YEZU KRISTO wakamba ne: “Ndaku kuenu kudi bana benu, ubalondele malu onso adi Yehowa mukuenzele ne luse ludiye mukuleje.” Tshikondo atshi uvua pamuapa mu Gelasa, ku Sud Est kua mbuu wa Galela, uyukila ne muntu uvua musue kulua muyidi wende. Mêyi a Yezu adi aleja ne: uvua mumanye dijinga ditu bantu nadi dia kuambila balela babu malu adi abasankisha ne adi ne mushinga.​—Mâko 5:19.

Ke mushindu utu bantu lelu kabidi, nansha mutubi bitamba kuenzeka mu imue miaba kupita mikuabu. Nunku, padi muntu ulua mutendeledi wa Yehowa, Nzambi mulelela, utu musue kuambila balela bende malu mapiamapia adiye muitabuje. Kadi mmunyi mudiye mua kuenza nanku? Mmunyi mudiye mua kulenga mioyo ya balela bende badi mu bitendelelu bikuabu anyi mene kabayi batendelela? Bible udi ufila mibelu mimpe ne mijalame.

Mu bidimu lukama bia kumpala, Andele uvua umue wa ku bantu ba kumpala bavua bamone Yezu ne bamanye ne: yeye ke Masiya. Nnganyi uvuaye muambile diakamue bualu ebu? Andele “Wakanji kumona muanabu Simona, kumuambilaye ne: ‘Tudi bamone Masiya’ (padibu bakudimuna muaku eu udi umvuija ne: ‘Kristo’).” Andele wakaya ne Petelo kudi Yezu, nunku wakamupetesha diakalenga dia kuluaye umue wa ku bayidi ba Yezu.​—Yone 1:35-42.

Bidimu bitue ku bisambombo pashishe, pavua Petelo musombele mu Yopa, bakamulomba bua kuya ku Nord mu Kaisaliya bua kumona bena mu nzubu mua Kôneliyo mfumu wa basalayi. Petelo wakasangana banganyi mu nzubu? Bible udi wamba ne: ‘Kôneliyo uvua mubindile (Petelo ne bavuaye muenze nabu luendu) ne ukavua mubikidishe balela bende ne balunda bende ba pa muoyo.’ Nunku, Kôneliyo wakapetesha balela bende diakalenga dia  kutejabu Petelo ne kuangata dipangadika bilondeshile malu avuabu bumvue.​—Bien. 10:22-33.

Ndilongesha kayi ditudi tupetela ku mushindu uvua Andele ne Kôneliyo benzele balela babu malu?

Andele anyi Kôneliyo, kabavua balekele bua malu enzeke mu mpukapuka to. Andele wakadiyila ne Petelo kudi Yezu, ne Kôneliyo wakalongolola malu bua balela bende bumvue bivua Petelo ne bua kuamba. Kadi Andele ne Kôneliyo kabavua benzeje balela babu malu ku bukole peshi batete muinshi muinshi bua kubasaka bua kuluabu bayidi ba Kristo to. Udiku mumone dilongesha mu bualu ebu anyi? Mbimpe tuenze bia muomumue. Tudi mua kuikala ne mushindu wa kuambila balela betu malu kampanda ne wa kukeba mpunga ya bobu kupeta bulelela bua mu Bible ne kupetangana ne bena Kristo netu. Kadi, tudi tunemeka budikadidi buabu bua kudisunguila malu ne tubenga kubenzeja malu ku bukole mu mushindu mubi. Tuangate tshilejilu tshia Jürgen ne mukajende Petra ba mu Allemagne bua kumona mutudi mua kuambuluisha balela betu.

Petra wakalonga Bible ne Bantemu ba Yehowa ne kutambulaye. Bayende Jürgen uvua mfumu wa basalayi. Ku ntuadijilu, Jürgen kavua usanka bua dipangadika dia mukajende to. Kadi mu bungi bua matuku, wakamona ne: Bantemu ba Yehowa bavua balongesha bulelela bua mu Bible. Yeye pende wakadilambula kudi Yehowa ne lelu udi mukulu mu tshisumbu tshiabu. Mmubelu kayi udiye upesha bantu lelu bua bidi bitangila kulenga muoyo wa mulela udi kayi ne ditabuja dimue netu?

Jürgen udi wamba ne: “Katuena ne bua kuenzeja balela betu malu ku bukole ne kubatshiokesha ne malu a mu Bible to. Kuenza nanku kudi mua kukolesha dipangadika diabu adi. Mu bungi bua matuku, bidi mua kuikala bimpe kumuambila malu ku kakese ku kakese ne budimu. Tudi kabidi mua kutuangaja balela betu ne bena Kristo badi ne nsombelu wa buena wabu ne banange malu a buena abu. Kuenza nunku kudi mua kubambuluisha.”

Mupostolo Petelo ne balela ba Kôneliyo bakitaba mukenji wa mu Bible ne lukasa. Mu bidimu lukama bia kumpala, bivua bilombe bantu bakuabu bavua bapete bulelela matuku a bungi bua kuangatabu dipangadika.

Bamue balela ba Yezu bakamuitabuja pavuaye uyisha. Tshilejilu, bidi bimueneka ne: mupostolo Yakobo ne Yone bavua bana babu ne Yezu, ne mamuabu Salome uvua muanabu ne mamuende wa Yezu. Uvua mua kuikala umue wa ku ‘bakaji bakuabu ba bungi bavua bambuluisha [Yezu ne bapostolo] ne bintu biabu.’​—Luka 8:1-3.

Kadi, bantu bakuabu ba mu dîku dia ba Yezu kabakamuitabuja diakamue to. Tshilejilu, musangu kampanda panyima pa tshidimu tshijima Yezu mumane kutambula, musumba wa bantu uvua mudisangishe mu nzubu bua kumuteleja. “Kadi pakumvua bana babu tshivua tshienzeke, bakaya bua kumukuata, bualu bavua bamba ne: ‘Mmujimije lungenyi.’” Panyima pa matuku, pavua bana babu ne Yezu bajinga kumanya kuvuaye mulongolole bua kuya, kakabandamuna buludiludi to. Bua tshinyi? Bualu “bana babu kabavua baleja ditabuja kudiye to.”​—Mâko 3:21; Yone 7:5.

Ndilongesha kayi ditudi tupetela ku mushindu uvua Yezu muenzele balela bende malu? Kavua mufiike munda pavuabu bamuembe ne: mmujimije lungenyi to. Nansha panyima pa lufu luende ne dibishibua diende, wakakankamija kabidi balela bende pakamuenekelaye muanabu Yakobo. Bidi bimueneka  ne: dimuenekela Yakobo edi divua diamuambuluishe yeye ne bana babu ne Yezu bakuabu bua kushindikabu ne: uvua bushuwa Masiya. Nunku, bavua ne bapostolo ne bantu bakuabu mu nzubu wa kuulu wa mu Yelushalema ne bavua bushuwa bapete nyuma muimpe. Pakapita matuku Yakobo ne Yuda, uvua pende muanabu ne Yezu bakapeta kabidi midimu ya pa buayi.​—Bien. 1:12-14; 2:1-4; 1 Kol. 15:7.

Anu bu mu bidimu lukama bia kumpala, lelu bamue balela ba muntu batu dijinga ne tshikondo tshile kumpala kua kubuelabu mu njila udi ufikisha ku muoyo. Tuangate tshilejilu tshia Roswitha, uvua muena Katolike pavua bayende mutambule ne mulue Ntemu wa Yehowa mu 1978. Bu muvua Roswitha munange malu avuaye witabuja, kavua musue malu avua bayende witaba to. Kadi panyima pa matuku, wakatuadija kuitaba ne kuluaye kumona ne: Bantemu ba Yehowa bavua balongesha bulelela. Mu 2003 yeye pende wakatambula. Tshivua tshimusake bua kushintuluka ntshinyi? Pamutu pa bayende wa Roswitha kumvua bibi bua buluishi buvuaye muleje kumpala, wakamushila mpunga wa kushintulula lungenyi luende. Mmubelu kayi udi mamu eu ufila? Udi wamba ne: “Malu a bungi adi mua kukumbana koku lutulu, lutulu lua bungi, lua bungi menemene.”

Monika wakatambula mu 1974, ne bana bende ba balume babidi bakalua Bantemu bidimu bitue ku dikumi pashishe. Nansha muvua bayende Hans kayi ubenga bulelela, wakalua kutambula yeye mu 2006. Ku diambuluisha dia bujinguludi, mmubelu kayi uvua bena mu dîku bafile? “Shala mulamate Yehowa, kuenji malu adi abengangana ne ditabuja dietu to.” Bushuwa, bivua bikengela kujadikila Hans misangu yonso muvuabu bamunange. Bavua anu batekemene ne: ndekelu wa bionso neitabe bulelela.

Umue musangu Yezu wakaleja muvua mukenji wa bulelela muenze bu mâyi adi afila muoyo wa tshiendelele. (Yone 4:13, 14) Tudi basue bua balela betu batalaje mioyo padibu banua mâyi a bulelela adi mimpe ne matoke. Bushuwa, katuena basue kubatshiokesha ne mâyi a bungi musangu umue to. Mushindu utudi tubumvuija bulelela ke udi mua kuenza bua bikale ne mioyo mitalale anyi batshioke. Bible udi wamba ne: “Mutshima wa muntu muakane udi welangana meji a bualu budiye mua kukudimuna” ne kabidi ne: ‘Mutshima wa muena meji udi uyisha mukana muende lungenyi.’ Mmunyi muudi mua kutumikila mubelu eu?​—Nsu. 15:28; 16:23.

Mukaji udi mua kujinga mua kumvuija bayende ditabuja diende. Yeye ‘muelangane meji kumpala kua kuakula,’ neasungule ne budimu mêyi mimpe ne kakuakula ne lukasa to. Kena ne bua kuenza malu bua kuleja ne: yeye ke muakane ne mupite bakuabu to. Ngakuilu wende muimpe udi mua kutalaja bantu mioyo ne kukebesha ditalala. Ndîba kayi didi bayende bimpe ne didibu mua kumukuatshila bualu bipepele? Mmalu kayi atuye musue kuakula anyi kubala? Nga sianse anyi? Nga tshididi anyi? Peshi nga manaya? Mmunyi mudiye mua kukoka ntema ya bayende ku malu a mu Bible eku unemeka mushindu utuye udiumvua anyi wela meji? Kudiela nkonko ya mushindu eu kudi mua kumuambuluisha bua kuakula ne kuenza malu ne meji.

Kumvuija patupu ditabuja dietu mu mushindu muimpe kakuena anu kukumbane bua kulenga mioyo ya bena mu dîku badi kabayi Bantemu to. Bitudi tuamba bidi ne bua kuikala bipetangana ne bikadilu bietu bimpe.

Jürgen utukadi batele udi wamba ne: “Ikala utumikila mikenji ya mu Bible dituku dionso. Eu ke mushindu muimpe wa kubatabuluja ne kubasaka bua bamone bitudi tuenza nansha bobu kabayi batuitaba.” Hans uvua mutambule bidimu bipite pa 30 panyima pa mukajende udi witaba bualu ebu wamba ne: “Bikadilu bimpe bia muena Kristo bidi ne mushinga, bidi mua kusaka mulela bua kumona mudi bulelela bukudimuna nsombelu wetu.” Balela betu badi ne bua kumona ne ditabuja dietu didi dienza bua tuikale bashilangane ne bakuabu, bikale mu mushindu muimpe, kadi ki mmu mushindu mubi to.

Mupostolo Petelo wakapesha bakaji bavua babayabu kabayi bena kuitaja mubelu eu: “Nuenu bakaji nukokele babayenu, bua bikala bakuabu kabayi batumikila dîyi dia Nzambi, bakokibue kakuyi dîyi, bua bikadilu bia bakaji babu, bualu mbadimuene bikadilu bienu bimpe pamue ne kanemu kakole. Didilengeja dienu kadikadi dia pambelu, dia kulukisha nsuki, kuvuala bilenga bia ngolo anyi kuvuala kua bilamba, kadi dikale dia muntu musokome wa  mu muoyo mu didilengeja didi kadiyi dinyanguka dia meji mapole ne a ditalala didi ne mushinga wa bungi ku mêsu kua Nzambi.”​—1 Pet. 3:1-4.

Petelo wakafunda ne: mulume uvua mua kuitaba Dîyi dia Nzambi bua bikadilu bimpe bia mukajende. Bu muvua muanetu wa bakaji kampanda diende Christa mumanye bualu ebu, wakadienzeja bua kulenga mutshima wa bayende ku diambuluisha dia bikadilu bimpe katshia anu watambula mu 1972. Nansha muvua bayende mulonge Bible ne Bantemu musangu kampanda, kakitaba bulelela to. Wakabuela mu bimue bisangilu bia bena Kristo ne kuibidilanganaye bimpe ne bamue bena mu tshisumbu. Bena mu tshisumbu pabu bavua banemeka mmuenenu wende bua adisunguile tshidiye musue. Mmunyi muvua Christa mulenge muoyo wa bayende?

Udi wamba ne: “Mvua ndienzeja bua kushala mu njila uvua Yehowa musue bua meme kuendela. Imue misangu mvua nditatshisha bua kukoka bayanyi ‘kakuyi dîyi’ kadi ku bienzedi bianyi bimpe. Pavuabi kabiyi bibengangana ne mikenji ya mu Bible, mvua ngenza tshionso tshivua tshikengela bua kukumbaja majinga ende. Nunku, mvua nnemeka budikadidi buende ne nteka malu onso mu bianza bia Yehowa.”

Tshilejilu tshia Christa tshidi tshileja mushinga wa kuenza malu bilondeshila nsombelu. Uvua utungunuka ne kukolesha buena Kristo buende, ubuela mu bisangilu bionso ne uyisha bikole. Kadi, uvua ne busunguluji, mumanye ne: bayende uvua dijinga ne dinanga diende, dîba ne dimutabalela. Kuenza malu bilondeshile nsombelu ne kuikala ne busunguluji kudi ne mushinga kudi yonso wa kutudi udi ne balela badi kabayi Bantemu. Bible udi wamba ne: ‘Bualu buonso budi ne dîba diabu.’ Mu dîba emu mudi kabidi edi ditudi tupesha bena mu dîku dietu, nangananga muena dibaka netu udi kayi Ntemu. Dîba ditudi tupitshisha pamue didi diambuluisha bua kuyukidilangana. Malu akadi menzeke adi aleja ne: diyukidilangana dimpe didi dikepesha njiwu ya didiumvua nkaya, mulekelela anyi kumvua mukawu.​—Muam. 3:1.

Holger uvua tatuende mutambule bidimu 20 panyima pa bena mu dîku bakuabu udi wamba ne: “Mbimpe tuleje ne: tudi banange bena mu dîku ne kabidi ne: tudi tusambila bua bualu buabu.” Christa udi usakidila ne: ‘kakulekela kutekemena ne: bayende neangate dipangadika dia kulua ku luseke lua Yehowa ne ndekelu wa bionso kuitaba bulelela to.’ Mushindu utudi tumona balela betu badi kabayi Bantemu udi ne bua kuikala muimpe misangu yonso, uleja mutudi ne ditekemena.

Tshipatshila tshietu ntshia kulama malanda mimpe, kupesha balela betu diakalenga dia kuanyisha bulelela ne kulenga mioyo yabu ku diambuluisha dia mukenji udi mu Bible. Mu malu onso, tudi ne bua kuikala ne “bupole ne kanemu kakole.”​—1 Pet. 3:15.