Ma e Jesús o sacrificao o vida go salva yo ntee yo ngeji fiel (Mateo 20:28). Ngekʼo, ne Biblia mama ke e Jesús ngeje nu “Salvador del mundo” (1 Juan 4:14). Xo mama ke “otrjo dʼaja kʼꞹ søø ra unꞹ salvación, na ngeje kja ne xoñijomꞹ dyaxi bʼꞹbʼꞹ dʼa bʼɇzo ke ri chjɇbi angeze kʼꞹ søø ra salvazꞹji” (Hechos 4:12).

 E Jesús go nrru̱u̱ ngekʼua texe yo ejmeji angeze søø ra salvaji (Hebreos 2:9; Juan 3:16). E Diosi o tsjapꞹ ro tetrjo na yeje, nudyakʼua e Jesús go nzhogꞹ a jensʼe nzakja dʼa espíritu (Hechos 3:15). Nrreze a jensʼe, e Jesús “søø ra unꞹ salvación texe kjo chɇzhiji e Diosi mediante angeze, sido ra mbøsʼꞹyo na ngeje nunca ra nrru̱u̱” (Hebreos 7:25).

¿Pjenga ni jyongøji ke ra mbøxkꞹji e Jesús?

 Texe nde ri pɇsʼiji pecado (Romanos 3:23). Ne pecado kjakꞹji ra tu̱ji xo ñe ke ra jyangøji o ra xo̱gaji ko e Diosi (Romanos 6:23). Pe e Jesús ngeje “dʼa ayudante” o nzakja dʼa abogado ke ra mbøsʼꞹ yo ejmeji angeze (1 Juan 2:1). E Jesús go sacrificao o vida, ngekʼua angeze søø ra dyøtꞹ e Diosi ke ra dyⱥrⱥ ma ri oraji ñe ra perdonaozꞹji in nzhꞹbʼꞹji (Mateo 1:21; Romanos 8:34). E Diosi nuu na joo kʼo ørꞹ e Jesús ngekʼua kjapꞹ nguenrrayo. Angeze go ndⱥjⱥ e Jesús kja ne Xoñijoma “ngekʼua por medio de angeze ra salvaji yo ntee” (Juan 3:17).

¿Ngextrjo ra creoji e Jesús ngekʼua ra salvazꞹji?

 Jyo. Na joo ke ra creoji e Jesús ngekʼo ra salvazꞹji, pe xe ni jyodꞹ pje ra kjaji (Hechos 16:30, 31). Ne Biblia mama: “Nge ga kjanu, chjɇnjui nʼa ntee ma ya nrru̱u̱ dyaja pɇsʼi zɇzhi, je xo ga kjatrjonu nu fe ma dyaja pɇpji ya nrru̱u̱” (Santiago 2:26). Ma ri nee ra salvazꞹji ni jyodꞹ:

•   Ra pjechiji ja ga kjaa e Jesús ñe e Jehová, kʼꞹ nu Tata angeze (Juan 17:3).

•   Ra ejmeji e Jesús ñe e Jehová (Juan 12:44; 14:1).

•   Ra kjaji kʼo manda angezebi ngekʼua ra jñetsʼe i fe (Lucas 6:46; 1 Juan 2:17). E Jesús o mama ke dya texe kʼo ra matrʼꞹji “in Jmugø” ra salvaji, ngextrjo kʼꞹ ra tsjaa o voluntad kʼꞹ nu Tata (Mateo 7:21).

•   Sido ra kjꞹbʼꞹji in kuɇ zø ri pɇsʼiji nrrumꞹ. Na ngeje e Jesús o mama: “Pe kʼꞹ ra sɇchʼi jesta ma ra sⱥjⱥ nu fin nge kʼꞹ ra salvajikʼꞹ” (Mateo 24:13).