GUNA tadikaka taihu momo na edia tano korikori e rakatani, bena ela tano ma haida ai moni ḡaukara bae kara totona, to hari idia na e lou edia tano korikori. Iehova bona taunimanima e lalokau henidiamu dainai, pablisa dia momo gabudia ela unuseniai bae haroro diba. (Mat. 22:37-39) Idia be dahaka sensi e kara, bona edena dalai Iehova ese e hanamodia? Haere baita diba totona, mani Cameroon, western Africa ai, e vara ḡauna aita laloa.

Laḡani 1998 ai, tadikaka ta ladana Onésime na ena tano Cameroon e rakatania. Bona laḡani 14 lalonai gabu ta ai e nohova. Nega ta, Kristen hebouna ta ai, haroro ḡaukara ena haheitalai sivaraina e kamonai. Tok e heniva tauna na eto: “Bema tura namodia rua na gabu idaudia rua ai e kimaiva, ta be gwarume momo e veriva, a ta be lasi. O laloamu gwarume momo se veriva tauna be bema lao gwarume momo e verimu gabuna, a?”

Una haheitalai ese Onésime e durua, bena e laloa ia na baine lou Cameroon, unuseniai momo na e urava Baibul bae stadilaia. To ia na e lalohekwarahi. Ia na laḡani momo tano ma ta ai e nohova dainai, e ura baine diba bema ia na heḡereḡere Cameroon ai baina noho. Una dainai, Onésime na ela Cameroon ai hua siks baine noho. Bena laḡani 2012 ai, lalona e hadaia baine lou ena tano korikori Cameroon ai.

Onésime na eto: “Una gabu na siahu bona edia mauri dalana na idau dainai baina manada na namo. Kingdom Hall ai, fom ai a helaiva dainai una baina manadalaia na namo.” Bona mai kirina ida ma e gwa, “To, program ai na hakala namonamova dainai, unu helai ḡaudia na asina lalodia.”

Laḡani 2013 ai, Onésime ese Géraldine e adavaia, ia danu laḡani 9 bamona France ai e noho murinai e lou lao Cameroon. Edia mauri lalonai mai anina bada ḡaudia e ato gunava dainai, edena dalai Iehova ese e hanamodia? Onésime na e gwa: “Ai raruosi na Basileia Evanelia Skulina ai a vareai, bona Betele ai a ḡaukaramu. Laḡani gunadiai, emai kongrigeisin ai Baibul stiuden 20 heḡereḡerena e bapatiso. Hari, na dibamu lau na gabu maorona ai na ‘haodamu.’” (Mar. 1:17, 18) Géraldine ma eto: “Hari hahenamo momo na davarimu.”

Judith na United States ai e nohova, to e urava ena haroro ḡaukara baine habadaia. Ia na e gwa: “Cameroon ai famili na vadivadiamu bona na loumu negadiai na taimu, badina stadi a hamatama taudia na rakatanidiamu.” To, Judith na se ura baine lou  Cameroon. Badina moni ḡaukara namona ta e karaiava bona tamana ena medikol davadia Cameroon ai e siaiva. To Iehova e abidadama henia dainai, Judith na e lou Cameroon. Ia na e gwa, United States ai e moalelaiva ḡaudia haida e readiamu. To Iehova e ḡuriḡuri henia, baine durua una gabu maurina baine manadalaia, bona seket tauna ta adavana ida edia hahegoada herevana ese e durua bada.

Judith na e gwa: “Lau na lou Cameroon neganai, ḡau ta na se idau, to na moale badina laḡani toi lalonai taunimanima foa na durudia e bapatiso.” Una negai, Judith ese spesol painia ḡaukara e hamatamaia. Hari, ia bona adavana, Sam-Castel na sekit ḡaukara e karaiamu. To, Judith tamana enai be dahaka e vara? Judith bona ena famili ese tano ma ta ai hospele ta e davaria, tamana ena opereisin baine abia totona, bona una hospele ese opereisin e karaia asi davana. Ḡau iboudiai na e heau namonamo.

Tadikaka ta ladana Victor na ela Canada ai e nohova. Gima Kohorona ta ai edukeisin bada e herevalaia atikol ta e duahia murinai, ena lalohadai e haidaua. Ia na se ura iunivesiti bainela, to teknikol kosi haida e kara. Victor na e gwa: “Una ese e durugu ḡaukara ta baina davaria haraḡa, bona na urava baina karaia ḡauna, painia ḡaukara baina karaia diba.” Gabeai Victor ese Caroline e adavaia, bona raruosi ela Cameroon. Unuseniai, brens ofis ai e vadivadi neganai, tadikaka haida ese e hagoadadia unuseniai hesiai ḡaukara bae karaia totona. Victor eto: “Ai na asi emai ekskius, bona emai mauri ai ḡau haida a haidau dainai, una invateisin abia dae.” Ena be Caroline na mai ena helt hekwakwanai haida, to lalodia e hadai bena ela.

Unuseniai Victor bona Caroline na e regula painia matama, bona e davaridia taudia iboudiai na e ura dikadikava Baibul bae stadilaia. Matamanai, idia sibodia ese e habou monidia e ḡaukaralaiva. Bena e louva Canada ai hua haida e ḡaukarava, bona ediai e heḡereḡereva neganai ma e louva Cameroon bona ma e painiava. Dahaka hahenamo e davari? Basileia Evanelia Skulina ai e vareai, spesol painia ḡaukara e karaia, bona hari konstraksen ḡaukara e karamu. Victor na e gwa: “Emai mauri namona a rakatania, bona Iehova enai a tabekau dainai, ia ese e narimai.”

Laḡani 2002 ai, Alain na Germany ena iunivesiti ta ai e skuliva neganai, pepapepa ta ladana, Youths​—What Will You Do With Your Life? e duahia. Una ese e durua ena mauri ai tahua ḡaudia matamatadia e ato. Laḡani 2006 ai, Ministerial Training School ela, bena e siaia Cameroon ai hesiai ḡaukara baine karaia.

Cameroon ai, Alain na pat-taim moni ḡaukara ta e davaria. Gabeai, moni ḡaukara namona ta e abia, to e lalohekwarahi badina hari be ena nega na dia heḡereḡere haroro bona hahediba ḡaukarana baine karaia. Una dainai, e abia hidi spesol painia ḡaukara baine karaia neganai, una invateisen na e abia dae. Alain ena bosi na e ura iena pei baine habadaia, to ia na lalona e hadaia spesol painia ḡaukara baine karaia. Gabeai Alain ese Stéphanie e adavaia, ia danu laḡani momo lalodiai France ai e noho. To Cameroon ela neganai dahaka hekwakwanai e davari?

 Stéphanie na e gwa: “Nega haida e gorereguva bona allergies na davari, to hanaihanai muramura na abiva dainai na namo.” Stéphanie bona adavana na edia haheauka karana dainai hahenamo e davari. Alain na eto: “Hanua daudauna ta ladana, Katé, ai a harorova neganai, kamonai taudia momo a davaridia bona e ura Baibul bae stadilaia. Gabeai fon amo edia stadi a karava. Unu Baibul stiuden rarua na e bapatiso, bena grup maraḡina ta e hamatamaia.” Stéphanie ma eto: “Taunimanima ta durudiamu bona Iehova enai edia mauri e gwauhamatalaimu na moale bada ḡauna. Iniseniai a haroromu neganai a moale badamu.” Hari, Alain bona Stéphanie na sekit ḡaukara e karaiamu.

Gisèle na Italy ai medikol skulina ta ai e skuliva neganai e bapatiso. Ia ida Baibul e stadilaiava painia headava tau bona hahine edia mauri dalana e itaia neganai, una ese e durua haroro ḡaukara baine habadaia totona. Una dainai, Gisèle na skuli e haorea neganai, maoromaoro regula painia ḡaukara e hamatamaia.

Gisèle na e ura baine lou lao Cameroon unu amo Iehova baine hesiai henia, to ḡau haida e lalohekwarahilai. Ia na e gwa: “Italy ai na nohomu ena maoro (Italian residency) na baina koua, bona turagu, bona famili baina rakatanidia.” May 2016 ai, Gisèle na e lou lao Cameroon. Dina haida muridiai, ia ese Léonce e adavaia. Bena Cameroon ena brens ofis ese e hamaorodia taoni ta ladana, Ayos, baela, unuseniai Basileia e harorolaiamu taudia na lasi.

Ayos ai mauri be ede bamona? Gisèle eto: “Wiki haida lalonai paoa na lasi, bona emai mobael fon danu asia charge. Nega momo na asie ḡaukarava. Lau na lahi ai nanadu na diba, bona hanuaboi ai ranu abi gabuna asi tauna neganai, wilbaro bona tosi a ḡaukaralaiva ranu a utuva.” Dahaka ese idia e durudia bae haheauka totona? Gisèle na e gwa: “Iehova ena lauma helaḡa, adavagu namona, bona famili bona tura namodia amo hahegoada herevadia bona moni dalanai e durumai, una ese ai e hagoadamai.”

Gisèle be ena gabu korikori e lou lao dainai e moalemu, a? Ia na eto: “Oibe! Na moalemu. Matamanai hekwakwanai haida e vara bona a lalomanoka, to unu ḡau iboudiai a hanaidia. Lau adavagu ida na baia kara diba ḡaudia a kara. Ai na Iehova abidadama heniamu, bona ia kahirakahira a laomu.” Léonce bona Gisèle na Basileia Evanelia Skulina ai e vareai, bona hari idia na temporary spesol painia.

Haoda taudia na hekwakwanai idauidau lalodiai e ḡaukara goadamu gwarume momo bae abi. Una heḡereḡerena, edia gabu korikori e lou lao taudia na mai edia ura bada ida Basileia sivaraina e abia daemu kudou maoro taudia e durudiamu. Iehova ese ia ladana dainai e ḡaukara goadamu pablisa na be hanamodiamu. (Neh. 5:19; Heb. 6:10) Bema oi na tano ma ta ai o nohomu, to emu gabu korikori ai pablisa na dia momo, oi be o uramu ba lou eiava? Bema unu bo kara tomamu, Iehova ese be hanamomumu.​—Her. 10:22.