Dan Kenya, de pionie ti dan predikasion ek zot ti rant dan enn lakaz. Zot ti bien etone pou trouv enn tipti misie ki ti pe dormi lor enn lili. Li ti ena enn ti lekor ek so de lame ti bien kourt. Kan zot ti montre li promes Bondie ki enn kikenn ki “bwate pou sote kouma enn serf,” sa misie-la ti fer enn gran sourir.​—Is. 35:6.

Sa de pionie-la ti aprann ki Onesmus ti ne avek enn maladi ki apel ostéogenèse imparfaite. So bann lezo ti extra frazil​—telman frazil ki mem enn ti presion ti kapav kas zot. Onesmus ti kone ki li ti pou soufer pandan le res so lavi ek ki li ti pou bizin res lor enn fotey roulant touletan parski pena okenn medsinn ouswa tretman pou sa maladi-la.

Onesmus ti aksepte enn letid Labib. Selman, so mama pa ti oule ki li asiste bann renion parski dapre li, Onesmus ti pou kapav blese ek gagn plis douler. Alor, bann frer ti anrezistre bann renion ek Onesmus ti ekout sa bann renion-la kot li. Apre ki li ti etidie pandan sink mwa, Onesmus ti deside pou asiste bann renion malgre bann risk ki ti ena.

Eski Onesmus ti gagn plis douler kan li ti asiste bann renion? Okontrer! Onesmus dir: “Pandan bann renion, mo ti ena linpresion ki mo bann douler ti diminie.” Li ti panse ki sa lesperans ki li ti fek gagne la, se samem ki ti fer li santi li pli bien. Mama Onesmus ti remark enn sanzman dan latitid so garson ek li ti telman kontan, ki li osi li ti aksepte pou etidie Labib. Li ti dir: “Servi Bondie se enn medsinn pou mo garson.”

Enn tipe letan apre, Onesmus ti vinn enn proklamater. Apre, li ti pran batem ek asterla li enn asistan ministeryel. Mem si li pa kapav marse ek ki li pa kapav servi enn so lebra, Onesmus ti anvi fer tou seki li kapav dan servis Jéhovah. Li ti anvi fer pionie tanporer, me li ti ezite pou ranpli so form. Kifer? Parski li ti kone ki li ti pou bizin kont touletan lor enn kikenn pou pous so fotey roulant. Kan li ti fer so bann frer ek ser kone seki ti pe trakas li, zot ti promet pou soutenir li. Se seki zot ti fer pou ed Onesmus fer pionie tanporer.

Onesmus ti retrouv li dan mem sitiasion kan li ti anvi fer pionie permanan. Me selman, enn text dizour ti donn li lankourazman ki li ti bizin. Text-la ti baze lor Psaume 34:8 ki dir: “Goute ek gete ki Jéhovah Li bon.” Apre ki li ti medit lor sa verse-la, Onesmus ti deside pou fer pionie permanan. Asterla, li pres kat zour dan enn semenn ek li ena plizir letid ki pe fer bann bon progre. An 2010, li ti asiste Lekol Pionie. Onesmus ti extra kontan ki enn parmi so bann instrikter ti enn parmi bann frer ki ti pres ar li premie fwa!

Asterla, Onesmus pre pou gagn 40 an. So bann paran inn mor, me toulezour bann frer ek ser dan kongregasion okip li. Li ena enn gran rekonesans pou bann benediksion ki li pe gagne ek li pe atann zour kot “okenn abitan pa pou dir: ‘Mo malad.’”​—Is. 33:24.