“Lino mukupepa, mutaswililoka mu mazwi.” —Mateo 6:7.

Yeova asilonda twapepa mapepo akusungila nanti akubelenga umwi buku lya mapepo. Lelo akalonda twapepa ukufuma pansi ya mwenzo. Elenganyini vino mungayuvwa ndi cakuti cuza winu akumunena amazwi ali yamwi cila wanda. Ya cuza asuma yakalanda ivili umu mwenzo. Ndi cakuti tukuomvya amazwi itu lino tukupepa kuli Tata witu uwa kwi yulu, tukalanga ukuti tukamulola nga cuza witu.

“Nupya lino mukamulenga musyapeelwa, pano mapange inu aipe.”—Yakobo 4:3.

Tutange twenekele Leza ukwasuka mapepo itu ndi cakuti itumanya ukuti wapata vino tukulenga nanti vino tukulonda ukukwata. Wakwe, ndi cakuti umwi akupepa ukuti Leza amwazwe ukuwina ivyangalo vya kusitikapo pakuti akwate ulupiya, uzye Yeova angasuka ipepo lilyo? Pano watunena ukuti tutalinzile ukutemwisya impiya nu kutaila ivintu visi vya cumi, wa masyuko. (Ezaya 65:11; Luka 12:15) Tutange tutaile ukuti Yeova angasuka mapepo ya musango uwo! Fwandi pakuti Leza aasuke mapepo itu, tulinzile ukusininkizya ukuti tukulenga ukulingana na vino watunena ukupitila muli Baibo.

 “Ndi umwi akakana ukuvwa isunde, ni pepo lyakwe kwene lyapatwa.”—Mapinda 28:9.

Mu nsita ino ivyalumbulwa muli Baibo vyacitikanga, Leza atasukanga mapepo yakwe yayo atuvwilanga masunde yakwe. (Ezaya 1:15, 16) Leza aatasenuka foo. (Malaki 3:6) Ndi cakuti tukulonda Leza aasuka mapepo itu, tulinzile ukulauvwila amasunde yakwe. Nga ndi cakuti twacisile iviipe vimwi ukucisila? Uzye ala cikupiliula ukuti Leza atalatala aasuke mapepo itu? Awe foo! Leza alatweleela ndi cakuti tukulanga ukuti tukauvwa uyi pa viipe vino twacisile nupya tukulondesya ukulamuzanzya.—Milimo 3:19.