A Zezi vʋʋgrã kɩtame t’a karen-biisã maneg n kɩs-a sɩda, tɩ b yẽesmã paase. Wala makre, tʋm-tʋmd a Poll toga soay n kẽng Aazimineer ne Mediterane mogrã soolmẽ, n lugl tigims la a keng a tẽed-n-taasã raood sẽn na yɩl tɩ b kell n yals kãn-kãe baa ne nebã yel-manesmã sẽn da pa sõma wã, la b sẽn da namsd kiris-nebã wʋsg b tũudmã yĩngã. Baa sẽn da pa nana wã, neb wʋsg sak n lebga kiris-neba.

B wa n kẽesa a Poll bãens roogo. Baasgo, a zĩnda be n gʋls lɛta n tool kiris-neb tigimsã, n keng b raood la a sagl-ba. A pʋd n keoog-b lame tɩ yel-kãseng n da na n wa zĩndi. Yaa sɩdã kɩɩsgã. Wẽnnaam kɩtame t’a togs tɩ neb sẽn wõnd “kata sẽn yaa wẽns” n na n yik kiris-nebã sʋka, n “zãms nebã sẽn ka sɩda, n belg karen-biisã tɩ b tũ bãmba.”—Tʋʋma 20:29, 30.

Pipi kiris-nebã zãmaan saabẽ tɩ sɩdã kɩɩsgã zoe n sɩngame. Yɩɩ wakat kãng la tʋm-tʋmd a Zã paam vẽnegr ne a Zezi maasem, n gʋls Wilgr sebrã n togs yɛl sẽn da na n wa zĩnd kaoosg zugẽ. Wa a Zã sẽn wilg sebrã pʋgẽ wã, sɩdã kɩɩsd wall ziri karen-saamb baa a ye pa na n tõog n gɩdg Wẽnnaam t’a pa kɩt tɩ tẽngã lebg arzãn tɩ nin-tɩrs vɩɩmd a zug wa a sẽn da ratã ye. “Dũniyã soolem fãa la buud fãa la goam toɛy-toɛyã fãa la nebã fãa” na n wʋma Wẽnnaam Rĩungã koe-noogã. (Wilgri 14:6) Tẽngã gill na n lebga arzãna, tɩ sẽn dat-b n maan Wẽnnaam daabã vɩɩmd a zugu.

Woto pa “koe-noog” sɩda? Bɩ y zãms Biiblã n bãng koɛɛg ning Wẽnnaam sẽn taasd nebã, la koe-kãng sẽn tõe n naf-y to-to masã menga, la beoog-daare.

Y tõe n kẽe www.jw.org n karem Biiblã. Y leb n tõe n karma d sɛb kẽer me beenẽ, wala Kelg-y Wẽnnaam n paam n vɩɩmd wakat sẽn kõn sa, ne Biiblã sɩd yetame tɩ bõe? la sɛb a taab sẽn wilgd bũmb ning sẽn kɩt tɩ d tõe n kɩs Biiblã sɩda, la d sẽn tõe n maan to-to n tũ a saglsã tɩ sõng tõnd mengã la d zakã rãmba. Y sã n dat kibay n paase, y tõe n baoa a Zeova Kaset soab n soke.

—Tika Tʋʋma, Efɛɛz rãmba, Filip rãmba, Kolos rãmba, Filemo, 1 Zã, Wilgri.