Nathan—Jal Manomakore Motegno gi Lamo Maler

Ok yot nyiso ng’at ma nigi loch ni yorene richo kendo ni dwarore otim lokruok. Be inyalo chomo ng’at ma kamano kapo ni ing’eyo ni osenego ng’at moro mondo oumgo richone?

Ruoth Daudi mar Israel machon ne oterore gi Bathsheba, mi Bathsheba nomako ich. Mondo opand richogi, Daudi nomiyo oneg chwore, kae to okawo Bathsheba obedo chiege. Dweche nokadho ka Daudi odak e ngima mar wuondruok, kendo onge kiawa ni podi nodhi mana nyime chopo migepene kaka ruoth. Kata kamano, Jehova ne ok oweyo mondo richo mag ruodhno okal akala kamano. Ne ooro janabine ma Nathan mondo odhi ochom Daudi gi wachno.

Mano ne en tich matek ahinya. Temie paro ni in e chal mar Nathan. Kuom adier, makruok motegno gi Jehova koda chikene makare, ema nomiyo Nathan odhi ir Daudi mondo oparne wach richone. Ere kaka janabino ne dhi chopo migawono mi okony Ruoth Daudi fwenyo ni ne dwarore olok chunye?

JAPUONJ MATIYO GI RIEKO

Donge inyalo kawo dakika manok mondo isom 2 Samuel 12:1-25? Ketri ane e chal mar Nathan sama ne onyiso Daudi sigana maluwoni: “Ne nitie ji ariyo e dala; achiel japith, machielo jachan. Japith ne nigi jamini gi dhok mogundho: to jachan neonge gimoro, to mana nyarombo achiel kende, ma nong’iewo kendo nopidhogo: nodongo kaachiel kode, kendo kod nyithinde, nochamo mana chiemb ng’atno owuon, mometho e kikombene, kendo nonindo e kore, mochalone ka nyare. Eka  jawuoth moro nobiro wendo kuom japith cha, to ok noyie kawo moro kuom rombege ni mondo olosi ni jawuoth mobirone, to nokawo mana nyarombo mar jachan chande, molosogo ni jalo mobiro kuome.”—2 Sam. 12:1-4.

Nenore ni Daudi—jal ma nosebedo jakwath en owuon—nokawo siganano kaka gima ne otimore adier. Jasomo moro wacho kama: “Nyalo bedo ni Nathan ne hinyo dhi ir Daudi e lo jochan ma ne ok nyal yudo kony kumachielo, kendo Daudi ne paro ni kamoro weche mapile kaka mago ema nokelo Nathan ire gie kindeno.” Kata bed ni ne en kamano, mondo Nathan owuo gi ruoth kaka notimo, chir koda makruok gi Nyasaye ne dwarore. Sigana mar Nathan nomiyo mirima omako Daudi ahinya. Nowacho kama: “Kaka Jehova entie, ng’ato motimo kamano, otimo gi mowinjore gi tho.” Kae to eka Nathan ne oelone jalo niya: ‘In e ng’atno!’—2 Sam. 12:5-7.

Non ane gimomiyo Nathan noyiero loso wachno kotiyo gi yorno. Ok yot ne ng’at ma chunye osetwere gi mar ng’amachielo mondo one gik moko e yo makare. Kapo ni watimo gik mamiyo ji bedo gi kiawa, waduto wahinyo temo tiyo gi weche mwanyisogo ni gik mwatimogo nikare. Kata kamano, ranyisi ma Nathan notiyogo nomiyo Daudi okwedo timbene owuon ka ok ong’eyo. Ruoth noneno maler ni tim ma Nathan nonyiseno ne rach ahinya. Kata kamano, mana bang’ ka Daudi nosekwedo tim marach manie ranyisino, eka Nathan noelo ni mano e gima ruoth owuon nosetimo. Daudi koro ne nyalo neno pek mar richone. Mano nomiyo koro obedo gi paro makare ma ne nyalo miyo owinj kirieye. Ne oyie ayanga ni kuom adier notimo ne Jehova tim ‘achaya’ kuom nindo gi Bathsheba, kendo norwako siem ma ne omiye kirieyego.—2 Sam. 12:9-14; Zab. 51, weche manie chak sulano, New World Translation.

Ang’o mwanyalo puonjore kuom wachni? Dwaro maduong’ mar ng’at mapuonjo Muma en konyo jowinjone chopo e paro makare. Nathan ne omiyo Daudi luor, omiyo nodhi ire e yor rieko. Nathan nong’eyo ni chuny Daudi nohero timbe koda buche makare. Kokalo kuom ranyisi ma nochiwo, janabino notemo chiewo kido mag Nyasaye ma ne nie chuny Daudi. Wabende wanyalo konyo joma chunygi tir winjo tiend paro ma Jehova chiwo. E yo mane? Kuom konyogi chopo e paro makare, kwatimo kamano maok wanyisre kata ting’ore malo ka gima wan to walong’o chuth e wang’ Nyasaye. Muma ema onego watigo e nyiso gino makare kod maok kare, to ok pachwa wawegi.

Moloyo duto, makruok gi Nyasaye nokonyo Nathan kwero kendo chiwo siem ne ruoth ma ne nigi loch. (2 Sam. 12:1) Makruok gi Nyasaye e yo makamano biro miyowa chir mar chung’ motegno e siro puonj makare mag Jehova.

JAKEDO NE LAMO MALER

Nenore ni Nathan kod Daudi ne nigi osiep machiegni e kindgi, nimar Daudi nomiyo achiel kuom yawuote nying’ mar Nathan. (1 Weche 3:1, 5) Kama wakwongo winjoe wach Nathan ei Muma, iwuoyo kuome ka gin kaachiel gi Daudi. Giduto ne gihero Jehova. Nenore ni ruoth nogeno paro ma Nathan ne hinyo ng’ado, nimar ne oelo ne janabino gombo mare mar gero hekalu ne Jehova. Daudi nowacho kama: “Ne koro, an adak mana e ot mar yiend mierezi, to ark mar Nyasaye obet kogeng’e mana gi neng aluwa. Kendo Nathan nowacho ni ruoth, Dhi, itim duto ma nie chunyi; niwira Jehova ni kodi.”—2 Sam. 7:2, 3.

Kaka jal ma ne lamo Jehova kochung’ motegno, Nathan noriwo Daudi lwedo mapiyo kuom chenrone mar gero ot mosiko mar lamo maler. Kata kamano, nenore ni gie kindeno to Nathan nochiwo mana pache owuon kar wuoyo e nying’ Jehova. E otienono, Nyasaye nochiko janabine mondo oter ne Daudi ote mopogore niya: Daudi ok ema ne dhi gero hekalu mar Jehova. Ng’at ma ne dhi tiyo tijno ne dhi bedo achiel kuom yawuot Daudi. Kata kamano, Nathan nolando ni, Nyasaye koro ne timo singruok gi Daudi, manyiso ni kom-duong’ mare “nobedi ma nyaka chieng’.”—2 Sam. 7:4-16.

Dwaro mar Nyasaye ne opogore gi paro mar Nathan korka wach gero hekalu. Kata kamano, maok ong’ur, janabi ma ne oboloreno noriwo dwach Jehova lwedo motimo kaka nochike. Mano kaka oketonwa ranyisi maber ahinya kapo ni Nyasaye orieyowa kuom wach moro! Gik ma Nathan nobiro  motimo bang’e kaka janabi, nonyiso ni nosiko kober e wang’ Nyasaye. Kuom adier, nenore ni Jehova nokudho ne Nathan muche, kaachiel gi Gad jakor, mondo gichik Daudi ochan jower 4,000 ne tij hekalu.—1 Weche 23:1-5; 2 Weche 29:25.

JAKEDO NE CHENRO MAR KOM-RUOTH

Nathan nong’eyo ni Suleman ema ne dhi kawo ruoth bang’ Daudi ma koro noseti. Omiyo Nathan nokawo okang’ ma ne dwarore kane Adonija otemo kawo kom-ruoth gi thuon, e higini ma teko Daudi ne koro dhi karumo. Gie kindeni bende, Nathan notimo gima nyiso rieko koda makruok mare gi chenro mag Nyasaye. Mokwongo, nonyiso Bathsheba mondo odhi opar ne Daudi wach kuong’ruok ma notimo, ni mondo wuodgi ma Suleman ema obi obed ruoth. Kae to bang’e Nathan owuon ne odhi ir ruoth mondo openj Daudi kabe en ema ne oyie ne Adonija mondo okaw kom-ruoth. Bang’ fwenyo pek mar wachno, ruoth nochiko Nathan koda jotich mamoko ma nomakore kodgi, mondo giwir Suleman kendo kete ruoth. Tim Adonija mar kawo ruoth gi thuonno, ne ogik gikanyo.—1 Ruo. 1:5-53.

JANDIKO MANYISO BOLRUOK

Wachre ni Nathan kod Gad ema nondiko 1 Samuel sula 25 nyaka 31 kaachiel gi 2 Samuel. E weche mondik e bugego, iwachonwa kama: “Kendo timbe mag ruoth Daudi, mokwongo gi machien, neuru, ondikgi e kitap weche mag ndalo mar Samuel janen, kendo e kitap weche mag ndalo mar Nathan janabi, kendo e kitap weche mag ndalo mar Gad janen.” (1 Weche 29:29) Iwacho bende ni nitie weche ma Nathan nondiko e wi ‘timbe mag Suleman.’ (2 Weche 9:29) Mano nyiso maler ni Nathan ne odhi nyime gi tich mar od ruoth kata mana bang’ tho Daudi.

Nenore ni Nathan wuon ema nondiko thoth weche mwang’eyo e wiye. Kata kamano, bedo ni ok onyisowa weche moko konyowa ng’eyo kido ma ne en-go. Nenore ni Nathan ne en jandiko ma nigi kido mar bolruok. Ne oonge gi chuny mar manyo huma kata dwaro loso nyinge owuon. Kaluwore gi buk moro malero weche me Muma, inyalo wach ni iwuoyo kuome ei ndiko mokudh gi much Nyasaye, to ‘ok hulnwa nonde.’ Ok wang’eyo wach moro e wi anyuolane kata kit ngima ma nodakie.

MAKRUOK GI JEHOVA EMA NE DUONG’ E NGIMANE

Kuom weche manok ma Ndiko nyisowa e wi Nathan, onge kiawa ni kata obedo ni ne en ng’ama nyiso bolruok, ne okedo ahinya ne chenro mag Nyasaye. Jehova Nyasaye nomiye migepe mapek. Par matut kuom kido ma Nathan nonyiso, kaka makruok gi Nyasaye koda hera ma noherogo dwaro mag Nyasaye. Tem luwo kido ma kamago.

Nyalo bedo ni in ok bi ori mondo isiem kendo kwero ruodhi ma joterruok kata geng’o joma dwaro kawo kom-ruoth gi thuon. Kata kamano, kokalo kuom kony ma Nyasaye chiwo, makruok gi Nyasaye koda chikene makare en gima nyaloreni. In bende inyalo bedo jachir, ka gie kindeno bende inyiso rieko, ibedo japuonj mar adiera, kendo bedo jakedo ne lamo maler.

[Picha manie ite mar 25]

Kaka jal ma ne riwo lwedo chenro mar kom-ruoth, Nathan notiyo gi rieko kuom wuoyo gi Bathsheba