kell n sak Wẽnnaamã yĩnga, b buudã pa lebg maan-kʋʋdb ye. La yellã pa be ne tõogã ye. Tõogã yõod ra yaa kogl buud ning pʋgẽ yagengã sẽn na n yi wã, la a sõng nebã tɩ b bãng Mesi wã sẽn yaa a soaba. Kiristã sẽn wa n wa tɩ nebã bãng-a wã, tõogã tʋʋmd saame. Biiblã yeelame: “Kirist yaa tõog tɛka.” (Rom 10:4) La sokr n kete: Ãnd dãmb n na n paam n yɩ buud sẽn yaa  maan-kʋʋdbã? A Zeova maana kaool a to sẽn na yɩl n yãk neb a taab tɩ b yɩ bu-paalga.

7. Bõe la a Zeova vẽneg no-rɛɛs a Zeremi t’a togse?

⁷ Yʋʋm wʋsg nand tɩ tõogã kaool sa, a Zeova vẽnega no-rɛɛs a Zeremi t’a togs tɩ yẽ na n maana “kaool-paalg” ne Israyɛll buudã. (Karm-y Zeremi 31:31-33.) Kaool-kãng na n yɩɩ toor ne tõogã kaoolã. Bala kaool-paalgã maasem yĩnga, nebã na n tõog n paama b yel-wẽnã sugr tɩ pa tũ ne rũms maoong ye. Wãn to?

8, 9. a) A Zezi zɩɩmã sẽn daagã kɩtame tɩ d tõe n paam bõe? b) Bõe la neb nins sẽn be kaool-paalgã pʋgẽ wã na n tõog n maane? (Ges-y sõsgã sɩngrẽ fotã.)

⁸ Yʋʋm kobs loogr poore, a Zezi wilga a tʋm-tʋmdbã b sẽn segd n maand Soaalã zaabr dɩɩbã to-to. Yɩɩ yʋʋmd 33 Nizã kiuug rasem 14. Wakat kãnga, a goma divẽ wã yelle, n yeel a tʋm-tʋmdb 11 wã sẽn kell n pa ne-a wã woto: “Bõn-yũudl-kãngã yaa mam zɩɩm sẽn yaa kãab-paalg zɩɩm sẽn daag yãmb yĩnga.” (Luk 22:20) A Matɩe wilgame t’a Zezi yeela woto: “Yãoã yaa mam zɩɩm sẽn yaa kãab-paalg zɩɩm sẽn daag neb wʋsg yel-wẽnã sugr yĩnga.”—Mat. 26:27, 28.

⁹ A Zezi zɩɩmã sẽn daagã n kɩt tɩ kaool-paalgã sɩnge. Leb n yaa a Zezi zɩɩmã n kɩt tɩ nebã tõe n paam b yel-wẽnã sugr wakat fãa yĩnga. A Zezi pa naag kaool-paalgã pʋgẽ ye. Bala a sẽn pa tar yel-wẽndã, a pa baood tɩ b kõ-a sugr ye. La Wẽnnaam na n kɩtame tɩ ãdem-biisã rɩ a Zezi maoongã nafa. A na n zaeya wẽn-sakdb kẽer me ne a vʋʋsem sõngã, tɩ b lebg a “kamba.” (Karm-y Rom dãmb 8:14-17.) Wẽnnaam nifẽ, nin-kãens pa le tar yel-wẽnd ye. Rẽnd b yaa wa a Bi-ribl a Zezi sẽn pa tar yel-wẽndã. B “yaa pʋɩt-n-taas ne Kirist.” Sẽn paase, b na n tõog n maana bũmb ning Israyɛll buudã sẽn pa tõog n maanã. Bãmb n na n yɩ ‘buud sẽn yaa maan-kʋʋdba,’ tɩ yaa zu-zẽkr n kõ-ba. Tʋm-tʋmd a Pɩɛɛr yeela woto: “Yãmb yaa nin-tũusdsi, la naam maan-kʋʋdba, la buud sẽn yaa sõma, la nin-daadse, n na n wilg sẽn bool-a yãmb tɩ y yi lik pʋgẽ n kẽ bãmb vẽen-kãsengã pʋgẽ wã bõn-sõma wã fãa.” (1 Pɩɛ. 2:9) Kaool-paalgã tara yõod wʋsgo. Bala, a paka sor tɩ kiris-neb na n paam n yɩ a Abrahaam yagengã yagen-taase.

10. Wakat bʋg la kaool-paalgã sɩng-yã? Bõe yĩng tɩ ra pa tõe n yɩ wakat sẽn deng rẽ?

¹⁰ Wakat bʋg la kaool-paalgã sɩng-yã? Pa yɩ Soaalã zaabr dɩɩbã sasa ye. Bõe yĩnga? Bala, sẽn na yɩl tɩ kaoolã sɩnge, a Zezi ra segd n leba saasẽ, n tɩ wilg Wẽnnaam a maoongã yõodo. Sẽn paase, neb nins sẽn na n yɩ ‘pʋɩt-n-taas ne Kiristã’ segd n deng n paama vʋʋsem sõngã zaeebo. Rẽnd kaool-paalgã sɩnga yʋʋmd 33 Pãntekotã daare, wakat ning a Zezi karen-biisã sẽn paam vʋʋsem sõng zaeebã.

11. Wãn to la kaool-paalgã pak sor tɩ zʋɩf-rãmb la bu-zems neb tõog n naag taab n lebg Israyɛll sẽn yaa Wẽnnaam dẽndã? B yaa bãmb b wãna?

¹¹ A Zeova sẽn wa n vẽneg a Zeremi t’a togs tɩ yẽ na n maana kaool-paalg ne Israyɛllã, wilgame tɩ tõogã kaoolã ra na n wa saame. Kaool-paalgã sẽn sɩngã, tõogã tʋʋmd saame. (Heb. 8:13) Rẽ tɛka, Wẽnnaam nifẽ, zʋɩf-rãmb nins sẽn tẽedã ne bu-zemsã neb nins  sẽn pa kẽ bãong n yaool n tẽedã fãa lebga bõn-yɛnga. Bala, bãmb “bãong yaa sũur yelle, Sɩɩg Sõng sẽn maanda, la ka tõog yĩng ye.” (Rom 2:29) Wẽnnaam sẽn maan kaool-paalgã ne-bã, a ninga a tõodã “bãmb pʋ-tẽerẽ, la [a] gʋls bãmb b sũyã pʋsẽ.” (Heb. 8:10) Neb nins sẽn na n zĩnd kaool-paalgã pʋgẽ wã na n yɩɩ 144000. Bãmb la bu-paalgã b sẽn boond me tɩ “Israyɛll sẽn yaa Wẽnnaam dẽndã.”—Gal. 6:16; Wil. 14:1, 4.

12. Bõe n kɩt tɩ tõogã kaool ne kaool-paalgã wõnd taaba?

¹² Bũmb kẽer n kɩt tɩ tõogã kaool ne kaool-paalgã wõnd taaba. Wala makre, a Zeova maana tõogã kaool ne Israyɛll buudã, tɩ kaool-paalgã yaa ne Israyɛll sẽn yaa Wẽnnaam dẽndã. A Moiiz n da yaa tõogã kaool sɛ-yõkda, t’a Zezi yaa kaool-paalgã sɛ-yõkda. Yaa rũng zɩɩm n daag tɩ tõogã kaool sɩnge, la yaa a Zezi zɩɩmã n daag tɩ kaool-paalgã sɩnge. Tõogã kaool sasa, a Moiiz n da yaa Israyɛll buudã taoor lʋɩtã. La neb nins sẽn be kaool-paalgã pʋgẽ wã taoor lʋɩt yaa a Zezi sẽn yaa Wẽnnaam nebã Zu-soabã.—Ef. 1:22.

13, 14. a) Bõe yĩng tɩ d tõe n yeel tɩ yaa Rĩungã yĩng la Wẽnnaam maan kaool-paalgã? b) Sẽn na yɩl tɩ neb nins sẽn yaa Israyɛll sẽn yaa Wẽnnaam dẽndã tɩ rɩ naam ne Kiristã saasẽ, bõe n yaa tɩlae?

¹³ Yaa Rĩungã yĩng la Wẽnnaam sẽn maan kaool-paalgã. Bala, yaa kaool-paalgã maasem la a yãk buud sẽn yaa sõma wã, tɩ bu-kãng nebã na n kẽng saasẽ, n tɩ yɩ rĩm-dãmb la maan-kʋʋdb Rĩungã pʋgẽ. Nin-kãens la a Abrahaam yagengã yagen-taasã. (Gal. 3:29) Rẽnd kaool-paalgã wilgdame tɩ kaool ning Wẽnnaam sẽn maan ne a Abrahaamã na n pidsame.

¹⁴ Kaool-paalgã maasem, Wẽnnaam yãka neb tɩ b lebg Israyɛll sẽn yaa Wẽnnaam dẽndã. Kaool-kãng paka sor me tɩ sẽn paam-b vʋʋsem sõng zaeebã lebg “pʋɩt-n-taas ne Kirist.” La sẽn na yɩl tɩ sẽn paam-b vʋʋsem sõng zaeebã tõog n tɩ rɩ naam ne a Zezi saasẽ la b yɩ maan-kʋʋdba, kaool a to n yaa tɩlae.

15. Kaool bʋg la a Zezi maan ne a tʋm-tʋmdb nins sẽn kell n pa ne-a wã?

¹⁵ A Zezi sẽn wilg a karen-biisã b sẽn segd n maand Soaalã zaabr dɩɩbã to-to wã poore, a maana kaool ne-bã. Kaool-kãng la b sẽn boond tɩ Rĩungã kaoolã. (Karm-y Luk 22:28-30.) Kaool-kãngã yaa toor ne kaool a taabã. Bala kaool a taabã yaa a Zeova n maan ne nin-yɛng wall ne neb wʋsgo. La Rĩungã kaool yaa a Zezi n maan ne a karen-biis nins sẽn paam vʋʋsem sõng zaeebã. A Zezi sẽn yeel t’a Ba kõo yẽ soolmã, wõnda yaa a Zeova sẽn maan kaool ne-a t’a na n yɩ ‘maan-kʋʋd wakat sẽn ka sɛta, n wẽnd a Melkisedɛkã’ yell la a ra gomda.—Heb. 5:5, 6.

16. Rĩungã kaoolã paka sor tɩ sẽn paam-b vʋʋsem sõng zaeebã na n maan bõe?

¹⁶ A Zezi tʋm-tʋmdb 11 wã kell n paa ne-a a “makrã pʋgẽ n ka bas ye.” La Rĩungã kaool wilgdame tɩ b na n tɩ naaga a Zezi saasẽ, n zaoond gɛy zut n dɩ naam la b yɩ maan-kʋʋdba. La pa bãmb bal n na n paam bark-kãngã ye. A Zezi goma ne tʋm-tʋmd a Zã bõn-makr pʋgẽ, n yeel woto: “Ned ning sẽn na n tõoge, mam na kɩt tɩ yẽ zĩnd ne maam m geerã zug wa mam me sẽn tõog la m zao ne m  Ba bãmb geerã zugã.” (Wil. 3:21) Rẽnd yaa ne kiris-neb 144000 sẽn paam vʋʋsem sõng zaeebã la a Zezi maan Rĩungã kaoolã. (Wil. 5:9, 10; 7:4) Yaa kaool-kãng n pak sor tɩ b na n tɩ naag a Zezi saasẽ n dɩ naam. Yaa wa pʋg-sad sẽn na n kẽ kãadem ne rĩma. Kãadmã poore, pʋg-paalã tõe n naaga rĩma n dɩ naam. Sɩd me, Biiblã boonda sẽn paam-b vʋʋsem sõng zaeebã tɩ Kiristã “pʋg-paala,” la ‘pʋg-sad sẽn ka sãame.’—Wil. 19:7, 8; 21:9; 2 Kor. 11:2.

17, 18. a) D goma kaool a yoob yelle. Bõe la kaool fãa wilgd Rĩungã zugu? b) Bõe n kɩt tɩ d tõe n tẽ Rĩungã ne d sũy fãa?

¹⁷ Sõs-kãngã ne sẽn loog-a wã pʋgẽ, d goma kaool toor-toor yelle. D yãa kaool fãa sẽn wilgd bũmb ning Rĩungã zugu. (Ges-y zĩ-gũbr ning sẽn yet tɩ “wẽnnaam sẽn na n pids a raabã to-to” wã.) Rẽnd yaa vẽeneg tɩ Rĩungã na n tõog n maana bũmb nins fãa a sẽn segd n maanã, bala a yẽbga kaool zutu. D tõe n kɩsa sɩd ne d sũur fãa tɩ ne Rĩungã maasem, Wẽnnaam na n pidsa raab ning a sẽn tar ne ninsaalbã la ne tẽngã.—Wil. 11:15.

¹⁸ Sãmbg sẽn kae, Wẽnnaam Rĩungã la ninsaalbã zu-loeesã tɩɩm. D kɩsa sɩd ne d sũy fãa tɩ bark nins a sẽn na n wa ne wã na n nafa ãdem-biisã wakat fãa yĩnga. Woto wã, bɩ d kell n moon ne yẽesem, n wilg d taabã bark kãense!—Mat. 24:14.