TSHIENA-BUALU TSHINENE: BUA TSHINYI MAKENGA BUNGI NUNKU? NDÎBA KAYI DIAJIKAWU?
Badi bashipa bantu ba bungi badi kabayi ne bualu
Muana mukuabu diende Noelle uvua muana muimpe ne uvua munange kuzola. Dilolo dikuabu uvua wendakana ku mfundu kua nzubu wabu ne kuselemukaye e kudina mu dijiba dia mâyi a kuowela. Muana eu wakafua mbingu ibidi kumpala kua kuenzaye mufikilu wa tshidimu tshiende tshinayi.
Charlotte, Daniel, Olivia, Josephine . . . ngamue a ku mêna a bana ba bidimu 26 anyi 27 bavua bafue munkatshi mua bantu 26 bavuabu bashipe ku tshingoma mu tulasa tua mu Connecticut mu États-Unis mu dia 14/12/2012. Mu madilu a bana aba, Mukalenge Obama wakatela mêna a bana aba ne kuambila bantu bavua babungame muaba awu ne: “Malu a mushindu eu adi ne bua kujika.”
Bano uvua ne bidimu 18 wakumbuka mu ditunga dia Irak mu 1996 ne kuyaye kusomba ne bena mu dîku diabu mu ditunga dia Norvège. Balunda bende bavua bamubikila ne: Sun Rays dîna diende dia bilele. Bia dibungama mu dia 22/7/2011, Bano wakafua pende munkatshi mua bantu 77 bavuabu bashipe kudi ntomboji mukuabu. Ntomboji eu wakamba ne lutambishi luonso ne: “Ndi ndomba luse . . . tshivua mumanye ne: nenshipe bantu ba bungi nunku to.”
Malu mabi a mushindu eu adi atungunuka ne kuenzeka bikole pa buloba bujima. Elabi meji ku kanyinganyina ne dibungama bidi nabi bantu badi batuilangana ne njiwu, malu a tshikisu, mvita, tshinyangu, bikumina ne malu makuabu mabi. Nunku badi bashipa bantu ba bungi badi kabayi benze bualu ne babakengesha kabayi ne tshidibu benze!
Bamue bantu badi babanda Nzambi bela meji ne: Mufuki wetu kena utabalela bantu to. Bakuabu badi bafika too ne ku diamba ne: Nzambi udi umona mutudi tukenga, kadi ki mmusue kutuambuluisha to. Banga pabu badi bamba ne: malu mabi a mushindu eu mmadianjila kulongolola kudi Nzambi. Bantu badi anu ne bia bungi bia kuamba bua tshilumbu etshi. Nkuepi kutudi mua kupeta mandamuna mimpe ne majalame? Mu biena-bualu bidi bilonda, netutangile mu Bible Dîyi dia Nzambi bua kupeta mandamuna a tshidi tshikebesha makenga ne mushindu wikalawu mua kujika.
