Kayando kakama kakanenela banu simbu yaikalu manene. Kwesekesa na bupolofweto bwa mu Mbimbiliya, kakakalako ha simbu “mu matangwa a mamaneselelo” nambe ngwetu ‘matangwa a kukotoka.’ (2 Timothi 3:1; Daniele 12:4) Ikapwa simbu ya “kayando kaje kanda kakaleko laja kutunda hatangelele Njambi byuma kweta na simbu ije, co lalo kukakakalako nawa.”—Maki 13:19; Daniele 12:1; Mateu 24:21, 22.

Bika bikalingiwa ha simbu ya kayando kakama?

•   Bakanyongesa bulombelo bwa makuli. Bulombelo bwa makuli bakabunyongesa mu bwasi-bwasi. (Kujombolola 17:1, 5; 18:9, 10, 21) Ciyulo ca nzili ca bupolitiki cimanena munga ya United Nations cikashulisilila cizango ca Njambi mu kulinga ebi byuma.—Kujombolola 17:3, 15-18. a

•   Kulwisa bulombelo bwa busunga. Baka-mafuti babanatumbula mu cimona ca Ezekiele ngwabo “Gogi wa ku lifuti lya Magogi,” bakeseka kunyongesa boshe bali na kulombela Njambi mu busunga. Nameme ngoco, Njambi akanyungilila banu bendi.—Ezekiele 38:1, 2, 9-12, 18-23.

•   Kusompa boshe bakakala ha lifuti-libu. Yesu akasompa banu boshe, “co akangununa banu ngwe kanyungi mwakangununa bimanga ku bimembe.” (Mateu 25:31-33) Munu na munu bakamusompela kukundwiya nambe kujeneka kukundwiya “bandolome” ba Yesu baje bakayula nendi mwilu.—Mateu 25:34-46.

•   Kukungulula baje bakayula mu Bumwene. Nga bakulongwa baje babanangula kukayula na Kristu bamanesa buyoye bwabo bwa hano hasi, bakasangukila mwilu.—Mateu 24:31; 1 Korinte 15:50-53; 1 Tesalonika 4:15-17.

•   Amagidoni. Ei “nzita ya litangwa lyakama lya Njambi Muka-nzili Yoshe” baitumbula lalo ngwabo “litangwa lya Yehova.” (Kujombolola 16:14, 16; Isaya 13:9; 2 Pita 3:12) Baje babakasompa mwamubi kuli Kristu bakabanyongesa. (Zefaniya 1:18; 2 Tesalonika 1:6-10) Oku kukambateselela na kunyongesa biyulo bya bupolitiki bya mu kaye koshe bije bibanendeka mu Mbimbiliya ngwabo cikashama wa mitwe 7.—Kujombolola 19:19-21.

Bikalingiwa munima ya kayando kakama

•   Kukuta Satana na badimona. Kangelo wa nzili akombila Satana na badimona “mu mbulu” muje mubakakala ngwe banatsi. (Kujombolola 20:1-3) Ha simbu yakakala Satana mu mbulu kukapwa lika ngwe ali mu kamenga mwafwa kakasa kungumuna lalo banu.—Kujombolola 20:7.

•   Ciyulo ca myaka 1000 cishangumuka. Bumwene bwa Njambi bukashangumuka kuyula ha myaka 1000, co bukanenela banu bibezikiso byabingi. (Kujombolola 5:9, 10; 20:4, 6) “Mbunga yakama” ije kutwasa kulaba ‘ikatunda mu kayando kakama’ na kulimwena mucikashangumuka ciyulo ca myaka 1000 hano hasi.—Kujombolola 7:9, 14; Bisamu 37:9-11.