Ja ba mbøsʼꞹji ne biblia

¿PJENGA o jyɇzi kʼo fetiche dʼa nrrinxu ke mi ɇdyi 60 kjɇɇ? ¿Pje o tsjaa nu mbøkjimi sintoísta ngekʼua ro jyɇzi nu santuario i go tsjaa ministro cristiano? ¿Pje o mbøsʼꞹ  dʼa nrrinxu ke mi ꞹdʼꞹ ma bo mba̱ra̱ ke ma go musʼꞹji go unꞹji en adopción? Ra jɇziji ke angezetsjɇji ra xitsiji.

“Dya ri kreogø yo fetiche.” (E ABA DANSOU)

NU KJɆɆ MA O MUSʼꞸJI: 1938

NU PAÍS: BENÍN

TEXE KʼO NRRE MI KJAA: KO KʼO FETICHE

KʼO RO KJAAGO MI JINGUA: Ro tego kja dʼa tsʼijñiñi a So-Tchahoué, bʼɇchi mi bʼꞹntrjo dʼa zʼapjꞹ ñe dʼa zʼisʼi. Dya mi bʼꞹbʼꞹ carretera ngekʼua yo ntee mi pøji kja barco o kja tsʼi bʼꞹꞹ. Yo ntee mi kⱥjmaji jmo̱o̱ i mi pɇsʼiji bʼaga, chiba, ndenchjꞹrꞹ, kuchi ñe ngøñi i mi ⱥtrʼⱥji kʼo in ngumꞹji ko zaʼa, paja ñe ladrillo. Zø dya pɇsʼiji na punkjꞹ chʼopjꞹ, nujnu dya nrra na sʼonte yo ntee nzakja kʼo nandyo jñiñi.

Ma kja mi tsʼixutrʼigø ñe i kju̱juegø in tatagøbʼe go penkebʼe kja dʼa convento nuja mi jitsʼijme nu religión fetichista tradicional. Ma o kjogꞹ kʼo paa ro pjɇzhigo dʼa Dudua ke xo je ga kjanu ga xiji kʼe kjimi Oduduwa kja kʼe jñiñi a yoruba. Ro ⱥtrʼpʼⱥ na tsʼi capilla nu ja mi pⱥspʼⱥ, nu acete de palma, kʼo caracol, kʼo ngøñi kʼo mbaro i ñe kʼo xe nrre nandyo añimale. Mi sʼodʼꞹgø na punkjꞹ i mechʼi ma mi kjaagokʼo.

JA GUA MBØXKꞸGO NU JÑAKJIMI: Ma ro pjꞹrꞹ ro xørꞹ nu Jñakjimi, ro pjechko ke bʼꞹbʼꞹtjo na Yose kʼꞹ na kjuana ke ngeje e Jehová, i angeze dya nee ke ra xørpꞹji yo tsʼita (Éxodo 20:​4, 5; 1 Corintios 10:14). Ma ro pa̱rgokʼo, ro trjꞹtrʼꞹ trjexe kʼo ídolo ñe kʼo fetiche. I dya kja ro magø kja kʼo rito tribales ni funerarios.

Me ma sʼɇzhi ro jɇzgø kʼo fetiche, nange ro xørpꞹgokʼo​—ixko kjogꞹ 60 kjɇɇ​—. Ma ro jɇzgø nu religión me go ꞹdʼꞹ k’o mi jogøbʹe, in bʼedyigø ñe kʼo in mintego, me mi ꞹngꞹji i mi trjengeji. Nu kʼo o mbøxkꞹ nge ke ro øtꞹgo e Yose Jehová ke ro dyakꞹ o zɇzhkjimi ngekʼua ro kjaago kʼo na joo. ¡Me go mbøxkꞹgo kʼo mama kja Proverbios 18:​ 10! Nujnu mama: “O trju̱u̱ e Jehová ngeje na torre k’ꞹ me na zɇzhi. Je panu k’e ntee k’ꞹ kjaa na joo ngekʼo ra mbøsʼꞹ angeze”.

Nu kʼo go mbøxkꞹ nge ma ya ro magø kja yo reunión de yo testigo de Jehová, nujnu ro nu ke bʼemi mi sʼiyateji. Akjanu me ro mⱥkjo ma ro nugo ke mi kjaji trexe kʼo mama nu Jñakjimi. Nudya ri pa̱rgo na joo ke yo testigo e Jehová pɇsʼiji nu religión kʼꞹ na kjuana.

JA GUA MBØXKꞸGOYO: Ma ri kjaago trʼexe kʼo mama nu Jñakjimi pjøxkꞹ ra mimi na joo ko yo in chʼigo. Nudya me ri søøgø na joo. Dya kja xi ri sʼodʼꞹ i merio nzakja mi jingua ma mi xørpꞹgo yo ídolo ke dya o mbøxkꞹ. Nudya ri pɇpigo e Mizhokjimi Jehová, nge angeze ke ra xotrʼꞹ trʼexe yo nrrumbꞹ (Revelación [Apocalipsis] 21:​3, 4). Dya kja ri kreogø yo fetiche, nudya ri sʼiyago e Yose Jehová ko trʼexe i mꞹbʼꞹ. Ri pa̱rgo ke angeze pjøkꞹgo, ngekʼua mi ti mⱥkjødya.

“Ma kja mi tsʼitrʼigo ro jodʼꞹ e Mizhokjimi” (SHINJI SATO)

NU KJɆɆ MA O MUSʼꞸJI: 1951

NU PAÍS: JAPÓN

TEXE KʼO NRRE MI KJAA: RO NGE MBOKJIMI SINTOÍSTA

KʼO RO KJAAGO MI JINGUA: Ro tego kja dʼa tsʼijñiñi kja kʼe prefectura a Fukuoka. Mi tata ñe mi nana me mi jodʼꞹbi Mizhokjimi, ngekʼua o jitsʼkʼobʼe ro xørpꞹgø yo tsʼita sintoísta, ndizima kja mi tsʼitrʼigo ro jonkʼø pje ro kjaago ngekʼua ro salbazꞹ, i nrree mi jonkʼø jargua pjøsʼꞹgø k’o ntee kʼo mi pɇsʼiji nrrumꞹ. Ri mbenkʼo ma in xøpꞹte go dyøngꞹzꞹjme pje mi nee ro pjɇzhigøjme ma argua nozꞹjme, kʼo in dyokjøjme go nrrꞹrꞹji ke mi neeji ro ngeji científico o pje nrrema oficio. Ma ro trjꞹrgo ke ro kjinchʼigo ke ro pɇpigo e Mizhokjimi texeji me go nrrengegoji.

Ma ro kjuarꞹgo nu secundaria ro kichʼigø kja dʼa ngunxørꞹ ngekʼua ro pjɇzhigo xøpꞹte kja yo religión. Ngenu jero pa̱rgo na mbøkjimi sintoísta, nukʼꞹ ma dya pje mi kjaa mi xørꞹ dʼa libro ke ma potrjꞹ. Ro janrragø pje mi chju̱u̱ k’e libro, ngekʼua ma go dyøngꞹ pje ma libro ma xørꞹ angeze, ro trjꞹrꞹgo: “Ne Biblia” ro xipji. Nukʼua go xitsʼi: “Texe kʼꞹ ra nee ra pjɇzhi mbøkjimi sintoísta ni jyodʼꞹ ra xørꞹ ne Jñakjimi”.

Dabadiji ro ma tomꞹgo dʼa Jñakjimi i ro pⱥsʼⱥgø nuja mi søø ro janrragø. Nange pje nrre mi kjaago ke dya mi søø ro xørgo. Go sⱥjⱥ nu paa ma ro pjɇzhi mbøkjimi i ro pɇpji kja dʼa santuario sintoísta. ¡Akjanu, nzakja ke arma kjaago kʼo mi neego!

Dya go mezhe ma ro unꞹ nguenda ke dya mi ngeje kʼo mi neego. Na punkjꞹ kʼo mbøkjimi dya xi mi kjapꞹ nguenda kʼo ntee. Xo ma punkjꞹ kʼo dya xi mi ejmeji Mizhokjimi. Nzakja kʼꞹ mi mandazꞹ, go xitsʼi dʼa nu paa: “Ma gi nee ri bʼꞹbʼꞹ na joo, jizhi yo filosofía. Dya ri ma jizhi ke bʼꞹbʼꞹ Mizhokjimi”.

Dya mi kjakꞹ ro søøgø na joo texeyo. Zø dya ro jɇzigo kʼe santuario, xo ro jodʼꞹ kʼo mi jizhiji kʼo nandyo religión. Ma mazi mi jodʼꞹ, ixi mi ꞹnkʼo nguenda ke nzakja kʼꞹ dya mi bʼꞹbʼꞹ naja religión ke rgui jizhi kʼo na kjuana.

JA GUA MBØXKꞸGO NU JÑAKJIMI: Kja kʼe kjɇɇ 1988, ro chjɇbʼe dʼa budista kʼꞹ go xitsʼi ke ma joo ke ro xørgo nu o Jñaa e Yosi. Xo ro mbeñego nu mbøkjimi sintoísta kʼꞹ xo bi xitsʼi akjanu mi jingua kʼꞹ ro xørꞹgo nu Biblia. Ngekʼua dʼabadiji ro pjꞹrꞹ ro xørꞹ. Kʼo ro pjechi me go mbøxkʼꞹ, mi pjꞹrꞹ mi xørgo ma a ma nzhⱥʼⱥ i mi kjuarꞹgo ma a ma jyasto.

Kʼo mi xørgo go mbøxkꞹ ro zopjꞹgo e Mizhokjimi kʼꞹ mi nⱥdʼⱥ nu Jñakjimi janzi ga mama kja Mateo 6:​9-​13. Mi zopjꞹgo Mizhokjimi nzi ma kjogꞹ yeje hora,​mi kjaagokʼo zø mi pɇpjigo kja kʼe santuario.

Ri mbenkʼo ke ma mazi mi xørgo o Jñaa e Yose, mi e̱je̱ kja in ñigo na punkjꞹ trʼønꞹ. Kʼo pakʼo argua chjꞹntko i a mi pa̱rgo ke yo testigo e Jehová mi jizhiji o Jñaa e Mizhokjimi, i mi jingua a mi pa xøpꞹji o Jñaa e Tsʼitajensʼe in sugo. Ngekʼua ro jonkʼo dʼa testigo e Jehová i ro kjapꞹ trʼexe kʼo trʼønꞹ kʼo mi kjinkjo. Kʼo mazi ro nugo na joo nge ke trexe kʼo trʼønꞹ go nrrꞹrꞹ ko nu Biblia. Nakʼua angeze go jyodʼꞹ ke dʼa testigo ro jitsʼi nu Jñakjimi trʼexe yo ngoʼo.

Dya go mezhe ma ro pjꞹrꞹ ro mago kja yo jmurkjimi kja nu Salón del Reino de yo Testigo e Jehová. Nujnu dya ro unkʼo nguenda ke mi bʼꞹbʼꞹ janzi Testigo ke mi jingua ro sadʼꞹgo ma mi nee ro jitsiji kʼo mama nu Jñakjimi, nukʼo, me go zenguazꞹji na joo, nukʼo go tsjaakꞹ ke me ro søøgø na joo.

Kja yo jmurkjimi ro pa̱rgo ke e Mizhokjimi nee ke yo xira ni jyodʼꞹ ke ra sʼiyaji nu suu ñe trʼexe o bʼedyi. Nge ma kja ro unkʼo nguenda ke dya mi pjøsʼꞹgø in nrrinxꞹgo ñe yo in chʼigo. Zø me mi kjapꞹgo nguenda trʼexe kʼo ntee ke mi poji kja kʼe santuario nuja mi mbøkjimigo, in sugo dya mi kjapꞹgo nguenda ni ri dʼa paa.

Ma mazi mi xørgo nu Jñakjimi, mazi ma søøgø ke ma jogøbʼe ko e Jehová. Na punkjꞹ versículo me go sⱥtrʼⱥ kja i mꞹbʼꞹgo nzakja kʼo mama kja Romanos 10:​13, “Texe yo ntee kʼꞹ ra nⱥmbʼⱥji o trju̱u̱ e Jehová ra mimitrjoji dya ra nrru̱ji”. Ndizi ma kja mi tsʼitrʼigo mi jodʼꞹgo e Mizhokjimi, nudya argua tøtrʼꞹgo.

Dya kja mi søøgø na joo ma mi pɇpkjo kja kʼe santuario. Nu kʼo mi su̱go, nge, pje ro manji ma ro jɇzgø kʼe religión sintoísta. Zø a rgua mangø ke ma ro tøtrʼꞹgo kʼe Yose kʼꞹ ma kjuana ro pɇpjigo angeze, ngekʼua ro kjapʼꞹ nguenda in concienciago, ngekʼua ro jɇzi kʼe santuario kja kʼe zana marzo kja nu kjɇɇ 1989 i ro pjꞹrꞹ ro kjaago ko trexe in mꞹbʼꞹ kʼo nee e Jehová.

Mi ma sʼɇzhi ro kjaago kʼo ma joo. Kʼo mi manda kja kʼe santuario, dya o nuji na joo ke ro jɇzgø kʼo mi kjaago, i mi neji ke xi ro pɇpjigonu. Nu kʼo mazi o tsjakʼꞹ nrra na sʼɇzhi, ngeje, jargua xipjigo mi tata ñe mi nana. Ma ro magø kja o ngumꞹ angezebi, dya ma joo ma søøgø, me ma mbigo i mi bonkʼo janzi nrrajme, i mi øtꞹgo e Mizhokjimi Jehová kʼe ro mbøxkꞹ.

Ma ro sⱥtrʼⱥgo kja o ngumꞹ in tatago, me mi su̱go ro xikø ke dya kja ro pɇpjigo kja kʼe santuario sintoísta. O kjogꞹ na punkjꞹ nrrajme ke ro øtꞹgo e Jehová ke ro mbøxkꞹ, akjanu ro søø ro xikø in tatago. Ro xipji ke ya rgua tøtrʼꞹgo e Mizhokjimi kʼꞹ na kjuana kja nandyo religión, nge nuja ra pɇpjigodya, akjanu ro jɇzigø nu sintoísmo. Angeze dya pje go søø go mama, nangeje me go togꞹ o mꞹbʼꞹ, xo o e̱ji kʼo nandyo i pjamiliago, go ne xitsiji ke dya ma joo kʼo ma kjaago. Zø dya mi neego ke ro ꞹdʼꞹji, nutsʼkø dya xo mi nee ro jɇzgø kʼo ma pjechigo ko e Mizhokjimi Jehová. Nudya in pjamiliago dya kja ꞹngꞹji.

Dya mi ngextjo ro jɇzgø kʼe santuario, xo ñe kʼo nrre mi kjaago ma mi mbøkjimigo, me mi mbenkʼo kʼo mi jobigo, ngekʼua me mi søøgø ke ma sʼɇzhi, i nuja mi nzhonkʼo me mi mbenkʼo nrrexekʼo, dya mi søø ro jyombeñegokʼo.

¿Pje go mbøxkꞹ ngekʼua ro jɇzgø texekʼo? Yeje cosa. Daja, ro jmutꞹ texe kʼo tsʼita zø me ma mizhikʼo, kʼo​libro, kʼo cuadro kʼo mi pɇsʼigo i ro trjꞹtrʼꞹ. Yeje, ro pjꞹrꞹ ro jodʼꞹgo kʼo ro jogøbʼe ko yo testigo de Jehová. Akjanu jmachʼa jmanchʼa, ro jɇzgø kʼo ma sʼoo kʼo mi kjaago ma mi mbøkjimigo sintoísta.

JA GUA MBØXKꞸGOYO: Mi jingua dya mi pjøsʼꞹgø in sugo ñe yo in chʼigo ngekʼua angezeji mi søøji ke mi bʼꞹntsjɇji. Ma ro kjaago kʼo mama nu Jñakjimi a ro bʼꞹbʼꞹjme na joma. Ma o kjogꞹ yo paa in sugo xo go tsjaa kʼo mi nee e Jehová. Nudya, —nuzgo ñe in sugo, in chʼigobʼe, in xuntrʼigobʼe ñe o xira— ri kjagojme kʼo nee e Mizhokjimi Jehová kʼꞹ na kjuana.

Ma ri mbenkʼo ma kja mi tsʼitrʼigo ke ro kjinchʼigo ro pɇpigo e Mizhokjimi i nrre mi jonkʼø jargua pjøsʼꞹgø kʼo ntee kʼo mi pɇsʼiji nrrumꞹ, nudya ri unkʼo nguenrra ke a ro kjaago​trexe kʼo nee angeze, nudya, dya ri pa̱rgo jarga xikʼo e Mizhokjimi Jehová ke mi ti mⱥkjø.

“In mꞹbʼꞹgo mi xitsʼi pje xi mi bʼɇtsʼi” (E LYNETTE HOUGHTING)

NU KJɆɆ MA O MUSʼꞸJI: 1958

NU PAÍS: SUDÁFRICA

TEXE KʼO NRRE MI KJAA: MI SØØGØ KE DYA KJO MI KJAKʼꞸ NGUENRRA

KʼO RO KJAAGO MI JINGUA: O muxkʼꞹgoji kja kʼe tsʼijñiñi nu ja mi bʼꞹbʼꞹ kʼo mina ke mi chju̱u̱ Germiston, dya mi bʼꞹbʼꞹ na punkjꞹ ntee kʼo ma sʼonte. Mi tata ñe mi nana mi kjijñibi ke dya ro søø ro mbøkꞹbi ngekʼua ma kja mi ɇnkʼo yeje ngoʼo o dyakjøji en adopción. Akjanu ro tego i mi kjinkjo ke bʼemi mi ngebi in tatagobi kʼo bi chezhizꞹbi. Ma ro pa̱rgo ke dya mi nge in jyotrʼegobi, ro søøgø ke dya kjo mi neze. I ro søøgø ke dya kjo mi søø ro mbøxkʼꞹ. Me ro søøgø ke dya kjo mi pɇsʼi nguenda ke ro bʼꞹnkʼo, ke dya kjo mi søø ro mbøxkʼꞹ.

Ma mi ɇgø 16 kjɇɇ ro pjꞹrꞹ ro magø kja cantina ko kʼo mi jogøbʼe ngekʼua mi nemejme i mi ⱥrgojme bʼizhi. I ma ro ɇdyigo  17 kjɇɇ ro pjꞹrꞹ ro sʼꞹtrʼꞹ trju̱sʼꞹ. Mi nee ro ngezgo nzakja kʼo modelo ke mi kuatrʼꞹji kja kʼo anuncio kja kʼo trju̱sʼꞹji. Ma ro søtꞹ 19 kjɇɇ, ro ma pɇpkjo a Johannesburgo i je ro miminu. Akjanu ma ro unkʼo nguenrra a mi bʼꞹnkʼo ko kʼo ma sʼonte, me mi sʼoneji, mi sʼꞹtrʼꞹjme trju̱sʼꞹ i mi ti̱gojme trʼexe yo xabaro ñe yo nrromingo.

Mi kjaago na punkjꞹ ejercicio. Nu gimnasia aeróbica, nu squash i fútbol. Xo ro pɇpkjo na punkjꞹ kja kʼo ro xampago kja in carrera informática i go dyakøji dʼa reconocimiento, ngekʼua akjanu kʼo ntee go meyaji ke mi pɇpkjo na joo, i mi trjo̱kjo na punkjꞹ merio ngekʼua yo ntee mi xitsʼkøji ke mi ngetsʼkø dʼa triunfadora. Pe dya ma kjuanakʼo. A mboo kja in mꞹnkʼo dya mi mⱥkjø,​mi pa̱rgo ke pje xi mi bʼɇtsʼi.

JA GUA MBØXKꞸGO NU JÑAKJIMI: Ma o jitskøji nu Jñakjimi, ro pjechko ke e Yose Jehová me sʼiyazꞹji o dyakøji nu Jñakjimi. Nujnu nge nzakja na carta nuja go dyopjꞹ pje ro kjaagoji i jargua minkʼoji na joo (Isaías 48:​17, 18). Ro meya ke ma mi nee ro kjaago kʼo mi nee e Tsʼitajensʼe, mi jyodʼꞹ ro potꞹgo ja rma minkʼo i ro jɇzgø kʼo ma sʼoo kʼo mi kjaago.

Kʼꞹ otrʼꞹ ro kjaago ro potꞹ kʼo in jobigo. Ja ga mama kja Proverbios 13:​20, “ma ri dyokje ko nu kʼo me pa̱ra̱ na punkjꞹ xo akjatrjozge me ri pa̱ra̱ na punkjꞹ, pe nu kʼꞹ ra dyojui ko yo dya trjꞹmbeñe ra tsjaa kʼo na sʼoo”. Ro kjapꞹ nguenda yo jñaayo i pje nrre mi kjinkjø i ro jɇzgø kʼo ma sʼonte i ro pjꞹrꞹ ro jodʼꞹgo kʼo ro jogøbʼe ko yo testigo e Jehová.

Kʼo mazi ma sʼɇzhi bo nge ke ro jɇzgø ro sꞹtrʼꞹ trju̱sʼꞹ. Pje nrre kʼo ro kjaago ngekʼua ro jɇzgø kʼo, i nukʼo, o tsjaakʼꞹ ro pigo 14 kilo (30 libras). Me ro søøgøkʼo, nangeje dya mi nee ro pigø, nakʼua ixkʼo kjogꞹ 10 kjɇɇ ke ro bʼɇzhi kʼo kilo. Zø je ma kjanu, ro pa̱rgo ke mi jyodʼꞹ ro kjaagokʼo, me mi øtꞹgø e Jehová ke ro mbøxkꞹ i angeze o mbøxkꞹ ngek’ua ro søø ro kjaagok’o.

JA GUA MBØXKꞸGØYO: Kʼo o mbøxkꞹgo, nge k’ꞹ dyakja nrra ri sødyegø. Nudya,​dya kja ri tebʼegø ke nu bʼɇpji, nu posición social o nu merio ra tsjaakʼꞹ ra søøgø na joo. Nudya ke a ri bʼꞹbʼꞹgo ko i xira me ri to̱jiago ma ri pa xøpꞹjme o Jñaa e Mizhokjimi yo trʹee, a ro pjøskʼo jñii kʼo mi dyokjojme kja bʼɇpji o mba̱ra̱ji kjo ngeje e Diosi ke na mejme. Ma dya bʼe mi tu̱u̱ kʼo i tatago, ro jichi ke ma d’a ntee ra nrru̱u̱ e Tsʼitajensʼe ra yepe ra xosꞹ i ra mimi kja ne Xoñijomꞹ ma me rga zøøtrjo.

Nudya ke a ri jogøbʹe ko e Jehová, dyakja nrra ri søgø ke dya kjo kjakꞹ nguenda. Texe yo testigo e Jehová nge in bʼedyigøyo, akjanu ri pesʹigø na punkjꞹ nana, tata ñe kjuarma​(Marcos 10:​29, 30).

[Imagen]

Ko yo testigo e Jehová ro nuu ke bʼemi mi sʼiyateji

[Imagen]

Nu ja mi matrʼkʼo yo tsʼita sintoísta