Tudiku mua kumvua Bible anyi?

“Mu dîku dietu tuvua ne tshibidilu tshia kubala Bible mu Dia lumingu dionso. Kabivua bitamba kunsankisha to. Mvua mumanye ne: Bible mmukanda wa Nzambi, kadi tshivua ngumvua malu a bungi amvua mbala to.”​—Tatu Steven wa mu Grande Bretagne.

“Pamvua ne bidimu 17, ngakateta bua kulaba Bible. Bu mumvua tshiyi ngumvua malu adimu, meme kulekela.”​—Mamu Valvanera wa mu Espagne.

“Ngakabala Bible musangu umue bualu mvua mumanye ne: muena Katolike yonso udi ne bua kumubala. Ngakabala Bible mujima mu bidimu bisatu! Kadi tshivua mumvue bualu bua nsongo to.”​—Mamu Jo-Anne wa mu Australie.

BIBLE ke mukanda udi mutangalake bikole pa buloba. Mmukanda udibu bapatule bikole kupita mikanda mikuabu yonso, ne bantu ba bungi badi mua kuupeta, udi mu miakulu ya bungi ne mbaupatule kabidi pa mikaba ya kuteleja ne pa matadi a mishindu ya bungi. Nanku, bantu ba bungi badi ne Bible kabatu bamumvua to. Ke mudibi kabidi buebe wewe anyi?

Nzambi mmusue bua tumvue Dîyi diende anyi?

Bible udi wamba ne: ‘Dîyi dionso dia mu Mukanda wa Nzambi didi difume munda mua Nzambi.’ (2 Timote 3:16) Yehowa Nzambi ke muena Bible. Mmusue bua tuetu kumvua Dîyi diende anyi? Peshi mmufundishe malu makole mu Bible ku bukole bua kupangisha bantu ba bungi bua kumumvua kadi anu bantu bakese bu mudi bampasata ne balongi ba Bible bua kumvuabu anyi?

Tuanjayi kutangila tshidi mvese ya mu Bible eyi yamba:

‘Bualu bua mikenji eyi ingakunuambila lelu kayena minupite bukole bua nuenu kuyenza; kayena kule.’​—Dutelonome 30:11.

“Padi muaku webe udileja, udi ufila bujinguludi, nansha bena meji makese badi baumvua.”​—Musambu wa 119:130, MMM.

‘Pa dîba adi mene [Yezu] wakasanka mu nyuma muimpe, wakamba ne: Tatu wanyi, Mukalenge wa diulu ne wa buloba, ndi nkusakidila bua wewe wakusokoka bena meji ne bena budimu malu aa, wakuasokolola kudi bana bakese; bulelela, Tatu, bua bualu ebu buakadi buimpe ku mêsu kuebe.’​—Luka 10:21.

Bushuwa, muena Bible mmusue bua wewe kumvua Dîyi diende! Kadi nansha nanku, bantu ba bungi kabena bumvua malu adi mu Bible to. Ntshinyi tshidi mua kubambuluisha? Biena-bualu bidi bilonda nebileje malu asatu adi mua kukuambuluisha bua wewe kumvua Bible bimpe.