SULA MAR 30

Wedeni kod Osiepeni Mosetho Nyalo Bedo Mangima Kendo!

TUGE

Tho keloga lit kod kuyo mang’eny. Mano e momiyo Muma luongo tho ni jasigu. (1 Jo-Korintho 15:26) E sula mar 27, ne wapuonjore ni Jehova biro loyo jasiguno. Kata kamano, en ang’o ma biro timore ne joma nosetho? E sulani, wabiro puonjore e wi gimoro machielo ma Jehova osesingo, ma en chiero ji bilionde mosetho mondo gidag gi mor nyaka chieng’. Gibiro bedo mangima kendo! Be gima kamano nyalo timore adier? Be ibiro chiergi mondo gidag e polo koso e piny ka?

1. En ang’o ma Jehova biro timo ne wedewa kod osiepewa mosetho?

Jehova gombo chiero joma osetho. Jatich Nyasaye miluongo ni Ayub ne ni gadier ni Nyasaye ne dhi chiere ka otho. Nonyiso Nyasaye kama: “Ibiro luonga, to anadwoki [ka an e Liel].”—Som Ayub 14:13-15.

2. Wang’eyo nade ni ibiro chier jomotho?

Ka ne Yesu nie piny ka, Nyasaye nomiye teko mar chiero ji. Yesu nochiero nyako moro ma jahigni 12 kod wuod chi liel moro. (Mariko 5:41, 42; Luka 7:12-15) Bang’e, osiep Yesu miluongo ni Lazaro ne otho. Yesu nochiero Lazaro kata obedo ni ne osetho motieko ndalo ang’wen e liel. Bang’ lemo, Yesu nokok gi dwol maduong’ niya: “Lazaro, wuog oko!” Kendo “ng’at ma noyudo osethono nowuok oko” ka ngima! (Johana 11:43, 44) Par ane kaka osiepe Lazaro kod joodgi ne mor!

3. Be nitie geno moro amora ne wedewa kod osiepewa mosetho?

Muma singonwa kama: “Chier nobedie.” (Tich Joote 24:15) Joma Yesu ne ochiero ne ok odhi e polo. (Johana 3:13) Nochierogi e piny ka kendo ne gimor ahinya. Machiegnini, Yesu biro chiero ji bilionde mang’eny ma osetho mondo gidag e piny ka nyaka chieng’. Nowacho ni ibiro chier “ji duto manie liete,” to mano oriwo nyaka joma nie pach Nyasaye, ma samoro wan to wiwa osewilgo.—Johana 5:28, 29.

TIM NONRO

Non ane adiera manie Muma ma miyo wabedo gadier ni Yesu nigi nyalo mar chiero jomotho kendo ni obiro timo kamano. Ne ane kaka chier nyalo hoyi kendo miyi geno.

4. Yesu nonyiso ni en gi nyalo mar chiero jomotho

Puonjri weche momedore e wi kaka Yesu nochiero osiepne ma Lazaro. Som Johana 11:14, 38-44, kae to uwuo e wi penjo ma luwogi:

Wang’eyo nade ni Lazaro ne otho adier?—Ne kwan matindo 39.
Ka dine Lazaro odhi e polo, be iparo ni Yesu dine ochiere e piny ka?

Tug VIDIO.

VIDIO: Yesu Chiero Lazaro (1:16)

5. Ibiro chier ji mang’eny!

Som Zaburi 37:29, kae to uwuo e wi penjo ma luwoni:

Ji bilionde ma ibiro chier biro dak kanye?

Yesu biro chiero jotich Jehova kod jomamoko mang’eny. Som Tich Joote 24:15, kae to uwuo e wi penjo ma luwoni:

En ng’ano ma diher neno ka ochier?

Par ane wachni: Mana kaka yot ne wuon nyathi chiewo nyathine ma nindo e kaka yot ne Yesu bende chiero joma osetho

6. Chier nyalo hoyi kendo miyi geno

Chier mar nyar Jairo miwuoyo kuome e Muma osehoyo kendo jiwo ji mang’eny ma wedegi kata osiepegi osetho. Som siganano e Luka 8:40-42, 49-56.

Ka pok Yesu ochiero nyar Jairo, nonyiso Jairo kama: “Kik iluor, nyis mana ni in gi yie.” (Ne kwan matindo 50.) Ere kaka geno mar chier nyalo konyi . . .

sama watni kata osiepni otho?
sama tho ochomi?

Tug VIDIO, kae to uwuo e wi penjo ma luwoni:

VIDIO: Ere Kaka Geno mar Chier Miyo Wabedo gi Chir? (3:21)

Ere kaka geno mar chier nohoyo kendo jiwo jonyuol Phelicity?

PARO MA JOMOKO NIGO: “Tek ahinya yie ni ibiro chier ji mondo gidag e piny kae kendo.”

In to ineno nade?
En ndiko mane minyalo tiyogo mondo ikony ng’ato ng’eyo ni ibiro chier ji?

PUONJ MADUONG’

Muma singonwa ni ibiro chier ji bilionde mang’eny mosetho. Jehova dwaro ni gibed mangima, kendo osemiyo Yesu teko mar chierogi.

Ang’o ma ipuonjori?

Jehova gi Yesu neno nade wach chiero joma osetho?
Ji bilionde ma ibiro chier biro dak e piny koso e polo? Ang’o momiyo iwacho kamano?
Ang’o momiyo in gadier ni ibiro chier wedeni kod osiepeni mosetho?

Tarik ma atieke sulani:

Gima inyalo timo

Ka po ni ing’eyo ng’at moro ma watne kata osiepne osetho, inyalo nyise geno mar chier mondo ihoye.

Gik mamoko ma inyalo timo:

Gimachielo ma inyalo timo