EN Avril 2006, dan le monde entier bann la gazette ti koz lor enn zistoire extraordinaire: Enn l’equipe bibliste ti rann publik seki ena dan enn ancient texte ki zot ti fek decouvert ki appel “l’Evangile Judas.” Sa bann lartik-la ti dire ki bann bibliste pensé ki sa texte-la change net fason ki nou considere Judas, disciple ki ti trahir Jésus. Dapré sa bann bibliste-la, Judas ti enn hero. Li ti zapotre ki ti plus comprend Jésus ek ki ti livré Jésus pou ki so bann l’ennemi execute Li, parski c’est Jésus ki ti demann li pou faire sa.

Eski sa texte-la li vrai-mem ancient ou-soit non? Si li vrai-mem ancient, eski sa faire nou aprann bann nouveau kitsoz lor bann personnage ki’nn joué enn grand role dan l’Histoire couma Judas Iscariote, Jésus Christ, ou-soit bann premier Chretien? Eski sa bizin change fason ki nou considere l’enseignement Christ?

Nou pa koné exactement couma finn decouvert “l’Evangile Judas.” Au lieu ki document-la finn decouvert ek verifié par bann archeologue, li’nn nek apparette enn coute coumsa vers la fin bann l’année 1970 ou-soit commencement 1980. Li parette ki ti decouvert document-la dan l’Égypte en 1978 dan enn tombe abandonné, kitfois dan enn la cave. Li ti enn parmi quatre texte separé ki ti dan enn codex (forme dan ki livre ti été longtemps) ki ti ecrire en Copte (enn langue ki sorti dan langue ki bann Égyptien ti kozé longtemps).

Climat l’Égypte ki sec finn conserve sa codex ki en cuir-la pendant plusieurs siecle. Mais kan inn tire li dan l’Égypte li’nn commence abimé vite. En 1983, ti montré deux-trois bibliste codex-la pou enn ti moment; mais prix ki ti pé vann li ti tellement cher ki codex-la pa’nn gagne la vante. A mesure bann l’année inn passé, parski ti neglige ek ti mal garde codex-la, li’nn abimé pli vite encore. En l’an 2000, enn madame ki reste la Suisse ek ki habitué faire commerce bann antikité, ti acheté codex-la. A la fin, li’nn donne sa enn l’equipe expert international pou ki ensam avek Maecenas Foundation for Ancient Art ek National Geographic Society, zot remette sa codex-la dan enn bon l’etat mem si certain partie ti’nn vinn boute-boute. Sa l’equipe-la  ti pou aussi faire konn l’age sa codex-la ek ti pou traduire li ek interprete li.

Enn test avek carbone 14 inn montré ki li possible ki sa codex-la date depuis troisieme ou-soit quatrieme siecle N.L. Mais selman, bann bibliste ti pensé ki sa texte Copte-la, “l’Evangile Judas,” inn traduire depuis so langue original Grec depuis bien avant. Alors, dan ki lepok vrai-mem ti ecrire “l’Evangile Judas,” ek kot-sa ti ecrire sa?

Premier fois ki ti faire mention “l’Evangile Judas,” c’est dan bann livre Irénée, enn ecrivain ki ti pretann li Chretien ek ki ti vive vers la fin deuxieme siecle N.L. Irénée ki pa ti d’accord avek l’enseignement plusieurs groupe, ti ecrire lor enn ladan dan so livre Contre les hérésies: “Zot dire ki Judas, ki ti enn traitre, ti bien konn sa bann kitsoz-la, ek ki li tousel ti konn la verité ki personne pa ti koné, ek li ti accompli mystere lor trahison. A cause li, tou bann kitsoz, ki lor la terre ou-soit dan le ciel toulé-deux, ti rente dan confusion. Zot invente enn zistoire . . . ek zot inn appel li l’Evangile Judas.”

Irénée ti bien determiné pou contredire plusieurs l’enseignement bann Chretien Gnostique (Gnostique sorti dan enn mot grec ki kapav faire reference ar “connaissance ki reste secret”), ki ti pretann ki zot ena enn connaissance special. Ti ena beaucoup groupe Gnostique, ek chaque groupe ti ena so prop fason pou interprete seki li ti pensé ti la verité. Bann Gnostique ti favorise zot bann prop l’enseignement ek sa ti vinn bien commun pendant deuxieme siecle N.L.

Sa bann l’evangile Gnostique-la ti souvent pretann ki bann premier zapotre ti mal comprend message Jésus ek ki ti ena enn l’enseignement secret ki Jésus ti revelé zis ar deux-trois ki li ti choisir. a Certain parmi sa bann Gnostique-la ti croire ki le monde kot nou pé vive li enn prison. Alors, “bondié ki’nn crée [bann kitsoz]” ki mentionné dan bann l’Écritures Hébraïques ti enn bondié inferieur ki ti opposé ar plusieurs grand bondié ki zot ti croire. Pou zot, enn dimoune ki ena vrai “connaissance” ti comprend sa “secret[-la]” ek ti pou rod libere li ar so lekor physik.

“L’Evangile Judas” basé lor sa croyance-la. Li commence avek sa bann parole-la: “Parole secret ki Jésus ti dire dan enn conversation avek Judas Iscariote, pendant huit jour, trois jour avant ki li ti celebré Pâque.”

Eski c’est lor sa codex-la-mem ki Irénée ti ecrire, ek ki soi-disant ti perdi pendant plusieurs siecle? Marvin Meyer, ki ti forme partie premier l’equipe ki ti analyse ek traduire sa codex-la dire ki “ti description ki [Irénée] ti faire corresponn assez bien avek sa texte Copte ki appel l’Evangile Judas-la.”

Dapré “l’Evangile Judas,” Jésus ti riye so bann disciple kan zot ti montré ki zot mank connaissance. Mais parmi bann 12 zapotre, zis Judas ti montré ki li ti vrai-mem comprend Jésus. Alors, Jésus ti partage avek li en privé “bann secret lor le royaume.”

Premier l’equipe bann bibliste ki ti travail lor sa l’evangile-la ti bien influencé par seki Irénée ti dire. Dapré zot traduction, Jésus ti prefere Judas parski li ti disciple ki ti pou comprend bann mystere ek ki ti pou “rente” dan “royaume.” Bann zapotre ki ti dan l’erreur ti pou nomme kikenn pou remplace Judas, mais li ti pou vinn “treizieme l’esprit” ki ti pou “pli grand ki tou [lezot disciple]” parski Jésus dire: “To pou sacrifié sa zom (lekor) ki habille moi-la.”

Bann ecrivain bien populaire, couma Bart Ehrman  ek Elaine Pagels, ki aussi bann grand bibliste ki etudié lor bann premier Chretien ek bann Gnostique, pa ti tardé pou publié bann recherche ek commentaire ki zot ti faire lor “l’Evangile Judas” ki ti bien ressemblé traduction ki premier l’equipe ti faire. Mais selman, inpé apré, bann lezot bibliste, couma April DeConick ek Birger Pearson, ti dire seki zot pensé. Zot ti dire ki National Geographic Society ti tellement envie ki bann media koz lor travail ki li’nn faire avek sa ancient texte-la, ki li’nn taillé-rasé pou publié texte-la. En plus, pa finn respecté bann l’etape normal ki ti bizin suive pou analyse sa texte-la en profondeur ek pou faire bann lezot specialiste examine zot travail, parski l’equipe-la ti bizin signe enn document lor confidentialité.

DeConick ek Pearson pa’nn travail ensam, mais zot toulé-deux inn tire mem conclusion ki certain partie important dan sa codex-la ti mal traduire par sa premier l’equipe bibliste-la. Dapré recherche ki DeConick inn faire lor sa texte-la, Jésus appel Judas “Treizieme Demon,” pa “treizieme l’esprit.” b Jésus ti aussi dire dan enn fason bien clair ki Judas pa pou monte dan “royaume.” Au lieu ki li pou “pli grand” ki bann lezot disciple, Jésus dire Judas: “To pou faire pli pire ki zot tou. Parski to pou sacrifié sa zom (lekor) ki habille moi-la.” Dapré DeConick, bann ki’nn ecrire “l’Evangile Judas” ti pé bouffonne tou bann zapotre. Conclusion final ki DeConick ek Pearson inn tiré lor “l’Evangile Judas,” c’est ki Judas pa enn hero.

Ki bann bibliste ki’nn examine sa l’evangile-la considere Judas couma enn hero ou-soit couma enn demon, okenn parmi zot pa’nn dire ki sa texte-la ena bann l’information exact lor l’Histoire. Bart Ehrman expliké: “C’est pa enn l’Evangile ki’nn ecrire par Judas, ou-soit mem par enn kikenn ki pretann ki li [Judas]. . . . C’est pa enn l’Evangile ki finn ecrire dan lepok Judas par enn kikenn ki ti konn li . . . Alors, li pa enn livre ki pou donne nou bann l’information en plus concernant seki’nn arrivé dan la vie Jésus.”

“L’Evangile Judas” li enn texte Gnostique ki daté deuxieme siecle N.L., ek ki au commencement ti ecrire en Grec. Ziska zordi bann bibliste pa sur si “l’Evangile Judas” ki fek decouvert, li mem texte ar seki Irénée ti faire reference. Mais sel kitsoz ki “l’Evangile Judas” montré dan enn fason clair, c’est ki ti arrive enn moment kot bann fausse Chretien ti introduire zot bann prop l’enseignement, seki’nn amenn zot pou divisé en plusieurs secte. Au lieu ki “l’Evangile Judas” prouvé ki la Bible faire erreur, li montré ki bizin faire attention ar bann apostat, pareil couma Paul ti dire dan Actes 20:29, 30: “Mo koné ki apré ki mo’nn fini allé . . . parmi zot-mem, pou ena bann zom ki pou levé ek pou deforme la verité ek pou faire bann disciple suive zot.”