APRÉ Jésus so dernier repas avek so bann zapotre, la nuit avant ki so bann l’ennemi ti touye li, Jésus ti promette pou recompense zot, ek pou donne zot enn place dan le ciel. Li ti dire: “Dan lakaz mo Papa ena beaucoup place pou resté. Sinon, mo ti pou’nn dire zot, parski mo pé al prepare enn place pou zot.” (Jean 14:2) Kifer Jésus ti pou donne bannla enn place dan le ciel? Ki zot pou faire la-bas?

Jésus ti pé pense pou donne so bann disciple enn travail special. Pendant sa-mem la nuit-la, li ti dire: “Mais zot, zot bann ki finn contigne reste avek moi dan mo bann l’epreuve; ek mo pé faire enn alliance avek zot, pareil couma mo Papa finn faire enn alliance avek moi pou enn royaume.” (Luc 22:28, 29) Bondié ti’nn promette Jésus ki li ti pou vinn sa le roi ki ti pou donne bann dimoune enn sa bann kitsoz ki zot bien bizin-la—enn bon gouvernement. Jésus pou tire bann dimoune dan zot bann grand souffrance ek pou detruire bann ki pé fini zot net. Mem si Jésus pou ena bann sujet ziska “dan boute la terre,” so trone pou dan le ciel.—Psaume 72:4, 8; Daniel 7:13, 14.

Mais selman, Jésus pa pou regné tousel. A cause sa, li ti promette so bann zapotre ki Li pou donne zot enn place dan le ciel. Zot ti bann premier parmi bann ki ti choisir pou “regne couma bann le roi ki dirige la terre.”—Révélation 5:10.

Comié dimoune pou al dan le ciel? Pareil couma dan n’importe ki gouvernement, bann ki dirigé dan Royaume Bondié ki dan le ciel, zot tigit comparé ar tou bann dimoune ki vive enba l’autorité sa royaume-la. Ar bann ki pou regné avek li, Jésus ti dire: “Pa peur ti troupeau, parski zot Papa finn trouve bon pou donne zot royaume.” (Luc 12:32) A la fin pou ena 144,000 dimoune dan sa “ti troupeau[-la].” (Révélation 14:1) Sa nombre-la li tigit comparé ar bann million dimoune ki pou profite enn la vie eternel lor la terre en tant ki bann sujet fidele sa Royaume-la.—Révélation 21:4.

Alors, pa tou bann bon dimoune ki al dan le ciel. Concernant le roi David ki ti enn bon dimoune, l’apotre Pierre ti dire dan enn fason clair: “David pa ti monte dan le ciel.” (Actes 2:34) Jean le Baptiste aussi ti enn bon dimoune. Pourtant, Jésus ti dire ki li pa ti pou gagne l’honneur pou regné couma enn le roi dan le ciel. Jésus ti dire: “Parmi bann ki’nn né lor la terre, pa finn ena enn ki pli grand ki Jean le Baptiste; mais enn dimoune ki pli tipti dan royaume ki dan le ciel, pli grand ki li.”—Matthieu 11:11.

Eski ou pou gagne recompense ki reservé pou bann bon dimoune?

Ki enn dimoune bizin faire pou li gagne recompense pou vive pou touletan lor la terre? Jésus ti dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Remarké ki l’amour ki Bondié ena pou le monde pousse Li pou offert tou dimoune possibilité pou vive pou touletan mais zis bann ki “ena la foi” ki gagne sa recompense-la.

La foi bizin basé lor enn connaissance exact. (Jean 17:3) Ou kapav montré ki ou enn bon dimoune kan ou aprann plus lor projet ki Jéhovah ena pou bann dimoune. Ena la foi dan seki ou aprann ek laisse sa la foi-la pousse ou pou faire bann action. Ek surtout, ou pou kapav ena l’assurance ki possibilité pou vive pou touletan li vrai-mem ouvert devant ou.

 [L’encadré page 7]

Ki la Bible dire?

Question:

Ki arrive bann bon dimoune kan zot mort?

Reponse:

“Bann dimoune mort zot, zot pa konn nanyin ditou.”—ECCLÉSIASTE 9:5.

Question:

Ki l’esperance bann bon dimoune ena pou l’avenir?

Reponse:

“L’heure pé vini kot tou seki dan bann tombe souvenir pou tann [Jésus] so la voix ek pou sorti.”—JEAN 5:28, 29.

Question:

Kot-sa la plupart bann bon dimoune pou vive?

Reponse:

“Bann dimoune juste pou possede la terre, ek zot pou reste lor la pou touletan.”—PSAUME 37:29.