PRINSIP LABIB: “Personn pa air so prop lekor, me li nouri li e donn li boukou latansion.”​—Efezien 5:29.

KI SAVEDIR: Sa prinsip Labib la ankouraz nou pou pran swin nou lasante fizik. Enn sondaz montre ki boukou problem lasante ena enn lien ar fason ki bann dimounn amenn zot lavi. Alor, kan nou fer bann bon swa, sa kapav amelior nou lasante.

SEKI OU KAPAV FER:

• Seki Nou Manze. Swazir bann manze ki bon pou lasante ek bwar boukou delo.

• Res Aktif. Ninport ki laz ou ena, mem si ou andikape ouswa limite akoz enn maladi kronik, bann aktivite fizik kapav ed ou pou amelior ou lasante. Ou fami, bann kamarad, ek bann dokter kapav soutenir ou pou fer lexersis. Me sa depann zis lor ou bann zefor, si ou anvi gagn bann bienfe!

• Dormi Kantite Letan ki Bizin. Bann dimounn ki pa dormi ase pandan enn bon bout letan, kapav tom bien malad. Boukou dimounn pa dormi ase parski zot swazir pou fer lezot kitsoz dan ler ki zot sipoze dormi. Me si ou swazir pou dormi kantite letan ki bizin, ou pe swazir pou viv pli bien.

PRINSIP LABIB: “Akoz sa nou bizin pirifie noumem, separ nou avek tou seki kapav sali nou lekor ek nou lam.”​—2 Korintien 7:1.

 KI SAVEDIR: Nou pou ena enn pli bon lasante si nou pa servi bann kitsoz ki pou fer nou lekor ditor, kouma par exanp taba. Ek akoz taba boukou dimounn tom malad ek mor.

KI OU KAPAV FER: Swazir enn dat pou aret fime, ek ekrir li lor ou kalandriye. Zis avan sa zour-la, zet bann sigaret, sandriye, brike, ek lezot kitsoz ki ena enn lien avek sa move labitid-la. Evit al dan bann plas kot bann dimounn fime. Fer ou bann kamarad kone ki ou’nn desid pou aret fime pou ki zot kapav ed ou.

PRAN BANN PREKOSION.

“Si to ranz enn nouvo lakaz, to bizin osi met enn ti miray otour to twa pou ki to pa met enn det disan lor to lakaz parski enn kikenn inn sap lao inn tonbe.”​—DETERONOM 22:8.

KONTROL TO KOLER.

“Enn kikenn ki pa ankoler vit, ena boukou disernman, me enn dimounn ki pena pasians pas pou enn bet.”​—PROVERB 14:29.

EVIT MANZ KOUMA GOURMA.

“Fode pa ki to parmi . . . bann gourma.”​—PROVERB 23:20.