Yezu ne bayidi bende badi mpindieu baya ku nord batangile ku Galela. Tukadi mu muvu wa luya, ne ntete ikadi mipie ku bikolakola. Bu muvua bayidi ne nzala, bakatula miepu ya ntete, kutuadijabu kudia. Kadi dituku adi divua dia Nsabatu, ne bafalese bavua bamone tshivuabu benza atshi.

Vuluka ne: bamue bena Yuda ba mu Yelushalema batshivua bafuma ku dikeba bua kushipa Yezu, bamubanda ne: mmushipe mukenji wa Nsabatu. Bua musangu eu Bafalese badi bamubanda bua malu avua bayidi bende benza. Bakamuambila ne: “Tangila! Bayidi bebe badi benza bualu budi mikenji mikandike dituku dia Nsabatu.”​—Matayi 12:2.

Bafalese bavua bamba muvua kutula ntete, kuyivinga mu bianza bua kudia kuikale dinowa ne dipepula ntete. (Ekesode 34:21) Diumvuija diabu dikole dia tshivua kuenza mudimu kumvuija divua divuija Nsabatu mukole be, padi dituku adi divua dilongolola bua dikale dia disanka ne dia kukoleshibua mu nyuma. Yezu wakabenga mmuenenu wabu mubi au, kubapeshaye bilejilu bua kubaleja ne: Yehowa Nzambi kavua muele mukenji wa Nsabatu bua kuwutumikila mu mushindu au to.

Tshilejilu tshimue tshivua Yezu mufile ntshia Davidi ne bantu bende. Pavuabu ne nzala, bakaya ku ntenta wa tshitendelelu, kudiabu mampa a tshilejilu. Mampa au, akavuabu bumbushe kumpala kua Yehowa ne bapingaje a mapiamapia pa muaba wawu, avua malamina anu bakuidi, bobu ke bavua ne bua kuadia. Kadi bua nsombelu uvuaku, kabavua bapishe Davidi ne bantu bende bua muvuabu baadie to.​—Lewitiki 24:5-9; 1 Samuele 21:1-6.

Yezu wakafila tshilejilu tshibidi, wamba ne: “Kanuena babale mu Mikenji ne: mu matuku a Nsabatu bakuidi mu ntempelo badi banyanga Nsabatu  ne bashala kabayi ne dipila anyi?” Uvua usua kuamba ne: nansha dituku dia Nsabatu, bakuidi bavua bashipa nyama ya kulambula ne benza midimu mikuabu ku ntempelo. Yezu wakamba ne: “Kadi ndi nnuambila ne: tshidi tshinene kupita ntempelo tshidi muaba eu.”​—Matayi 12:5, 6; Nomba 28:9.

Yezu wakatela kabidi mêyi a mu Mifundu bua kumvuija lungenyi luende, wamba ne: “Bu nuenu bumvue tshidi mêyi aa umvuija: ‘Ndi musue luse, tshiena musue mulambu,’ kanuvua mua kupisha bantu badi kabayi ne dipila to.” Wakajikija ne: “Bualu Muana wa muntu udi Mukalenge wa Nsabatu.” Yezu wakakula bua bukokeshi bua Bukalenge buende bua ditalala bua bidimu tshinunu buvua bulua.​—Matayi 12:7, 8; Hoshea 6:6.

Bantu mbakenge mutantshi mule ku bupika bukole bua Satana, ne tshikisu ne mvita bienda anu bivula. Nebikale bishilangane bikole mu bukokeshi bua Nsabatu munene bua Kristo, watupesha tshikondo tshia dikisha tshitudi tujinga ne muoyo mujima ne tukeba!