Bualu bua Mvula wa kabutu ne Noa mbulelela anyi mmuanu?

UTUKU ujinga kudimona muaba muimpe udi bantu bonso mu ditalala kakuyi mvita, kakuyi dibunda dia bibawu anyi dikengeshangana anyi? Wewe musue malu aa, kudi muyiki mukuabu wa malu a kale utu bantu bamanye bikole udi mua kukukolesha. Mmuyiki wa Noa, muntu muimpe wakenza buatu buakamupandisha yeye ne dîku diende ku mvula mubi wakabutula bantu babi pa buloba bujima.

Mianu itu bantu ba bungi batambe kumanya itu anu mikese. Muyiki wa Noa udi mu Bible mu mukanda wa Genese nshapita 6 too ne ku wa 9, ne mmulonda kabidi mu mukanda wa Koran (wa bamizilma) ne mu mianu ya bantu ba bisamba kabukabu bia buloba bujima. Kadi Mvula wa kabutu uvua muloke bulelela anyi peshi ntshilejilu patupu bua kusaka bantu ku dienza malu makane? Balongi ba malu a bitendelelu ne bena siyanse bakadi bakokangane bua bualu ebu bidimu bungi tshianana. Kadi Bible, Dîyi dia Nzambi ki ndishiya bualu ne mpata mu tshilumbu etshi to, muyiki eu mbualu buenzeke, ki mbualu bufuikakaja anyi muanu to. Mona malu adi aleja mudi bualu ebu bulelela:

Mukanda wa Genese udi utuambila tshidimu tshisunguluke, ne ngondo ne dituku divua Mvula wa kabutu mutuadije, ne dîba ne muaba uvua buatu butudile, kabidi ne dîba divua mâyi makama pa buloba. Malu adiwu wakula bua buatu adi kabidi malelela pa bidi bitangila bunene ne bule buabu ne bintu bivua bienza nabi buatu abu. Pabi, mianu itu anu yakula malu adi kaayi mamanya dîba dijalame divuawu menzeke to.

Mikanda ibidi ya mu Bible idi yakula bua ndelanganyi ya bantu bakale idi ijadika ne: Noa uvua muntu wa muoyo. (1 Kulondolola 1:4; Luka 3:36) Ezela ne Luka bavua bafunde mulongolongo wa ndelanganyi eyi bavua benze mukebulula ne muoyo mujima. Luka uvua mufunde mulongo wa ndelanganyi ya Yezu too ne ku Noa.

Muprofete Yeshaya ne Yehezekele bavua bakule bua Noa anyi bua Mvula wa kabutu nansha bapostolo ba Yezu bu mudi Paulo ne Petelo bavua pabu bakule bua bualu ebu.​—Yeshaya 54:9; Yehezekele 14:14, 20; Ebelu 11:7; 1 Petelo 3:19, 20; 2 Petelo 2:5.

Yezu Kristo wakakula bua Mvula au wamba ne: ‘Bualu bua matuku a Muana wa muntu nebuikale bu muakadibu mu matuku a Noa. Bakadi badia, bakadi banua, bakadi babaka, bakadi babakibua too ne pakalua dituku diakabuela Noa mu buatu bunene, pakalua mâyi a bungi, pakafuabu buonso buabu.’ (Luka 17:26, 27) Bikalabi ne: Mvula wa kabutu kavua muloke, nanku tshivua Yezu muambe bua ‘matuku a Muana wa muntu’ tshidi tshilua tshianana’s!

Mupostolo Petelo uvua mudianjile kuamba bua “baseki” bavua mua kupetula bidi Bible wamba. Wakafunda ne: ‘Bua bobu badi basue kupua muoyo bua bualu ebu ne: buloba abu buakadiku mu tshikondo tshia Noa buakabuikidibua ne mâyi, buakajimina.’ Tuetu petu, tudiku basue kupua muoyo “bualu ebu” anyi? Kabituenzekedi to! Petelo wakatungunuka wamba ne: ‘Diulu didiku katataka ne buloba kabidi biakabutshidibua bua kapia ne kapia bilamibue too ne ku dituku dia dilumbulula ne dia dibutuka dia bantu badi babenga Nzambi.’​—2 Petelo 3:3-7.

Nzambi neabutule tshia kabidi bantu babi, ne nekuikala tshia kabidi bantu bapanduka. Tuetu bidikije tshilejilu tshia Noa, tudi petu mua kuikala munkatshi mua bantu bakane bapanduke ne kubuela mu buloba buimpe.