Ki ou mariage reste “enn la corde trois tresse”
“Enn la corde trois tresse pa casse vite.”—ECCL. 4:12.
1. Kisannla ti marié premier couple humain?
APRÉ ki Li’nn crée bann plante ek bann zanimo, Jéhovah ti crée premier zom, Adam. Plitar, Bondié ti faire Adam gagne enn sommeil bien profond, Li ti prend enn cote ar Adam ek Li ti servi sa pou faire enn femme ki ti pou vinn enn aide parfait pou li. Kan Adam ti trouve so femme premier fois, li ti dire: “Enfin, sannla li lezo mo lezo ek la chair mo la chair.” (Gen. 1:27; 2:18, 21-23) Jéhovah ti montré ki Li ti satisfait ar creation premier femme kan Li ti marié premier couple humain ek Li ti donne zot so benediction.—Gen. 1:28; 2:24.
2. Couma Satan ti crée enn desaccord entre Adam ek Ève?
2 Malheureusement bien vite, mariage, sa disposition ki Bondié ti etabli-la, ti en danger. Couma? Enn mauvais l’esprit, ki plitar ti appel Satan, ti embete Ève pou li mange fruit ki Bondié ti defann li ek Adam mangé. Enn tipé apré, Adam aussi ti desobeir Jéhovah pareil couma so madame; kan zot ti faire sa, zot ti rebelle kont domination Bondié, ki ti legal ek kont so bon direction. (Gen. 3:1-7) Kan Jéhovah ti demann zot ki zot ti’nn faire, li ti clair ki ti deja ena bann probleme entre Adam ek so madame. Adam ti blame so madame kan li ti dire: “Sa femme ki to’nn donné pou reste avek moi-la, li’nn donne moi fruit sa pié-la ek lerla mo’nn mangé.”—Gen. 3:11-13.
3. Ki mauvais l’attitude certain Juif ti’nn developpé?
3 Dan bann siecle ki finn suive, Satan inn servi different qualité methode bien sournois pou crée bann desaccord entre bann couple. Par exemple, dan enn certaine lepok, li ti servi bann chef religieux pou faire bann dimoune considere mariage dan enn fason ki contraire ar seki la Bible dire. Pou certain chef religieux juif, bann principe Bondié lor mariage pa ti ena l’importance. Zot ti permette ki bann mari divorce avek zot femme pou bann raison bien banal couma par exemple si zot femme ti mette trop beaucoup di-sel dan mangé. Mais Jésus ti clair kan li ti dire: “N’importe kisannla ki divorce avek so femme, excepté a cause fornication, ek marié avek enn lot, commette l’adultere.”—Mat. 19:9.
4. Ki kitsoz ki menace mariage zordi?
4 Dan nou lepok, Satan encore toujours pé essaye faire tou seki li kapav pou casse bann mariage. Bann mariage homosexuel, bann couple ki vive ensam sans marié, ek bann divorce ki facile pou gagné, montré ki li’nn bien reussi. (Lire Hébreux 13:4.) En tant ki chretien, ki nou kapav faire pou nou pa laisse-nou influencé par sa mauvais l’attitude ki partout dan le monde bann dimoune ena lor mariage-la? Anou examine certain kitsoz ki rann enn mariage heureux.
Faire enn place pou Jéhovah dan ou couple
5. Ki l’exemple “la corde trois tresse” vedir kan nou applik li ar mariage?
5 Pou ki enn mariage reussi, Jéhovah bizin ena so place dan la vie enn couple. So Parole dire: “Enn la corde trois tresse pa casse vite.” (Eccl. 4:12) Enn “la corde trois tresse” ena enn signification symbolik. Kan applik sa l’exemple-la ar mariage, sa deux premier tresse dan sa la corde-la represente enn mari ek enn femme ki uni ensam avek sa troisieme tresse principal-la, setadir Jéhovah. Kan enn couple uni avek Jéhovah, sa donne li la force spirituel necessaire pou faire face ar bann difficulté, ek c’est sa la clé pou zot reussi zot mariage.
6, 7. (a) Ki bann conjoint kapav faire pou ki Bondié ena enn place dan zot couple? (b) Ki enn soeur apprecié ar so mari?
6 Mais ki bann conjoint kapav faire pou assure-zot ki zot mariage couma enn la corde trois tresse? Psalmiste David ti chanté: “Ah Bondié, mo finn prend plaisir pou faire to volonté, ek to la loi li dan fond mo leker.” (Ps. 40:8) Nou aussi pareil, nou l’amour pou Bondié pousse nou pou servi Li avek enn leker complet. A cause sa, enn mari ek enn femme toulé-deux bizin developpe bann relation personnel ek proche avek Jéhovah ek faire so volonté avek plaisir. Toulé-deux conjoint bizin faire zeffort pou fortifié l’amour ki sakenn ena pou Jéhovah.—Prov. 27:17.
7 Si la loi Bondié vrai-mem dan fond nou leker, nou pou manifesté bann qualité couma la foi, l’esperance ek l’amour, ek sa pou aide nou pou garde nou mariage heureux. (1 Cor. 13:13) Enn soeur ki appel Sandra, ki ena 50 an mariage, dire: “Seki mo plus apprecié ar mo mari c’est direction spirituel ek bann conseil biblik ki li donne moi ek so l’amour pou Jéhovah, ki pli fort ki so l’amour pou moi.” Mari, eski ou femme aussi kapav dire mem zaffaire lor ou?
8. Ki enn couple bizin faire pou gagne “enn bon recompense” dan so mariage?
8 Eski en tant ki couple, ou ek ou conjoint mette bann kitsoz spirituel ek bann l’activité theocratik en premier dan zot la vie? En plus, eski vrai-mem ou considere ou conjoint couma ou partenaire dan service Jéhovah? (Gen. 2:24) Le roi Salomon ti ecrire: “Deux pli bon ki enn, parski zot gagne enn bon recompense pou travail dur ki zot faire.” (Eccl. 4:9) Oui, enn mari ek enn femme bizin travail dur pou gagne “enn bon recompense,” setadir enn mariage heureux ki dure pou touletan ek ki gagne benediction Bondié.
9. (a) Ki bann responsabilité bann mari chretien ena? (b) Dapré Colossiens 3:19, couma enn mari bizin traite so femme?
9 Ki montré ki Bondié ena so place dan la vie enn couple? C’est bann zeffort ki enn mari ek enn femme disposé pou faire pou vive en accord avek bann principe biblik. Bann mari ena responsabilité principal pou donne zot famille seki zot bizin lor plan materiel ek spirituel. (1 Tim. 5:8) Zot gagne conseil aussi pou prend compte besoin affectif zot femme. Dan Colossiens 3:19, nou lire: “Zot bann mari, contigne content zot femme ek pa vinn amer ar zot.” Enn bibliste expliké ki l’expression “vinn amer” vedir ki bann mari “koz brite ar [zot femme], ou-soit mem batte zot, ek pa donne zot l’affection, soin, seki zot bizin lor plan materiel, protection ek soutien.” Li clair ki enn conduite coumsa pena so place dan enn couple chretien. Kan enn mari prend so responsabilité en tant ki chef avek amour, li pa pou difficile pou so femme pou soumette ar so l’autorité.
10. Ki l’attitude bann femme chretien bizin manifesté?
10 Bann femme chretien ki envie ki Jéhovah ena enn place dan zot mariage bizin aussi respecté bann principe biblik. L’apotre Paul ti ecrire: “Fodé ki bann femme soumette ar zot mari pareil couma zot soumette ar le Seigneur, parski enn mari li chef so femme pareil couma Christ aussi li chef congregation.” (Éph. 5:22, 23) Satan ti embete Ève. Li ti faire li croire ki kan li pou independant ar Bondié, sa pou faire li vive heureux pou touletan. Zordi, nou trouve l’esprit l’independance dan beaucoup mariage. Mais pou bann femme ki ena la crainte pou Bondié, soumission ar l’autorité ki zot mari manifesté avek amour, li pa enn kitsoz ki abaisse zot. Zot rappel ki Jéhovah ti crée Ève pou li vinn ‘enn l’aide ki al bien ar’ so mari, ek sa position-la ti ena valeur devant lizié Bondié. (Gen. 2:18) Enn femme chretien ki disposé pou accepté sa disposition-la, li vrai-mem “enn couronne” pou so mari.—Prov. 12:4.
11. Dapré enn frere, ki finn permette so mariage reussi?
11 Enn lot fason ki bann couple kapav faire enn place pou Bondié dan zot mariage c’est kan zot etudié Parole Bondié ensam. Gerald ki heureux dan so mariage depuis 55 an, dire: “Pou ki enn mariage reussi, seki pli important c’est ki couple-la lire ek etudié la Bible ensam.” Li ajouté: “Faire bann kitsoz ensam, surtout bann kitsoz spirituel aide bann conjoint pou zot vinn pli proche ar zot camarade ek ar Jéhovah.” Etudié la Bible ensam aide enn couple pou garde bann principe Jéhovah clair dan zot l’esprit, sa fortifié zot spiritualité ek permette zot pou contigne progressé lor plan spirituel.
12, 13. (a) Kifer li tellement important ki enn couple prié ensam? (b) Ki bann lezot l’activité spirituel ki fortifié enn mariage?
12 Bann couple ki heureux zot aussi faire la priere ensam. Kan enn mari dire Jéhovah ‘tou seki li ena dan so leker’ ek prié pou bann kitsoz precis ki concerne surtout so famille, pena doute ki sa pou fortifié so relation avek so femme. (Ps. 62:8) Par exemple, li beaucoup pli facile pou reglé enn desaccord avek ou conjoint apré ki zot finn suppliye Bondié Tout-Puissant ensam pou donne zot so direction! (Mat. 6:14, 15) En accord avek zot la priere, li important ki toulé-deux bien decidé pou aide zot entre zot, ek pou ‘contigne supporte sakenn so camarade ek pou pardonné avek tou zot leker.’ (Col. 3:13) Rappel ki la priere montré ki ou ena confiance dan Bondié. Le roi David ti dire: “Zot tou zot lizié tourne vers toi avek l’espoir.” (Ps. 145:15) Kan nou tourne-nou vers Bondié avek l’espoir dan la priere, nou tracas diminué parski nou koné ki ‘Li interessé ar nou.’—1 Pierre 5:7.
13 Enn lot fason ki Jéhovah ena so place dan nou couple c’est kan nou assisté reunion ek nou participe dan predication ensam. Pendant bann reunion, bann couple aprann couma pou combatte “bann manigance” ki Satan servi pou casse bann famille. (Éph. 6:11) En plus, kan enn mari ek so femme preche ensam regulierement, zot aprann pou vinn “ferme, solide.”—1 Cor. 15:58.
Kan bann probleme arrivé
14. Ki bann kitsoz ki kapav faire enn couple gagne bann tension dan so mariage?
14 Li vrai ki sa bann suggestion ki nou fek examiné-la, zot pa nouveau. Mais kifer ou pa koz franc avek ou conjoint ek guetté dan ki domaine zot kapav amelioré? Selman, la Bible reconette ki mem bann couple ki faire enn place pou Jéhovah dan zot mariage, “pou gagne tribulation dan zot la vie.” (1 Cor. 7:28) A cause l’imperfection, mauvais l’influence sa le monde ki pa respecté bann la loi Bondié-la, ek bann piege Satan le Diable, mem bann chretien ki servi Bondié avek fidelité kapav gagne bann grand tension dan zot mariage. (2 Cor. 2:11) Mais Jéhovah aide nou pou faire face ar sa bann tension-la. Nou pena okenn doute lor la. Job, enn fidele serviteur Jéhovah ti perdi tou so troupeau, so bann serviteur ek so bann zenfant. Pourtant, la Bible dire: “Dan tousala, Job pa ti faire peché ek li pa ti rann Bondié responsable pou okenn mauvais kitsoz.”—Job 1:13-22.
15. Couma enn dimoune kapav reagir kan li stressé, ek ki bann conjoint kapav faire dan sa situation-la?
15 Parkont femme Job li, li ti dire: “Eski to pé toujours tini ferme to l’integrité? Maudi Bondié ek mort!” (Job 2:9) Oui, kan bann malheur ou-soit lezot difficulté arrivé, sa kapav tellement bouleverse enn dimoune ki li reagir dan enn fason sans reflechi. La Bible dire: “Pression ki enn dimoune sage gagné kapav faire li agir couma enn fou.” (Eccl. 7:7) Si a cause enn l’epreuve ou-soit bann “pression,” ou conjoint dire bann parole blessant, essaye reste calme. Si ou reponn li pareil, sa kapav faire zot toulé-deux dire bann kitsoz ki pou faire situation-la vinn pire. (Lire Psaume 37:8.) Alors, pa bizin prend compte bann “kozé sans reflechi” ki ou conjoint inn kapav dire parski li ti agacé ou-soit decouragé.—Job 6:3.
16. (a) Couma seki Jésus ti dire dan Matthieu 7:1-5 applik ar mariage? (b) Kifer li bien important ki nou equilibré dan nou mariage?
16 Enn dimoune marié bizin realiste dan seki li attann ar so conjoint. Kitfois enn kikenn kapav remarké ki so conjoint ena bann maniere ki li pa content ek li ena sa raisonnement-la: ‘Mo kapav change li.’ Li possible ki avek amour ek patience, ou kapav aide ou conjoint pou ameliore-li tigit par tigit. Mais pa blié ki Jésus ti compare enn kikenn ki tire bann ti defaut so camarade ar enn dimoune ki trouve “la paille” ki dan lizié so frere mais ki pa trouve enn “poteau” ki dan so prop lizié. A cause sa Jésus ti donne nou sa conseil-la: “Arrete jugé pou ki pa juge zot.” (Lire Matthieu 7:1-5.) Sa pa vedir ki fodé pa ou prend compte bann defaut grave ki ou conjoint ena. Robert ki marié depuis preské 40 an ti dire: “Kan bann conjoint pa peur pou kozé, zot franc ek zot disposé pou accepté bann remark serieux, sa kapav amenn zot pou faire bann changement dan zot la vie.” Alors, nou bizin equilibré. Au lieu ki sa fatigue nou ki nou conjoint pa pé manifesté bann qualité ki nou ti pou content, aprann pou trouve ek pou apprecié bann qualité ki li deja ena.—Eccl. 9:9.
17, 18. Kan bann probleme augmenté, ar kisannla nou kapav demann l’aide?
17 Kan nou situation changé, souvent sa kapav crée bann difficulté. Enn couple kapav gagne bann nouveau difficulté kan zot gagne zenfant. Enn conjoint ou-soit enn zenfant kapav tombe bien malade. Ou-soit li kapav arrivé ki nou bizin occupe bann parent agé. Li possible aussi ki bann zenfant ki’nn vinn adulte al reste loin ar zot parent. Parfois nou la vie kapav changé kan nou gagne bann nouveau responsabilité theocratik. Tou sa bann changement-la kapav crée stress ek bann tension entre nou ek nou conjoint.
18 Ki nou pou faire si nou ena l’impression ki tellement ena tension dan nou couple ki nou nepli kapav contigné? (Prov. 24:10) Surtout, pa baisse le bras! Satan bien content kan li trouve enn serviteur Bondié abandonne vrai l’adoration. Li pou plus content encore si c’est enn couple ki abandonne Jéhovah. Alors, faire tou seki ou kapav pou assure-ou ki ou mariage reste enn la corde trois tresse. Dan la Bible ena beaucoup l’exemple bann zom ek bann femme ki finn reste fidele malgré bann difficulté bien grave. Par exemple, enn fois David ti devide so leker devant Jéhovah, li ti dire: “Montré moi to faveur ah Bondié, parski dimoune mortel . . . [pé] contigne faire dominere ar moi.” (Ps. 56:1) Eski ou finn deja senti ki enn “dimoune mortel” pé faire dominere ar ou? Ki sa dimoune-la li enn membre ou famille ou-soit non, rappel ki David ti trouve la force pou li enduré, alors ou aussi ou kapav trouve sa la force-la. David ti dire: “Mo’nn tourne-moi vers Jéhovah, ek Li’nn reponn moi, ek Li’nn delivré moi ar tou bann kitsoz ki ti faire moi peur.”—Ps. 34:4.
Lezot benediction
19. Dan ki fason eski nou kapav protege-nou kont bann attak Satan?
19 Nou pé vive dan lepok la fin, alors li bien important ki bann couple “contigne console zot entre zot-mem ek fortifié sakenn so camarade.” (1 Thess. 5:11) Pa blié ki Satan pretann ki si nou reste fidele envers Jéhovah c’est zis par l’interet. Li pou servi tou moyen possible, parmi ena bann desaccord dan mariage, pou faire nou desobeir Bondié. Pou nou protege-nou kont bann attak Satan, nou bizin mette tou nou confiance en Jéhovah. (Prov. 3:5, 6) Paul ti ecrire “Pou tou kitsoz mo ena courage grace a celui ki donne moi la force.”—Phil. 4:13.
20. Ki bann benediction nou gagné kan nou faire enn place pou Bondié dan nou mariage?
20 Nou gagne beaucoup benediction kan Bondié ena so place dan nou mariage. C’est seki Joël ek so madame, ki marié depuis 51 an inn remarké. Joël dire: “Mo pa fini remercié Jéhovah pou madame ki Li’nn donne moi ek pou bonheur ki nou gagné dan nou mariage. Mo madame li enn conjoint ideal pou moi.” Ki zot secret? Joël dire: “Nou finn toujours faire zeffort pou montré-nou bon envers nou conjoint, pou ena patience ek pou content sakenn nou camarade.” Pena personne ki pou kapav faire sa dan enn fason parfait dan sa le monde-la. Mais kan-mem, anou travail dur pou mette en pratik bann principe biblik ek faire enn place pou Jéhovah dan nou mariage! Si nou faire sa, lerla nou mariage pou couma “enn la corde trois tresse [ki] pa casse vite.”—Eccl. 4:12.
Eski ou rappel?
• Couma nou kapav faire enn place pou Jéhovah dan nou couple?
• Ki bann conjoint bizin faire kan zot gagne probleme?
• Couma nou koné ki Bondié ena so place dan enn mariage?
[Questions d’étude]
[Zimage page 23]
Kan bann couple prié Jéhovah ensam, sa aide zot pou faire face ar bann probleme difficile