Iar dik im rũttol̦o̦k ilo Alicante, juon jikin ilo Jipein me epãd iturin lo̦jet. Ekar jab em̦m̦an mour in baam̦le eo ammim. Kõn men in, ke iar jo̦dikdik, ear l̦ap wõt aõ pãd itõrerein ial̦ ko. Ear wõr juon im̦õn kõm̦m̦an wiil̦ in wa me epaake m̦weo im̦õ. Kõn men in, iar jino m̦õttaik juon iaan rijerbal ro ijin. Etan em̦m̦aan in ej José María. Ear juon eo me ejouj im el̦ap an kar kea kõn ña, juon men me baam̦le eo aõ ear jab kwal̦o̦k ñan ña. Ilo iien ko ij inepata im iioon apañ, ear ãinwõt juon jeiũ im m̦õtta, meñe ear 20 iiõ rũttol̦o̦k jãn ña.

José María ear jino katak Baibõl̦ ippãn Ri Kõnnaan ro an Jeova. Iar lo bwe ear em̦m̦an ippãn riit Baibõl̦, im ekõn kwal̦o̦k ñan ña ta ko ej katak kaki jãn Baibõl̦. Ikõn roñjake ñan kwal̦o̦k kautiej, bõtab iar jab lukkuun itoklimo kõn men ko ej ba. Kõnke iar juon jo̦dikdik, iar poub im m̦ad kõn men ko jet. Ak ejjabto tokãlik, ear oktak men in.

Ijjab kõn̦aan tipdiki aolep men ko rar wal̦o̦k ke iar kũrããj. Men eo wõt imaroñ ba ej bwe iar bwebwe im juon eo ejaje kõl̦mãnl̦o̦kjen̦. Ium̦win juon wõt raan, aolep men ilo mour e aõ rar kajju oktak. Iar juon jo̦dikdik eo ekãkemo̦o̦j. Ak ãlikin iien in, iar kajju jaje m̦akũtkũt im to aõ pãd ilo aujpitõl̦. Ear lukkuun pen aõ mel̦el̦e kõn wãween in ipãd ie. Aolep iien ij kajjitõk ippa make im ba, ‘Ewõr ke unin aõ mour?’

José María ear lotok eõ, im ear m̦õkaj im kõm̦m̦an karõk bwe Ri Kõnnaan ro an Jeova jãn eklejia eo epaak ren lotok eõ ilo aujpitõl̦. Ilo aer keini aer lotok eõ, men in ear lukkuun kõm̦akũt bũruõ. Ãlikin wõt aõ diwõj jãn ijo me rar kõm̦adm̦õde ña ie ñan bar juon ruum̦, iar jino katak Baibõl̦. Iar katak m̦ool eo kõn unin an armej eñtaan im mej im etke Anij ej kõtl̦o̦k an wal̦o̦k men ko renana. Iar bar katak kõn kallim̦ur ko an Anij kõn ilju im jekl̦aj kõn an lal̦ in naaj obrak kõn armej ro reweeppãn im ejjel̦o̦k enaaj bar ba bwe ‘enañinmej.’ (Aiseia 33:24) Ij kab loe juon kõjatdikdik em̦m̦an im epel̦l̦o̦k ñan ña.

Ke iar diwõj jãn aujpitõl̦, ear m̦õkaj aõ kõm̦m̦an oktak ilo mour e aõ ke iar katak Baibõl̦. Kõnke iar kõjerbal juon wiil̦jea, iar maroñ etal ñan jet iaan kweilo̦k ko an Ri Kõnnaan ro an Jeova im bõk kun̦aõ ilo kwal̦o̦k naan. Ilo Nobõm̦ba 5, 1988 eo, iar peptaij ke ear 20 aõ iiõ. Jeova Anij ear jipañ eõ bwe en jim̦we wãween aõ l̦õmn̦ak kõn mour e aõ. Ak ta eo imaroñ kõm̦m̦ane ñan kwal̦o̦k aõ kam̦m̦oolol?

Iar peek ilo bũruõ bwe in jab kõtl̦o̦k bwe aõ jaje m̦akũtkũt en kabõjrak eõ jãn aõ kate eõ joñan wõt aõ maroñ ñan jerbal ñan Jeova. Iar kõn̦aan wõnm̦aanl̦o̦k wõt. (1 Timote 4:15) Ilo kar jinoin, men in ear jab pidodo kõnke baam̦le eo aõ ear jum̦ae. Bõtab, ro jeiũ im jatũ ilo tõmak rar jipañ eõ bwe in pãd ilo aolep kweilo̦k ko im keini aõ kwal̦o̦k naan.

Tokãlik, ear jino alikkar bwe ij aikuj pãd ilo jikin ko me ewõr remaroñ lale eõ aolep awa. Eto aõ kar pukot juon jikin em̦m̦an ñan ña. Bõtab tokãlik, iar loe juon jikin me ej ñan ro ewõr aer utam̦we ak nañinmej me ej pãd ilo Valencia, juon bukwõn me 100 m̦ail̦ ettol̦o̦kin im ej pãd ituiõñin Alicante. Iar em̦m̦akũttok ñan ijin im jokwe ie.

Meñe ijaje m̦akũtkũt, em̦õj aõ peek ilo bũruõ bwe in wõnm̦aanl̦o̦k wõt im jerbal ñan Jeova. Kõnke iar juon eo eutam̦we, ear wõr jããn in jipañ ak kõl̦l̦ã ko iar bũki. Iar kõjerbal jããn kein ñan wiaik juon aõ kampiutõr im kajjitõk bwe ren likũti iturin peet eo aõ. Iar bar wiaik juon nejũ jeel̦boon. Kiiõ aolep jibboñ, eo ej lale eõ ej kõjo̦ kampiutõr im jeel̦boon eo nejũ. Bwe in kõjerbal kampiutõr eo nejũ, ij kõjerbal juon kein control me ij kõm̦akũtkũti kõn jim̦win ñiũ. Ebar wõr juon al̦al̦ jidikdik me ij likũt ñan lo̦ñiũ im taip kake im jipedi nõmba ko ilo jeel̦boon eo nejũ.

Ewi wãween an men kein jipañ eõ? M̦oktata, rej jipañ eõ bwe in maroñ etal ñan Weep jait eo ad etan jw.org im l̦ãibrãre eo ad ilo Internet. Elukkuun l̦ap an men kein jipañ eõ! Ekkã aõ jol̦o̦k elõñ awa kajjojo raan ñan katak im kappok mel̦el̦e ko jãn bok ko ad me rej pedped ilo Baibõl̦. Men in ej kõm̦m̦an bwe in maroñ wõnm̦aanl̦o̦k im katak kõn Anij im men ko rem̦m̦an kõn e. Im ñe ij ebbeer ak l̦õmn̦ak bwe ejjel̦o̦k m̦õtta, aolep iien ewõr kein jipañ ilo Weep jait in me rej jipañ eõ bwe in m̦õn̦õn̦õl̦o̦k.

Kampiutõr eo aõ ej jipañ eõ bwe in roñjake im bõk kun̦aõ ilo kweilo̦k ko. Imaroñ uwaak, jar, kõm̦m̦an katak, im riit Naan in Keeañ ilo iien ko me epãd eta ilo jikejuul̦ in riit eo. Meñe ijjab maroñ etal ñan kweilo̦k kein, ij kile bwe ij bar m̦õttan eklejia eo.

Kampiutõr im jeel̦boon eo nejũ rej bar jipañ eõ bwe in bõk kun̦aõ ilo jerbalin kwal̦o̦k naan. M̦ool bwe ijjab maroñ kwal̦o̦k naan jãn em̦ ñan em̦, ãinwõt an enañin aolep Ri Kõnnaan ro an Jeova kõm̦m̦ane. Bõtab, men in ear jab kabõjrak eõ jãn aõ kwal̦o̦k naan. Ilo aõ kõjerbal kampiutõr im jeel̦boon eo nejũ, imaroñ kwal̦o̦k kõn tõmak eo aõ ñan ro jet. Ilo m̦ool, elukkuun em̦m̦an ippa bwebwenato ilo jeel̦boon eo nejũ. Kõn men in, em̦m̦aan ro rej lale eklejia rar kajjitõk ippa bwe in loloorjake karõk eo ñan kwal̦o̦k naan ilo talboon. Men in el̦ap an jipañ ro uwaan eklejia eo me rejjab maroñ kwal̦o̦k naan jãn em̦ ñan em̦.

 Ejjab men kein wõt rar jipañ eõ. Kajjojo raan, rũttõmak ro m̦õtta rej lotok eõ. Rej bõktok ro nukwier im ro jet m̦õttaer me reitoklimo in katak kõn Baibõl̦. Ekkã aer kajjitõk bwe in bwebwenato ippãn rein kõn Baibõl̦. Ilo iien ko jet, baam̦le ko rej lotok eõ im kajjitõk bwe in kobal̦o̦k ilo iien kabuñ an baam̦le eo. El̦aptata an em̦m̦an ippa ñe ajri ro reddik rej jijet iturin peet eo aõ im kwal̦o̦k ñan ña etke rej yokwe Jeova.

El̦ap aõ kam̦m̦oolol bwe elõñ rej lotok eõ. Ekkã an obrak ruum̦ e aõ kõn armej. Rũttõmak rein m̦õtta me rej lotok eõ rej itok jãn jikin ko repaak im jikin ko rettol̦o̦k. An rein lotok eõ im kwal̦o̦k aer yokwe eõ ear lukkuun kabwilõñ rijerbal ro me rej lale ro reutam̦we ilo ijin ij jokwe ie. Kajjojo raan, ij kam̦m̦oolol Jeova kõn an kõtl̦o̦k bwe in uwaan juon doulul ekanooj in em̦m̦an me aolep rej watõk doon ãinwõt jemjein jemjati.

Aolep iien ñe juon ej yokyokwe eõ im kajjitõk ejet aõ mour, ij ba, “Ij kate wõt eõ!” Ijel̦ã bwe ijjab make iaõ. Jekdo̦o̦n ta apañ ko jej iiooni, kõj aolep Kũrjin ro jej pãd ilo juon tarin̦ae. Im tarin̦ae in ej “tarin̦ae em̦m̦an eo an tõmak.” (1 Timote 6:12) Ta eo ear jipañ eõ bwe in maroñ wõnm̦aanl̦o̦k wõt ium̦win elõñ iiõ meñe elukkuun pen? Kajjojo raan ij jar im kam̦m̦oolol Jeova kõn an jipañ eõ ñan kile bwe ewõr unin aõ mour. Im ij kate eõ joñan wõt aõ maroñ bwe in poub wõt ilo aõ jerbal ñan Anij im reim̦aanl̦o̦k wõt ñan kõjatdikdik eo aõ.

Ekkã aõ l̦õmn̦ak kõn jukjukun pãd eo ekããl im kõn an naaj lukkuun em̦m̦an ñe ibar jel̦ã etetal im ekkãke. José María ebol̦io, im jet iien ij kõm̦m̦an kõjak ippãn kõn am̦ro naaj iãekwõj. Ikõn kajjitõk ippãn im ba, “Kwõl̦ak lale wõn n̦e iaarro enaaj wiin?” Im ej ba, “Ejjab aorõk wõn eo enaaj wiin. Men eo eaorõk ej bwe jenaaj mour ilo Pedetaij im iãekwõj.”

Ejjab pidodo ñe ij l̦õmn̦ak kõn aõ jaje m̦akũtkũt. Ijel̦ã bwe ke iar juon jo̦dikdik, iar kõm̦m̦ane juon men el̦ap an bwebwe, im ij lo leen men in iar kõm̦m̦ane. Bõtab, el̦ap aõ kam̦m̦oolol bwe Jeova ear jab kõjekdo̦o̦n eõ. Elukkuun lõñ men ko ear litok. Ear letok mour, rũttõmak ro m̦õtta bwe ren aõ baam̦le, juon kõjatdikdik em̦m̦an kõn ilju im jekl̦aj, im jipañ eõ bwe in lo lañlõñ ilo aõ jipañ ro jet. Men eo wõt imaroñ ba ej bwe el̦ap jãn joñan an Jeova kajeraam̦m̦an eõ.