MEM si ena linperfeksion ek pese akoz dezobeisans nou bann premie paran, Adan ek Ev, Bondie so proze pou bann imin pa’nn sanze. Plizir fwa dan so Parol, Labib, Bondie konfirme ki so proze ankor parey.

• “Bann ki swiv bon sime pou posed later e viv lor la pou toultan.”​—Psom 37:29.

• “Wi, Li pou fer lamor disparet pou touletan, ek Souverin Segner Zeova pou souy larm lor tou bann figir.”​—Izai 25:8.

• “Dernie lennmi ki pou detrir, se lamor.”​—1 Korintien 15:26.

• “Pa pou ena ni lamor, ni dey, ni lamantasion, ni douler.”​—Revelasion 21:4.

Kouma Bondie pou “fer lamor disparet pou touletan,” setadir “detrir” lamor? Remarke ki Labib dir dan enn fason kler ki ‘bann ki swiv bon sime pou viv pou toultan.’ Me li dir osi ki “lor sa later-la, pena enn zom ki drwat, ki touletan fer seki bon ek ki zame pa fer pese.” (Ekleziast 7:20) Eski zis pou gagn laviktwar lor lamor, Bondie pou nepli atann ki bann dimounn inparfe swiv so bann prinsip? Sa li inposib! Zame li pou fer sa, parski “Bondie . . . zame koz manti.” (Tit 1:2) Kan Bondie ti kree bann imin, Li ti ena enn proze ranpli ar lamour pou zot. Me, ki Li pou fer pou realiz so proze?

Zeova ti pran enn dispozision ranpli ar lamour pou delivre bann imin ar lamor. Ki Li ti fer? Li ti pey enn ranson. An zeneral, laranson souvan asosie ar pri ki peye pou liber enn dimounn ki prizonie. Ek kan Labib koz lor laranson, li fer referans ar enn kitsoz ki ena mem valer ouswa enn pri ki peye pou kouver bann dega ouswa pou ranpli bann kondision ki lalwa demande. Tou dimounn zot fer pese ek kondane pou mor, akoz sa Labib dir dan enn fason kler: “Personn pa kapav pey ase pou sov lavi enn lot; pena pri ki kapav donn Bondie kouma ranson pou lavi, lavi, ofet, li pena pri, personn pa kapav peye pou sov so lavi.”​—Psom 49:7, 8.

Enn dimounn inparfe pa kapav ni delivre limem ni peye pou pese enn lot dimounn. Ofet, kan li mor li kapav pey zis konsekans so prop pese. Li pa kapav peye pou so lavi ni pey pese enn lot dimounn. (Romin 6:7) Nou ti bizin ki enn dimounn parfe ek san pese donn so lavi, pa pou so prop pese, me pou nou pese.​—Ebre 10:1-4.

Se exakteman sa dispozision-la ki Bondie ti pran. Li ti avoy so Garson, Zezi, ki ti dan lesiel pou ki li ne lor later kouma enn imin parfe ek san pese. (1 Pier 2:22) Zezi ti dir ki li ti vini pou “donn so lavi kouma enn ranson pou tou dimoun.” (Mark 10:45) Li’nn mor pou pey pou nou bann pese ek pou liber nou ar lamor.​—Zan 3:16.

Parey kouma bann profesi Labib ti anonse, azordi nou pe viv “bann moman difisil.” Sa montre ki nou pe viv dan “bann dernie tan” sa move lemond-la. (2 Timote 3:1) Bann dernier tan pou fini ar “zour zizman ek destriksion bann dimounn ki pena okenn respe pou Bondie.” (2 Pier 3:3, 7, NW) Me pandan sa destriksion-la, bann dimounn ki kontan Bondie pou sape ek pou gagn “lavi eternel.”​—Matie 25:46.

 Pou ena bann milyon dimounn ankor ki pou gagn lavi eternel kan zot pou resisite. Kan Zezi ti vizit lavil Nainn, li ti resisit enn dimounn. Dan sa lavil-la, Zezi ti trouv enn vev ki ti perdi so sel garson dan lamor. Kan Zezi ti trouv sa, ‘so leker ti fer mal,’ ek li ti resisit sa garson-la. (Lik 7:11-15) Ek lapot Pol osi ti dir: “Mo ena lesperans an Bondie . . . ki pou ena enn rezireksion bann dimounn ki zis ek bann dimounn inzis, toule-de.” Sa lesperans-la li reel ek se enn prev extraordiner ki montre gran lamour ki Bondie ena pou bann imin.​—Zistwar Bann Apot 24:15, NW.

Bann milyon dimounn kapav ena lespwar pou viv pou touletan. Labib dir: “Bann dimounn zis pou posed later, ek zot pou res lor la pou touletan.” (Psom 37:29, NW) Dan sa lepok-la, zot pou trouv realizasion bann parol rekonfortan ki lapot Pol ti ekrir inn gagn apepre 2,000 an: “Lamor, kot to laviktwar ete? Lamor, kot to pouvwar donn douler ete?” (1 Korintien 15:55) Lerla, bann dimounn pou gagn laviktwar lor zot pir lennmi, lamor!