Baibo Ikaavwa Antu Ukusenuka

U MULANDU ci uno umwanaci uwali ni myaka umu ma 60 wateelile ukupepa ivilubi? I cani icalenzile simapepo uwa mu mipepele ya Cishinto ukuta incito ino waombanga pa cifulo cino yakati ica muzilo nu kuya umwina Klistu? Uzye umwanaci wino yauze yakuzizye wazizimizye uli kuli vino avyazi yakwe yamutazyezile? Uvwini vino antu yaa yaasimiike.

“Ndakai nsiombela ivilubi.”—ABA DANSOU

UMWAKA UNO YAVILWE: 1938

KUNO YAVYALILWE: BENIN

VINO UMI WALI: KAPEPA WA VILUBI

VINO NAALI: Nakuliile umu So-Tchahoué, umuzi uwayela umu ncende ya manzi umupiipi na yemba. Aikala muzi yakalema inswi, ukuteeka ing’ombe, imbuzi, imfwele, ya kapoli ni vyunyi. Kutaaya imiseo, fwandi antu yakaomvya sile mawato pa kupita. Yakakuula mang’anda ukuomvya imbao na masote, yamwi nayo yakakuulila ni njelwa. Antu aayako aapina sana. Nanti ciye vivyo, mutaaya sana umpulamasunde wakwe vino caya umu misumba.

Lino nali umwance, ya tata yatumile mangulenzi nani ukuti twaikala umu cikuulwa cakwe ya Katolika, muno twatandike ukulondela ivizumilo vyao. Lino nakuzile, natandike ukupepa leza wino yakaama ukuti Dudua (Oduduwa) wino akalondela intambi zya ya Yoruba yakapepa. Nakuuliile leza wii ing’anda nupya lyonsi namutuulilanga malambo ya visela, mafuta ya tuncindu, inyonga, inkoko, inkunda, ni nyama izipusanepusane. Amalambo yaa yali akome umutengo, nupya ilingi yamalilanga impiya umupiipi na zyonsi.

VINO BAIBO YANGAVWILE UKUSENUKA: Lino natandike ukusambilila Baibo, nasambilile ukuti Yeova ali Leza wa cumi sile wenga. Nasambilile nu kuti asilonda twaomvya ivilubi pa kupepa. (Kufuma 20:4, 5; 1 Kolinto 10:14) Nizile imanya vino nalondekwanga ukucita. Fwandi nasumvile ivilubi vyonsi nu kufumya umu ng’anda vyonsi ivyaomviwanga umu kupepa ivilubi. Natiile ukuya umu kuuzya kuli yano yakasowela ivya ku nkoleelo, nupya natiile ukucitako intambi zya mu muzi ni ntambi zya pa cililo.

Citaali icangupale kuli nene ne mwanaci ukusenuka ala indi ni myaka umu ma 60. Ya cuza yane, ya lupwa, na ina mupalamano yankaanyanga nupya yansekanga. Lelo napefile kuli Yeova ukuti angazwe ukulacita ivisuma. Nakomeleziwe sana na mazwi aaya pali Mapinda 18:10, aakati: ‘Izina lyakwe Yeova ulupungu ulukome. Umuntu akacita vyaololoke akautukilamo nu kucingililwa.’

Na cuze icangavwilizye u kuzanwa umu kulongana kwakwe ya Nte Yakwe Yeova. Nailoliile ukutemwa kwa wina Klistu, nupya nakomeleziwe sana pano antu yaa yakaezya ukucita vino Baibo ikalanda. Vino naweni vyalenzile nsininkizye ukuti ya Nte Yakwe Yeova ali upefi wa cumi.

 IVISUMA VINO NAZANA: Ukulondela ivisinte vya muli Baibo kwangazwa ukuzifya ucuza wane na ana. Nupya nsiuvwa ukuti naya ni cisendo. Nononanga impiya uku vilubi ivisifuuta ivitangavwile umu nzila ili yonsi. Lyene nkapepa Yeova aalamala intazi zitu zyonsi. (Kusokolola 21:3, 4) Naya sana ni nsansa ukumanya ukut lyene nsiombela ivilubi lelo nkaombela Yeova! Wene akancingilila nupya akansakamala.

“Nalondanga ukumanya Leza ukufuma sile uku wance.”—SHINJI SATO

UMWAKA UNO YAVILWE: 1951

KUNO YAVYALILWE: JAPAN

VINO UMI WALI: SIMAPEPO WA UPEFI WA CISHINTO

VINO NAALI: Nakuliile umu musumba wa Fukuoka. Avyazi yane yatemilwe sana ivya mapepo; ukufuma uku wance yansambilizye ukucindikisya ya leza ya Cishinto. Lino nali umulumendo, ilingi nelenganyanga pali vino ningapusuka nupya nalondesyanga ukwazwa antu aali ni ntazi. Nkwiusya lino nali uku sukulu lya ku pulaimale lino mwalimu uzizye umu kalasi pali vino twalondanga ukucita nga twakula. Ya kasukulu yanji yakweti vino yalondesyanga ukucita, wakwe ukusambilila sana vyakwe sayansi. Nalanzile ukuti nemo nkalondesya ukuombela Leza. Yonsi yansesile.

Lino namazile isukulu lya ku sekondale, natandike ukusambilila vyakwe usimapepo. Lino nali pi sukulu lilyo, namanyine na simapepo wa Cishinto uwabelenganga umu nsita yakwe ibuku ilyakweti inkupo itifi. Uwanda umwi wanguzizye ukuti, “Sato, uzye wamanya ibuku lii?” Vino namanyile inkupo yi buku lilyo, naswike inti, “A Baibo.” Walanzile ati, “Wensi aakulonda ukuya simapepo wa Cishinto alinzile ukubelenga ibuku kwene lii.”

Lilyo kwene napisile nu kuyakala Baibo. Nisile Baibo pa ncende isuma pano nasungilanga mabuku nupya namusunganga ningo. Nomba ntakweti insita ya kubelengamo, pano nali umupamviwe sana ni vya ku sukulu. Lino namazile isukulu, natandike ukuomba pa cikuulwa ca muzilo nga simapepo wa Cishinto. Vino nalondesyanga ukucita ukufuma uku wance vyafikiliziwe.

Pataalengile, vino nazanyile muli usimapepo wa Cishinto asi vino nenekelanga. Ya simapepo aingi yataatemilwe antu nupya yatayasumbangako mano. Nupya aingi yataali nu utailo. Simapepo umwi wino naombanga nawe wanenyile ati: “Ndi cakuti ukulonda ukutwalilila ukuomba ningo pano, ufwile sile ukulalanda pa mano ya untunze. Citaazumiliziwa ukulanda pali vyakwe Leza.”

Vino walanzile vyalenzile ukuti impate upefi wa Cishinto. Nanti icakuti natwalilile ukuomba pa cikuulwa ciici ica muzilo, natandike ukulondelezya pa mipepele yuze. Lelo ntaazanyile imipepele isuma. Lino nalondelezyanga sana mipepele, alino nuvwilangako uyi. Nayuvwanga ukuti kutaali upefi wa cumi.

VINO BAIBO YANGAVWILE UKUSENUKA: Umu 1988, namanyine na umwi uwa mu upefi wa Cibuda uwankomelizye ukubelenga Baibo. Nelenginye pali simapepo wa Cishinto wino imyaka ya ku cisila wankomelizye ukulacita vikwene. Napingwilepo ukucita vino wanenyile. Lino natandike ukubelenga Baibo, nizile intemwa vino nabelenganga. Insita zimwi nabelenganga Baibo usiku onsi suka ilanzi ilitunka.

Vino nabelenzile vyalenzile nalonda ukupepa kuli Leza umwineco wakwe Baibo. Natandikilepo ni ipepo lino Yesu wasambilizye asambi yakwe ilyalembwa pali Mateo 6:9-13. Naswilizyangapo ukupepa ipepo kwene lii nga papita maawazi yaili nanti sile lino nkuombela pa cikuulwa ca muzilo ica Cishinto.

Nakweti mauzyo aingi pali vino nabelenganga. Pa nsita yii ala natwala nupya namanyile ukuti ya Nte Yakwe Yeova yakasambilizya antu Baibo pano ala yatandalilapo mamane uku cisila. Nazanyile Nte Wakwe Yeova umwanaci nupya namuzizye sana mauzyo. Natemilwe vino waomvizye Baibo pa kwasuka mauzyo yonsi. Wandondiile Nte umonsi uwakuti ansambilizya Baibo.

Pataalengiile, natandike ukulongana pamwi na ya Nte Yakwe Yeova. Ntaamanyile ukuti pali ya Nte yayo paali yamwi yano nasaalulanga uku cisila. Lelo yandamwike ni nsansa nu kulenga njuvwe ukuti iyampokelela.

Pa kulongana kuko nasambilile ukuti Leza akalonda ya iya ukulanga ukutemwa nu kucindika amu lupwa lwao. Ku cisila nisile sana mano uku mulimo wane wakwe usimapepo icakuti nalekelizye mamane na ana yane yaili. Nilwike ukuti nakutikisyanga kuli vino antu aizanga uku kupepa pa cikuulwa ca muzilo yalandanga lelo ntatazile nkutike kuli vino mamane walandanga.

Lino nalundulukanga, nasambilile ivintu ivingi pali Yeova ivyalenzile kuti mpalame kuli aliwe. Natemilwe sana ivikomo wakwe Loma 10:13, apakati: “Wensi aakaama api zina lyakwe Yeova alapusuka.” Nalondanga ukumanya Leza ukufuma uku wance, lyene paa namumanya!

Natandike ukuyuvwa ukuti ntaalinzile ukuya pa cikuulwa ca muzilo. Pa kutandika nasakamalanga pali vino yauze yali nu kwelenganya nga nafuma umu upefi wa Cishinto. Lelo lyonsi nelenganyanga ukuti ndafumamo ndi cakuti nazana Leza wa cumi kuze. Fwandi umu 1989 napingwilepo ukuvwila vino kampingu wanenanga. Nafumile pa cikuulwa ca muzilo nu kutandika ukuombela Yeova.

Citangwike ukufuma pa cikuulwa ca muzilo. Ya simapepo yano naombanga nayo ancizile icifulo yankalipile nu kwezya ukumpatikizya ukuti ntafumapo. Ni catazile sana u kunena avyazi yane. Lino nayanga uku ng’anda ukumwao nasakamile sana icakuti nuvwanga nu kuwaya mu cisao nupya maka yasizile umu makulu! Nimilile imiku iingi umu nzila nu kupepa kuli Yeova ukuti ampeele amaka.

Lino nafisile pa ng’anda ya yavyazi, pa kutandika nuvwile sana intete ukutandika ilyasi. Papisile insita. Lyene pa cisila ca kupepa sana, nalondolwelile ya tata vyonsi. Nayanenyile ukuti inzana Leza wa cumi nupya nkufuma umu upefi wa Cishinto pakuti naombela Leza. Ya tata yazungwike nupya yuvwile uyi. Ya lupwa na yauze izile uku ng’anda nu kwezya ukusenula melenganyo yane. Ntalondanga ukusosya ya lupwa yane, lelo pa nsita ili imwi kwene, namanyile ukuti kuombela Yeova u kwali ningo. Umukuya kwa nsita, ya lupwa yane izile iyancindika pali vino napingwile.

Nanti icakuti natiile ukuya uku cikuulwa ca muzilo, nalondekwanga ukusenuka muli vino nelenganyanga. Ningiilemo sana muli vyakwe usimapepo. Nezizye na maka ukuti nilileko, lelo konsi kuno indi, kwayanga ivyanjiusyanga pa mulimo uwo.

Kwali ivintu viili ivyangavwile ukucimvya intazi kwene yii. Ica kutandikilako, nalondelizye vyonsi ivyali umu ng’anda ivyuvwananga nu upefi uno nafumilemo. Lyene nosile vyonsi, kuli kuti, mabuku, ivikope ni vintu vyuze ivya mutengo ivyuvwananga nu upefi uwo. Cakwe ciili, natandike ukuzanwa sana na ya Nte. Ucuza uno yandanganga na vino yangavwanga vyangazwilizye sana. Natandike ukwililako panono panono uku vintu vya mpiti.

IVISUMA VINO NAZANA: Natazyelanga mamane na ana nupya calenzile yayuvwa ukuzukilwa sana. Lelo lino natandike ukuya pamwi nayo, wakwe vino Baibo ikasambilizya ya iya ukucita, twatandike ukuvwana sana. Mukuya kwa nsita, mamane nawe kwene watandike ukuombela Yeova. Umwana witu umonsi, umukazyana na iya wakwe, swensi twaya umu kupepa kwa cumi.

Nga nelenganya pali vino nalondanga ukuombela Leza lino nali umwance nu kwazwa antu yauze, nkalola ukuti nazana vyonsi vino nalondanga nu kucilapo. Ntaakwata na mazwi yano ningaomvya aakutaizizya Yeova.

“Namanyile ukuti nuliizye cimwi.”—LYNETTE HOUGHTING

UMWAKA UNO YAVILWE: 1958

KUNO YAVYALILWE: SOUTH AFRICA

VINO UMI WALI: NAYUVWANGA UKUTAZYELWA

VINO NAALI: Navyalilwe umu Germiston, umwi tauni muno yakaimba mawe ya mutengo umutaaya sana umpulamasunde. Lino avyazi yane yayuvwile ukuti yatalakwanisya ukunsakamala, yapingwilepo ukuntwala uku yantu yauze ukuti ayano yansakamala. Lino nali na manda 14, atwalane yamwi aali nu kutemwa yantozile nupya nayalolanga ukuti ali ya mayo na ya tata. Lino namanyile ivyancitikile, nayuvwanga ukutazyelwa. Natandike ukuyuvwa ukuti ankuzizye asi ali yavyazi yane nupya yataamanyile ningo.

Lino nali ni myaka umupiipi na 16, natandike ukuya umu vikuulwa vya wengwa, muno twacinanga na anji nu kukutika kuli ya kalizya ya nyimbo. Lino nali ni myaka 17, natandike ukupeepa fwaka. Nalondanga ukoonda wakwe yano nalolanga yakulumbilizya pa kupeepa fwaka. Lino nali ni myaka 19 natandike ukuombela umu Johannesburg, muno natandike ukuzanwa na antu aipisye. Pataalengile natandike ukuomvya mazwi aipe, ukupeepa sana, nu kumwa sana pa mpela ya milungu.

Nanti ciye vivyo, amaka yene nakweti. Lyonsi nateyanga bola ya yakazyana ni vyangalo vyuze. Nupya naombesyanga pakuti manyikwe sana umu milimo ino naombanga umu vya makompyuta. Ukucita vivyo kwalenzile inkwate ulupiya nupya na antu aingi yalolanga ukuti uwikazi wane wali ningo. Lelo ntaali ni nsansa nupya nuvwanga sana uyi. Nizile imanya ukuti nulizye cimwi.

VINO BAIBO YANGAVWILE UKUSENUKA: Lino natandike ukusambilila Baibo, nizile imanya ukuti Yeova a Leza uwaya nu kutemwa. Nupya namanyile nu kuti walangilile ukuti watutemwa pa kutupeela Izwi lyakwe, Baibo. Caya kwati watulembela kalata cila muntu pakuti iyatutungulula. (Ezaya 48:17, 18) Nilwike ukuti ndi cakuti nkulonda naipakizya vino Yeova akatutungulula, nalondekwanga ukusenuka sana.

Conga cino nalondekwanga ukusenukamo u kuta ukuya ni vyuza iviipe. Nakomeleziwe sana na mazwi aaya pali Mapinda 13:20 apakaati: “Wino akapita nu wa mano nawe kwene alaya uwa mano, lelo wino akacina na awelewele, alacula wakwe cimwi, NWT.” Icisinte cii calenzile ukuti insye ivyuza vya mpiti nu kupanga ivyuza ivipya muli ya Nte Yakwe Yeova.

Uwavya ukalamba uno nakweti u kuta ukupeepa; nateesilwe sana uzya. Lino nacimvyanga panono panono uwavya uwo, nizile inkwata intazi na yuze. Ukuta ukupeepa fwaka kwalenzile ukuti mfinileko na ma kg 13.6! Cico cansakamike sana, nupya cansendiile imyaka umupiipi na 10 pakuti mbwezyeko ma kg. Nomba namanyile ukuti ukuta ukupeepa cali ali cintu ca mpomvu. Natwaliliile ukupepa kuli Yeova, nawe wangavwile ukucimvya intazi iiyo.

IVISUMA VINO NAZANA: Ndakai naya nu umi usuma. Nupya nateeka umwenzo pali vino nakwata. Ndakai nsikonkelela ivintu ivisileta insansa, ivili wa ncito, kulumbuka ni vyuma. Lelo nkaya ni nsansa ndi cakuti nkusambilizya yauze icumi ca muli Baibo. Ni cacitika i cakuti, anaci yatatu pali yano naombanga nayo mpiti ndakai yakaombela Yeova capamwi nani na ya wane. Lino avyazi ankuzizye yoili yatatala yafwa, nayanenyileko pali vino Baibo yalaya pa kutuutuluka ukulaya umu paladaise pano nsi.

Ukupalama sana kuli Yeova kwangazwa ukuzizimizya intazi ya kutazyelwa. Wancindamika pa mulandu wa kungika umu lupwa lwakwe ya kapepa yanji umu nsi yonsi. Pali yayo paya ya mayo aingi, ya tata, aina na ya nkazi.—Mako 10:29, 30.

[Cikope]

Nailolela ukutemwa kwa ina Klistu pali ya Nte Yakwe Yeova

 [Cikope]

Icikuulwa ca muzilo ica Cishinto kuno napepanga pa nsita imwi