YA DANIEL NA YA MIRIAM yatwaline umu Sepetemba umu 2000 nupya yatandike ukwikala umu musumba wa Barcelona, uku mpanga ya Spain. Ya Daniel yalanzile ukuti: “Twikalanga ningo sana. Incito zino twaombanga zyalenganga twaya umu kuliila uku vikuulwa vya kulilamo ivisuma sana, twayanga uku mpanga izipusane pusane, nupya twazwalanga ivyakuzwala ivya mutengo. Nupya twaombanga lyonsi umu mulimo wa kusimikila.” Nomba ivintu vizile visenuka.

Lino kwali ukongano umu 2006, kwali ilyasi ilyafisile ya Daniel pa mwenzo umwali icuzyo cakuti: “Uzye tukaomba apapezile amaka itu ukuti twazwe yaayo ‘aaya pa nzila ya kuononesi’ pakuti tuyazwe ukuya pa nzila ya ku umi?” (Mapi. 24:11) Ilyasi lilyo lyalanzile sana pa mulimo uno twapeelwa uwa kwazwa antu ukumanya amazwi aakapeela umi amuli Baibo. (Mili. 20:26, 27) Ya Daniel yalanzile ukuti, “Nayuvwile kwati Yeova u wamvwanzyanga.” Nupya ilyasi lyalanzile nu kuti ukuombesya umu mulimo wa kusimikila kukalenga kuti umwi aye sana ni nsansa. Ya Daniel yamanyile ukuti amazwi yaya yali acumi. Ya Miriam yene pa nsita iiya ala yatandika upainiya nupya yaipakizyanga sana.

Ya Daniel yalanzile ukuti, “Nasondwelile ukuti yali insita iyakuti nsenuke.” Nupya vivyo kwene avino yacisile. Yacefizyeko insita ino yaombanga incito, iyatandika upainiya, nupya yelenginye pa nsansa zino yali nu kuya nazyo ndi yene na ya Miriam yaya uku kuombela ukukalondekwa ya kasimikila ya Wene aingi.

Umu Mei umu 2007, ya Daniel na ya Miriam yatiile incito nu kuya uku Panama, impanga ino yaile yatandalako pa nsita imwi. Mu cifulo ca kusimikilamo mwali ni vilila ivingi ivyali umu Bocas del Toro Archipelago pali Yemba wa Caribbean, ukukaikala aikala mpanga yano yakaama ukuti aa Guaymi. Ya Daniel na ya Miriam yelenginye ukuti ndi yaomvya impiya zino yasunzile, yali nu kwikala uku Panama pa myezi 8.

Yayanga uku vilila ivipusane pusane ukuomvya uwato ni ncinga, nupya yakaiusya vino ulwendo lwao ulwa kutandikilako pa ncinga lwayatonsizye, yapisile amakilomita 32 ala yakutumbela imyamba, nupya ala kasanya ikawala cuze. Kwasiile sile panono ukuti ya Daniel yafwe icipafi pa mulandu nu kutonta. Lelo, indupwa zya ya Guaymi izikalanga umu mbali ya nzila zyayapokelelanga ningo, sana sana lino yasambilileko panono ululimi lwa ku mpanga iiya. Pataalengile, avino yatandike ukutungulula amasambililo 23.

Lino impiya zino yakweti zyasizile, insansa zino yakweti zyasizile. Ya Daniel yalanzile ukuti: “Twatandike ukwelenganya pa kuswilila uku Spain ala tukuponya na minsozi. Twayanga sana nu ulanda ndi twiusya ukuti twali nu kusya amasambililo yano twatungululanga.” Nomba, lino papisile umwezi, yapokelile amazwi ayalenzile ukuya sana nu luzango. Ya Miriam yalanzile yati: “Yatunenyile ukuti tutandike ukuomba upainiya uiyele. Catuzanzizye sana ukutwalilila ukuombela kuuku!”

Pa mulandu nu kusenuka kwa vintu umwi uvi, umu 2015, ya Daniel na ya Miriam yayanenyile ukuti yatwalilile ukuombela uku mpanga iiya muli upainiya. Uzye yacisile uli? Yataile sana vino Yeova walaya, vino tukawelenga pa Masamu 37:5 ukuti: “Sekezya amikalo yako kuli [Yeova], umutaile nawe alakwazwa.” Yazanyile incito iyakuyazwa lino yakuomba upainiya, nupya ndakai yaya umu cilongano icayela umu citungu ca Veraguas, uku mpanga ya Panama.

Ya Daniel yalanzile yati: “Lino tutatala twafuma uku Spain, tutamanyile ningo ndi cakuti twali nu kukwanisya ukwangupazya uwikalo. Nomba twakwanisya, nupya tukakwata vyonsi ivikalondekwa sana.” Uzye icani icalenga yaye sana nu luzango? Yalanzile ukuti, “Ukwazwa antu afuke ukusambilila pali Yeova ali cino cikatuzanzya sana!”