UDIKU mumanye bamue bana batu basue kudiela mulu ne kumuenena bakuabu ku makanda adibu nau anyi?​— Utuku musue kuikala pamue ne bana ba mushindu au anyi? Peshi utu musue kuikala pamue ne muntu wa malu malenga udi musue bupole anyi?​— Mulongeshi Munene wakamba ne: “Ba diakalenga mbakebi ba bupole, bualu nebababikile [ne:] bana ba [Nzambi].”​—Matayo 5:9, MMM.

Kadi misangu mikuabu bantu batu benza malu adi atufikisha munda. Ki mmuomu anyi?​— Nanku tudi mua kukeba bua kudisombuela. Umue musangu bualu ebu buakenzekela bayidi ba Yezu pavuabu mu luendu ne Yezu batangile ku Yelushalema. Teleja nkulondele bualu abu.

Pakavuabu bende mutantshi, Yezu wakatuma kumpala bayidi bende bakuabu bua kuyabu mu musoko kampanda wa mu Samalea bua kukebabu muaba wa buobu kuikishila. Kadi bantu ba kuine aku kabavua basue bua Yezu ne bayidi bende basombe kuabu to, bualu  bena Samalea bavua ne tshiabu tshitendelelu. Nenku kabavua banange muntu yonso uvua wenza luendu uya mu musoko wa Yelushalema bua kutendelela to.

Bu bualu ebu buikale bukuenzekele wewe, uvua mua kuenza tshinyi? Bivua mua kukuenza tshiji anyi? Uvua mua kukeba bua kudisombuela anyi?​— Ke tshivua bayidi babidi aba: Yakobo ne Yone basue kuenza. Bakambila Yezu ne: ‘Udi musue tubikidishe kapia ka mu diulu kapueke bua kubabutula anyi?’ Kabiena bikemesha bua muvua Yezu mubinyike ne: Bana ba mukungulu wa mvula! Kadi Yezu wakabambila ne: Kabivua bimpe bua kuenzela bantu malu a nanku to.​—Luka 9:51-56; Mâko 3:17.

Bulelela bantu badi mua kutuenzela malu mabi ku misangu. Bana bakuabu badi mua kutubengela bua tuetu kunaya nabu. Badi mene mua kuamba ne: “Katuena basue bua wewe ulue muaba utudi to.” Padi bualu bua nunku buenzeka, bidi mua kutubungamija bikole, ki mmuomu anyi? Tudi mua kumvua muoyo utuambila bua kuenza bualu kampanda bua kudisombuela. Kadi bidiku bikengela kuenza nanku anyi?​—

Angataku Bible webe. Tuye mu Nsumuinu nshapita wa 24, mvese wa 29. Badi bambamu nunku: ‘Kuambi ne: Nemmuenzele bu mudiye mungenzele; nempingajile muntu eu difutu diakanangane ne bienzedi biende.’

Bidi biumvuija tshinyi buebe wewe?​— Bidi biumvuija ne: katuena ne bua kukeba bua kudisombuela to. Katuena ne bua kuenzela muntu malu mabi anu bualu yeye pende uvua mutuenzele malu mabi to. Kadi udi mua kuenza tshinyi bikala muntu ukubunda mvita? Udi mua kukeba bua kukuamba mêyi mabi bua kukufikisha tshiji. Udi mua kutuadija kukuseka ukuamba ne: udi muena buôwa. Udi ukubikila ne: udi mutebelele. Newenze tshinyi? Neuditue mudiye e kutuadija nende mvita anyi?​—

Tumone kabidi tshidi Bible wamba. Bulula mu Matayo nshapita 5, mvese wa 39 (MMM). Yezu udi wambamu ne: “Lekelayi kuluisha muntu udi unuenzela bibi. Muntu mukutape dipi ku ditama dia balume, umupe ditama dikuabo kabidi.” Udi wela meji ne: Yezu uvua usua kuamba tshinyi muaba eu? Uvuaku usua kuamba ne: padi muntu ukukuma dinkomo  ku ditama dimue, nenku udi ne bua kumulekela ukukuma kabidi dinkomo ku ditama dikuabu anyi?​—

Tòo, Yezu kavua musue kuamba nanku to. Dipi kadiena mumue ne dinkomo dikuma muntu to. Didi anu bu kusakila muntu. Muntu udi mua kukutapa dipi bua kukubunda mvita. Udi ukeba bua ufike munda. Kadi paudi ufika munda ne umusakila pebe, ntshinyi tshidi tshienzeka?​— Nenufike ku diluangana mvita.

Yezu kavua musue bua bayidi bende baluangane mvita to. Nanku wakamba ne: padi muntu ututapa dipi, katuena ne bua kumupingajila to. Katuena ne bua kufika tshiji ne kubundula mvita nansha. Tuetu benze nanku, tudi tuleja ne: tudi petu ne lungenyi lumue ne lua mukuetu udi mutuadije mvita au.

Padi tshimvundu tshijuka, udi wela meji ne: ntshinyi tshidi tshiakanyine bua kuenza?​— Mbimpe kumbuka muaba au. Muntu mukuabu udi  mua kukusakila misangu ndambu. Kadi nebijikile anu pine apu. Paudi umuka muaba au, ki mbuena kuamba ne: udi mupange bukole to. Mbuena kuamba ne: udi mukole mu malu adi makane.

Kadi biobi bienzeke ne: udi mufike ku diluangana ne mutshimune unuvua baluangane nende? Ntshinyi tshidi mua kuenzeka pashishe?​— Muana uudi mukume au udi mua kulua ne balunda bende bakuabu. Badi nansha mua kukutapa ne mutshi munene peshi ne kela. Nunku udi mumvue mpindieu tshivua Yezu kayi musuile bua tuluangane mvita anyi?​—

Tudi mua kuenza tshinyi tuetu bamone bantu baluangana mvita? Tudi mua kutua ku tshia umue ta ku tshia mukuabu anyi?​— Bible udi utuambila tshidi tshimpe kuenza. Bulula mu Nsumuinu nshapita wa 26, mvese wa 17. Udi wamba ne: ‘Udi upita mu njila, ubuela mu matandu adi kaayi bua bualu buende, udi bu muntu udi ukuata mbua ku matshi.’

Ntshinyi tshidi mua kuenzeka wewe mukuate mbua ku matshi bikole? Bidi mua kusama mbua ne yeye kukusumaye, ki mmuomu anyi? Padi eku mbua wenza muende muonso bua kutuka mu bianza biebe, nebikukolele bua kushala mumukuate ku matshi ne kabidi nebimuenze luonji lua bungi. Wewe anu mumulekelele, udi nansha mua kukusuma bibi. Kadi udi mua kushala katshia anu wamukuata ku matshi anyi?​—

Ke mushindu utudi mua kudikebela bilumbu patudi tubuelakana mu mvita ya bantu bakuabu. Tudi mua kuikala katuyi bamanye uvua mutuadije mine mvita ayi anyi katuyi bamanye tshivuabu baluangane mvita ayi. Badi  mua kuikala bakuma muntu pamuapa bualu mmuibe tshintu tshia bende. Tuetu bamubuelele mu mvita, tudi mua kuikala tuambuluisha muivi. Abi kabiakuikala bimpe to, ki mmuomu anyi?

Nanku, tshiudi mua kuenza ntshinyi paudi umona bantu baluangana mvita?​— Padibi mu kalasa, udi mua kunyema lubilu kuya kuambila mulongeshi. Padibi kule ne kalasa, udi mua kubikila muledi webe anyi mpulushi udi muaba au. Bushuwa, nansha padi bantu bakuabu bakeba bua kuluangana, tuetu tudi ne bua kukeba ditalala.

Bayidi balelela ba Yezu badi benza muabu muonso bua kuepuka diluangana mvita. Patudi tuenza nunku, bulelela tudi tuleja ne: tudi bakole mu malu makane. Bible udi uleja ne: muyidi wa Yezu ‘kena ne bua kutandangana, kadi ikale ne kalolo kudi bantu bonso.’​—2 Timote 2:24.