“Sa Bondié-la, Li nou Bondié pou touletan, oui pou toujours. Li-mem ki pou guide nou ziska nou mort.”​—PS. 48:⁠14.

1, 2. Kifer nou bizin suive direction Jéhovah plutot ki nou compte lor nou prop sagesse, ek ki bann question nou kapav posé?

 KAN nou interesse-nou ar bann kitsoz ki pena okenn valeur ek ki faire di-tort, li facile pou pensé ki sa bann kitsoz-la pa vrai-mem mauvais. (Prov. 12:⁠11) Si nou vrai-mem envie faire enn kitsoz ki enn chretien pa supposé faire, nou leker pou trouve surement bann pretexte pou faire li. (Jér. 17:​5, 9) Alors, c’est avek sagesse ki enn psalmiste ti demann Jéhovah: “Envoye to la-lumiere ek to la-verité. Ki zot guide moi.” (Ps. 43:⁠3) Au lieu ki li ti mette so confiance dan so prop sagesse ki limité, li ti mette so confiance en Jéhovah, ek pena enn pli bon guide ki Jéhovah. Pareil couma sa psalmiste-la, li bon ki nou rod direction Bondié.

² Mais, kifer nou bizin compte lor direction Jéhovah plus ki n’importe ki lezot direction? Kan eski nou bizin rod sa direction-la? Ki bann qualité nou bizin developpé pou nou kapav gagne bann bienfait ar sa direction-la, ek couma Jéhovah guide nou zordi? Dan sa lartik-la, nou pou examine sa bann question important-la.

Kifer nou bizin compte lor direction Jéhovah?

3-5. Cite bann raison kifer nou kapav ena enn confiance total dan direction Jéhovah.

³ Jéhovah Li nou Papa ki dan le ciel. (1 Cor. 8:⁠6) Li konn sakenn parmi nou dan tou ti detail, ek Li kapav mem lire dan nou leker. (1 Sam. 16:⁠7; Prov. 21:⁠2) Le roi David ti dire Bondié: “To’nn koné kan mo assizé ek kan mo levé. To’nn konn mo pensée depuis bien loin. Parski pena enn parole lor mo la-langue​—guetté o Jéhovah​—ki to pa deja konn sa net.” (Ps. 139:​2, 4) Parski Jéhovah konn nou bien coumsa, eski nou bizin douté ki Li koné ki kitsoz pli bon pou nou? En plus, Jéhovah Li ena enn sagesse ki pena limite. Li trouve tou, Li trouve en profondeur plus ki n’importe ki dimoune. Couma enn situation commencé, Li koné couma li pou fini. (Is. 46:​9-​11; Rom. 11:⁠33) Li-mem “Bondié, ki tousel sage.”​—Rom. 16:⁠27.

⁴ En plus, Jéhovah content nou ek Li touletan envie seki pli bon pou nou. (Jean 3:​16; 1 Jean 4:⁠8) Li enn Bondié ki ena l’amour, alors Li genereux envers nou. Disciple Jacques ti ecrire: “Tou joli don ek tou cadeau parfait sorti la-haut, parski li sorti kot Papa tou la-lumiere ki dan le ciel.” (Jacq. 1:⁠17) Bann dimoune ki laisse Bondié guide zot dan zot la-vie, tire enn grand bienfait ar so generosité.

⁵ Finalement, Jéhovah Li tout puissant. En rapport avek sa, enn psalmiste ti dire: “Enn dimoune ki reste dan l’endroit secret sa Kikenn ki Pli Grand-la, pou gagne enn place pou resté enba l’ombrage Tout-Puissant. Mo pou dire Jéhovah: ‘To-mem mo refuge ek mo forteresse,  mo Bondié en ki mo pou mette mo confiance.’ ” (Ps. 91:​1, 2) Kan nou suive direction Jéhovah, nou pé rod l’aide ar sa Bondié ki touletan reussi dan seki Li faire-la. Mem si nou gagne l’opposition, Jéhovah pou soutenir nou. Li pa pou laisse nou tombé. (Ps. 71:​4, 5; Lire Proverbes 3:​19-​26.) Oui, Jéhovah koné seki pli bon pou nou, Li envie seki pli bon pou nou, ek Li ena pouvoir pou donne nou seki pli bon pou nou. Li pou vrai-mem bete ki nou rejette so direction! Mais kan eski nou bizin so direction?

Kan eski nou bizin direction Jéhovah?

6, 7. Kan eski nou bizin direction Jéhovah?

⁶ En realité, nou bizin direction Jéhovah toute longue nou la-vie, depuis nou zenfant ziska nou vinn vié. Enn psalmiste ti dire: “Sa Bondié-la Li nou Bondié pou touletan, oui pou toujours. Li-mem ki pou guide nou ziska nou mort.” (Ps. 48:⁠14) Pareil couma sa psalmiste-la, bann chretien ki sage jamais pa arrete rod direction Bondié.

⁷ Bien sur, ena bann situation kot nou senti ki nou bien bizin l’aide. Parfois li arrivé ki nou dan enn “situation critik”​—kitfois nou pé faire face ar persecution, enn maladie grave, ou-soit nou’nn perdi nou travail enn coute. (Ps. 69:16, 17) Dan sa bann situation-la, nou gagne enn grand reconfort kan nou tourne-nou vers Jéhovah parski nou sur ki Li pou donne nou la force pou nou kapav enduré ek Li pou guide nou pou nou prend bann bon decision. (Lire Psaume 102:⁠17.) Mais nou bizin aussi so l’aide dan lezot situation. Par exemple, kan nou al preche la bonne nouvelle lor Royaume Bondié avek nou prochain, nou bizin direction Jéhovah si nou envie ki nou temoignage gagne bann bon resultat. Ek n’importe kan nou ena enn decision pou prend, ki sa concerne nou divertissement, nou l’habillement ek nou coiffure, nou frequentation, nou travail, nou l’education, ou-soit n’importe ki lezot kitsoz, c’est zis si nou suive bann principe Jéhovah ki nou pou agir avek sagesse. En realité, pena okenn situation kot nou pa bizin direction Jéhovah.

Ki danger ena kan nou pa rod direction Bondié?

8. Kan Ève ti mange fruit ki Bondié ti defann, ki li ti faire en realité?

⁸ Selman, nou bizin rappel ki pou nou suive direction Jéhovah nou bizin disposé pou faire li. Bondié pa pou force nou pou suive so direction si nou pa envie. Premier dimoune ki ti choisir pou pa suive direction Jéhovah, ti Ève, ek so l’exemple montré ki li bien grave pou prend enn mauvais decision coumsa. Maziné aussi seki so action inn montré en realité. Ève ti mange fruit ki Bondié ti defann parski li ti envie “vinn couma Bondié, . . . pou konn seki bon ek seki pa bon.” (Gen. 3:⁠5) Kan li ti faire sa, li ti prend place Bondié, setadir li ti decidé par li-mem seki bon ek seki mauvais au lieu ki li ti suive direction Jéhovah. Li ti tourne ledo ar domination  Jéhovah, li pa ti envie rann compte personne. So mari, Adam, ti ena mem conduite rebelle.​—Rom. 5:⁠12.

9. Si nou rejette direction Jéhovah, en realité ki nou pé faire, ek kifer li pa sage ditou?

⁹ Zordi, si nou pa suive direction Jéhovah, nou pé faire pareil couma Ève, sa vedir ki nou aussi nou pé rejette domination Jéhovah. Prend l’exemple enn kikenn ki prend l’habitude pou guette pornographie. Si li frequente congregation, li koné ki bann principe Jéhovah dire lor sa sujet-la. Dapré la Bible fodé mem pa nou mentionne bann kitsoz impur, alors sa vedir ki fodé pa ki enn kikenn guette sa bann kitsoz-la avek enn mauvais desir sexuel. (Éph. 5:⁠3) Kan enn dimoune coumsa rejette bann principe Jéhovah, li montré ki li pé renié domination Jéhovah, ki li pé rejette l’autorité Jéhovah. (1 Cor. 11:⁠3) Li pa sage ditou pou ena enn conduite coumsa parski couma Jérémie ti dire: “Enn dimoune ki pé marché pa finn crée pou dirige so pas.”​—Jér. 10:⁠23.

10. Kifer nou bizin servi nou liberté dan enn fason responsable?

¹⁰ Certain kapav pa d’accord avek seki Jérémie ti dire. Zot dire ki si Jéhovah inn donne nou liberté pou choisir, fodé pa Li critik nou kan nou servi sa liberté-la. Selman, pa blié ki nou liberté pou choisir li enn responsabilité ek enn don en mem temps. Nou bizin rann compte pou seki nou choisir pou dire ek pou faire. (Rom. 14:⁠10) Jésus ti dire: “Seki nou ena en abondance dan nou leker, sa-mem ki nou la-bouche dire.” Li ti dire aussi: “C’est dan leker ki bann mauvais raisonnement, crime, adultere, fornication, vol, fausse temoignage, blaspheme, sorti.” (Mat. 12:⁠34; 15:⁠19) Alors, nou bann parole ek nou bann action montré dan ki condition nou leker été. Zot montré seki nou été vrai-mem. C’est a cause sa ki enn chretien ki sage rod direction Jéhovah dan tou kitsoz. Dan sa fason-la, Jéhovah trouvé ki sa dimoune-la li ‘droite dan so leker’ ek Li pou “faire [li] di-bien.”​—Ps. 125:⁠4.

11. Ki nou kapav aprann ar zistoire nation Israël?

¹¹ Rappel zistoire nation Israël. Kan bann Israélite ti faire bann bon choix ek zot ti obeir bann commandement Jéhovah, Li ti protege zot. (Jos. 24:⁠15, 21, 31) Mais souvent, zot ti mal servi zot liberté pou choisir. Dan lepok Jérémie, Jéhovah ti dire lor zot: “Zot pa ti ecouté, ni zot ti ouvert zot zoreille, mais zot ti commence marche dan bann conseil dapré zot mauvais leker ki ti teti, ek sa inn faire zot al en arriere, pa devant.” (Jér. 7:​24-​26) Enn situation vrai-mem triste, pa vrai? Fodé jamais ki nou aussi nou rejette direction Jéhovah ek nou marche par nou prop conseil parski nou teti ou-soit parski nou envie satisfaire nou prop desir. Si nou faire sa, nou pou “al en arriere, pa devant”!

Ki bann qualité nou bizin pou suive direction Bondié?

12, 13. (a) Ki qualité pousse nou pou suive direction Jéhovah? (b) Kifer li important ki nou ena la foi?

¹² C’est nou l’amour pou Jéhovah ki pousse nou pou suive so direction. (1 Jean 5:⁠3) Selman, Paul ti montré ki ena enn lot kitsoz ki nou bizin kan li ti dire: “Nou pé marche par la foi, pa par seki nou trouvé avek nou lizié.” (2 Cor. 5:​6, 7) Kifer la foi li important? Nou koné ki Jéhovah pé dirige nou “lor bann chemin la justice,” mais sa bann chemin-la zot pa amenn nou vers la richesse ou-soit vers bann grand position ki sa lé-monde-la offert. (Ps. 23:⁠3) A cause sa, nou la-foi bizin pousse nou pou fixé nou lizié lor bann benediction spirituel ki pa kapav comparé, ki nou gagné kan nou servi Jéhovah. (Lire 2 Corinthiens 4:​17, 18.) Ek la foi aide nou pou contente-nou mem kan nou ena zis seki nou bizin pou nou vive.​—1 Tim. 6:⁠8.

¹³ Jésus ti montré ki, pou nou pratik vrai l’adoration, fodé ki nou ena enn l’esprit sacrifice, ek pou sa aussi nou bizin ena la foi. (Luc 9:​23, 24) Parski zot ti ena la foi, certain serviteur Jéhovah finn faire bann grand sacrifice, finn endure pauvreté, finn supporté ki faire dominere ar zot, finn supporte bann prejugé, ek mem persecution. (2 Cor. 11:23-​27; Rév. 3:​8-​10) C’est selman enn la-foi solide ki ti permette zot pou enduré avek la joie. (Jacq. 1:​2, 3) Enn la-foi solide faire nou sur ki, kan nou suive direction Jéhovah, c’est touletan pli bon kitsoz ki nou kapav faire ek nou pou touletan gagne bann bienfait ki pou dure  longtemps. Nou pena okenn doute ki benediction ki bann ki enduré avek fidelité gagné, li beaucoup pli grand ki n’importe ki souffrance ki zot bizin supporté.​—Héb. 11:⁠6.

14. Kifer Agar ti bizin manifesté l’humilité?

¹⁴ Anou guetté couma l’humilité aussi li important pou suive direction Jéhovah. L’exemple Agar, servante Sara faire nou comprend sa. Kan Sara ti rann-li compte ki li ti sterile, li ti donne Abraham Agar pou gagne relation avek li. Kan Agar ti tombe enceinte, li ti commence meprise so maitresse ki ti sterile. Alors, Sara ti “commence humilié li,” ek Agar ti sauvé. Lerla enn ange Jéhovah ti joinde Agar ek ti dire li: “Retourne kot to maitresse ek abaisse-toi enba so la-main.” (Gen. 16:​2, 6, 8, 9) Kitfois Agar ti pou prefere gagne enn lot l’instruction. Pou li kapav suive direction sa ange-la, li ti pou bizin rejette so l’attitude ki ti rempli ar l’orgueil. Mem si sa ti difficile, Agar ti manifesté l’humilité ek li ti faire couma sa ange-la ti dire li, ek so garson, Yishmaël, ti né en securité dan camp kot so papa ti resté.

15. Mentionne certain situation kot nou bizin ena l’humilité pou nou suive direction Jéhovah.

¹⁵ Pou nou suive direction Jéhovah, kitfois nou aussi nou bizin manifesté l’humilité. Certain kitfois pou bizin admette ki enn divertissement ki zot content, pa faire Jéhovah plaisir. Li kapav arrivé ki enn chretien inn offense enn kikenn ek li bizin al demann li pardon. Ou-soit li kapav inn faire enn erreur ek li bizin reconette so erreur. Ki arrivé si enn kikenn faire enn peché grave? Li bizin abaisse li-mem ek confesse so peché ar bann ancien. Enn chretien kapav mem exclu. Pou ki li reintegré dan congregation, li bizin repenti sincerement ek change so conduite net. Dan sa bann situation-la ek dan lezot situation pareil, bann parole Proverbes 29:⁠23 bien reconforte nou: “L’orgueil enn dimoune ki’nn faire ar la poussiere pou abaisse li, mais enn kikenn ki ena enn l’attitude humble pou gagne la gloire.”

Couma Jéhovah guide nou?

16, 17. Couma nou kapav tire maximum profit ar la Bible, moyen principal ki Jéhovah servi pou guide nou?

¹⁶ Jéhovah guide nou surtout par so Parole inspiré, la Bible. (Lire 2 Timothée 3:​16, 17.) Si nou envie tire maximum profit ar la Bible, li bon ki nou pa attann ki enn situation difficile arrivé pou nou rod bann conseil biblik. Au contraire, nou pou prend l’habitude lire la Bible toulé-jour. (Ps. 1:​1-3) Dan sa fason-la, nou pou koné ki ena dan la Bible. Bann pensée Bondié pou vinn nou bann pensée ek nou pou pré pou faire face ar n’importe ki situation ki kapav arrivé enn coute.

¹⁷ En plus, li important ki nou medité ek nou prié en rapport avek seki nou lire dan la Bible. Kan nou medite lor bann verset biblik, nou reflechi couma nou kapav applik zot dan bann situation bien precis. (1 Tim. 4:​15) Kan nou faire face ar bann probleme grave, anou prié Jéhovah pou Li donne nou direction ki nou bizin. L’esprit Jéhovah pou aide nou pou rappel bann principe ki nou’nn lire direct dan la Bible ou-soit dan bann publication ki basé lor la Bible.​—Lire Psaume 25:​4, 5.

18. Dan ki fason Jéhovah servi nou bann frere ek soeur spirituel pou guide nou?

¹⁸ Enn lot moyen ki Jéhovah servi pou guide nou c’est nou bann frere ek soeur spirituel ki forme enn grand famille. “L’esclave fidele et avisé” forme enn partie important dan sa grand famille-la. College central ki represente sa l’esclave-la contigne donne nou en abondance ek regulierement la nourriture spirituel par moyen bann publication ek bann programme ki nou gagné dan reunion ek l’assemblée. (Mat. 24:45-​47; compare avek Actes 15:​6, 22-​31.) En plus, parmi nou bann frere ek soeur, ena ki mur lor plan spirituel, surtout bann ancien, ki qualifié pou aide zot bann frere ek soeur ek pou donne zot bann conseil biblik. (Is. 32:⁠1) Bann jeune ki grandi dan bann famille chretien ena enn lot moyen pou gagne direction Jéhovah. Zot parent c’est enn l’autorité ki Bondié inn etabli, ek bann jeune encouragé pou tourne-zot vers zot parent pou gagne direction.​—Éph. 6:​1-3.

19. Ki bann benediction nou pou gagné si nou contigne suive direction Jéhovah?

¹⁹ Oui, Jéhovah donne nou so direction dan plusieurs fason ek nou gagne bann bienfait kan nou profite sa direction-la. Le roi David ti koz lor  enn lepok kot bann Israélite ti fidele envers Jéhovah kan li ti dire: “Nou bann papa ti ena confiance en toi; zot ti ena confiance ek to ti pé delivré zot. Zot ti criyé vers toi, ek zot ti reussi sapé, zot ti ena confiance en toi, ek zot pa’nn gagne la honte.” (Ps. 22:​3-5) Si nou suive direction Jéhovah avek confiance, nou aussi nou pa pou “gagne la honte.” Nou l’esperance pa pou dan vide. Si nou “mette tou dan la main Jéhovah” au lieu ki nou compte lor nou prop sagesse, nou pou gagne beaucoup benediction depuis asterla-mem. (Ps. 37:⁠5) Ek si nou perseveré fidelement dan sa chemin-la, sa bann benediction-la pou eternel. Le roi David ti ecrire: “Jéhovah content la justice, ek Li pa pou quitte so bann fidele. Oui, Li pou veille lor zot pou touletan . . . Bann dimoune juste pou possede la terre, ek zot pou reste lor là pou touletan.”​—Ps. 37:28, 29.

Eski ou kapav expliké?

• Kifer nou ena confiance dan direction Jéhovah?

• Si nou rejette direction Jéhovah, en realité ki nou pé faire?

• Cite certain situation kot enn chretien bizin manifesté l’humilité.

• Couma Jéhovah guide nou zordi?

[Questions d’étude]

[Zimage lor page 16]

Eski ou rod direction Jéhovah dan tou domaine dan ou la-vie?