UZYE MUKAILOLA UKUTI MWAYA NI NSANSA? Ndi cakuti avino mukailola, i vyani vyalenga muye ni nsansa? Uzye u lupwa, incito nanti kuno mukapepa? Limwi mukulondesya icintu cimwi icilamuletela insansa wakwe kumala isukulu, ukwingila incito isuma nanti sile ukukala motoka umupya.

Antu aingi yakaya ni nsansa ndi cakuti yakwata vino yalondesyanga. Nomba uzye insansa zizyo zikatwalilila? Insita izingi insansa zizyo zikasila, na cii cikalenga muntu kuvwa uyi.

Ukuya ni nsansa tungakulondolola ukuti u kutwalilila ukuvwa ningo, mu melenganyo nu kulondesya kukwata ivintu vyonsi vikalondekwa pakuti insansa zizyo zitwalilile.

Nupya, kulunda pakuvwa ningo, ukuya ni nsansa kungalondololwa nu kuti u kutwalilila sile ukuvwa ningo ukwaula ukuta, fwandi kungaya kwati ulwendo. Tutanga tuti ndaya ni nsansa uku nkolelo, lelo tulinzile ukuya ni nsansa lyonsi.

Tungakolanya insansa ku umi usuma. Uzye tukacita uli pakuti tuye nu umi usuma? Tukalya ivyakulya ivisuma, kutukusya umwili ni vintu vyuze. Fwandi na pakuya ni nsansa kwene tulinzile kucita vimwi. Tungaya ni nsansa ndi tukuisunga ningo nu kwikala ukulingana ni visinte.

I visinte ci vya muli Baibo vino tulinzile kulalondela pa kuya ni nsansa? Nanti icakuti kwaya ivicindame ukuluta vyuze, katulole vino vingatwavwa mu visinka ivili apisika:

• KUTEEKA UMWENZO NA UKAPEKAPE

• UMI NU KUTWALILILA KUYA AKOME

• KUTEMWA

• KWELELA

• VYAKUCITA MU UMI

• UPALILO

Ibuku licindame sana umwaya mano ya cumi likalanda ukuti ‘Ansansa yayo anzila zitambalale.’ (Masamu 119:1) Katulande pa nzila kwene iyo.