Yezu udi ujikija kulongesha bapostolo banayi pa mukuna wa Olive, wandamuna lukonko luabu bua dikalaku diende mu matuku atshilualua ne bua nshikidilu wa ndongoluelu wa malu eu.

Yezu uvua muenze malu a bungi mu dia 11 ngondo wa Nisana! Bivua pamuapa pavuabu bapingana ku Betania butuku pavua Yezu muambile bapostolo bende ne: “Nudi bamanye ne: mu matuku abidi emu Pasaka neenzeke, nebafile Muana wa muntu bua kumushipelabu ku mutshi.”​—Matayi 26:2.

Bidi bimueneka ne: Yezu uvua mupitshishe dituku diakalonda mmumue ne: Disatu mu ditalala ne bapostolo bende. Mu Dibidi uvua mutandishe bamfumu ba bitendelelu ne mubele patoke. Bavua bakeba bua kumushipa. Kadi kavua mudileje patoke mu dituku dia 12 ngondo wa Nisana bua tshintu nansha tshimue katshimupangishi bua kusekelela Pasaka ne bapostolo bende panyima pa dibuela dia dîba dilolo divua dilonda, mu muladilu wa dituku dia 14 ngondo wa Nisana to.

Kadi bamfumu ba bakuidi ne balombodi ba bantu ki mbashale bapuwe kumpala kua Pasaka kuenzeka to. Bakadisangisha mu lupangu lua muakuidi munene Kayifa. Bua tshinyi? Bavua bafiike munda bualu Yezu uvua muele malu abu patoke. Mpindieu bakela tshifufu “bua kukuata Yezu ne budimu ne kumushipa.” Ndîba kayi ne ndituku kayi dienzabu bualu ebu? Badi bamba ne: “Mu tshibilu to, bua tshimvundu katshilu kujuka mu bantu.” (Matayi 26:4, 5) Bavua batshina bualu bantu ba bungi bavua banange Yezu.

Tshikondo atshi, muntu kampanda udi ulua kumona bamfumu ba bitendelelu. Tshidi tshibakemesha ntshia ne: uvua Yudasa Isakaliote, umue wa ku bapostolo ba Yezu. Satana uvua mumukune lungenyi lua kutungila Mfumuende! Yudasa wakabebeja ne: “Nenumpeshe tshinyi meme mumufile kunudi?” (Matayi 26:15) Bu muvua bualu ebu bubasankishe bikole, ‘bakumvuangana bua kumupesha makuta a arjan.’ (Luka 22:5) Avua bungi kayi? Bakitaba  ne disanka dionso bua kumupesha bitupa bia arjan 30. Bungi ebu buvua pamuapa bupetangana ne nshekele 30, difutu divuabu bapesha mupika. (Ekesode 21:32) Nunku bamfumu ba bitendelelu bakapetula Yezu, baleja muvuaye ne mushinga mukese. Ke Yudasa “kutuadijaye kukeba mpunga muimpe wa kumufila kudibu musumba wa bantu kawuyipu.”​—Luka 22:6.

Dituku dia 13 dia ngondo wa Nisana diakatuadija mu Disatu panyima pa dibuela dia dîba, ne edi divua dituku disambombo ne butuku bua ndekelu buvua Yezu mupitshishe mu Betania. Dituku diakalonda, bavua ne bua kujikija dilongolola malu a ndekelu bua Pasaka. Bavua ne bua kukeba muana wa mukoko bua kumushipa ne kumosha mujima panyima pa dituku dia 14 ngondo wa Nisana dimane kutuadija. Nkuepi kuvuabu mua kudiila biakudia ebi ne nnganyi uvua mua kubilongolola? Yezu ki mmuakule bua bualu ebu to. Nunku, Yudasa kavua ne mushindu wa kubafila kudi bamfumu ba bakuidi to.

Pamuapa mu Dinayi mu mapingaja, Yezu udi utuma Petelo ne Yone kumbukila ku Betania wamba ne: “Ndayi, nulongolole Pasaka bua tuetu kudia.” Bakandamuna ne: “Udi musue tumulongoluele penyi?” Yezu udi umvuija ne: “Panudi nubuela mu tshimenga, nenusambakene ne muntu mukuabu muambule mulondo wa mâyi. Numulonde mu nzubu udiye ubuela. Nuambile muena nzubu au ne: ‘Mulongeshi udi ukuambila ne: “Nzubu wa benyi undi mua kudiila Pasaka ne bayidi banyi udi penyi?”’ Nanku muntu au neanuleje nzubu munene wa kuulu, muikale ne bintu bionso. Numulongoluele muaba au.”​—Luka 22:8-12.

Kakuyi mpata muena nzubu eu uvua muyidi wa Yezu. Uvua pamuapa mudianjile kumanya dilomba dia Yezu bua kufila nzubu wende bua tshibilu etshi. Pakafika bapostolo babidi ku Yelushalema, bakasangana malu onso anu muvua Yezu mubambile. Nunku bakenza bua muana wa mukoko ikale pabuipi ne bua malu makuabu avua atangila biakudia bia Pasaka bikale bilongolola bua kudiisha bantu 13, mmumue ne: Yezu ne bapostolo bende 12.