AKORANGA 10
Me Pēhea Koe Ka Mōhio Ai ki te Karakia Pono?
1. Kotahi tonu rānei te karakia pono?
“Kia tūpato ki ngā poropiti teka.”—MATIU 7:15.
I whakaako a Ihu i āna kaiaru ki te karakia kotahi, te karakia pono. He rite tēnā ki te ara e tika ana ki te ora tonu. I mea a Ihu: “He tokoiti te hunga e kite” i taua ara. (Matiu 7:14) E whakaae ana te Atua ki te karakia anake e mahi ana i tāna Kupu pono. Kei roto ngā kaikarakia pono katoa i te whakapono kotahi.—Pānuitia Hoani 4:23, 24; 14:6; Epeha 4:4, 5.
2. He aha ngā kōrero a Ihu mō ngā Karaitiana teka?
“Ki tā rātou kī, kua mātau rātou ki te Atua; heoi ko a rātou mahi hei whakakāhore ki a ia.”—TAITUHA 1:16.
I whakatūpato a Ihu, ka whakakinotia e ngā poropiti teka te Karaitianatanga. Ko waho o rātou, he kaikarakia pono te āhua. E kī ana ō rātou hāhi he Karaitiana rātou. Engari, ka taea te mōhio ki te tino āhua o aua tāngata. He pēhea? Mā te karakia pono anake e hua ai i ngā Karaitiana pono me ngā āhua me ngā tikanga e taea ai te kite.—Pānuitia Matiu 7:13-23.
3. Me pēhea koe ka mōhio ai ki ngā kaikarakia pono?
Āta whakaarohia ēnei tohu e rima:
-
E manaakitia ana te Paipera e ngā Kaikarakia pono, ānō ko te Kupu a te Atua. E ngana ana rātou ki te whai i ngā ako o te Paipera. Nō reira, he rerekē te karakia pono i te karakia i ahu mai i te whakaaro tangata. (Matiu 15:7-9) Kāhore ngā kaikarakia pono e kauwhau i tētahi mea, ka mahi mea kē.—Pānuitia Hoani 17:17; 2 Tīmoti 3:16, 17.
-
E whakahōnore ana ngā kaiaru pono a Ihu i te ingoa o te Atua, a Ihowa. I whakahōnore a Ihu i te ingoa o te Atua mā te kauwhau i taua ingoa. I āwhina ia kia mōhio te iwi ki te Atua, i ako hoki kia inoi rātou kia whakatapua te ingoa o te Atua. (Matiu 6:9) I tōu takiwā, ko tēhea te rōpū karakia e kauwhau ana i te ingoa o te Atua?—Pānuitia Hoani 17:26; Rōma 10:13, 14.
-
E kauwhau ana ngā Karaitiana pono mō te Kīngitanga o te Atua. I tonoa mai a Ihu e te Atua kia kauwhau i te rongo pai o te Kīngitanga o te Atua. Ko te Kīngitanga o te Atua anake te tūmanako mō te ao. I kōrero a Ihu mō tērā tae noa ki tōna matenga. (Ruka 4:43; 8:1; 23:42, 43) I mea ia ka kauwhautia hoki tēnā e āna kaiaru. Ina haere atu tētahi tangata ki a koe ka kōrero mō te Kīngitanga o te Atua, nō tēhea rōpū karakia ia?—Pānuitia Matiu 24:14.
-
Ehara ngā kaiaru a Ihu i te ao kino nei. Ka mōhio koe ki a rātou nō te mea kāhore rātou e uru ki ngā mahi tōrangapū, ngā tohenga pāpori rānei. (Hoani 17:16; 18:36) Otirā, kāhore rātou e whai wāhi ki ngā mahi me ngā āhua whakamamae o te ao.—Pānuitia Hēmi 4:4.
-
E tino aroha ana ngā Karaitiana pono tētahi ki tētahi. Mai i te Kupu a te Atua, e ako ana rātou ki te manaaki i ngā iwi katoa. Ahakoa kua tino tautoko ngā karakia teka i ngā whawhai o ngā tauiwi, kāhore rawa ngā kaikarakia pono e pērā. (Mika 4:1-3) Engari, ohaoha tonu tā rātou whakapau i te tāima me ngā rawa ki te āwhina me te akiaki i ētahi atu.—Pānuitia Hoani 13:34, 35; 1 Hoani 4:20.
4. Ka taea rānei te mōhio ki te karakia pono?
Ko tēhea te rōpū karakia nō te Kupu a te Atua katoa ngā ako, e whakahōnore ana i te ingoa o te Atua, e kauwhau ana i te Kīngitanga o te Atua anake hei tūmanako mō te ao? Ko tēhea te rōpū e aroha nui ana tētahi ki tētahi, kāore hoki e uru ana ki ngā whawhai? He pēhea tōu whakaaro?—Pānuitia 1 Hoani 3:10-12.
