Mu mudimu wende wa diyisha, Yezu uvua misangu ya bungi uleja mudi budipuekeshi ne mushinga. (Luka 14:8-11) Uvua ne dijinga dikole dia kupeta bantu balume ne bakaji bavua basue kuenzela Nzambi mudimu ne budipuekeshi. Too ne dîba adi bamue ba kudibu batshivua bamanyike bu benji ba mpekatu banene.

Bafalese ne bafundi bavua bamone ne: bantu abu, tuamba ne: bavuabu bamona bu bantu bavua kabayi ne mushinga, bavua bakokibue kudi Yezu ne mukenji wende. Bakadiabakena ne: “Muntu eu udi wakidila benji ba mpekatu ne udia nabu.” (Luka 15:2) Bafalese ne bafundi bavua badimona ku mutu kua bantu ne bavua bamona bantu bonso aba bu lupuishi lua muinshi mua makasa abu. Bua kuleja dipetu divuabu nadi bua bantu aba, bamfumu aba bakenza mudimu ne miaku ya mu tshiena Ebelu eyi: ‛am ha·’aʹrets idi yumvuija ne: “bena ditunga [buloba]” bua kuakula bua bualu buabu.

Kadi Yezu uvua wenzela bantu bonso malu ne kanemu, bulenga, ne luse. Ke bua tshinyi bena bupuekele ba bungi kusangisha ne bamue bantu bavua bamanyike bu benji ba mpekatu bavua basue kumuteleja bikole. Kadi ntshinyi tshivua Yezu mumvue ne muenze pavuabu bamuamba bua muvuaye wambuluisha bena bupuekele aba?

Diandamuna didi dimueneka patoke padiye ufila tshilejilu tshidi tshilenga ku muoyo tshivua tshifuanangane ne tshikavuaye mufile kumpala mu Kapênuma. (Matayi 18:12-14) Yezu udi uleja malu bu ne: Bafalese mbantu bakane ne badi mu bukubi mu tshisumbu tshia mikoko ya Nzambi. Kadi badi baleja bena bupuekele bu bantu badi bapambuke ne bajimine. Yezu udi wamba ne:

“Mmuntu kayi wa munkatshi muenu udi ne mikoko lukama udi, padiye ujimija umue wa kudiyi, kayi ushiya 99 mu tshipela wenda ukeba udi mujimine too ne padiye uwupeta? Padiye uwupeta, udi uwuteka pa makaya ende ne usanka. Padiye ufika kuende, udi ubikila balunda bende ne bena mutumba nende, ubambila ne: ‘Nusanke nanyi, bualu ndi mupete mukoko wanyi uvua mujimine.’”​—Luka 15:4-6.

Udi ufila dilongesha kayi? Udi umvuija ne: “Ndi nnuambila ne: mu mushindu wa muomumue, disanka dinene nedikale mu diulu bua muenji wa mpekatu umue udi unyingalala bua mpekatu yende kupita bua bantu bakane 99 badi kabayi ne bualu bua kunyingalala bua mpekatu yabu.”​—Luka 15:7.

Bualu bua dinyingalala dia mpekatu buvua Yezu muakule ebu buvua mua kuikala bulenge Bafalese bikole ku muoyo. Bavua badiangata bu bakane ne badimona kabayi benzejibue bua kunyingalala. Pavua bamue ba kudibu bakule bibi bua muvua Yezu mudie ne balambuishi ba bitadi ne benji ba mpekatu bidimu bishale, wakandamuna ne: “Tshivua  mulue bua kubikila bantu bakane, kadi mbua kubikila benji ba mpekatu.” (Mâko 2:15-17) Bafalese bavua badimona bakane aba kabavua bamona ne: bivua bikengela kunyingalala to, nunku kakuvua disanka mu diulu to. Mbishilangane ne patu benji ba mpekatu banyingalala ne muoyo mujima.

Bua Yezu kushindika lungenyi luende lua ne: padi benji ba mpekatu banyingalala kudi disanka dia bungi mu diulu, wakafila tshilejilu tshikuabu tshia nsombelu wa dîku wamba ne: “Mmukaji kayi udi ne makuta a binjanja dikumi bia drakma, yeye mujimije drakma umue, kayi utemesha muendu, ukomba mu nzubu muende ne ukeba bimpe bimpe too ne padiye umupeta? Padiye umupeta, udi ubikila balunda bende ne bena mutumba nende, wamba ne: ‘Nusanke nanyi, bualu ndi mupete dikuta dianyi dia tshinjanja tshia drakma dimvua mujimije.’”​—Luka 15:8, 9.

Dilongesha didi Yezu ufila didi dipetangana ne dikavuaye mufile mu tshilejilu tshikuabu tshia mukoko mujimine. Udi wamba mpindieu ne: “Bia muomumue, ndi nnuambila ne: disanka didi munkatshi mua banjelu ba Nzambi bua muenji wa mpekatu umue udi unyingalala bua mpekatu yende.”​—Luka 15:10.

Mona ne: banjelu badi basanka bikole padi benji ba mpekatu banyingalala! Bualu ebu budi ne mushinga wa pa buawu, bualu benji ba mpekatu badi banyingalala ne bapeta muaba mu Bukalenge bua Nzambi budi mu diulu nebapete muaba mubandile kupita too ne wa banjelu bine! (1 Kolinto 6:2, 3) Kadi banjelu kabatu bumvua mukawu to. Nunku tudi ne bua kumvua mushindu kayi padi muenji wa mpekatu upingana kudi Nzambi ne unyingalala ne muoyo mujima?