Yãmb tara sɩɩg sẽn pa kiid bɩ?

“GƲLSG Sõamyã zãnga yaa Wẽnnaam n kõ tõndo: la a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem.” Woto la tʋm-tʋmd a Poll gʋls-yã. (2 Tɩmote 3:16) N-ye, Biiblã yaa sɩd sebr sẽn yit sɩd Wẽnnaam a Zeova nengẽ.—Yɩɩl Sõamyã 83:18, NW.

A Zeova sẽn yaa bũmb fãa n paas ninsaalbã Naandã yĩnga, a mii tõnd sẽn lebgd bũmb ninga, d sã n ki. (Hebre dãmba 3:4; Wilgri 4:11) La Biiblã sẽn ya a Gomdã vʋʋsem sõng sẽn vẽneg tɩ b gʋlsã pʋgẽ, a kõo leokr sẽn yaa sɩd bũmb ning sẽn maand kũum poorã wɛɛngẽ.

Sɩɩgã yaa bõe?

Biiblã pʋgẽ, goam nins b sẽn lebg tɩ yaa “sɩɩgã” võor meng-meng yaa “vʋʋsem.” La a pa vʋʋsem bal ye. Wala makre, Biibl gʋlsd a Zak yeelame: “Yĩnga sã n ka lagem ne sɩɩga [bɩ “vʋʋsem,” NW ], a yaa kũum.” (Zak 2:26) Woto yĩnga, vɩɩmã pãng yaa bũmb ning sẽn kɩtd tɩ yĩngã vɩyã.

Pãn-kãng sẽn kõt vɩɩmã pa tõe n yɩ vʋʋs-zaalgã bɩ pemsmã bal sẽn kẽed la a yit fulfuudẽ wã ye. Bõe yĩnga? Bala vʋʋsgã sã n yalse, vɩɩmã ket n bee yĩngã pʋgẽ wakat bilf pʋgẽ “minit a wãna,” sã n yaa ne The World Book Encyclopedia. Rẽ kɩtame tɩ b tõe n modg n vʋʋg a soabã. La pãng ning sẽn kõt vɩɩmã sã n wa yi yĩngẽ wã n sa, baa b sẽn modg to-to ning fãa, b pa tõe t’a soaba vʋʋg ye. Dũniyã vʋʋsg bɩ a pemsem fãa pa tõe tɩ yĩngã bab-kɩdg fĩ-fĩi meng leb n vɩɩmd ye. La vɩɩm pãn-kãng sẽn yaa pãng ninsaal nif sẽn pa ne wã, yaa vɩɩm pãng ning sẽn kɩtd tɩ nedã yĩng la a mengã ket n vɩyã. Yaa nedã sẽn vʋʋsdã n zãad vɩɩm pãn-kãngã.—Zoob 34:14, 15.

Vʋʋsem bɩ vɩɩm pãn-kãng tʋmda ninsaalbã pʋsẽ bal bɩ? Biiblã sõngda tõnd tɩ d bãng sʋk-kãngã leokre. Rĩm a Salomo sẽn tar yamã sak n deegame tɩ ninsaalbã la rũmsã “b yiiba fãa yõe vʋʋsem yaa bũmb a yembre,” la a sʋke: “Ãnda n mi ninsaal yõe vʋʋsem sã n kẽngda yĩngri tɩ rũms rẽnd  sigd tẽnga?” (Koɛɛg Soaba 3:19-21) Woto, b yetame tɩ rũmsã ne ninsaalbã tara vʋʋsem. Rẽ yaa bõe?

D tõe n dɩka vʋʋsmã bɩ vɩɩm pãngã n mak ne kuurã sẽn marsd masĩn bɩ bũmb a to. Kuurã wã ninsaal nif sẽn pa ne wã tõe n tʋma tʋʋm toɛ-toɛya. Fãa bee ne teoog ning a sẽn marsdã. Wala makre, b tõe n tũnuga ne kuurã wã n kɩt tɩ fɛɛr wɩnge, bɩ ãmpull widgi, n kɩt tɩ ordinatɛɛr kõ kɩbaya, bɩ n kɩt tɩ televiziõ kõ imaaz rãmb la rãamde. La baa ne rẽ, kuurã wã pa rɩkd teed nins a sẽn marsdã halhaal ye. A ket n yaa pãng bala. Woto me, vɩɩm pãngã pa tar bõn-naandsã a sẽn kõt vɩɩmã zʋg bɩ b manesem ye. A pa tar zʋgo, a pa tõe n tags me. Ninsaalba la rũmsã “b yiiba fãa yõe vʋʋsem yaa bũmb a yembre.” (Koɛɛg Soaba 3:19) Woto yĩnga, ned sã n ki, vʋʋsem ning sẽn be a pʋgẽ wã pa yit n tɩ be zĩig a to n yaa wa malɛk buud ye.

Rẽ, kũ rãmbã lebga bõe? Bõe n paamd vʋʋsem bɩ vɩɩm pãng ning sẽn da be ned pʋgẽ wã a kũum poore?

“Fo na n le lebga tẽng tom yɛsa”

Pipi rao a Ãdem sẽn wa n kɩɩs Wẽnnaam noorã ne yamleoogã, A yeel-a lame: “Yaa ne fo neng tʋʋlg la f na n paam dɩɩb n dɩ n wa tãag f sẽn na n lebg tẽnga tom fo sẽn yi a pʋgẽ wã. Tɩ bõe, fo yaa tẽng tom, la fo na n le lebga tẽng tom yɛsa.” (Sɩngre 3:19) Yɛ la a Ãdem da be, Wẽnnaam sẽn da wa n pa yãk tẽngã tom n naan-a wã? Bãng-y t’a ra pa be zĩig ba a yembr ye! A ra pʋd n ka be ye. Rẽnd Wẽnnaam a Zeova sẽn wa n yeel t’a Ãdem da na n “lebga tẽng tom yɛsa,” a ra rat n yeelame t’a Ãdem na n kiime n weel n lebg tom. A Ãdem da pa na n yi tẽng zug n kẽng saasẽ ye. A Ãdem sã n ki, a ra pa na n leb n beẽ ye. A sɩbgr da yaa kũum, vɩɩm kaalem, la ra pa zĩig a to la a ra na n kẽng ye.—Rom dãmba 6:23.

Yaa wãn to yẽ ne neb a taabã sẽn ki wã? B wilga kũ-rãmbã halhaal vẽeneg Koɛɛg Soaba 9:5, 10 pʋgẽ, d sẽn karemdẽ tɩ: “Kũum ka mi bũmb ye . . . Tʋʋmd ne tagsgo la yam ne bãngre ka be kɩɩm-kulg fo sẽn dabd zĩig ninga ye.” Woto yĩnga, kũum dat n yeelame bal tɩ f ka be ye. Yɩɩl-gʋlsdã gʋlsame tɩ ned sã n ki a vɩɩm pãngã yitame, a “maana yõore n leb n leb tẽnga tomẽ. Baraar bala bãmb tagsg na n sɛɛme.”—Yɩɩl Sõamyã 146:4.

Vẽenega, kũ rãmbã pa vɩ zĩig ba a yembr ye. B pa tõe n bãng bũmb ye. B pa tõe n yã, b pa tõe n wʋme, b pa tõe n gom ne yãmba. B leb n pa tõe n sõng-yã, bɩ n maan-y wẽng ye. Sɩd-sɩda y pa segd n zoe kũ-rãmbã ye. La yaa wãn to la vʋʋsmã ‘yit’ nedã pʋgẽ a kũumã wakate?

 Vʋʋsmã “lebda sɩd Wẽnnaamã nengẽ”

Biiblã yetame tɩ “vɩɩma vʋʋsem me leb[da] Wẽndẽ tɩ bãmb n da fʋʋs-a.” (Koɛɛg Soaba [Kowelɛt] 12:7, Sebr Sõngo) Woto rat n yeelame tɩ vɩɩmã vʋʋsem sɩd pasgda vɩ-raoogã n kẽng Wẽnnaam nengẽ bɩ? Abada! Biiblã sẽn yet tɩ ‘lebã’ pa rat n yeel tɩ yaa yi zĩig n kẽng a to pʋgẽ ye. Wala makre, Wẽnnaam da yeela Israɛll neb nins sẽn da pa tar kɩs-sɩdã woto: “Lebg-y n wa-y mam nengẽ, tɩ mam me na lebg n wa yãmb nengẽ. Mam yaa saasẽ-pãng-soaba, yaa maam n yeele.” (Malaki 3:7) Israɛll sẽn ‘lebg n wa’ a Zeova nengẽ wã ra rat n yeelame tɩ b basa wẽngã maaneg n ye sɩng Wẽnnaam so-tɩrgã tũubu. La a Zeova sẽn ‘lebg n wa’ Israɛll nebã nengẽ wã ra rat n yeelame t’a ra na n gesa a nin-buiidã yell yɛsa. Yɛl a yiibẽ wã fãa, ‘lebã’ tɩ loeya ne tagsgo, la pa yi zĩig sɩd-sɩd n kẽng a to pʋgẽ ye.

Woto me, kũumã sasa, ‘vɩɩmã vʋʋsem’ sã n wa lebd Wẽnnaam nengẽ, a sɩd pa yit tẽngã n “leb” saasẽ ye. Pãng ning sẽn kõt vɩɩmã sã n yi ned yĩngẽ n sa, yaa Wẽnnaam bal n leb n tõe n kõ nedã vɩɩmã pãnga. Woto, vɩɩmã vʋʋsem “lebda Wẽnd nengẽ,” sẽn dat n yeel tɩ nin-kãng soabã yɩlẽ n paam vɩɩmã beoog-daar bee ne Wẽnnaam a yen tãa masã.

Wala makre, ges-y Gʋlsg Sõamyã sẽn yet a Zezi Kirist kũumã wɛɛngẽ. Evãnzill gʋlsd a Luk yeta woto: “A Zezi moona ne b koɛɛg pãnga: ‘M Ba, m lebsda m vʋʋsma yãmba.’ B sẽn yeel woto, b kiime.” (Luk 23:46, Sebr Sõngo) A Zezi vʋʋsmã sẽn yi a yĩngẽ wã, a ra pa rɩk sor sɩd-sɩd n kẽng saasẽ ye. Hal tɩ ta rasem a tãab-n-soabã, a Zezi pa vʋʋg ye, la a sẽn wa n vʋʋgã yaa rasem 40 poor la a rʋ saasẽ. (Tʋʋma 1:3, 9) La a Zezi kũumã wakate, a ninga a vʋʋsmã a Ba nugẽ ne bas-yardo, n teeg a Zeova zãng fasɩ n miẽ t’a tõe n vʋʋg-a lame.

N-ye, Wẽnnaam tõe n vʋʋga neda. (Yɩɩl Sõamyã 104:30) Ad woto sɩd kõta saagr sẽn yaa kãseng menga!

Saagr sẽn be bas-m-yam

Biiblã yeta woto: “Bɩ yãmb da yɛɛs ne yõ wã ye. Tɩ bõe, wakat watame tɩ fãa sẽn be [tẽegr, NW ] yaad pʋsẽ na n wʋm [a Zezi] koɛɛg n yi.” (Zã 5:28, 29) N-ye, a Zezi Kirist kãabame tɩ neb nins fãa sẽn be a Zeova pʋ-tẽerẽ wã na n vʋʋgame. Neb nins sẽn yɩ a Zeova sõgen dãmb n yɩ nin-tɩrsã na n zĩnda bãmb sʋkã. La neb milyõ rãmb a taab n ki n pa wilg b sã n da na n tũu Wẽnnaam no-tɩrsã bɩ b pa na n tũ ye. Tõe tɩ ya b sẽn da pa mi a Zeova noyã, bɩ b pa paama sẽk tɩ sek n na n toeem ye. Nin-kãensã buudã me bee Wẽnnaam pʋ-tẽerẽ, la b na n vʋʋgame, bala Biiblã yetame: “Nin-tɩrsã la sẽn pa-b nin-tɩrsã me vʋʋgr na n zĩndame.”—Tʋʋma 24:15, NW.

Rũndã-rũndã, tẽngã pida ne kisgr la zaba, nen-kɛglem la zɩɩm daagre, tẽngã rẽgeng la bãase. Sẽn ki-bã sã n vʋʋg tẽng a woto zugu, sɩd-sɩda sũ-noogã pa na n kaoos ye. La Naandã kãabame tɩ ka la bilfu, a na n sãama zãmaan kãngã a Sʋɩtãan Munaafɩɩk sẽn so wã. (Yelbũna 2:21, 22; Daniɛll 2:44; 1 Zã 5:19) Ninsaalb zãmaan-tɩrga, sẽn yaa “tẽng paalga,” n sɩd zĩnd tɩ yɩ bõn-kãsenga.—2 Pɩɛɛr 3:13.

Rẽ wẽnde, “ned ba a ye ka na n le yeel t’a ka laafɩ ye.” (Ezai 33:24) Baa sũ-sãams nins kũumã sẽn wat ne wã na n saame, bala Wẽnnaam “na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” (Wilgri 21:4) Ad woto sɩd yaa saagr kãseng n kõ ‘neb nins sẽn be tẽegr yaadẽ wã’!

A Zeova sã n wa yiis wẽnemã tẽngã zugu, a pa na n naag nin-tɩrsã n sãam ye. (Yɩɩl Sõamyã 37:10, 11; 145:20) Sɩda, neb “kʋʋng [kãsengã, NW ]” “sẽn yi soolem fãa, la buud fãa, la neb sẽn gomd goam toɛ-toɛya fãa” n na n põs “to-kãsenga” sẽn na n sãam zãmaan  wẽng kãngã wã. (Wilgri 7:9-14) Woto, kʋʋng kãseng n na n zĩndi, n deeg sẽn na n vʋʋg-bã.

Yãmb yãgdame n dat n yã neb nins y sẽn nong sẽn maan kaalma bɩ? Yãmb rat n vɩɩmda wakat sẽn pa sat tẽng zug Arzãnẽ wã bɩ? Sã n yaa woto bɩ y bao n bãng Wẽnnaam daabã la a sẽn dat n maan bũmb nins beoog-daarã tɩ zems kɛpɩ. (Zã 17:3) A Zeova ratame tɩ “neba [buud, NW ] fãa paam fãagre la b bãng sẽn yaa sɩda.”—1 Tɩmote 2:3, 4.

[Foto, seb-neng 29]

“Fo yaa tẽng tom, la fo na n le lebga tẽng tom yɛsa”

[Foto, seb-neng 30]

B tõe n dɩka vɩɩm vʋʋsmã n mak ne kuurã

[Foto, seb-neng 32]

Vʋʋgrã na n waa ne sũ-noog sẽn kaoosde