Elõñ armej ro rar bõjrak jãn aer etal ñan im̦õn jar ko kõnke rar jab lo uwaak in kajjitõk ko aer im ejjel̦o̦k juon ear kaenõm̦m̦an er. Kõn men in, ewõr ke tokjãn am̦ ilo̦k ñan iien kweilo̦k ko an Ri Kõnnaan ro an Jeova? Ta ko renaaj wal̦o̦k ñan kwe ñe kwõnaaj ilo̦k im kweilo̦k ippãer?

Kwõnaaj m̦õn̦õn̦õ kõnke kwõnaaj pãd ibwiljin armej ro rej yokwe doon. Ilo iien ko an rijjelõk ro, kar ajeje Kũrjin ro ñan elõñ eklejia ko. Rar kweilo̦k bwe ren kabuñ ñan Anij, katak Jeje ko im ñan kakajoor im kaenõm̦m̦an doon. (Hibru 10:24, 25, UBS) Aolep armej rein el̦ap aer kar yokwe doon. Kõn men in, rar lukkuun epaake doon im rar watõk doon ãinwõt jemjein jemjaten ilo juon baam̦le. (2 Tessalonika 1:3; 3 Jon 14) Kõmij l̦oore joñak eo an Kũrjin rein jãn iien ko etto. Eñin unin, kõmij bar m̦õn̦õn̦õ.

Kwõnaaj bõk tokjãn ko rem̦m̦an ilo am̦ katak kilen jerbali naan in kakapilõk ko jãn Baibõl̦ eo. Ilo iien ko etto, em̦m̦aan ro, kõrã ro im ajri ro jim̦or rar kweilo̦k ippãn doon. Kõmij kõm̦m̦an ãindein. Ewõr ro me rej kõjerbal Baibõl̦ ñan katakin kõj kilen jerbale naan in kakapilõk ko ilo Baibõl̦. (Duteronomi 31:12; Nihimaia 8:8) Ilo katak ko me ewõr kajjitõk ko im ilo iien al ko, aolep remaroñ bõk kun̦aaer. Ñe jej bõk kun̦aad ilo men kein, jej kwal̦o̦k kõn tõmak eo ad ãinwõt Kũrjin ro.​—Hibru 10:23.

Kwõnaaj jeraam̦m̦an bwe tõmak eo am̦ ilo Anij enaaj kajoorl̦o̦k. Rijjelõk Paul ear jejel̦o̦k ñan juon iaan eklejia ko im ba: “Ekanooj l̦ap aõ kõn̦aan lo kom̦, . . . bwe jen jim̦or jipañ doon; aõ tõmak en jipañ kom̦, im ami tõmak en jipañ eõ.” (Rom 1:11, 12, UBS) Ilo iien kweilo̦k ko ekkã ad kõm̦m̦ao ippãn ri tõmak ro m̦õttad. Men in ej kakajoor tõmak eo ad. Bareinwõt ej kõm̦m̦an bwe jen wõnm̦aanl̦o̦k wõt im kate kõj ñan mour ekkar ñan naan in kakapilõk ko ilo Baibõl̦.

Jouj im itok ñan iien kweilo̦k ko amim. Kwõnaaj make kile im kam̦ool men ko ej kab m̦õj am̦ riiti. Armej ro ie renaaj karwaineneik eok. Ejjel̦o̦k on̦ean del̦o̦ñ im rejjab tõltõl jabawõt.

• An wõn joñak eo kõmij l̦oore ilo iien kweilo̦k ko amim?

• Ta tokjãn ko rem̦m̦an jej loi ñe jej pãd ilo kweilo̦k ko an Ri Kõnnaan ro an Jeova?