AN Zilyet 2000, Leta Californie ti pas enn lalwa pu bann dimunn ki responsab bann aksidan. Devan lalwa, enn dimunn kapav diminye so par responsabilite dan enn aksidan, si li fer kitsoz pu montre ki li partaz maler dimunn ki’nn viktim sa aksidan la. Be kifer eski finn bizin pas sa lalwa la? Finn remarke ki kan enn aksidan fer bann viktim uswa koz bann domaz, suvan bann dimunn ezite pu prezant zot exkiz. Zot per pangar kan zot fer sa, lakur konsider sa kumadir zot pe admet zot tor. Lot kote, bann viktim ki panse ki ti bizin prezant zot bann exkiz vit, kapav ankoler. Lerla, enn ti aksidan kapav lev enn gran bagar.

Byinsir, si se pa u antor, pa neseser ki u demann exkiz. Dayer, defwa li preferab ki u reflesi lor seki u dir. Se seki enn vye proverb dir: “Plis enn kikenn koze, plis li riske fer erer. Me, enn kikenn saz tini so lalang.” (Proverb 10:19; 27:12) Me mem dan sa ka la, u kapav montre ki u ena bon manyer ek u kapav propoz u led.

Me mem andeor bann zafer lakur, buku dimunn finn aret demann exkiz.  Par egzanp, enn madam dan lakaz pu kapav dir: ‘Zame mo mari demann exkiz.’ Dan travay, enn formenn kapav fer sa konplint la: ‘Mo bann travayer pa rekonet zot bann erer, ek byin rar zot pu demann exkiz.’ Dan lekol enn profeser pu fer sa rapor la: ‘Bann zanfan pa finn aprann pu dir pardonn mwa.’

Kifer Eski Li Difisil pu Demann Exkiz?

Enn rezon kifer enn dimunn ezite pu demann exkiz, se ki li per ki apre, lezot pa aksepte li kuma avan. Parski li per pangar lezot rezet li, li pa arive dir klerman seki li resanti. Avredir, dimunn ki’nn blese la kapav evit sa kikenn ki’nn fer li ditor la, ek lerla li vinn difisil pu zot rekonsilye.

Enn lot rezon kifer dimunn ezite pu demann exkiz, se ki zot pa pran kont seki lezot resanti. Par egzanp zot rezonn kumsa: ‘Mem si mo demann exkiz, sa pa pu koriz erer ki mo’nn fer.’ Ena mem lezot ki per pu demann exkiz, parski zot per so bann konsekans. Zot demann zotmem: ‘Eski bannla pu dir momem ki antor ek mo pu bizin pey bann domaz?’ Me pli gran baryer ki kapav anpes enn dimunn demann pardon, se so fyerte. Enn dimunn ki tro fyer pu dir “exkiz mwa” kapav per li perdi so pozisyon, ek lerla li pa pu kone kot pu met so figir.

Anfin, ninport ki rezon li kapav ete, buku gayn difikilte pu demann exkiz. Me eski li vremem neseser demann exkiz? Ki profi nu kapav tire si nu pre pu demann exkiz?

[Zimaz lor paz 3]

“Bann zanfan pa finn aprann dir pardon”

[Zimaz lor paz 3]

“Mo bann travayer pa rekonet zot bann erer”

[Zimaz lor paz 3]

“Zame mo mari demann exkiz”