Suive l’exemple Paul ek faire bann progré spirituel
“Mo’nn combatte sa joli combat-la, mo’nn termine la course, mo’nn garde la foi.”—2 TIM. 4:7.
1, 2. Ki bann changement Saul de Tarse ti faire dan so la-vie, ek ki travail important li ti accepté?
SAUL de Tarse ti intelligent ek determiné. Mais li ti ‘vive dapré bann desir so lekor.’ (Éph. 2:3) Plitar li ti dire ki li ti ‘enn dimoune ki ti blasphemé ek enn persecuteur, ek nanyin pa ti faire li peur.’—1 Tim. 1:13.
2 Avek le temps, Saul ti faire bann grand-grand changement dan so la-vie. Li ti abandonne conduite ki li ti ena avant ek li ti travail dur pou ‘pa rod so prop l’avantage, mais l’avantage majorité.’ (1 Cor. 10:33) Li ti vinn enn dimoune douce ek li ti montré sa l’affection ki li ti ena dan so leker-la pou bann dimoune ki li ti persecuté avant. (Lire 1 Thessaloniciens 2:7, 8.) Li ti ecrire: “Mo ti vinn enn ministre . . . C’est moi, enn dimoune ki pli tipti ki seki pli tipti parmi bann saint, ki finn gagne sa faveur ki personne pa merité-la, pou ki mo annonce bann nation la bonne nouvelle ki concerne bann richesse Christ ki nou pa kapav comprend.”—Éph. 3:7, 8.
3. Couma sa kapav aide nou kan nou etudié bann lettre ki Paul inn ecrire ek recit so ministere?
3 Saul, ki ti aussi appel Paul, ti faire bann grand progré spirituel. (Actes 13:9) Enn fason sur pou nou faire bann progré pli vite dan la verité, c’est kan nou etudié bann lettre ki Paul inn ecrire ek recit lor so ministere, ek kan nou imite so la-foi. (Lire 1 Corinthiens 11:1; Hébreux 13:7.) Anou guetté couma kan nou faire sa, sa pou pousse nou pou etabli enn bon programme l’etude personnel, pou developpe enn vrai l’amour pou lezot ek pou ena enn l’opinion raisonnable lor nou-mem.
Paul ti ena enn bon programme l’etude
4, 5. Couma Paul ti tire profit ar so l’etude personnel?
4 Paul ti enn Pharisien ki ti’nn gagne so l’instruction ‘avek Gamaliel, l’instruction ki ti basé lor tou ti detail la Loi bann ancetre.’ Alors li ti ena deja enn certaine connaissance bann l’Ecriture. (Actes 22:1-3; Phil. 3:4-6) Zis apré so bapteme, li “ti al l’Arabie”—soit dan desert syrien ou-soit dan enn l’endroit bien trankil dan l’Arabie ki trouve dan l’est la mer Rouge kot li ti pou kapav medité. (Gal. 1:17) Li parette ki Paul ti envie medite lor bann l’Ecriture ki ti prouvé ki Jésus ti le Messie. En plus, li ti envie prepare-li pou travail ki li ti ena devant li. (Lire Actes 9:15, 16, 20, 22.) Li ti prend le temps pou medite lor bann kitsoz spirituel.
5 C’est connaissance biblik ek l’intelligence ki Paul ti gagné grace a l’etude personnel ki ti permette li enseigne la verité dan enn fason efficace. Par exemple, dan synagogue Antioche de Pisidie, au moins cinq fois Paul ti cite directement bann verset l’Écritures hébraïques pou prouvé ki Jésus ti le Messie. Paul ti aussi faire reference ar bann l’Écritures hébraïques plusieurs fois. Li ti presente so bann point dan enn fason ki ti tellement convaink lezot, ki “beaucoup Juif ek bann ki ti’nn converti, ti’nn vinn Juif, ek ki ti adore Bondié, ti suive Paul ek Barnabas” pou zot konn plus. (Actes 13:14-44) Plusieurs l’année plitar letan enn groupe Juif ki ti reste Rome ti vinn guette li dan so lakaz, Paul ti explik zot tou kitsoz “kan li ti rann temoignage a fond lor royaume Bondié ek kan li ti servi so capacité pou convaink zot concernant Jésus, grace a la loi Moïse ek bann Prophete.”—Actes 28:17, 22, 23.
6. Ki ti aide Paul pou reste fort lor plan spirituel kan li ti faire face ar bann l’epreuve?
6 Kan li ti faire face ar bann l’epreuve, Paul ti contigne examine bann l’Ecriture ek gagne la force dan message inspiré par Bondié ki ti ena ladan. (Héb. 4:12) Pendant ki li ti dan prison Rome, avant ki ti touye li, Paul ti demann Timothée pou amenn “bann rouleau” ek “bann parchemin.” (2 Timothée 4:13) Sa bann document-la ti surement bann partie l’Écritures hébraïques ki Paul ti servi pou li etudié en profondeur. Pou ki li reste ferme, li ti bizin gagne enn connaissance bann l’Ecriture grace a enn bon programme l’etude la Bible.
7. Mentionne bann bienfait ki ou kapav gagné grace a enn l’etude la Bible regulier.
7 Kan nou ena enn l’etude la Bible regulier ek nou aussi medite lor bann sujet precis, sa aide nou pou progressé lor plan spirituel. (Héb. 5:12-14) Concernant valeur Parole Bondié, enn ecrivain psaume ti chanté: “La loi ki sorti dan to la-bouche, li pli bon pou moi ki bann millier piece l’or ek l’argent. To commandement faire moi vinn pli sage ki mo bann l’ennemi, parski li pou reste pou moi pou touletan. Mo’nn garde mo lipié loin ar tou mauvais chemin, pou ki mo kapav garde to parole.” (Ps. 119:72, 98, 101) Eski ou ena enn bon programme l’etude personnel? Eski ou pé lire la Bible toulé-jour ek medite lor seki ou lire pou prepare-ou pou bann nouveau responsabilité ki ou kapav gagné dan service Bondié?
Saul ti aprann pou content bann dimoune
8. Couma eski Saul ti traite bann ki pa ti suive religion juif ?
8 Avant ki li vinn chretien, Saul ti zelé pou so religion, mais li pa ti casse la tête avek bann dimoune ki pa ti dan religion juif. (Actes 26:4, 5) Kan certain Juif ti pé lapide Étienne, li ti pé guetté ek li ti d’accord avek seki zot ti pé faire. Surement sa ti faire li ti gagne plus conviction encore ki ti bizin persecute bann chretien ek kitfois li ti pensé ki Étienne ti merite sa punition-la. (Actes 6:8-14; 7:54–8:1) La Bible dire: “Saul ti commence servi violence kont la congregation. Li ti rente dan bann lakaz enn apré lot, ek li ti traine bann zom ek bann femme dehors ek li ti livré zot pou ki mette zot dan prison.” (Actes 8:3) Li “ti al ziska persecute zot, mem dan bann la-ville en dehors.”—Actes 26:11.
9. Ki ti pousse Saul pou reexamine fason ki li ti traite bann dimoune?
9 Kan Seigneur Jésus ti apparette ar li, Saul ti pé al Damas pou contigne attak bann disciple Christ. Enn la-lumiere ki pa naturel ek ki ti sorti ar Garson Bondié ti faire li vinn aveugle ek li ti bizin ki lezot aide li. Avant mem ki Jéhovah ti servi Ananias pou faire Saul retrouve clair, Saul ti’nn fini change so l’attitude net envers bann dimoune. (Actes 9:1-30) Apré ki li ti vinn enn disciple Christ, li ti faire bann grand zeffort pou traite tou dimoune pareil couma Jésus ti pou traite zot. Sa vedir ki li ti bizin arreté avek so bann maniere violent ek vinn enn kikenn ki ti “vive en paix avek tou dimoune.”—Lire Romains 12:17-21.
10, 11. Couma Paul ti montré vrai l’amour pou bann dimoune?
10 Paul pa ti zis contente-li pou reste en paix avek lezot. Li ti envie montré vrai l’amour envers zot, ek so ministere chretien ti donne li l’occasion pou faire sa. Pendant so premier voyage missionnaire, li ti preche la bonne nouvelle dan partie l’Asie ki ti trouve entre Israël ek la Grèce. Malgré grand l’opposition, Paul ek so bann compagnon ti concentré zot zeffort pou aide bann ki ti ena l’humilité pou vinn chretien. Zot ti retourne Lystres ek Iconium, malgré ki bann opposant dan sa bann la-ville-la ti’nn rod touye Paul.—Actes 13:1-3; 14:1-7, 19-23.
11 Plitar, Paul ek so bann compagnon ti rod aussi bann dimoune ki ti bien disposé dan la ville Philippes ki ti trouve en Macédoine. Lydie, enn madame ki ti’nn converti ti’nn vinn juif, ti ecoute la bonne nouvelle ek li ti vinn chretien. Bann l’autorité la ville ti faire batte Paul ek Silas coute baton ek ti jette zot dan prison. Mais Paul ti preche avek garde-prison, ek garde-la ek so famille ti baptisé ek ti vinn bann adorateur Jéhovah.—Actes 16:11-34.
12. Ki ti pousse Saul, enn dimoune ki avant nanyin pa ti faire li peur, pou vinn enn zapotre Jésus Christ ki ti ena beaucoup l’amour?
12 Kifer Saul ti adopté croyance bann dimoune ki li ti pé persecuté avant? Ki ti pousse sa dimoune ki nanyin pa ti faire li peur-la, pou vinn enn zapotre douce ki ti ena beaucoup l’amour ek ki ti disposé pou riské so la-vie pou ki lezot kapav konn la verité lor Bondié ek Christ? Paul li-mem expliké: “Bondié, ki ti choisir moi par so faveur ki personne pa merité, inn trouve bon pou faire konn so garson par rapport ar moi.” (Gal. 1:15, 16) Paul ti ecrire Timothée: “Inn faire moi misericorde . . . pou ki par moi, cas principal, Christ Jésus kapav montré tou so patience ek faire moi vinn couma enn l’exemple bann dimoune ki pou ena la foi en li, pou zot gagne la vie eternel.” (1 Tim. 1:16) Jéhovah ti pardonne Paul ek kan li ti gagne sa faveur ki personne pa merité-la ek aussi sa misericorde-la, sa ti pousse li pou montré l’amour pou lezot dimoune kan li ti faire zot konn la bonne nouvelle.
13. Ki kitsoz ki bizin pousse nou pou montré l’amour pou lezot, ek couma nou kapav faire sa?
13 Pareil, Jéhovah pardonne nou bann peché ek nou bann erreur. (Ps. 103:8-14) Enn psalmiste ti dire: “Si to ti veille tou nou bann peché, O Yah, O Jéhovah, kisannla ti pou kapav tini devant toi?” (Ps. 130:3) Sans misericorde Bondié, personne parmi nou pa ti pou gagne sa la-joie ki nou service sacré donne nou-la, ni nou ti pou kapav attann pou gagne la vie eternel. Grace a faveur Bondié ki personne pa merité, nou tou nou gagne bann grand bienfait. Alors pareil couma Paul, nou bizin ena desir pou montré l’amour envers lezot kan nou preche avek zot ek nou enseigne zot la verité, ek aussi kan nou fortifié nou bann compagnon.—Lire Actes 14:21-23.
14. Couma nou kapav faire plus dan nou ministere?
14 Paul ti envie progressé dan ministere la bonne nouvelle, ek l’exemple Jésus ti touche so leker. C’est par so travail predication ki Garson Bondié ti montré so l’amour extraordinaire pou bann dimoune. Li ti dire: “Recolte-la grand, mais bann travailleur tigit. Alors suppliyé Maitre recolte pou Li envoye bann travailleur dan so recolte.” (Mat. 9:35-38) Kan li-mem li ti vinn enn travailleur zelé, Paul ti agir en accord avek n’importe ki la-priere ki li ti kapav inn faire pou demann plus travailleur. Ek ou? Eski ou kapav ameliore qualité ou ministere? Ou-soit eski ou kapav preche plus, par exemple kan ou organise ou la-vie pou ou kapav prend service pionnier? Anou montré vrai l’amour envers lezot kan nou aide zot pou “tini ferme parole ki donne la vie.”—Phil. 2:16.
L’opinion ki Paul ti ena lor li-mem
15. Couma Paul ti considere li-mem par rapport ar so bann compagnon?
15 En tant ki enn ministre chretien, Paul ti donne nou enn l’exemple extraordinaire dan enn lot fason encore. Mem si li ti gagne beaucoup privilege dan congregation, Paul ti bien conscient ki li pa ti’nn gagne sa bann benediction-la ek li pa ti’nn merite sa a cause so bann capacité. Li ti realisé ki c’est par sa bann benediction-la ki Bondié ti montré So faveur ki personne pa merité, envers li. Paul ti reconette ki bann lezot chretien zot aussi zot ti bann ministre efficace. Malgré bann responsabilité ki li ti ena parmi peuple Bondié, li ti garde so l’humilité.—Lire 1 Corinthiens 15:9-11.
16. Couma Paul ti montré l’humilité ek modestie kan ti bizin reglé sa question circoncision-la?
16 Guette fason ki Paul ti traite enn probleme ki ti arrivé dan la ville Antioche ki ti trouve en Syrie. Bann membre dan sa congregation-la pa ti d’accord entre zot lor question circoncision. (Actes 14:26–15:2) Parski Bondié ti’nn choisir Paul pou prend la tête pou preche avek bann non-Juif ki pa ti circonci, li ti kapav pensé ki li ti konn zot bien ek alors li ti bien qualifié pou reglé sa probleme-la. (Lire Galates 2:8, 9.) Mais kan li’nn trouvé ki malgré so bann zeffort li pa ti pé kapav reglé probleme-la, avek humilité ek modestie, li ti suive bann disposition ki ti existé pou al vers college central ki ti trouve Jérusalem ek discute sa probleme-la avek zot. College central ti examine sa question-la, ti arrive enn decision, ek ti choisir li couma enn zot bann messager. Dan tousala, Paul ti coopere avek zot. (Actes 15:22-31) Coumsa, Paul ti “premier pou honore” so bann compagnon.—Rom. 12:10b.
17, 18. (a) Ki sentiment Paul ti ena pou bann frere dan congregation? (b) Ki nou aprann lor Paul par fason ki bann ancien Éphèse ti reagir kan li pé quitte zot?
17 Paul ti ena l’humilité ek li pa ti crée enn distance entre li ek bann frere ek soeur dan bann congregation. Au contraire, li ti attaché ar zot. A la fin so lettre ki li ti ecrire bann Romain, li ti envoye so salutation pou plus ki 20 dimoune ki li ti appel par zot nom. Pa mentionne la plupart sa bann dimoune-la dan bann lezot partie la Bible ek zot pa ti ena bann privilege special. Mais zot ti bann serviteur Jéhovah ki ti fidele, ek Paul ti bien content zot.—Rom. 16:1-16.
18 Parski Paul ti enn dimoune ki ti ena l’humilité ek li ti bien amical, sa ti fortifié bann congregation. A la fin dernier reunion ki li ti ena avek bann ancien Éphèse, “zot ti maye Paul ek zot ti embrasse li avek l’affection, parski zot ti bien chagrin surtout a cause li ti’nn dire zot ki zot pa pou retrouve so figure encore.” Zot pa ti pou chagrin coumsa, si Paul ti enn dimoune fiere ki ti garde so distance avek bann frere.—Actes 20:37, 38.
19. Couma nou kapav montré l’humilité dan fason ki nou traite nou bann compagnon?
19 Tou bann ki envie progressé lor plan spirituel bizin ena l’humilité pareil couma Paul. Li ti encourage so bann compagnon chretien pou “pa faire nanyin avek l’idée pou leve la guerre ni pou mette zot-mem en avant, mais avek enn l’esprit l’humilité, considere lezot couma pli superieur ki zot.” (Phil. 2:3) Couma eski nou kapav suive sa conseil-la? Enn premier fason, c’est kan nou coopere avek bann ancien dan nou congregation, nou suive zot bann l’instruction ek nou respecté bann decision ki zot prend kan enn dimoune dan congregation inn faire enn peché grave. (Lire Hébreux 13:17.) Enn lot fason, c’est kan nou ena enn grand l’estime pou nou bann frere ek soeur. Dan bann congregation peuple Jéhovah ena bann dimoune different nationalité, culture, race, ek groupe ethnique. Alors, eski nou pa bizin aprann pou traite zot tou avek l’affection, sans faire preference, pareil couma Paul ti faire? (Actes 17:26; Rom. 12:10a) La Bible encourage nou pou “accueil sakenn nou camarade, pareil couma Christ aussi finn accueillir nou pou la gloire Bondié.”—Rom. 15:7.
“Galope avek endurance” la course pou la vie
20, 21. Ki pou aide nou pou reussi galope la course pou la vie eternel?
20 Nou kapav compare la vie enn chretien ar enn longue la-course. Paul ti ecrire: “Mo’nn termine la course, mo’nn garde la foi. A partir asterla, ena couronne la justice ki’nn reservé pou moi, couronne ki le Seigneur ki enn juge juste pou donne moi en recompense sa jour-la, pa zis moi, mais aussi tou bann ki finn content so manifestation.”—2 Tim. 4:7, 8.
21 Kan nou suive l’exemple Paul, sa pou aide nou pou reussi galope la course pou la vie eternel. (Héb. 12:1) Alors anou faire tou seki nou kapav pou contigne faire bann progré spirituel kan nou etabli enn bon programme l’etude personnel, nou developpe enn l’amour profond pou bann dimoune, ek nou touletan ena l’humilité.
Couma ou pou reponn?
• Ki bann bienfait Paul ti gagné grace a enn bon programme l’etude personnel?
• Kifer li important ki bann vrai chretien ena enn l’amour profond pou bann dimoune?
• Ki bann qualité pou aide ou pou pa faire preference?
• Couma l’exemple Paul kapav aide ou pou coopere avek bann ancien
[Questions d’étude]
[Zimage lor page 26]
Gagne la force dan bann l’Ecriture pareil couma Paul ti faire
[Zimage lor page 28]
Montré l’amour envers lezot kan ou faire zot konn la bonne nouvelle
[Zimage lor page 29]
Eski ou koné kifer bann frere ti bien content Paul?
dan ou congregation?