1. Ededia dala haida ai Iehova ida baita ḡaukara hebou diba?

ḠAU iboudiai e havaradia Diravana ena ura na taunimanima ḡoevadaedia na ia ida bae ḡaukara hebou ena ura bae haḡuḡurua totona. Ena be hari ina negai taunimanima na dia ḡoḡoevadae, to abidadama taudia na dounu dina ta ta ai Iehova ida bae ḡaukara hebou diba. Heḡereḡere, Basileia sivaraina namona ta harorolaiamu bona taunimanima na hahediba ai ta halaodiamu neganai, ita na ‘Dirava ida ta ḡaukara heboumu.’ (1 Kor. 3:5-9) Mani a laloa, mai anina bada ḡaukarana ai siahu idoinai Diravana ida ta ḡaukara heboumu na hahenamo ta! To, Iehova ida ta ḡaukara heboumu dalana na dia haroro bona hahediba ihalaodia ḡaukarana mo. Ina atikol ai dala ma haida baita herevalaimu​—eda ruma bese bona tadikaka taihu baita durudia, heabidae karana baita hahedinarai, tiokratik ḡaukaradia ai baita heduru, bona eda hesiai ḡaukara helaḡana baita habadaia.​—Kol. 3:23.

2. Dahaka dainai Iehova ena ura ihaḡuḡuruna totona ta karamu ḡaudia na ma haida ida basita haheḡereḡerea?

² Ina atikol ta stadilaiamu neganai, Iehova dainai ba kara ḡaudia na ma haida ida basio haheḡereḡerea. Ba helalotao, ta ta laḡanidia, edia goada, noho daladia bona diba na idauidau. Aposetolo Paulo na eto: “Ta ta ena ḡaukara ena ḡaukara bae  diba, a bamona ena basine diba, unu amo sibona ena ḡaukara baine heaḡilaia.”​—Gal. 6:4.

3. Dahaka dainai baita gwau diba edia ruma bese e naridiamu taudia na Dirava ida e ḡaukara heboumu?

³ Iehova na e uramu ena hesiai taudia ese edia ruma bese bae naridia. Heḡereḡere, reana moni ḡaukara o karamu tauani dalanai emu ruma bese ba ubua totona. Sina haida na ruma ai e nohomu natudia maraḡidia e naridiamu. Bona natu badadia haida na tamadia sinadia gogorere daidiai e naridiamu. Unu na mai anidia bada ḡaukaradia haida. Dirava ena Hereva na eto: “Varavarana se naridiamu bona ena ruma taudia se ubudiamu tauna ese Iesu ibadinana e ḡoreamu; ena dika ese murimuri tauna ena dika e hereaiamu.” (1 Tim. 5:8) Bema unu maduna o huamu, bo mamiamu tiokratik ḡaukaradia ai emu nega bada na so ḡaukaralaiamu. To basio lalomanoka! Emu ruma bese bo nariamu neganai, Iehova na be moalemu.​—1 Kor. 10:31.

4. Edena dala ai tama sina ese tiokratik ḡaukaradia bae ato guna, bona una ese dahaka e havaraiamu?

⁴ Kristen tama sina ese natudia e durudiamu tiokratik ḡaukaradia bae ato guna neganai, idia na Iehova ida e ḡaukara heboumu. Unu e kara toma tama sina momo na gabeai e itaia natudia memerodia bona kekenidia na ruma e rakatani ful-taim hesiai ḡaukaradia bae kara totona. Haida na misinari taudia; ma haida na pablisa dia momo tanodia ai e painiamu; a ma haida na Betele ai e ḡaukaramu. Natu na gabu daudau ai e nohomu dainai tama sina ida na asie hebamo momomu, dia guna heḡereḡerena. To, sibodia edia ura e dadaraimu tama sina ese natudia na e hagoadadiamu edia hesiai ḡaukara bae lalo bada. Dahaka dainai? Idia na e moalemu badina e itaiamu natudia na Basileia ḡaudia e ato gunamu. (3 Ioa. 4) Reana unu tama sina momo edia hemami na Hana ena heḡereḡerena, ia na eto natuna Samuel na Iehova vada e “henia.” Unu tama sina na e laloamu Dirava ida e ḡaukara heboumu na hahenamo namona ta. Bona asie uramu una hahenamo na bae reaia.​—1 Sam. 1:28.

5. Edena dala ai emu kongrigeisen taudia ba durudia diba? (Rau 23 ai laulau ba itaia.)

⁵ Bema ruma bese lalonai emu maduna na dia bada, gorere eiava buruka tadikakadia bona taihudia, eiava idia e naridiamu taudia ba durudia diba, a? Emu kongrigeisen ai heduru bae abi na namo taudia ba tahudia. Reana Kristen taihuna ta tamana eiava sinana burukana ba naria diba unu amo taihu ese ḡau ma haida baine kara diba. Eiava heduru e uramu taudia ba durudia hebou ba laohaidia, stoa baola edia ura ḡaudia ba ha hoi, eiava hospele ai ta ba vadivadia. Unu bo kara tomamu neganai, Iehova ida o ḡaukara heboumu ta ena ḡuriḡuri ihaerelaina totona.​—1 Korinto 10:24 ba duahia.

6. Heabidae karana baita hahedinaraia anina be dahaka?

⁶ Dirava ida e ḡaukara heboumu taudia ese heabidae karana e hahedinaraiamu. Kristen Grik Toretoredia ai, ina hereva “heabidae karana” e hahanaia anina na “idau taudia ikara namo henidia karana.” (Heb. 13:2) Baibul sivaraidia haida ese una kara namona baita hahedinaraia dalana e hadibadamu. (Gen. 18:1-5) Hanaihanai dala e hekehomu negadia ai ma haida baita durudia na namo, ena be idia  na eda “ekalesia taudia” eiava lasi.​—⁠Gal. 6:10.

7. Dahaka dainai ful-taim hesiai ḡaukara e karamu taudia bavabidia dae?

⁷ Ful-taim hesiai ḡaukara e karamu taudia iabi-daedia karana amo Dirava ida ba ḡaukara hebou diba, a? (3 Ioane 5, 8 ba duahi.) Nega momo una kara ese dala e kehoamu “baita hahealo heheni.” (Roma 1:11, 12) Olaf enai e vara ḡauna mani aita laloa. Ia na e helalotaomu laḡani haida gunadia ai, ena kongrigeisen lalona ta ese seket tauna se abia dae edia ruma ai baine noho; una seket tauna na asi adavana. Olaf ese tamana sinana, dia Witnes taudia, e noidia edia ruma ai baine noho. Idia ese ena noinoi na e abia dae to e gwa Olaf na helai ḡauna badana (couch) ai baine mahuta. Olaf na unu e kara toma. Ia na eto: “Una na wiki namona ta! Lau bona seket tauna na daba ta ta ai a toreisiva bona emai daba anianina a aniava lalonai topik namodia momo a herevalaiva. Na abi hahegoada herevadia ese ful-taim hesiai ḡaukara baina karaia urana na e hagoadaia.” Laḡani 40 mai kahana gunadia ai, Olaf na tano momo ai misinari ḡaukara e karava.

8. Dahaka dainai ma haida baita kara namo henidia ena be matamanai basie moale? Haheitalai a gwauraia.

⁸ Dala momo ai idau taudia ediai lalokau ba hahedinaraia diba, ena be matamanai emu hekwarahi na basie laloa bada. Mani ina haheitalai aita laloa. Spain ai, pablisa ta ese ena stadi hahinena Yesica, Ecuador amo, e itaia e taiva. Pablisa ese ena tai badina e henanadailaia neganai, Yesica na eto guna Spain do sela neganai, ia na ogoḡami ai e nohova bona dina ta idia na asi edia aniani. Una dainai natuna na ranu mo e heniava. Yesica na natuna e hamahutaiava lalonai, heduru totona e ḡuriḡuriva. Se daudau, Witnes taihudia rarua ese e vadivadia, to Yesica ese e kara auka henidia bona e henia magasin na e darea. E nanadaidia, eto: “O laloamu ina be aniani natugu baina henia, a?” Unu taihu na e ura lalona bae hagoadaia, to ia na se ura baine kamonai. Gabeai, idia ese bosea ta mai anianidia na ena iduara badinai e rakatani. Edia kara namona ese Yesica kudouna e hamarerea bona ena hemami na e dika badina Dirava ese ena ḡuriḡuri e haerelaia neganai se ura baine kamonai. Hari, ia na lalona e hadaia Iehova baine hesiai henia. Unu taihu edia hariharibada karana dainai anina namona e vara!​—Koh. 11:1, 6.

9, 10. (a) Baibul negadiai Dirava ena taunimanima be ededia nega ai e heduruva? (b) Hari ina negai kongrigeisen tadikakadia haida be ededia dala haida ai e hedurumu?

⁹ Idaunegai Israel ai, taunimanima na nega idauidau ai e heduruva. (Eso. 36:2; 1 Sis. 29:5; Neh. 11:2) Hari ina negai, oi danu dala momo ai emu nega, kohu, bona diba ba ḡaukaralai tadikaka bona taihu ba durudia totona. Unu bo kara tomamu neganai bo moale dikadikamu bona hahenamo momo bo abimu.

¹⁰ Dirava ena Hereva ese kongrigeisen ai tatau e hagoadadiamu Iehova ida bae ḡaukara hebou totona hesiai taudia bona elda taudia ai baela. (1 Tim. 3:1, 8, 9; 1 Pet. 5:2, 3) Unu e kara tomamu taudia na e uramu tauani bona lauma dalana ai ma haida bae durudia. (Kara 6:1-4) Elda taudia ese oi de noimu atenden ḡaukarana ba karaia, eiava buka ba nari, teritori, meintenens, eiava ḡaukara ma haida ai ba heduru, a? Unu ḡaukara e karamu taudia ese be hamaoromumu ma haida idurudia karana na mai moalena.

11. Edena dala ai taihu ta na tiokratik ḡaukaradia ai ma haida ihebamo henidia karana amo namo e davari?

¹¹ Tiokratik ḡaukaradia ai e hedurumu  taudia na nega momo tura matamatadia e davaridiamu. Margie ena haheitalai aita laloa, ia na Kingdom Hall konstraksen ai laḡani 18 e ḡaukara. Laḡani momo lalodiai, matamata taihudia ida e hebamova bona e hadibadiava. Ia na e davaria una ḡaukara na dala namona ta, lauma dalanai baita hahealo heheni totona. (Roma 1:12) Margie na hekwakwanai e davari negadia ai, konstraksen ḡaukaradia ai e hebamo henidia taudia ese e hagoadaiava. Unu bamona konstraksen ḡaukarana ta ai o hedurumu, a? Ena be mai emu diba eiava lasi, to ba heduru diba, a?

12. Edena dala ai disasta negadiai ba heduru diba?

¹² Disasta negadiai, Dirava ena taunimanima na tadikakadia e durudiamu karana amo Dirava ida e ḡaukara heboumu. Heḡereḡere, dika e davari taudia na moni dalanai e durudiamu. (Ioa. 13:34, 35; Kara 11:27-30) E durudiamu dalana ma ta be, gabu e haḡoevamu eiava e dika rumadia e hagini loumu. Poland taihuna ta, Gabriela, ena ruma na abata ese e hadikaia, to ena gabu kahikahina ai kongrigeisen tadikakadia ese e durua neganai e moale. Ia na eto: “Asina uramu na haboio ḡaudia baina herevalai​—unu na tanobada ḡaudia mo. To, na uramu na davari ḡaudia baina herevalai. Egu ai e vara ḡauna amo na dibamu, Kristen kongrigeisen lalonai na nohomu na hahenamo badana ta bona na moalemu.” Disasta murinai heduru e abi taudia momo danu e gwaumu, idia na e moalemu. Bona ma haida idurudia karana ai Iehova ida e ḡaukara heboumu taudia na e moale dikadikamu.​—Kara 20:35; 2 Korinto 9:6, 7 ba duahi.

13. Edena dala ai ma haida idurudia karana ese eda hetura karana Iehova ida e hagoadaiamu? Haheitalai ta a gwauraia.

¹³ Stephanie bona pablisa ma haida na mai moaledia ida Dirava ida e ḡaukara hebouva, badina idia ese tuari dainai United States ai e ha noho Witnes taudia e durudia. Edia noho rumadia e tahuva bona kohudia e atova. Stephanie na eto: “Idia ese tanobada heḡeḡemadai tadikaka oreana edia lalokau karana e mamia neganai, e moale dikadika bona una ese  ai na e hagoadamai.” Ma eto: “Unu Witnes taudia na e laloava ai ese a durudiava, to momokani, idia ese ai na e durumai bada. Edia lalokau, lalotamona, abidadama, bona Iehova enai e tabekau karana a itaia neganai, emai lalokau Iehova enai na e hagoadaia, bona ena orea amo ta a abimu ḡaudia iboudiai a lalodia bada.”

14, 15. (a) Peroveta tauna Isaia ese dahaka kara e hahedinaraia? (b) Edena dala ai Basileia e harorolaiamu taudia ese Isaia e tohotohoamu?

¹⁴ O uramu Iehova ida ḡaukara hebou karana ba habadaia, a? Mai emu ura ida pablisa dia momo gabuna ta baola diba, a? Momokani, Dirava ena hesiai taudia na gabu daudaudia na basie lao dibamu. To tadikaka bona taihu haida na edia noho daladia heḡereḡere dainai gabu daudaudia e laomu. Edia lalohadai na peroveta tauna Isaia heḡereḡerena. Iehova e henanadai, “Daika baina siaia? Daika na ai daimai ai bainela?” neganai, ia na eto: “Lau o ina, a siagu.” (Isa. 6:8) Emu noho dalana be heḡereḡere bona o uramu Dirava ena orea ba durua, a? Ededia dala ma haida ai ba heduru diba?

¹⁵ Haroro bona hahediba ihalaodia ḡaukarana ai, Iesu na eto: “Uit vada e lo ḡoevaḡoeva, to iutuna taudia na dia hoho. Uma biaguna ba noia, ia ese iutuna taudia haida ma baine siaidia, ena uit bae utua.” (Mat. 9:37, 38) Pablisa dia momo gabuna ta ai painia ḡaukarana ba karaia diba, a? Eiava ta ba hagoadaia diba unu baine kara toma, a? Tadikaka bona taihu momo na e laloamu, Dirava bona dekeda taudia ilalokau henidia karana baita hahedinaraia dalana namona ta na, pablisa dia momo gabudia eiava teritoridia ai painia ḡaukara baita karaia. Emu hesiai ḡaukara ba habadaia daladia haida o lalomu, a? Unu bo kara tomamu neganai bo moalemu.

16, 17. Ededia dala ma haida ai Iehova ihesiai henina ḡaukarana ba habadaia diba?

¹⁶ Mai emu ura ida dina ta eiava dina haida Betele ai eiava konstraksen ḡaukaradia ai ba heduru diba, a? Hanaihanai Dirava ena orea na e uramu mai edia ura ida Iehova e hesiai heniamu bona ḡaukara idauidau e abi daemu taudia ese bae durudia. Una anina na dahaka ḡaukara bae henidia neganai bae karaia, ena be idia na ḡaukara ma haida ai mai edia diba. To, Iehova ese sibodia edia ura e dadaraiamu bona hesiai ḡaukaradia e karamu taudia na e lalodia badamu.​—Sal. 110:3.

¹⁷ O uramu diba ma haida bavabi unu amo emu hesiai ḡaukara helaḡana ba karaia namonamo, a? Bema oibe, Basileia Evanelia Sikulina baola diba. Una sikuli ai e hadibadiamu taudia na, lauma ḡaudia e lalo badamu tataudia bona hahinedia, idia na ful-taim hesiai ḡaukaradia e karamu unu amo edia hesiai ḡaukara bae habadaia diba. Una sikuli e haoreamu taudia na dahaka asainmen bae henidia neganai mai edia ura ida bae abia dae na namo. Mai emu ura ida una dala ba ḡaukaralaia diba emu hesiai ḡaukara ba habadaia totona, a?​—1 Kor. 9:23.

18. Dina ta ta ai Iehova ida ba ḡaukara hebou karana ena namo haida be dahaka?

¹⁸ Ita na Iehova ena taunimanima dainai, hariharibada karadia​—unu na kara namodia, hebogahisi, bona lalokau​—baita hahedinarai, bona dina ta ta ai ma haida baita durudia. Unu baita kara tomamu neganai, baita moalemu bona maino ai baita nohomu. (Gal. 5:22, 23) Ena be emu noho dalana na edeheto, to ba moale diba bema Iehova ena hariharibada karana ba tohotohoa bona Ia ida ba ḡaukara hebou!​—Her. 3:9, 10.