Dya kjo pa̱ra̱ na punkjꞹ nzakja e Jehová. E Jehová me sʼiyazgoji, dya jɇzgiji pjøxkʼꞹgoji. Ma go tsjaa kʼꞹ ro nga̱ra̱ ntee kja ne Xoñijomꞹ, dya go ngama ro tsjatsjɇji jakʼo ma neji (Jeremías 10:23). Yo tsʼitrʼi ñe yo tsʼixutrʼi dya pa̱ra̱ji na punkjꞹ, o tata ga mbøsʼꞹji ñe jichiji pje ra tsjaji. Nzakja yo tsʼitrʼi, nutsʼkoji dya ri pa̱rgoji na punkjꞹ ngekʼua e Mizhokjimi pjøxkʼꞹgoji akjanu ra pjechiji pje ra kjaji (Isaías 48:17, 18). Kja ne Biblia e Jehová xitsiji jñaa kʼo me pjøxkʼꞹji. Xorꞹge kja 2 Timoteo 3:16.

E Jehová xitsʼkoji ke ma ra kjaji kʼo mama kja nu Jñaa ra mimiji na joo nudya ñe ga ma axojñi e Jehová ra dyakoji kʼo me na joo. Angeze o dyakoji ra bʼꞹnjiba kja ne Xoñijomꞹ ngekʼua me joo ga soʼo kja o mꞹbʼꞹ ma ga jñanrra ri mimiji jaga nee angeze. Xorꞹge kja Salmo 19:7, 11; Apocalipsis 4:11.

¿E Jehová xitsʼi kja ne Biblia nrrexe kʼo ri tsjage? Iyo. Pe ma dya ri pa̱rge pje ri tsjaa, ri zopjꞹ ri zopjꞹ ne Biblia ga kjanu e Jehová ra mbøxkʼꞹ ri pa̱rge pje ni mbe kʼo na joo ke ri tsjaa ñe pje ni mbe kʼo dya ga joo kʼo dya ri tsjaa (Deuteronomio 22:8). Pama pama ri xorꞹ ne Biblia ga kjanu ri unꞹ nguenrra jaga kjaa kʼo nee Mizhokjimi (Proverbios 2:10-12). Ne Biblia mama ke e Jehová me sʼiyazgoji, go dyakꞹgoji kʼo me na zøø, o tsjaa ke ra bʼꞹbʼꞹgoji. Ma ra xorꞹjikʼo kja ne Biblia, ri unꞹji nguenrra kʼꞹ na joo ra pjonguenrraji kʼo ri kjaji ngekʼua dya pje ra kjogꞹzꞹji ja ri pepjiji, kja in nzunji ñe ja ri nzhodʼꞹji. Xorꞹge kja Hechos 17:28.

E Jesús go mama pje ra kjaji, o mama ke na joo ra pa̱rgoji jaga kjaa e Mizhokjimi ngekʼua ra sʼiyaji ñe ra kjaji kʼo mama angeze.  Dya ri jyombeñe kʼo mama e Jehová ma pje kʼo ri tsjage (Proverbios 3:6). Nukʼꞹ ra tsjaa kʼo mama e Mizhokjimi me ta mⱥjⱥ ñe ra mimi texe yo paa kja ne Xoñijomꞹ ma me rga zøø. Xorꞹge kja Mateo 22:36-38.

E Jesús go mama ra sʼiyaji yo ntee, ma ra kjajikʼo ra ka̱rgoji na joo ko yo ntee, dya ra chu̱ji (1 Corintios 13:4-7). Ra kjaji kʼo go mama e Jesús, ra sʼiyaji yo ntee kʼua janzi ga sʼiyazgoji e Jehová. Xorꞹge kja Mateo 7:12; 22:39, 40.

Kja ne Biblia e Jehová mama ke yo bʼɇzo ra sʼiyaji o suu, yo nrrinxu ra sʼiyaji o xira, ra sʼiyaji o trʼiji akjanu ra mimiji na joo (Colosenses 3:12-14). Kʼo ya chjꞹntꞹ dya ra jiambꞹbi ra mimibi nrrenxe yo paa. Xorꞹge kja Génesis 2:24.

Kja ne Biblia e Jehová xitsiji ra pepjiji, dya ra ponꞹji, ma ri tsjagekʼo yo ntee dya ra netsʼeji ñe dya ra nee ra dyakʼꞹji bʼepji. Ma pje kjogꞹtsʼꞹ dya gi soge na joo, ne Biblia xitsʼige jñaa kʼꞹ ra mbøxkʼꞹ (Proverbios 10:4, 26; Hebreos 13:18). Ne Biblia mama ke ma gi pɇsʼi pje ri sige ñe gi bʼꞹbʼꞹge na joo, dya ri tsjijñi jargi tsjaa ngekʼua ri pɇsʼige na punkjꞹ merio. Xorꞹge kja Mateo 6:24, 25, 33; 1 Timoteo 6:8-10, TNM.

E Jehová xitsigoji kja ne Biblia ke dya ga joo ke ra ti̱ji (Proverbios 14:30; 22:24, 25). Ga kjanu ri bʼꞹbʼꞹge na joo, dya kjo ri sadʼꞹge, dya kjo ri jyombʼꞹge chu̱ʼu̱, dya ri sodye nzakja kʼo ntee kʼo ti̱ji, dya xo ra kjogꞹtsʼꞹ kʼo na sʼoo (Proverbios 23:20). E Jehová mama ke ma gi nee ri sige pare soo ri sige, pe dya ri ti̱ge (Salmo 104:15; 1 Corintios 6:10). Ma ra xorꞹji kʼo mama e Mizhokjimi kja ne Biblia ra kjijñiji kʼo na joo ñe ra kjaji kʼo na joo (Salmo 119:97-100). Kʼe relijion kʼꞹ na kjuana pa̱ra̱ ke ma ra kjaji kʼo mama e Mizhokjimi ra minji na joo. Angezeji me sʼiyaji e Jehová xo neji ra soʼo na joo o mꞹbʼꞹ. Xorꞹge kja Mateo 5:14-16.