UZYE watuumanya icintu cakutandikilako cino Nowa wacisile lino wafumile umu ciwato pamwi nu lupwa lwakwe? Wapeezile umutuulo nanti uwila kuli Leza. Lola Nowa apa cikope icili apisika vino akupeela umutuulo. Nowa wapeezile uwila uu uwa nyama ukutaizya Leza pa kupususya ulupwa lwakwe kuli mulamba mukalamba.

Uzye vwile Yeova watemilwe uwila kwene uuwa? Ee, watemilwe. Acino waneeniile Nowa ukuti atalatala aonoone antu nupya ukuomvya mulamba.

Pataalengiile, avino nu musili umile, alino Nowa nu lupwa lwakwe yaafumile umu ciwato nu kutandika kwikala cipya-cipya. Leza wayapoleliile nu kuyaneena ati: ‘Mukwate ana aingi. Muvule ukufikila antu yace ikale umu nsi yonsi.’

Nomba, umukuya kwa nsita, antu aali nu kuvwa ilyasi lyakwe mulamba mukalamba ndi yaatiinanga ukuti limwi nupya kwene mulamba aliza. Acino Leza wapeezile usininkizyo wa kuti atalatala aonoone antu umu nsi yonsi ukuomvya mulamba. Uzye watuumanya usininkizyo kwene uu? Waali u mulalamfuti.

Umulalamfuti ukaloleka umulwelele ndi cakuti akasanya kawala lino imvula yata sile ukutoonya. Umulalamfuti ungakwata imiziwo iingi. Uzye watala walolapo umulalamfuti? Uzye watu-ulola apa cikope?

Mazwi yano Leza walanzile aeya: ‘Nalaya ukuti antu ni inyama yatalatala yonoonwe muli mulamba nupya. Namaika umulalamfuti wane umu makumbi. Nu mulalamfuti ndi waloleka, ndaiusya vino nalaya.’

Uzye lyene i cani cino ufwile ukwiusya ndi walola umulalamfuti? Ee, uulayo wakwe Leza uwakuti atalatala aumoole antu nupya ukuomvya mulamba mukalamba.