1. Nanti icakuti Yeova a Leza uwapapelapela, uzye wazumilizya yauze ukucita cani?

YEOVA a Leza wa Papelapela. Waumvile ivintu vyonsi, nupya wakwatisya amano na maka. Lino Yobo wilwike ukuti vii ali vino Yeova waya, walanzile ati: “Nemo natimanya ukuti wemo wakwata amaka akucita icintu icili consi. Wemo ungacita consi cino ukulonda, nupya kusi angalesya.” (Yobo 42:2) Yeova angacita icili consi cino akulonda ukwaula ukuti umwi amwazwe. Lelo akalanga ukuti waya nu kutemwa pano wazumilizya yauze ukuombela pamwi nawe pakuti afikilizye ukulonda kwakwe.

2. U mulimo ci ucindame uno Yeova wapeezile Yesu?

² Leza waumvile Umwanakwe, Yesu, ala atatala waumba iciliconsi. Lyene Yeova walesile ukuti Umwanakwe amwazwa ukuumba ivintu vyonsi. (Yoane 1:1-3, 18) Umutumwa Paulo  walemvile pali Yesu ati: “Muli aliwe Leza waumvile vintu vyonsi ivya mwiyulu na pano pa nsi, ivikaloleka ni visiloleka, kwika pamwi na maka yonsi, aene, yakateeka ni ntunguuluzi zyonsi. Leza waumvile uumbo onsi muli aliwe nupya vyonsi vyaumvilwe kuti viye vyakwakwe.” (Kolose 1:15-17) Yeova atapeezile sile Umwanakwe incito icindame lelo walesile nu kuti yauze yamanye pali cii. Fwandi lyali i syuko sana ukuombela pamwi na Leza!

3. U mulimo ci uno Yeova wapeezile Adamu, nupya u mulandu ci?

³ Yeova nupya wazumilizye antunze ukuti yaombela pamwi nawe. Wapeezile Adamu umulimo wa kutemela inyama mazina. (Utandiko 2:19, 20) Mutale mwelenganye vino Adamu wazanzile lino wapezilwe umulimo uu! Walolekesyanga vino inyama yonga na yonga yali na vino yacitanga, alino lyene asoolola izina lilingine ni nyama iyo. Yeova aliwe waumvile vinyama vyonsi, fwandi umwineco atemwa nga aliwe wavitemile mazina. Lelo walangilile ukuti watemilwe Adamu pano wamuzumilizye ukuti aliwe atemele inyama mazina. Nupya Leza wapeezile Adamu umulimo wa kuzifya insi yonsi ukuya paladaise. (Utandiko 1:27, 28) Nomba umukuya kwa nsita Adamu wasoolwilepo ukuta ukuombela pamwi na Leza, nupya icacitike icakuti wizile aacula kumwi na ana yakwe kwene.—Utandiko 3:17-19, 23.

4. Uzye antu yamwi yaombiile uli pamwi na Leza ukufikilizya ukulonda kwakwe?

⁴ Lino papisile insita, Leza wizile azumilizya antu na yauze ukuombela pamwi nawe. Nowa wakuuzile iciwato muno wene nu lupwa lwakwe yapusukile lino Mulamba wizile. Mose wakulwile uluko lwa ina Izlaeli ukufuma umu Eguputo. Yoswa watungulwile aina Izlaeli ukwingila umu Mpanga ya Ulayo. Solomoni wakuuzile ing’anda ya kupepelamo umu Yelusalemu. Maliya wizile aya nyina wakwe Yesu. Antu yaa autailo alino na yauze aingi yaombiile pamwi na Yeova ukufikilizya ukulonda kwakwe.

5. U mulimo ci uno tungaombako, nupya u mulandu ci uno Yeova watupeelela umulimo uu? (Lolini cikope cakutandikilako.)

⁵ Ndakai, Yeova watuzumilizya ukuti twaomba papezile amaka itu ukutungilila Uwene wakwe. Tungaombela Leza umu nzila izingi. Nupya nanti cakuti swensi tutanga tumuombele umu nzila ili imwi, swensi tungasimikila ilandwe lisuma ilya Wene. Yeova atemwa nga aliwe akaomba umulimo uu umwineco. Nga akalanda na antu pano nsi ala wene ali ukwiyulu kwene. Yesu walanzile ukuti Yeova nga walesile amawe aliyo yasimikile antu pa wene wakwe. (Luka 19:37-40) Lelo Yeova watuzumilizya ukuti twaombela pamwi nawe. (1 Kolinto 3:9) Umutumwa Paulo walemvile ati: “[Vino Mukuombela] pamwi na Leza, lyene tukumupapata kuti mwapokelela cikuku cakwe Leza, mutaleka cikuku ciye icaula mulimo.” (2 Kolinto 6:1) I syuko sana vino Leza watuzumilizya ukuombela pamwi nawe. Lekini tulole vimwi ivikaalenga twaya nu uluzango lino tukuombela pamwi na Leza.

6. Uzye umwana wakwe Leza iyeli walondolwile uli vino uvwanga lino waombelanga pamwi na isi?

⁶ Ukuombela pamwi na Leza lyonsi kukalenga aomvi yakwe ukuya nu luzango. Lino umwana wakwe Leza iyeli atali aize pano nsi, walanzile ati: “[Yeova] uwalenzile kuti  nemo injeko . . . Anene namuzanzyanga cila wanda, ala nkusansamuka panoli [cila nsita].” (Mapinda 8:22, 30) Lino Yesu wali na isi, wali ni nsansa pano waomvile imilimo iingi nupya wamanyile ukuti Yeova wamutemilwe. Uzye naswe tungaya ni nsansa ndi tukuombela pamwi na Leza?

7. U mulandu ci uno umulimo wa kusimikila ukatuletela uluzango?

⁷ Yesu walanzile ukuti tukaya nu luzango lino tukupeela na lino tukupokelela. (Milimo 20:35) Twali nu luzango lino twasambilile icumi, nomba u mulandu ci uno nupya tukazangila ndi cakuti tukusambilizyako yauze icumi? A pa mulandu wakuti tukalola kuno yakuya ni nsansa ndi cakuti yamanya vino Baibo ikasambilizya nu kuya ya cuza yakwe Leza. Tukazanga ndi twalola vino yakusenuka muli vino yakaelenganya na vino yakacita. Umulimo wa kusimikila wacindama sana nupya ali mulimo usuma uno tungaombako. Ukalenga ukuti yano yasambilila nu kuya ivyuza vyakwe Leza, yakakwate umi wa pe.—2 Kolinto 5:20.

8. Uzye antu yamwi yalandapo uli pa luzango luno yaaya nalo pa mulandu wakuti yakaombela pamwi na Leza?

⁸ Lino tukwazwa yauze ukusambilila pali Leza, tukamanya ukuti tukuzanzya Yeova nupya tukamanya ukuti akataizya pali vino tukamuombela papezile maka itu. Cii naco cikatuletela uluzango. (Welengini 1 Kolinto 15:58.) Marco, aakaikala uku Italy, walanzile ati: “Nkazanga cuze vino namanya ukuti nkaombela Yeova nu mwenzo wane onsi, nsiombela umuntu muze wino panono sile angilila na vino naomba.” Franco, aakaikala uku Italy, nawe kwene walanzile ati: “Yeova akaomvya Izwi lyakwe alino na vyuze vino watupekanyizizya ukukutwiusya cila wanda ukuti watutemwa nupya akatwiusya nu kuti vyonsi vino tukamuombela vyacindama kuli aliwe, nanti cakuti limwi cingaloleka kwati pasi na vino tukaomba. Fwandi ali mulandu uno ukuombela pamwi na Leza  kukandetela uluzango nupya umi wane utaya uwa silesile.”

9. A ucuza ci uwali pali Yesu na Yeova, nupya u mulandu ci?

⁹ Nga tukuombela pamwi na yano twatemwa, tukapalama sana kuli aliyo. Tukamanya sana imiyele yao ni nkulilo zyao. Tukamanya ningo mauyo yao na vino yakalonda ukufikilizya amauyo yayo. Yesu waomvile na Yeova pa myaka iingi sana. Izile yatemwana sana icakuti kusi icali nu kunona ucuza wao. Yesu walondolwile vino ucuza wao wali lino walanzile ati: “Nemo na Tata twaya wenga.” (Yoane 10:30) Yalemenkine sana, nupya yuvwananga sana lino yaombelanga pamwi.

10. U mulandu ci uno ukusimikila kukalenga tupalame kuli Leza nu ku yanji?

¹⁰ Yesu wapefile kuli Yeova ukuti acingilile asambi yakwe. U mulandu ci? Wapefile ati: “kuti yaye wenga ndi vino wewe nani twaya wenga.” (Yoane 17:11) Ndi tukukonka masunde yakwe Yeova nu kuombako umulimo wa kusimikila, tukamanya ningo imiyele yakwe isuma. Tukamanya na cino cacindamila ukumutaila nu kukonka masunde yakwe. Nupya nga twapalama kuli Leza, nawe akapalama kuno tuli. (Welengini Yakobo 4:8.) Nupya tukapalama uku ina itu na ya nkazi pano swensi tukakwata intazi alino ni nsansa pa mulandu wakuti twakwata mauyo aliyamwi. Tukaombela pamwi, ukuzangila pamwi, nu kuzizimizya pamwi. Octavia, aakaikala uku Britain, walanzile ati: “Ukuombela pamwi na Yeova kukalenga ukuti mpalame sana uku yanji.” Walondolwile ati icalenga, u mulandu wakuti auze yakwata “uyo uli umwi na uno wakwata.” Naswe kwene avino tukayuvwa. Ndi twalola vino aina yakuombesya pakuti yazanzye Yeova, tukapalama sana kuli aliyo.

11. U mulandu ci uno tulapalama sana kuli Yeova nu kuvwana sana na anji umu nsi ipya?

¹¹ Twatemwa sana Leza na antu yanji, lelo umu nsi ipya tulacilapo ukutemwana. Mutale mwelenganye imilimo usuma ino tulaaomba umu nsi ipya! Tulaazengela yonsi aalaatutuluka nu kuyasambilizya pali Yeova. Nupya tulazifya insi ukuya paladaise. Tulazanga cuze ukuombela pamwi nupya tulaya amalilike lino tukutekwa na Yesu. Antu yonsi yalauvwana nu kupalama sana kuli Yeova, wino alikusya ‘icaumi consi.’—Masamu 145:16.

12. Uzye umulimo wa kusimikila ukatucingilila uli?

¹² Tulinzile ukucingilila ucuza witu na Yeova. Tukaikala umu nsi yakwe Satana nupya tutamalilika, fwandi cangupala ukutandika ukwelenganya nu kucita vintu wa antu amu  nsi. Caya kwati ukowa umu luzi muno muli umukuku uukututwala kuno tusikulonda. Fwandi ndi tukowa umuluzi lwa musango uwo tulinzile ukuomvya amaka pakuti tutasendwa nu mukuku. Ali vino caya naswe kwene, ndi tusikulonda kuti Satana atusombe tulinzile ukuombesya. Uzye ukusimikila kungatucingilila uli? Nga tukusimikila uku yantu pali Yeova, tukaika sile amano uku vintu vicindame, asi ivintu ivingatonsya utailo witu. (Filipi 4:8) Ukusimikila kukakomya utailo witu pano kukalenga twaiusya amalayo yano Leza watulaya nupya tukaiusya na masunde asuma yano watupeela. Nupya ukusimikila kukalenga tutwalilile ukuya ni miyele ino tulinzile ukukwata pakuti tucingililwe kuli Satana nu ku yantu amu nsi.—Welengini Efeso 6:14-17.

13. Uzye Nte umwi aakaikala uku Australia akauvwa uli pa mulimo wa kusimikila?

¹³ Nga tukuombesya umu mulimo wa kusimikila, kuisambilizya, nu kucita ivisuma uku antu amu cilongano, tukacingililwa pano tusikwata insita ya kusakamala pa ntazi zino tuli nazyo. Joel, aakaikala uku Australia, walanzile ati: “Umulimo wa kusimikila ukangazwa ukuya nu utailo. Mulimo wa kusimikila ukalenga naiusya intazi zino antu yakakwata nu usuma uno nazana pa mulandu wakukonka ivisinte vya muli Baibo umu umi wane. Umulimo wa kusimikila ukangazwa ukuya umuicefye; ukalenga nkwate isyuko lya kutaila sana Yeova nu kupokelela ukwazwa ukufuma uku ina na ya nkazi.”

14. U mulandu ci uno ukutwalilila ukuomba umulimo wa kusimikila kukalangilila ukuti umupasi wakwe Leza ukatwazwa?

¹⁴ Nupya ukusimikila kukalenga tutaile sana ukuti umupasi wakwe Leza ukatwazwa. Lekini tulangilile: Elenganyini ukuti mukaomba incito ya kupeela antu ivyakulya uku ncende inu. Musifola pa mulimo uu uno mukaomba, nupya mukaisakamala mweineco. Alino nupya antu yano mukatwalila ivyakulya yasilonda ivyakulya vivyo, nupya yamwi yamupata nu kumupata pa mulandu wakuti mukayatwalila ivyakulya. Uzye vwilini mungatwalilila ukuomba incito ya musango uwo? Mungatoovoka zuwa sana, nupya limwi mungata ni ncito iyo. Nomba swemo, tukatwalilila ukuomba umulimo uu uwa kusimikila, nanti cakuti tukasumba insita ikulu ni impiya umu mulimo uu nupya nanti cakuti antu yakutuseka nanti ukutusokela, tusiita. Fwandi icumi cumi umupasi wakwe Leza ukatwazwa.

15. Uzye umulimo wa kusimikila ukaazwilizya uli ukufikilizya vino Leza akaalonda ukucitila antunze?

¹⁵ Uzye umulimo wa kusimikila ukaazwilizya uli ukufikilizya vino Leza akaalonda ukucitila antunze? Ukulonda kwakwe Leza kwali ukwakuti antunze yaikala manda pe, nupya vino Leza walondanga ukucita vitasenwike lino Adamu wapondwike. (Ezaya  55:11) Leza wapekinye ukuti tukululwe kufuma ku luyembu ni mfwa. Wapekinye uli? Yesu wizile pano nsi nu kupeela umi wakwe. Pakuti impolelwa ino Yesu wapeezile iyazwe antunze, antu yalondekwanga ukuvwila Leza. Acino Yesu wasambilizye antu vino Leza akaalonda yacita, nupya wanenyile asambi yakwe ukuti avino yacita. Ndi tukusimikila nu kwazwa yauze ukuya ivyuza vyakwe Leza ndakai, ala tukuombela pamwi na Leza ukufikilizya vino wapekanya ukuti antunze yakakululwe kufuma uku luyembu ni mfwa.

16. Uzye umulimo wa kusimikila vyalemana uli na masunde yakwe Leza akulu kuluta?

¹⁶ Ndi tukwazwa antu yauze ukuti yakaye nu umi wa pe, ala tukulanga ukuti twayatemwa nupya ala twatemwa na Yeova. Leza “akalonda umuntu wensi kuti atuulwe nu kumanya cumi.” (1 Timoti 2:4) Lino umu Faliseo umwi uzizye Yesu isunde lyakwe Leza ilikulu kuluta, Yesu wamwaswike ati: “‘Uwatemwa Mwene Leza wako nu mwenzo wako onsi, nu umi wako onsi, na mano yako yonsi.’ Lii lili sunde likulu nupya ilyacindama kuluta Masunde onsi. Na lyakwe ciili likoline na lii, nalyo likati, ‘Uwatemwa umuzo ndi vino waitemwa.’” (Mateo 22:37-39) Nga tukusimikila antu ilandwe lisuma, ala tukuvwila amasunde yaa.—Welengini Milimo 10:42.

17. Uzye mukauvwa uli api syuko lino mwakwata ilya kusimikila ilandwe lisuma?

¹⁷ Ala twasyuka cuze! Yeova watupeela umulimo uukatuletela uluzango, uukatupalamika sana kuli aliwe nu kuleka twauvwana sana na anji, nupya ukacingilila ucuza witu na aliwe. Nupya umulimo uu ukatupeela isyuko lya kulanga ukuti twatemwa Leza na antu yanji. Yeova wakwata aomvi yakwe nyanya ukuzinguluka insi yonsi, nupya yonsi yapusana pusana. Nomba nanti cakuti sweswe yance nanti aikolo, aakankala nanti aapina, aakome nanti aatonte, tukaomba papezile amaka itu ukusimikila antu yauze. Tukayuvwa wakwe Chantel akaikala uku France, uwalanzile ati: “Umuntu uwakwata sana amaka umu umbo onsi, Kaumba wa vintu vyonsi, Leza uwaya nu luzango, akanena akuti: ‘Pitanga! kavwange! kamvwangileko, uvwange ukufuma pansi ya mwenzo. Nakupeela amaka, nakupeela Izwi lyane Baibo, nakupeela angeli aakukwazwa, nakupeela aina, alino nupya nkakusambilizya nu kukulanga ivyakucita pa nsita iliinge.’ I syuko sana ukuomba umulimo uno Yeova watupeela nu kuombela pamwi na Leza witu!”