“Ewi Toan Aõ Naj Kir ñõn Yuk Kin Jibañ?”

Jayne ear jõñ im ba “Ikõnan bwe en joko aõ metõk.” Kõra in ear bõk nañinmij in cancer im ear ajededlok ñõn aolepen mõtõn ko ilo enbwinin. Baamle eo an im ro mõtõn rar lukkun kõnan jolok nañinmij eo an im an iñtan! Inem rar jar ñõn Anij bwe en jibõñ e. Anij enaj ke kar uake jar ko air? Eor ke an kea?

ANIJ ejela kin men ko armij rej iioni. Nan eo an, Baibel eo ej ba: “Aoleb menin kõmõnmõn ko rej ñũr kin iñtan.” (Dri Rom 8:22, UBS) Anij ejela bwe elõñ buki million armij ro rej iñtan aolep ran einwõt Jayne, ilo enbwin, iñjake, im ilo lemnok. Anij ej lo an 800 million armij ro kwõle kajjojo ran, im elõñ million ro jet rej iion jorran jen ro uan baamle ko air, bareinwõt ej lo an elõñ jemen im jinen ajiri ro inebata kin mour eo an ro nejiir im kin ilju im jeklaj eo air. Bwelen kwomaroñ kar lemnok elañe Anij enaj kamarmire abañ kein. Kwonañin ke kar lemnok kin elañe Anij enaj kõmõn jabrewõt men ñõn kamarmiri abañ kein? Elañe eor juõn kõnan iber ñõn jibõñ ro jej yokwe ir, ejjab mol ke bwe Anij bareinwõt enaj kar kõnan jibõñ armij rein me rej menin kõmõnmõn ko an?

Elañe kwar lemnok kin kain kajitõk rõt kein, emol ejjab kwe wõt kwoj lemnok rõt in. Elõñlok jen 2,600 yiõ ko remotlok, juõn eman etiljek etan Habakkuk, ear bõk ejja iñjake in wõt an elõñ armij ro ranin, ilo an kar kajitõk iben Anij: “O Iroij, ewi toan aõ naj kir ñõn yuk kin jibañ ak kwoj jañin uak im lomoren kim jen jorrãn kein? Etke kwoj kõmmõn bwe in iion jorrãn kein rellab? Etke kwoj bed wõt im jab lali men kein rebwid? Jorrãn im ire rej kabol iõ. Buktak im iakwelel rej walok ijoko otemjej.” (Habakkuk 1:2, 3, UBS) Habakkuk ear lo elõñ jerbal ko relukkun nana im lej ilo ran ko an. Ranin, men kein renana im lej rej walok ilo nuuj ko aolep ran im kõmõn bwe armij ro remõn ren inebata.

Anij ear ke kajitokjen men eo Habakkuk ear inebata ak kajitõk kake? Jaab. Ear roñjake kajitõk eo an inem tokelik ear kainemõn im kõkãtõk e. Jeova ear kakajur tõmak eo an Habakkuk ilo an kar kalimuri bwe enaj kajemlok iñtan. Kalimur eo an Anij kin ta eo enaj kõmõne emaroñ kainemõn yuk bareinwõt, einwõt an kar jibõñ Jayne im baamle eo an. Ewi wãwen ar jela elañe Anij ej lukkun kea kake kij? Ta eo Anij enaj kõmõne ñõn kajemlok iñtan? Eokwe katak kein tok jet renaj uaki kajitõk kein.